الاثنين، 29 أغسطس، 2011

حكم القلب ... الحلقة 9

الحلقة 9
اتفاجئت نهى بالصورة والخبر اللى فى الموقع... بالسرعة دى خبر زى ده لحق ينتشر قبل ماترجع البيت
"ردى عليا يانهى ...مش دى انتى"
"ايوه انا"
"معقولة...واحدة بعقلك قدر خالد صفوت يضحك عليكى"
"مضحكش عليا ولا حاجة"
"واضح"
"خالد عايز يتجوزنى"
"تلاقيها لعبة من ألعايبه وبيتحجج لك بأعذار وبعد كده يخلع"
"انا اللى طلبت منه ميستعجلش"
"انتى بتحبيه يانهى"
"بحبه"
"وليه موافقتيش انه يتقدملك بسرعة"
"خايفة... عايزة اتأكد من شعوره قبل اى ارتباط"
"انتى حاسة بايه"
"حاسة انه بيحبنى... وانا كمان بحبه... بس مستنية نتأكد"
"طيب هتعملى ايه لو الاخبار انتشرت والكلام وصل لخالو"
"مش عارفة...انا لازم اكلم خالد اقوله"
واتصلت نهى بخالد
"خالد ازيك"
"ازيك ياحبيبتى..وحشتك صح"
"انت فين"
"مالك يانهى صوتك متغير ليه"
"قولى بس انت فين"
"انا طالع البيت اهو"
"طيب اول ماتدخل افتح موقع جريدة الوسط الفنى"
"فيه ايه"
وصوت مخنوق بالعياط طلع منها
"فيه صورة لينا"
"متقلقيش ياحبيبتى انا هكلمهم يمسحوا الخبر ده باى طريقة ... اطمنى ومتزعليش نفسك"
"طيب كلمنى وعرفنى عملت ايه"

بعد ساعة من القلق والتوتر اتصل بيها خالد
"ايه ياخالد... عملت ايه"
"مقدرتش اخليهم يمسحوا الخبر... والله عملت كل حاجة علشان يشيلوا الخبر بس رئيس التحرير رفض"
"يعنى ايه ... كده اتفضحت"
"فضيحة ايه بس يانهى... اطمنى محدش يعرف انتى مين وكمان وشك مش باين فى الصورة"
"انا عايزة اعرف ازاى بالسرعة دى صورونا ونشروا الخبر"
"الصدفة يانهى ان محرر فى الجريدة شافنا واحنا داخلين...طبعا دخل ورانا وصورنا ونشر قبل مانمشى من المكان"
"انا خايفة الخبر ينتشر ويوصل لبابا"
"حددى معاد مع بابا وانا مستعد اخطبك دلوقتى حالا"
"لا طبعا مينفعش اصحح غلط بغلط"
"ارتباطك بيا غلط"
"مقصدش ياخالد...انا قصدى لما نتأكد من مشاعرنا"
"انا عن نفسى يانهى متاكد من مشاعرى... اتأكدى براحتك من مشاعرك انتى.. وابقى ردى عليا"
"انا متأكدة من مشاعرى "
"اللى هيا؟؟"
"ايه ده انت بتستغل مواقف ولا ايه"
"لا انا بحب ونفسى حبيبتى تقولهالى"
"متستعجلش "
"طيب طمنينى... بتحبينى"
"اشوفك بكرة ياخالد"
"ماشى يا حبى هجيلك اخدك زى النهاردة من نفس المكان"

فات اسبوع بسرعة اووووووى ونهى اخدت على الجو بسرعة وكل الناس حبوها.... خالد اتغير فعلا وبقت حياته من البيت للشغل مع نهى ... كان بيقضى وقته فى البيت على خير العادة... بدأ يحس هو قد ايه كان عايش حياة مفيهاش اى متعة غير لحظية... اما مع وجود نهى فى حياته بدأ يحس بالسعادة النابعة فعلا من القلب... مجرد وجودهم فى مكان واحد كان اقصى سعادة بالنسبة له

خلصت التحضيرات النظرية والمفروض ان نهى راجعة اسماعيلية تانى ...واتحدد معاد بداية التصوير بعد 10 ايام... وهيكون فيه حفلة لبدء التصوير وفيها الصحافة والتليفزيون
اخر يوم اتصل بيها خالد بالليل
"نهى انتى مسافرة"
"ايوه ياخالد حجزت 8 الصبح ان شاءالله"
"هتوحشينى اوى بعد مااتعودت على وجودك جنبى"
"وانت كمان هتوحشنى بس معلش دول 10 ايام وهنرجع نشوف بعض كل يوم تانى"
"يعنى بجد هوحشك"
"طبعا ياخالد... مش حبيبى"
"اخيييييييرا نطقتى يامفترية"
"انا مفترية خلاص ياريتنى ماقلت ولا اتكلمت"
"انا كل لحظة بستنى تقولى فيها انك بتحبينى.. مع انى كنت حاسسها بس كنت محتاج اتأكد"
"ماهو انت لو مكنتش حسيت تبقى غبى"
"ذوق ذوق يانهى ورومانسية كمان"
"انت بتتريق"
"ازاى معقول اتريق...انتى بتقولى غبى واحنا عمالين نقول حب واحساس"
"يعنى ياخالد عمالة اقابلك واروح واجى معاك وماشية ورا قلبى بس ومن غير خوف ومش عايزة افكر لو اهلى عرفوا ممكن يحصل ايه يبقى كل ده مش بحبك... ياغبى"
"انا بقى بموووووت فيكى ومش عايز ابعد عنك لحظة ... بقولك ايه تيجى نتجوز دلوقتى"
"مجنون مجنون... انا عايزة انام علشان مسافرة كمان 5 ساعات"
"مجنون بيكى يامجننانى"
"ماشى يامجنون...سلام بقى "
"ماتكلمى باباكى فى الاجازة دى"
"لا ياخالد انا عارفة بابا... نستنى شوية لاحسن يعند وميخلينيش اجى التصوير"
"طيب خلاص... انتى هتيجى على الحفلة ولا امتى"
"لا قبلها بيوم ان شاءالله...وبعدين احنا مع بعض ع التليفون اى جديد هقولك عليه"
"اوك ياحبيبتى تصبحى على خير"

نزلت نهى وركبت تاكسى لحد السوبر جيت
هناك... شافت عربية خالد
"ايه ده؟؟؟ افرضى الاتوبيس طلع من غيرك كنتى عملتى ايه"
"انت ايه اللى جابك هنا"
"مقدرتش اسيبك تسافرى لوحدك... جيت ألحقك علشان اوصلك"
"توصلنى فين"
"لحد بيتك وانا اقدر اسيبك لوحدك ابد... اتفضلى يااميرة"
"اميرة مين"
"اركبى ياشيخة فصلتينى"

هناك 11 تعليقًا:

  1. ربنا يستر و الوضع ما يتطورش
    بس معرفش ليه حاسه إنك مخبية شوية مشاكل :)
    مستنية الجديد

    ردحذف
  2. ندى
    هههههه مفقوسة انا ولا ايه؟؟
    زلا اتعودتوا فى قصصى على المشاكل
    هههههههههه عموما اكيد هتبقى مشاكل خفيفة لان القصة عامة جوها خفيف ... اتنكدتوا معايا كتير"
    ومش عايزة انكد عليكوا فى ايام العيد
    كل سنة وانتى طيبة

    ردحذف
  3. ههههههههههههههه عجبنى اوى ناقر ونقير بس عسل اوى ههههههههههههههههههه
    سلمى

    ردحذف
  4. سلمى
    ههههههههههههه انتى الاعسل يا سكرة

    ردحذف
  5. دينا
    و أنت طيبة و يا رب عيد سعيد علينا كلنا إن شاء الله

    و يا رب المشاكل تفضل خفيفة فى القصة بس أصلا مهما عملنا صعب الواحد يتعود فى قصصك ع حاجة عشان كلها مختلفة عن التانية...أه هم كلهم نهاية سعيدة و ديه أكتر حاجة عجبانى بس فى كل مرة المشاكل بتتحل بطريقة غير المتوقعة و جميلة و غير القصص اللى قبلها

    ردحذف
  6. ندى
    ميرسى ياحبيبتى كلامك ده اسعدنى كتيييييييير
    ويارب متزهقوش من القصص وكل قصة تعجبكم ان شاءالله

    ردحذف
  7. gamda ya dina
    bs ana shayfa en 5aled mish hay3melaha 7aga
    bs heya momken tet2fesh w heya rakba m3ah :D

    ردحذف
  8. انا حبيييييييييييييييت خالد هههههههههههههه
    لولى

    ردحذف
  9. روياتك كلها اجمل من بعض لدرجة انى حاسة انى بقيت مدمنة

    ردحذف
  10. هههههههههههههههههههههههههههههههههههههه

    جميله فيها احساس وكمان ضحك عامله جو حلو اوى بجد

    وعد العيون

    ردحذف
  11. القصة جميلة يا دينا تسلم ايدك

    ردحذف

قول رأيك بلاش تقرا وتقفل من سكات...ارائكم تهمنى