الاثنين، 12 سبتمبر 2011

آر(R) ... الحلقة 1

الحلقة 1
"رشا..رشا..اصحى الساعة بقت 6ونص"
"طيب يامجدى..هقوم اهو"
"قومى العيال هيتأخروا على المدرسة"
"اووووف بقى زهقت"
"زهقتى من ايه... ماانا بقولك اقعدى فى البيت وانتى اللى ماسكة فى الشغل"
"بقى بذمتك ده وقته للكلام ده عموما هرد عليك نفس الرد بتاع كل مرة..انا متعلمتش وبقيت دكتورة زيك علشان اقعد فى البيت مش كفاية حرمتنى يبقى عندى عيادة زى باقى الناس "
"ماهو ده اللى كان ناقص كمان تبقى فى المستشفى الصبح والعيادة بالليل"
"خلاص بقى يامجدى انا مش هسيب المستشفى ومش بقول عايزة عيادة ارحمنى بقى من الاسطوانة دى"
ومشيت رشا من الاوضة ودخلت اوضة ولادها
"رامز...يالا اصحى... رودى قومى"
وقربت من رامز وشالت الغطا من عليه...وقيمته علشان يدخل الحمام ولما قام قربت من رودينا وشالت الغطا ومسكت ايدها تقيمها
"ايه ده؟؟انتى سخنة كده ليه"
"زورى بيوجعنى يامامى"
"سلامتك ياحبيبتى قومى ادخلى الحمام وانا اديكى دوا هتبقى كويسة بس يالا علشان متتأخريش"
"مش قادرة اقوم"
ودخل مجدى على صوت كلامهم
"فيه ايه"
"رودى سخنة شوية هديها مضاد حيوى وخافض للحرارة وهتبقى كويسة"
"مش قادرة اقوم يابابى"
وقرب مجدى منها وجسها
"البنت تعبانة وانتى عايزاها تروح المدرسة"
"ماهو رامز عنده امتحان ومينفعش يغيب النهاردة علشان يقعد معاها"
"اقعدى انتى مش مامتها"
"مينفعش انا عندى عملية الساعة 9"
"تتأجل..واقعدى ببنتك"
"مينفعش تتأجل لان الولد عنده السكر وما صدقنا اتظبط علشان اعمل العملية"
"طب وبعدين"
"انت ممكن تتأخر شوية... اقعد معاها وانا على الساعة 12 بالكتير اكون هنا"
"بابا خليك معايا"
"حاضر يا حبيبتى... بس متتأخريش يادكتورة لازم انزل قبل 12"

بدأت الحرارة تنزل بعد ما رودينا اخدت الادوية وقعد مجدى معاها وبدأ يلبس الساعة 11ونص ولما جت 12الا ربع ورشا مجتش اتصل بيها
"انتى فين يارشا"
"انا فى المستشفى خلصت اهو"
"يعنى ايه لسه...انا لازم انزل دلوقتى"
"بقولك جاية اهو"
"وانا اعمل ايه دلوقتى"
"هى رودى صاحية"
"ايوه"
"طيب هات اكلمها"
"رودى حبيبة ماما شطورة صح...بابا هينزل ويفتح لك التليفزيون على الكارتون ...وماما شوية وجاية..صح يا شطورة هتقعدى"
"حاضر يامامى"
"هاتى بابى بقى"
"ايوه...هتصرف ازاى انا دلوقتى"
"انزل انت وافتح لها التليفزيون على اى قناة كارتون وانا خلاص خرجت من المستشفى هاخد تاكسى واجى"

لما دخلت رشا البيت...شافت التليفزيون مفتوح ورودينا مش موجودة... دخلت تشوفها فى الاوضة... ملقيتهاش...فى الحمام... فى المطبخ ...فى كل جزء فى البيت...مش موجودة
بدأ القلق يتملك منها حتى لما اتصلت بمجدى وهى بتعيط
"مجدى انت اخدت رودى معاك"
"اخدتها ايه؟؟؟لا طبعا"
"البنت مش موجودة فى البيت"
"يعنى ايه مش موجودة.. انا فتحت لها التليفزيون وقعدتها واطمنت عليها ونزلت...مفيش من نص ساعة"
بدأ صوت عياط رشا يعلا
"مش موجودة خالص فى البيت...هتكون فين يعنى...تعالى يامجدى انا خايفة"
"طيب انا جاى حالا بس حاولى تشوفي ممكن تكون راحت فين"
"انا هخبط على الجيران كلهم يمكن تكون عند حد فيهم"
"طيب اسالى عم مرسى الاول"
"طيب...بس متتأخرش عليا"
وبعد ماقفلت معاه نزلت جرى على مرسى البواب مكنش موجود ومسكت العمارة باب باب تسأل على رودينا...الجيران اللى تعرفهم واللى متعرفهمش وبعد ربع ساعة كان مجدى عندها
وبدأوا يحطوا السيناريوهات المحتملة لاختفاء رودينا واللى ممكن تفكر فيها بنت عندها 5 سنين
يمكن تكون نزلت تشترى اى حاجة؟؟بس ممعهاش فلوس
يمكن نزلت تستنى مامتها فى الشارع؟؟ طيب راحت فين
يمكن يكون حد من الاقارب جه ولما لقاها لوحدها اخدها معاه
ووصلت رشا للانهيار وهى مش عارفة بنتها فين
واتصل مجدى بكل الاقارب والمعارف...ومفيش فايدة
ولما جه رامز من المدرسة وعرف اللى حصل كان طول الوقت قاعد فى حضن مامته وبيعيط
الوقت بيمر ومفيش اى اخبار عن رودينا
البيت كل شوية زوار يطمنوا ويواسوا رشا
مجدى نزل يدور فى المستشفيات والاقسام...ومفيش اى جديد
واول ما مر 24 ساعة عمل محضر غياب
واليوم بيمر ورا التانى ورا التالت ومفيش اى اخبار

فى مكتب المقدم هانى محروس مفتش المباحث
"هانى باشا فيه اشارة جت دلوقتى... بالعثور على جثة طفلة مقتولة وملقاة فى عمارة مهجورة"

هناك 19 تعليقًا:

  1. بجد الحلقة حلوة جدا بس عاوز اعرف اية الى هيحصل بقا انتى كاتبة عظيمة جدا

    ردحذف
  2. هتطلع مش هي حرام تتقتل ف اول المسلسل كده

    بس لسه مافيش تشويق وحوار زوجين تقليدي.. اتمنى نلاقي حاجه مختلفه ف الحلقات الجايه

    ردحذف
  3. men awelha kedaaaaa gossaaaaaa !!!!! ya le3bo ya dina :D:D

    nona

    ردحذف
  4. مادو
    ربنا يخليك
    ويارب القصة تعجبك لحد النهاية
    منتظرة متابعتك ورايك كل يوم ان شاءالله

    ردحذف
  5. توتا
    ان شاءالله الحلقات الجاية تتشوقى
    وهنشوف هى ولا لأ؟؟

    ردحذف
  6. نونا
    ان وجد البوليسية وجدت الجثة ههههههههههه

    ردحذف
  7. من اولها كدا جثه الله عليكي يا استاااااااااااااااااااااااااااااااذه

    ردحذف
  8. جميلة يا دينا شكلها هتبقى جامدة اوى القصة دى

    ردحذف
  9. ايناس
    ههههههه مبنضيعش وقت

    ردحذف
  10. فروتى
    يااااااااارب ياجميل

    ردحذف
  11. اسمى صافى
    والقصة تحفة
    عموما كتاباتك كلها بتعجبنى
    والمرة دى اكتر لانها بوليسية فمختلفة

    ردحذف
  12. بداية مبدأية حلوة و جذبتني و شكلي كدة شكلي هتابعها :):)

    ردحذف
  13. صافى
    ميرسى على كلامك
    ونورتينى واسعدتينى بكومنتك
    ان شاءالله تتابعينى وتعجبك

    ردحذف
  14. اسراء
    الحممممممدلله انها جذبتك
    مستنية رايك كل حلقة ان شاءالله

    ردحذف
  15. بداية حلوووووووووووووة كتير

    ردحذف
  16. روعه قصصك انا قريت ذكرى سارة وبتسلى على كل قصة ان شاء الله حقرأهم كلهم بس بجد انا سعيده جدا انى لقيت مدونتك .. وححاول على قد ما اقدر اعملها شير لانك بجد كاتبه عظيمة ورواياتك تحفه .. تسلم ايدك

    ردحذف
  17. هاي دينا ازيك انا يارا من المنصوره 13 سنه : كنت حبه من حضرتك ان انا انزل القصص دي بلييييز بجد قصص حضرتك جميله جدا و روعه بجد و انا عايزه احملها القصص ( بين نارين _ عماره 8 _ يوميات حماه1و2 _ ار _ شبح الماضي _ اقوي حب ) بليييييييييز انا عايزه انزلهم ع الجهاز بتاعي

    ردحذف
  18. بجد انتي. روعة


    مونه

    ردحذف
  19. انا قريت القصه دي قبل كدا تحففففففففه
    ودورت عليها عشان اقراها تاني
    جميله كتاباتك اوي يادينا

    توتا

    ردحذف

قول رأيك بلاش تقرا وتقفل من سكات...ارائكم تهمنى