الخميس، 22 سبتمبر 2011

آر(R) ... الحلقة 10

الحلقة 10
تانى يوم راح هانى المستشفى علشان يتكلم مع روز
"صباح الخير يا مدام...مدام روز اتحسنت"
"صباح النور...لا ياحبيبتى كل ماتصحى تصرخ وتخرف بكلام مش مفهوم الممرضات يدوها منوم وتنام تانى"
"والاستاذ فادى وصل"
"ايوه..جه امبارح"
"هو مش موجود ليه"
"بيعمل الاجراءات"
وزاد عياط الجدة اللى كانت بتكتمه من اول الحوار
"اهدى يامدام...ان شاءالله هنمسك القاتل فى اسرع وقت"
"يارب...انا افتكرت حاجة بس مش عايزة اقولها قدام فادى"
"خير"
"كان فيه اتصالات كتير بتيجى على تليفون روز... واحد يقولها بحبك فى نص الليل مثلا.. او الصبح بدرى يقولها صباح الخير ياحبيبتى...وكلام من ده ولما زاد الموضوع عن حده غيرت روز الرقم بتاعها وبعد فترة رجعت نفس الاتصالات دى تانى...لحد من اسبوع غيرته تالت وساعتها مبقتش تدى الرقم لحد خالص غيرى انا وفادى ومريم "
"والاتصالات وقفت"
"ايوه وقفت...بس بقت تيجى على تليفون البيت... بس اقل ماكانت على موبايلها...واخر مكالمة من يومين كان فيها زى تهديد"
"ازاى"
"كانت اول ما بتسمع صوته بتقفل... فآخر مكالمة قالها...قبل ماتقفلى مش هسيبك وهفضل احبك...ردت وقالتله انت مش عارف انى متجوزة...قالها انا اعرف عنك كل حاجة ... قالت له عايز منى ايه...قالها مش عايز غير انك تحبينى شتمته وقفلت فى وشه السكة"
"وبعدين"
"مفيش تانى يوم حصل اللى حصل"
"ماشى يامدام ياريت لما الاستاذ فادى يرجع تقوليله يجيلى المكتب... واول لما مدام روز تفوق ادينى خبر..وعايز رقم البيت والارقام اللى غيرتها مدام روز "

راح هانى على النادى وقابل الامن اللى ع الباب
"السلام عليكم... انا المقدم هانى من المباحث"
"اهلا ياباشا..اتفضل"
"انا عايز اعرف مين اللى كان هنا اول امبارح الصبح"
"انا سعادتك"
"تعرف مدام روز وبنتها مريم"
"اه طبعا كابتن روز ومريم...احنا كلنا مش مصدقين اللى حصل"
"شفت مريم يوم مااختفت"
"فى الحقيقة ياباشا انا مشفتهاش وده قلته للكابتن روز وهى بتدور عليها...ربنا يصبرها"
"محدش جه سألك عن مدام روز او بنتها او اى حاجة تخصهم"
"لا...محصلش"

راح هانى على المكتب
"ها ياباش ايه الاخبار"
"خد الارقام دى وهات بيان المكالمات بيهم كلهم"
"القضية اتعقدت اوى ياباشا وبقت غريبة"
"لازم نحاول نعمل اللى علينا قبل ما نلاقى جثة تالتة"
"طيب والحل...احنا اصلا مش لاقيين رابط بين البنتين"
"يمكن لما مامتها تفوق تفيدنا بحاجة...او لما نعرف مين اللى كان بيطارد الام"
"حتى اللى بيطارد الام ايه علاقته برودينا؟؟"
"مش عارف...فيه حاجة مفقودة وانا مش عارفها"
"بقولك ياباشا...الاقسام مسكت شوية من المتسولين ومتفرقين كل قسم فيه واحد ولا اكتر"
"انت فاكر شكل الراجل كويس"
"اه فاكره"
"هنستنى يومين كمان ونبقى نروح نشوفهم يمكن نتعرف عليهم"
"تحت امرك ياباشا"
"بس شوف الارقام دى فى اسرع وقت"
وخرج حسام واتصل هانى بالتليفون
"الو دكتورة رشا"
"ايوه...مين معايا"
"انا المقدم هانى"
"اهلا وسهلا..خير"
"اناعايز اعرف قبل حادثة رودينا مكنش بيجيلك اى اتصالات غريبة"
"تهديد يعنى...لأ"
"مقصدش تهديد...انا اقصد معاكسات حد معجب بيكى...حاجات من النوع ده"
"لا خالص....ليه"
"كنت بسأل بس...شكرا سلامى للدكتور مجدى...سلام"
وبعد ماقفل هانى التليفون...رن بعد دقيقة
"هانى...الحقنى"
"ايه يارباب مالك"
"تعبانة هموت مش قادرة"
"طيب انا جاى حالا..اجيبلك دكتور معايا"
"لالالا انا تقريبا بولد"
"بتولدى؟؟؟انتى مش لسه مدخلتيش فى التاسع"
"بكرة ياهانى اول يوم فى التاسع... وبعدين كل اللى عندى اعراض ولادة...ألحقنى بسرعة مش قادرة اتكلم...اااااااااااااااااااااااه"
وقبل ماتخلص صرختها كان هانى بره المكتب ونزل بسرعة
على عربيته... وفى اسرع وقت كان فىى البيت
لقى مراته قاعدة على الارض... وبتصرخ
"ايه اللى مقعدك كده"
"مش قادرة اقف"
"طيب تعالى لازم نروح المستشفى"
واول ما قام وقومها من على الارض... شاف مياه كتيرة حواليها... ومفهمش وغير لها هدومها وهى بتصرخ واخدها على المستشفى

"المدام لازم تولد حالا"
"ازاى يادكتور... مش هى لسه فى التامن"
"المياه اللى بتحفظ الجنين نزلت كلها تقريبا... ولازم نلحقه قبل مايموت"
ودمعت عيون هانى ومراته مع الكلمة... ونادى الدكتور على الممرضة
"جهزيها للعمليات"
"هانى كلم ماما...عايزة اشوفها قبل ماادخل العملية"

فى الاوضة اللى نايمة فيها روز...جنبها فادى ومامتها
وفى هدوء تااااام.... فجأة صرخت روووووووز
"قتلوا بنتى...هما اللى قتلوها... بيكرروها تانى"
وانتفض فادى وحضنها يهديها..وجريت مامتها تنادى على الدكتور
اللى امر بحقنة منومة تانى...علشان اعصابها تهدا وتنام

هناك 6 تعليقات:

  1. هااااااااااا.. بيكرروها ازاي يعني؟؟ روز معاها الدليل الي هيوصلنا للقاتل

    ردحذف
  2. توتا
    تفتكرى؟؟؟؟
    يعنى مش تخاريف من الصدمة؟؟؟

    ردحذف
  3. انا بردو اعتقد ان روز معاها الدليل اللى هيوصلهم للقاتل , بس ايه اللى يتفهم من كلمه بيكرروها تانى دى .؟؟

    ردحذف
    الردود
    1. ريم هى الى قتلتهم وريم دى صحبت رشا وروز وهى ماتت فى بتاع برضو مهجور وتحت الانشاء

      حذف
  4. انا اشعرت يا ديناااااااااااااااااااااا

    ردحذف
  5. ymkn kant m5alefa bent tania w ,atet be nafs el taree2a bs men ragl tany

    ردحذف

قول رأيك بلاش تقرا وتقفل من سكات...ارائكم تهمنى