الحلقة 3
نزل هانى لمرسى البواب وبنظرة فاحصة وسريعة للاوضة المفتوحة ومفيهاش حد ...استنتج انه عايش لوحده
"السلام عليكم ياعم مرسى"
"وعليكم السلام ياباشا اتفضل"
"كنت تعرف رودينا اكيد"
"طبعا ياباشا هى ورامز والدكتور والدكتورة"
"انت هنا من امتى"
"من ييجى 5 سنين كده"
"ايه اللى حصل بقى يوم مااختفت"
"والله ياباشا مااعرف انا كنت بجيب طلبات للسكان ومتأخرتش ده يدوب من 11ونص لواحدة الا ربع رجعت لقيت الدكتورة بتلف على السكان وبيدوروا على رودينا وفضلنا ندور لحد ما جه الخبر الشوم ده"
"هو انت مش متجوز"
"لا متجوز ومعايا عيال بس فى البلد"
"انت منين"
"من الاقصر"
"وبتشوف عيالك ازاى"
"اهو كل كام شهر كده بنزلهم البلد كام يوم...اكل العيش مر"
"انت تعرف الشغالة اللى كانت عندهم"
"اه طبعا ام صلاح ...دى ست غلبانة وبتربى يتامى والدكتور قطع عيشها حتى بعد مامشيت من عندهم وجبت لها شغل عند الاستاذ فوزى راح كلمه وخلاه يمشيها"
"اااه انت بقى اللى جبت لها الشغل...هو انت بتشوفها"
"اه بتعدى عليا كل مدة كده بتشوف شغل"
"هو انت مخدماتى ولا بواب"
"ياباشا ساعات حد بيقولى عايز واحدة تشتغل وببعتها تسترزق"
"واخر مرة شفتها امتى"
"من كام يوم كده"
وانتبه هانى لكلمة من كام يوم
"لا قولى بقى بالظبط...من كام يوم"
"مش فاكر بس هى جت وقعدت معايا ييجى ساعة "
"طيب كنا الصبح ولا بالليل وسألت عن حد من بيت الدكتور"
"كنا الضهر وحتى رامز ورودينا كانوا راجعين من المدرسة سلمت عليهم وباستهم واتكلمت معاهم شوية قبل مايطلعوا"
"اتكلموا فى ايه؟؟وهما بييجوا لوحدهم من المدرسة"
"انا معرفش اتكلموا فى ايه علشان كنت بمسح قدام العمارة والعيال بييجوا فى الاتوبيس بتاع المدرسة"
"عنوانها ايه"
"معرفش ياباشا هى اللى كانت بتجيلى مش انا اللى بروح لها"
"طيب افتكر جت قبل ما البنت تختفى بكتير يعنى"
"لا يومين ولا 3 بس"
"ماشى ياعم مرسى لو عرفت او افتكرت اى حاجة ابقى عرفنى ولوان شكلنا هنتقابل كتير"
"تؤمرنى ياباشا"
فى المكتب
"ايه ياحسام تحرياتك عن مكان الجريمة ايه"
"العمارة مهجورة والشارع هادى جدا ومفيش اى حد شاف حاجة"
"طيب بص انا عايز تحريات من المستشفى اللى بتشتغل فيها الام عن عنوان الولد اللى توفى فى العملية السنة اللى فاتت... وعايز كمان عنوان الشغالة "
"حاضر ياباشا فى اسرع وقت...بس وصلت لحاجة"
"الشغالة كانت بتحوم من فترة حوالين البيت والبواب متعاطف معاها"
"تفتكر يكونوا متفقين مع بعض"
"ممكن طبعا"
"طب ليه مقبضتش عليه"
"لا انا عايزه تحت عينينا من بعيد لبعيد"
"علم ياباشا...التحريات هتكون عندك فى اقرب وقت"
"وعايز برضه اعرف العلاقة بين الام والاب عاملة ازاى...مستقرة ولا لأ"
"ليه ياباشا"
"حسيت كده ان كل واحد عايز يتهم التانى انه السبب"
"اقوم انا علشان ألحق اجيب كل المعلومات دى"
"ماشى ياحسام... ومعلش هناخدك من خطيبتك اليومين دول"
"هههه هى اتعودت خلاص "
"انا عايز اوصل للقاتل ده باسرع وقت...انا بعتبر القضية دى غير اى قضية تانية"
"ليه دى مش اول جريمة قتل نحقق فيها"
"مش عارف ليه حاسس انى نفسى امسك القاتل ولو اطول اقتله بايدى مش هتأخر...مهما كان السبب طفلة زى دى تتقتل ليه"
"قدرها وعمرها...اول مرة اشوفك بتتكلم بالمشاعر فى الشغل"
"التوقيت ياحسام صعب اوى عليا... حاسس اوى باهلها لان انت عارف انى مستنى اول مولود بعد عذاب 10 سنين انتظار... وقد ايه انا ومراتى تعبانين فى الانتظار...مين عارف اهلها تعبوا قد ايه لحد ماهى جت...وفى لحظة تروح منهم كده"
"ربنا يقوملك المدام بالسلامة ... وعادى ياباشا احنا مش اول مرة يعدى علينا حالات مؤثرة وعمرنا مااتاثرنا"
"معاك حق... انا هروح البيت شوية وارجع تكون جبت لى اى حاجة من اللى طلبتها منك"
رن موبايل هانى وهو بيستعد للنزول للمكتب
"الو المقدم هانى معايا"
"ايوه ...مين؟"
"انا د.مجدى ابو..."
"اه.. اهلا يادكتور.. ياترى خير"
"انا عايز اقابل حضرتك ضرورى"
"مفيش مانع... هو رامز عامل ايه دلوقتى"
"احسن شوية وبدأ يهدا"
"طيب انا كنت عايز اتكلم معاه شوية...ممكن اعدى عليكوا فى البيت اتكلم مع رامز وتحكيلى اللى انت عايزه"
"لا بلاش البيت انا الكلام اللى هقوله ده مش عايز رشا تعرف عنه حاجة"
"طيب شرفنى فى المكتب...وهات رامز معاك"
"رامز؟؟؟ليه رامز هو دخله ايه بالموضوع...معلش يافندم ياريت نبقى بعيد عن الولد لانه صغير وكفاية عليه فقدانه لاخته"
"لو شايف انها حاجة مش مهمة مكنتش طلبت اشوفه"
"طيب ممكن تفهمنى"
"لما نتقابل هتفهم كل حاجة"
"طيب بعد اذنك ممكن نتقابل فى مكان عام علشان نفسية الولد"
"مفيش مانع...حدد المكان اللى يعجبك"
فى المكان المحدد اتقابل مجدى ورامز مع هانى
وقبل مايدور اى حديث رن موبايل هانى
"الو..ايوه ياحسام ايه الاخبار"
"انا جبت عنوان اهل الولد... هما من قرية اسمها الدير ف الاقصر"
"طيب جهز نفسك هنروح هناك بكرة الصبح"
"بس فيه حاجة تانية"
"هاااااا"
"دى نفس القرية اللى منها مرسى البواب"
ماعرفش ليه افتكرت البواب الي ف مسلسل خاتم سليمان خخ
ردحذفبس عجبتني الحلقه النهارده طويله ومليانه احداث وربنا يستر من الحوار الي هيدور مابين الاب وهاني
توتا
ردحذفطمنينى البواب هناك شبه البواب هنا؟؟؟
اصل انا متابعتش المسلسل
الحمدلله انها عجبتك...ويارب كده للاخر
هههههههههههههههههههههههههههههه تقريبا كان عامل نفسه مالوش علاقه وطلع ف الاخر هو القاتل خخ وكان متفق مع وحده يلبسوا القضيه لصاحبتها متخيله انتي بس
ردحذفGREEN APPLE :وجه جديد يظهر في احداث القضية ولم نتأكد بعد من هوية القاتل .. نرمى الشكوك الآن على البواب ولكن من يدرى!! لعلها أم الطفلة نفسها أو أبيها .. وهو ما سيتضح لنا من ملامح تلك الشخصيات فى الحلقات المقبلة .. سعدت جدا بهذه الحلقة المثيرة :)
ردحذفeh all3'bta de hoa al boab dh lleh 3laka b al 2
ردحذفTu2aa
الشك هيبقي في البواب بس دة ما يمنعش ان ممكن يكون اي طرف تاني وربنا يسترها في الحوار الي هيدور بس الحلقة دي كانت جميلة ومليانة احداث
ردحذف