السبت، 17 سبتمبر، 2011

آر(R) ... الحلقة 5

الحلقة 5
"اتأخرت ليه ياحسام"
"معلش كنت بحاول اجيب عنوان الشغالة بس معرفتش بكرة يكون عندك بس لما نرجع من الاقصر"
"لا خليك انت هنا وهاتلى عنوانها وانا هروح الاقصر"
"اللى تشوفه يافندم"

فى بيت هانى بعد مادخل الساعة 2 بعد نص الليل...شاف مراته صاحية
"ايه يارباب اللى مصحيكى لحد دلوقتى"
"تعبانة اوى ياهانى...مش عارفة انام"
"حاسة بايه..تحبى نروح المستشفى"
"لا انا بس حاسة انى مش قادرة اخد نفسى وزهقانة من نوم السرير بقالى كام شهر"
"استحملى ياحبيبتى هانت ...تعالى بس ريحى على السرير وانا قاعد معاكى اهو لحد ماتنامى"
"لا انت طول اليوم فى الشغل ادخل ارتاح"
"انا مضطر اسافر الصبح الاقصر...هتصل قبل ماانزل بمامتك تيجى تقعد معاكى"
"ماانت عارف ان ماما مش بتقدر وعايزة اللى يخدمها"
"معلش اهى تقعد معاكى علشان اطمن بس"
"انت مسافر ليه"
"علشان القضية الجديدة"
"هى ايه؟؟"
وانتبه هانى ان مراته قلبها ضعيف ومش بتتحمل الحوادث
"متشغليش بالك انتى بالحاجات دى"
واخدها نيمها على السرير ومنامش غير لما اطمن انها نامت

تانى يوم الصبح سافر هانى للدير قرية مرسى...وسأل على بيت اسماعيل حسان...والناس دلوه عليه
"سلامو عليكم ياحاجة"
"وعليكم السلام"
"الحاج اسماعيل موجود"
"ايوه ...اتفضل اطلع له"
وطلع هانى مع الست لحد اوضه فى دور علوى من البيت اللى واضح انه بيت عيلة من كتر الستات والاطفال الموجودين
"اتفضل هنا"
وشاورت الست اللى ميعرفش هى تبقى مين على اوضة...اول مادخل هانى شاف راجل كبير نايم على السرير وجنبه كرسى متحرك...فادرك انه مقعد لا يتحرك
"ازيك ياحاج وازى صحتك"
"الحمدلله يابنى...انت مين؟؟متآخذنيش العتب ع النظر"
"لا ولا يهمك ياحاج...انا المقدم هانى مفتش مباحث وجاى من القاهرة"
"اهلا وسهلا... بس خير"
"انا جاى فى موضوع يخص وفاة ابنك "
"الله يرحمه ... وبعدين ايه اللى فكركوا بيه دلوقتى الموضوع ده خلص من ييجى سنة والدكتور منه لله اللى اتسبب فى موته محبوس"
"واخدتوا بالتار"
"تار مين بس ومين اللى هياخده... ده بعد المرحوم مفيش غير البنات ...اصله كان الولد الوحيد اللى جه بعد 7 بنات...وانا من بعده زى ماانت شايف كده يبقى التار مين اللى هياخده...احنا ناس مؤمنين بقدر ربنا وفوضنا امرنا لله"
"انت ملكش اخوات ياحاج"
"ليا طبعا 3 غيرى 2 متوفيين وواحد موجود"
"هو فين"
"ياااااااه ده فى ليبيا من 15 سنة وكل اللى بيننا وبينه اتصالات كل فين وفين... بس معلش لامؤاخذة يعنى هو الدكتور اتقتل "
"لا بنت الدكتورة اللى عملت العملية وانا شاكك انكوا ليكوا دخل فى الموضوع ده"
"يابيه حقق براحتك وان لقيت حد من عندنا اللى عملها خده من وسطينا ... احنا مش بناخد التار من العيال الصغيرين وكمان بنت... ولا بنفكر فى التار خالص ده قضاء وقدر"
"هما اخواتك متوفيين من زمان"
"لا من 6 شهور "
"الاتنين"
"اه ..كنا احنا التلاتة مسافرين وعملنا حادثة هما ربنا افتكرهم وانا من ساعتها مش بتحرك خالص "
"ربنا يشفيك ويصبرك ...بس قولى تعرف مرسى مجاهد"
"مرسى...مرسى مجاهد مين"
"مرسى مجاهد بن الهلالى"
"اه ابن الهلالية... اللى فى مصر من سنين"
"اه هو...اخر مرة اتقابلتوا امتى"
"احنا من سنين بين عيلتنا وعيلته مشاكل وبنورثها جيل ورا التانى"
"مشاكل ايه؟؟تار"
"لا مش تار... بس عداوة بسبب نسب قديم بين العيلتين ومكملوش مع بعض وبقت كل عيلة تتكلم عم التانية...طلعنا بنكررهم وهما بيكرهونا ومش ممكن يحصل بيننا لا شغل ولا نسب ولا اى اتفاق"
"ماشى ياحاج...هستأذن انا"
ومشى هانى وطول الطريق وهو بيسأل اهل البلد عن الكلام ويحقق فى الكلام اللى قاله اسماعيل... واتأكد من كل كلمة انها حقيقة... وسأل عن مرسى وعرف انه مش بييجى البلد غير كل كام شهر يومين تلاتة ويمشى وبعد ماخلص راح يلحق معاد الطيارة علشان يرجع بيته بسرعة يطمن على مراته

"رشا...انتى هتفضلى تقعدى كتير كده هنا"
"اه...عايزة افضل قاعدة فى نفس المكان اللى بتقعد فيه بنتى"
"مش هترجعى الشغل بقى ورامز يرجع المدرسة"
"شغل؟؟!!لالا خلاص مش عايزة اروح الشغل تانى"
"ليه يارشا انتى بتساعدى اطفال كتير على التخلص من الامهم وتخفيف تعبهم عايزة تسيبيهم"
"انا كنت فاكراك انت اللى هتقوللى سيبى الشغل زى ماكان نفسك من زمان...هتتهمنى بالاهمال والتقصير علشان اتأخرت يوم رودى مااختفت"
"لا مش هتهمك بالتقصير ولا هحملك المسئولية"
"اشمعنى يعنى...ايه التغيير المفاجئ ده"
"ماهو انتى عمرك ماقصرتى معانا وان كنتى انتى يومها اتاخرتى شوية انا كمان مكنش المفوض انزل واسيبها...يعنى احنا الاتنين غلطنا بس فى الاخر ده قدرها وقدرنا"
"انا مش مصدقة ان مجدى جوزى اللى بيقول الكلام ده"
ومسك ايدها وقرب منها وقربها لحضنه
"لازم نقرب من بعض اكتر علشان نفضل مع بعض طول العمر احنا التلاتة يمكن نبقى 4 او 5 كمان... سامحينى على كل اللى الغلط اللى غلطته فى حقك"
واترمت رشا فى حضنه وهى بتعيط وكلها امل ان حياتهم تبقى اهدأ من الاول... يعنى كان لازم تفقد بنتها علشان يرجع حبها واستغربت من عجايب الدنيا

دخل هانى مكتبه تانى يوم الصبح وحسام وراه
"ايه ياحسام الاخبار"
"صفاء لسه مختفية وام صلاح جبت عنوانها وعملت تحريات عنها...لقيت مفاجأة"
"خييييييير"
"جوزها عايش مش ميت زى ماكانت بتقول...بس هو كان فى السجن ولسه خارج من شهر"

هناك 8 تعليقات:

  1. حبيب قلبي عايش مش ميت.. الشغاله دي وراها مصايب.. يبقى هي ومرسي ليهم علاقه وصفاء ويوم ورا يوم نصفي واحد منهم خخخخ


    اتاخرتي علينا كتير النهارده وانا صاحبة عيا والسهر ممنوع خخخخخخخخخخخ

    ردحذف
    الردود
    1. علي فكرة الشغالة ما لهاش دعوة بالموضوع ولا حتي البواب ولا صفاء دي هتطلع في الاخر صديقة رشاواسمها ريم

      حذف
  2. توتا
    والله التأخير ده غصب عنى...بكتب الحلقة وعينى بتقفل لوحدها
    وهنشوف مين الوحش المفترى اللى عمل كده

    ردحذف
  3. السلام عليكم ورحمة الله وبركاته
    ازيك يا دندن ... والله وحشااااااااااااانى بجد
    ايه التألق ده؟؟ بقى انا اسيبك وانتى عاطفية ورومانسية ارجع الاقيكى قلبتى بوليسى ...بس انتى متالقة فى كله بصراحة ..ماشاء الله عليكى
    بس انا اعتقد ان الافراد اللى بتدور حولهم الشكوك مش هما خااااااااالص المقصودين .. واعتقد ان الشخصية المطلوبة لسة مظهرتش اصلا ...كده ولا ايه؟؟؟ طمنينى على حسى البوليسى؟؟

    ردحذف
  4. وعليكم السلام ورحمة الله وبركاته
    ازيك ياهنودة انتى كمان وحشتينى اوى
    وميرسى على الكلام الجامد جددددددى هههههههه
    اما بالنسبة لحسك البوليسى فانا مش هقولك حاجة عنه غير لما نعرف القاتل

    ردحذف
  5. دينا انا قريت كل قصصك اشجان وحكم القلب وفوق احتمالى وذكرى سارة وتحت سقف واحد وكله كلهدى اخرر قصة هاقراها ليكى ف اللى موجودين ومش قادرة اوصفلك احساسى ف كل حلقة من كل قصة قريتها قصصك مؤثرة جدااا ربنا يزيييدك نجاااح انا بحب الفن عمتا والفناانين انا كمان فنانة صغنونة بس هوايتى الرسم انا من كل قلبى بدعيلك ربنا يوفقك واتمنالك النجاااح دايما ومستنية دعوااتك دايما ليا ومستنية اشوفلك قصص تانية كتيييييير مالاقيش ةقت اقرااها لأنى عايزة اقرالك الجدييد

    ردحذف
  6. بس بس بس جوز الخدامه هو الدكتور بتاع التخدير :D

    ردحذف
  7. حلوه جدا

    ردحذف

قول رأيك بلاش تقرا وتقفل من سكات...ارائكم تهمنى