الأربعاء، 21 سبتمبر 2011

آر(R) ... الحلقة 9

الحلقة 9
لما اتنقل هانى وحسام لمكان الجثة واثناء المعاينة
"هانى باشا الموقف كله بيفكرنى بالحادثة اللى فاتت"
"انا فعلا مستغرب معنى كده ان فوزية مظلومة"
"واضح ان القاتل واحد...القتيلة بنت ومخنوقة بنفس الطريقة وسايب الجثة فى عمارة تحت الانشاء...كل الملابسات واحدة"
"تفتكر ايه الرابط بين الحادثتين...رودينا كانت فى 6اكتوبر ودى فى مصر الجديدة يعنى القاتل مش ماسك مثلا منطقة معينة...ومش حرامى لان البنت دى لابسة حلقها"
"اروح اشوف بلاغات الغياب"
"استنى لما نشوف دى هنا من امتى ومين اللى بلغ"
وراح هانى ناحية الطبيب الشرعى اللى تم استدعاؤه
"ايه يادكتور...متوفية من امتى"
"مكملتش 24 ساعة وواضح ان الوفاة نتيجة الخنق بلايشارب ده...وده طبعا تقرير مبدئى "
ولفت نظر هانى حاجة فى الجثة وقرب منها اوى ...ومال عليها
حسام"فى ايه ياباشا"
هانى"بص تحت الايشارب...مش دى نفس السلسلة الفضة اللى كانت لابساها رودينا وفيها حرف®"
حسام"فعلا...شبهها بالظبط"
هانى"يعنى ايه القاتل بيقتل البنات اللى لابسة السلسة دى ولا البنات اللى بتبدأ بحرف ر"
حسام"يبقى اكيد مجنون"
هانى"اكيد مجنون…فاكر الراجل اللى بلغ عن قتل رودينا وكان متعرفش اذا كان عاقل ولا مجنون…بدأت اشك فيه"
حسام"تصدق ياباشا ممكن"
هانى"بس دى رودينا كان بقالها 3 ايام بلغ ليه"
حسام"وبعدين فى الحيرة دى"
هانى"بص يا حسام اصدر اوامر لكل الاقسام بالقبض عن كل المتسولين والمجاذيب اللى ماشيين فى الشوارع يمكن نلاقيه"
"حاضر ياباشا حالا"
"فين الراجل اللى بلغ النهاردة"
وجه راجل شكله وهيئته انه محترم فى نهاية الخمسينات
"السلام عليكم…انا ياباشا اللى بلغت"
"وانت ايه اللى جابك هنا"
"دى عمارتى ببنيها لولادى ومن شهر كده الفلوس قصرت معايا شوية فوقفت كل حاجة زى ماهى لحد ماربنا يفرجها واكمل…كل كام يوم كده باجى اطمن على العمارة واطلع افتش فيها بخاف يكون حد وضع يده عليها ولا حاجة…النهاردة جيت كالعادة لقيت البنت دى بلغت على طول"
"اخر مرة جيت هنا امتى"
"اول امبارح الصبح"
"طيب سيب لى بيانتك علشان لو احتجتك"
"حاضر"
"حسااااام…شوف بلاغات الغياب علشان نعرف البنت دى مين"

بعد 5 ساعات فى مكتب هانى
"هانى باشا… الجثة لبنت اتبلغ عن غيابها من ساعة واحدة بس اسمها مريم فادى ميلاد"
"مريم…ولابسة حرف®"
"قلت لاهلها ولا لسه"
"بعت عسكرى يبلغ اهلها علشان يتعرفوا عليها"
"انا هروح ع المشرحة علشان اقابل اهلها ونشوف ايه العلاقة بين مريم ورودينا اللى تخليهم يلبسوا نفس السلسلة"

وصل هانى المشرحة قبل اهل البنت...بعد ربع ساعة وصل 2 ستات واحدة فى الثلاثينات وواحدة فى نهاية الخمسينات او بداية الستينات...وواضح انهم ام وبنت
كانوا منهارين وعلامات الرعب والقلق من رهبة المكان ومن انتظار خبر سئ...على وشهم وخيط ضعيف من امل انها متكنش بنتهم الموجودة فى المشرحة
لما سألوا ودخلوا للتعرف على الجثة زاد الصراخ وانهارت ام البنت لدرجة انها وقعت مغمى عليها واضطرت والدتها لطلب الاسعاف
راح وراهم هانى وسأل الدكتور عن الحالة فعرف انها صدمة عصبية... وراح للجدة وسألها
"البقية فى حياتك يامدام"
ردت وهى بتعيط"ميرسى... انت مين"
"انا المقدم هانى من المباحث"
"اه... طيب مين عمل كده فى مريم وليه"
"بنحاول نعرف اهو بس ياريت اعرف منك شوية معلومات"
"اتفضل"
"مريم اختفت ازاى"
"كانت فى النادى مع روز وكانت روز عندها تمرين ومريم بتستناها فى الجنينة خرجت روز من التمرين ملقتش مريم من ساعتها"
"روز دى مامتها مش كده؟؟هى بتتمرن ايه؟"
"روز بتشتغل فى النادى مدربة تنس"
"وفين ابو مريم"
"مسافر بيشتغل فى الامارات انا كلمته دلوقتى وهى جاى النهاردة"
"ليكم خلافات مع حد"
"لا احنا فى حالنا ومفيش خلافات مع حد"
"طيب ممكن سؤال تانى... هى مريم ليه لابسة سلسلة بحرف مامتها مش حرف الM"
"سلسلة ايه؟"
"سلسلة فضة فيها R"
"مريم عمرها مالبست سلاسل لان اى معدن يلامس رقبتها بيعملها حساسية"
"انتوا ساكنين فين"
"فى مصر الجديدة"
"ومدرسة مريم"
"هنا برضه"
"تعرفى الدكتور مجدى حسين والدكتورة رشا النجار"
وفكرت الجدة شوية وبعدها جاوبت
"لا معرفهمش... ليه"
ومردش هانى على سؤالها وكل اللى جاوبه
"اتفضلى الكارت بتاعى ولما الاستاذ فادى يوصل ياريت يكلمنى"
"حاضر...احنا ممكن ندفن البنت"
"لما باباها يوصل بالسلامة ياخد التصريح من النيابة بعد الطب الشرعى مايخلص تقريره النهائى"

بعد ماوصل هانى مكتبه اتصل بمجدى
"ازيك يا دكتور انا المقدم هانى"
"اهلا يافندم ازى حضرتك"
"الحمدلله...انا كنت عايز اسأل عن السلسلة اللى كانت لابساها رودينا"
"سلسلة ايه"
"السلسلة الفضة عايز بس اعرف هى كانت ترمز لحاجة معينة"
"انا معرفش حاجة عن سلاسل ثوانى اسال رشا"
واخدت رشا التليفون من مجدى بعد همهمات بينهم
"اهلا يافندم...حضرتك بتقول لمجدى سلسلة فضة...سلسلة ايه"
"سلسلة فضة كانت لابساها رودينا وفيها حرف R"
"رودينا مكنتش لابسة حاجة فضة خالص كانت لابسة خاتم وحلق بس"
"ليه مقلتليش من وقتها"
"انا مشفتهاش ومحدش قالى حاجة عن السلسلة دى"
"والدكتور مجدى مش شافها"
واخد مجدى التليفون وعاد هانى سؤاله تانى
"انا مخدتش بالى لان الصدمة كانت كبيرة وحتى لو شفت السلسلة كان ممكن اعتقد ان رشا جابتها لرودى من غير مااعرف عادى يعنى"
"تعرف واحد اسمه فادى ميلاد او مراته مدام روز"
وفكر شوية
"لا معرفهمش"
"ممكن تسأل الدكتورة كمان"
وبعد ماسالها مجدى
"لا متعرفش حد بالاسم ده"
"ماشى يادكتور...متشكر اوى مع السلامة"
"معلش يافندم سؤال بس هو ايه حكاية السلسلة دى"
"اول مااعرف هقولك على طول"

هناك 14 تعليقًا:

  1. كل يوم يا دينا الاحداث بتزيد غموض ومحدش بيلحق يفرح باى تخمين يفكر فيه :) رغم ان مليش فجو القصص البوليسيه بس مقدرش طبعا ماقرش حاجة انتى اللى كاتبها وبجد كل مرة تثبتى مدى المواهبة والابداع سواء فالكوميدى او الرومانسى او الاجتماعى اخيرا البولسى كمان ربنا يوفقك دايما يا دودو

    Mai el modather

    ردحذف
  2. يا حلاوه يا حلاوة ده امريكي المسلسل يا دينا ولا ايه. ده توقيع بيسيبه المجرم على ضحاياه وخاصه لما يكون سفاح متسلسل خخخخ بس اكيد بيعنيله حاجه.. بس لازم يكون سبب يخليه يقتلهم .. فيه حاجه مش اتقالت ف ملف القضيه ممكن تقرير الطبيب الشرعي وملف التحقيقات ساعة زمن وتلاقي القضيه اتحلت خخخخخخخخخخخخخ

    ردحذف
  3. يوم عن يوم الموضوع بيزيد غموض وتشويق
    تسلم ايدك يا دينا
    وفى انتظار الحلقه الجديده ان شاء الله

    ردحذف
  4. مى
    ربنا يخليكى يا حبيبتى
    وكل الكلام الحلو ده عليا انا؟؟؟
    متحرمش منك ابدا كلك ذوق

    ردحذف
  5. توتا
    ههههههههههههههههه
    يالا حليها بقى وورينا شطارتك
    ولا المقدم هانى اشطر منك وهيحلها الاول

    ردحذف
  6. بنت من الزمن ده
    ربنا يخليكى ياقمر

    ردحذف
  7. بجد يادينا كل شويه الحكاية بتشدنى اكتر ماشاء الله على اسلوبك بجد

    ردحذف
  8. ريما
    مييييييييييييرسى كتيييييييير
    وان شاءالله كل القصص تعجبك

    ردحذف
  9. بجد تحفة تسلم دماغك وايدك على طول

    ردحذف
  10. ماشاء الله عليكي وعلي دماغك


    مونه

    ردحذف
  11. t7faaaaa aweeeee bs eh 7kaet 7rf al r de !!
    Tu2aa

    ردحذف
  12. سفاح شيكاغو هههههههههههههههههههه

    ردحذف
  13. فكرتينى بـ فيلم Home alone لما كانوا يسرقوا كُل بيت يفتحوا الحنفيه و يسيبوها و كده لما اتقبض عليهُم لِبسوا كُل القضايا :D: D


    Hisham Haddad

    ردحذف
  14. انا شاكة في مجدي معرفش ليه

    ردحذف

قول رأيك بلاش تقرا وتقفل من سكات...ارائكم تهمنى