الأربعاء، 19 أكتوبر، 2011

عمارة 8... الحلقة 20

الحلقة 20
وقف حسين مش عارف يعمل ايه؟؟
وياترى ممكن يكون القزازة دى فيها ايه؟؟
"انا مالى... كأنى مشفتش حاجة"
واخد حسين العشا وطلع بيه للغرفة المنشودة
لما خبط حسين على الباب فتح له راجل فى الخمسينات وواضح عليه الهيبة والاحترام وكان بيتكلم فى الموبايل
وسمعه وهو بيقول
"متقلقش يا ثروت... انا معايا الدليل اللى هيطلعه براءة ويبعد عنه حبل المشنقة وهقدمه فى جلسة بكرة ان شاءالله"
بعد ما خرج حسين من الاوضة... فكر
"الراجل دلوقتى هياكل... مش يمكن يكون القزازة دى فيها سم ويموت ويبقى ذنبه فى رقبتى... مش كفاية ابويا مات بسببى... لالالا مينفعش اسكت"
وخبط على باب الغرفة بسرعة وبقوة
فتح النزيل
"فيه ايه انت بتخبط كده ليه"
"معلش يابيه انا عايزك فى كلمتين بسرعة"
"كلمتين ايه...قول"
"جوه بس بعد اذنك"
ودخل معاه اوضته وحكى له على اللى شافه بالظبط
"يعنى الاكل ده مسموم"
"يابيه انا مش عارف انا قلت اللى شفته وخلاص"
"انا متشكر جدااااا يا....انت اسمك ايه"
"حسين"
"ماشى ياحسين متشكر اوى وقبل ماامشى من الفندق عايز اشوفك"
"لو تقصد فلوس ولا حاجات من دى ... انا والله مش عايز حاجة غير ارضى ضميرى"
"برضه عايز اشوفك قبل ماامشى ان شاءالله"
"حاضر انا بكرة شيفت من 1 الضهر... سلام عليكم"
وخرج حسين وكان فاضل حوالى ساعة على نهاية الشيفت...كمل شغله وكأن شيئا لم يكن
تانى يوم وهو بيستلم شغله عرف من زمايله ان البوليس كان موجود امبارح الفجر وكانت الدنيا مقلوبة... ولما سأل عن السبب عرف ان النزيل فى غرفة 442 كان مبلغ انه متهدد وعملوا كمين ومسكوا واحد كان داخل يسرق ورق قضية من النزيل وكان متوهم انه متخدر ولما حققوا عرفوا ان واحد من المطبخ كان حاطط منوم فى العشا وبالصدفة النزيل مأكلوش
استغرب حسين ان الحكاية جت وكأنها كلها بعيدة عنه... واستغرب ان مجتش سيرته بس قال فى نفسه"كده احسن"
واثناء شغله... استدعاه النزيل
"ازيك يا حسين"
"اهلا يابيه...انا عرفت ان حضرتك بلغت ومسكوا اللى كان عايز يسرق"
"اه يا حسين... انا على فكرة مجبتش سيرتك خالص علشان انت عملت فيا جميل مش معقول ارده بإساءة"
"اساءة ايه مش فاهم"
"اللى كانوا عايزين يسرقوا الورق دول ناس كبار اوى وعاملين زى الاخطبوط ليهم 100 دراع واى حد يقف فى طريقهم بيدوسوا عليه وخصوصا لو على قده... فلو كنت جبت سيرتك ان انت اللى قلت كانوا انتقموا منك"
"وحضرتك مش خايف"
"لا متقلقش انا مأمن نفسى منهم وميقدروش عليا... انت مبسوط هنا"
"الحمدلله"
"لو بتعرف تسوق وتحب تيجى تشتغل السواق الخاص بتاعى ياريت بس انا بيتى ومكتبى فى اسكندرية"
"مش فارقة بابيه هنا من هناك"
"يعنى موافق"
"ان شاءالله بس اول الشهر علشان اخد مرتبى من هنا"
"ده الكارت بتاعى ابقى تعالالى وتستلم الشغل على طول"
"حاضر... متشكر اوى"

فى شقة 2
"حمدالله على السلامة ياحبيبى"
"الله يسلمك يا حبيبتى...انا قلت اعدى عليكى قبل مااطلع"
"وانت كنت تقدر تطلع من غير مااشوفك"
"تعالى ادخل"
"لا يدوب اطلع اطمن بابا وماما عليا وانام شوية وانزلك اخر النهار... اومال طنط ميرفت فين"
"نايمة شوية"
"سلمى عليها لحد ما انزلك"
وبعد ساعات نزل اسلام وقعد معاهم شوية وسابتهم ميرفت وقامت
"مسألتنيش يعنى عن المفاجأة اللى قلت لك عليها"
"اه...قولى يالا"
"ماما هتتجوووووووووووووووووز"
وبرق اسلام عينه من هول المفاجأة... ومتكلمش
"اسلام...اسلااااام...ايه مالك "
"طنط ميرفت هتتجوز وانتى فرحانة كده"
"اه ايه الغريب يعنى"
"موقفك هو اللى غريب... مامتك هتتجوز حد غير باباكى وانتى عادى وكمان فرحانة"
"وهو بابا عايش علشان ازعل... وطبعا لازم افرح اى حاجة هتفرح مامتى تفرحنى"
وسكت اسلام وهو قالب وشه
"فيه ايه يااسلام...افرد بوزك ده شوية...امى انا اللى هتتجوز على فكرة مش مامتك انت"
"انتى بتقولى ايه...انا امى اصلا متعملش كده"
"وهى هتتجوز ازاى ...على باباك مثلا"
"انتى بقيتى سخيفة وكلامك بايخ... انا قايم"
"فيه ايه يااسلام انا عمالة اهزر معاك وانت بتغلس كده"
"انتى بتقولى مش امك اللى هتتجوز ...بتتريقى على امى"
"انا متريقتش...عموما انا شايفة مفيش حاجة تستاهل"
"فعلا مفيش حاجة تستاهل... انا نازل رايح لصحابى"

فى شقة 3
حامد"مالك يااسلام...من امبارح وانت مش طبيعى"
اسلام"تصدق يابابا طنط ميرفت هتتجوز"
حامد"ايييييه؟؟؟دى اكيد اتجننت"
سامية"احنا مالنا بس ...هى حرة"
حامد"حرة ايه بس... دى قلة قيمة لما تتجوز فى السن ده"
سامية"سن ايه؟؟دى مجبتش 40سنة"
حامد"ايه انتى قليلة العقل زيها... واحدة بنتها بتتجوز رايحة تتجوز هى...ستات ناقصة عقل"
اسلام"انا مش عارف يعنى واحد ييجى يخطبها منى ويقولى انا طالب القرب منك فى حماتك... ولا اقول انا رايح فرح حماتى"
حامد"اكيد نيفين هترفض وهى مش هتقدر تزعلها"
اسلام"نيفين فرحانة وده اللى مجننى"
حامد"ده الكلام بجد بقى مش مجرد كلام وخلاص"
اسلام"لا بجد طبعا"
حامد"وانت هتسيب خطيبتك تعيش مع راجل غريب... احنا ايه يضمنلنا اخلاقه ولا يبص لها ازاى"
اسلام"معاك حق يابابا... راجل غريب معاهم فى بيت واحد ازاى...لالالا مقدرش اتحمل كده"
حامد"انت لازم تاخد موقف ومتسمحلهاش انها تعيش مع راجل غريب فى بيت واحد"
سامية"راجل غريب راجل غريب...مش هيبقى غريب عليها لما يتجوز مامتها"
حامد"بقولك ايه اسكتى انتى كمان لاوالله اقلب عليكى .. ده انتوا صحيح عقلكم صغير وباين كده لما بتكبروا بتتهبلوا ستات مجانين "

هناك 13 تعليقًا:

  1. هو عقل حامد هيك على طول كتير منرفز بس القصة حلوة يسلمو

    ردحذف
  2. اسلام ده طلع متخلف

    ردحذف
    الردود
    1. ابن ابو يعني اه الواد الطرطور ده وابوه عقلو اصغر من سنو بكتي وابن بيالدو وامو اعقل بكتي اسلام شخصية ضعيفخ اوي

      حذف
  3. بصراحه انا شايفه ان الست من حقها تتجوز بعد ماجوزها يتوفى والناس اللى بتبص للموضوع من ناحيه انها مش محترمه او حاجه تانيه تبقى عندها نقص

    ردحذف
    الردود
    1. انا عندي رئي انت علطول بتعمليها هجره غير شرعيه وديما الاب بيموت والام تتجوز

      حذف
  4. الله يحرقك راجل ياحامد عامل زى البقدونس كده حشرى اوى
    منار

    ردحذف
    الردود
    1. الله يا حراك يا ابراهيم
      زي
      الله يحرقق ياحامد

      حذف
  5. لابد من دراسة جميع القرارا يدا حتى لا يندم الانسان على اخدها
    تفسير الاحلام

    ردحذف
  6. حلو جدا يا دندن بس كنتي حطي شخصية زلام حلوه مش طرطور
    اسلام

    ردحذف
  7. اللى اسمه حامد ده معندوش اى احترام للست ودايما عاوز يقلل من قيمتها انا لو حمايا كده هقتله :D

    ردحذف
  8. هو مين اللي عقله صغير
    حامد من الناس اللي عايزة الناس كلها تمشي علي مزاجه وعلي اللي هو شايفه صح عشان يبقوا كويسيين واحد مريض

    ردحذف
  9. اسلام دا زى باباه الاتنين متخلفين الاحسن تسيبه

    ردحذف

قول رأيك بلاش تقرا وتقفل من سكات...ارائكم تهمنى