الاثنين، 28 نوفمبر، 2011

بين نارين ... الحلقة 1


الحلقة 1
"ماما يالا بقى هنتأخر"
"انا جاهزة خلاص ياطارق...عقبال ماافرح بيك انت كمان"
"ياستى خلينا فى فرحتنا النهاردة ببسنت وبعد كده نفكر فيا"
"يارب افرح بيكم يا ولادى وربنا يسعدكم يارب"
"ربنا يخليكى لينا يا ست الكل...يالا بقى...انا هوصلك عند بسنت الاول وبعدين اروح لايمن"
"طيب يابنى"
"لما بسنت تخلص كلمينى علشان نيجى"

وصل طارق وايمن عند الكوافير اللى فيه بسنت
ايمن"ماتتصل بطنط تقول لها اننا جينا"
طارق"مالك ياعريس...متوتر ليه كده"
"اصل انا اول مرة اخطب"
"لا والله...تصدق فاجئتنى... اثبت كده لسه قدامك زفة ورقص وشبكة وليلة طويلة ...وخلى بالك والنبى اوعى توقع الدبلة وانت بتلبسها لاختى"
"بكرة تحصلنى واما اشوف ساعتها هتبقى متوتر ولا عادى"
"احصلك مين ياعم... تحيا الحرية"
ومسك طارق تليفونه واتصل بمامته...وبعد دقايق خرجت بسنت ومامتها...و....
اتقدم طارق ناحية اخته...باسها من راسها...ومسك ايديها
وسلمها لايد ايمن
الام"طارق.. انا هروح اركب مع خالتك واروح على القاعة علشان استقبل الناس وانت خد بسمة معاكم"
وانتبه طارق للى واقفة جنب العروسة...بسمة صاحبتها من زمان
"ايه ده؟؟؟ انتى بسمة؟؟؟ معرفتكيش خاااااااالص"
وابتسمت بسمة بكسوف ومشيوا كلهم ناحية العربية
ركب العريس والعروسة... وبعدين راح طارق فتح الباب لبسمة
وبعد ماقعدت لف وراح ركب العربية

طول الوقت وطارق يختلس نظرات لبسمة
رغم انها صاحبة بسنت من ايام ثانوى
وبقالها 7 سنين بتيجى بيتهم وبيشوفها
بس اول مرة يشوفها مختلفة كده...هى جميلة فى جميع حالاتها
بس اول مرة ينتبه لجمالها
لما وصلوا القاعة... اكتشف طارق ان بسمة جاية من غير اهلها
فراح لمامته
"ماما..انتى معزمتيش مامة بسمة"
"لا ازاى عزمتها طبعا..بس ابنها الصغير تعبان وسخن واتصلت قالتلى انها مش هتقدر تيجى"
ابتسم طارق ابتسامة خبيثة...وكأنه فرح ان بسمة هتبقى لوحدها
القاعة كانت مليانة ناس... وبسمة اجمل الموجودات بعد العروسة
طارق عينه عليها كل تحركاتها
ولما قعدت مع مامته على الترابيزة... بعد شوية قامت الام ترحب بالناس
"منورة يا بسمة... عقبالك"
"ميرسى ياطارق...عقبالك انت كمان"
"شكلها هتبقى قريب"
"ربنا يوفقك"
ودورت وشها وهى مش فاهمة قصده... ياترى هيخطب
جت الام قعدت... وقامت بسمة ومالت على الام
"طنط انا رايحة الحمام اظبط شعرى"
قامت بسمة..وقام طارق رايح لاخته
وهو ماشى سمع 2شباب من اصحاب ايمن
"اهى قامت اهى شكلها رايحة الحمام...روح استناها وهى خارجة كلمها"
"بس هقولها ايه"
"قول اى حاجة بس كلمها واعرف عنها اى معلومات"
وراح واحد من الشباب ناحية الحمام ووقف بعيد عنه شوية
كل ده طارق واقف ومتضايق جدا وف نفس الوقت مش عايز يعمل مشكلة يبوظ بيها فرح اخته
لما خرجت بسمة من الحمام...حاول الشاب يكلمها بس هى مشيت بسرعة ومردتش عليه
فرح طارق واطمن... وراح لاخته وكملوا الفرح كلهم وهما فى منتهى السعادة

بعد الفرح ماخلص
ايمن"طارق احنا مش رايحين على البيت انا حاجز عشا فى اوتيل"
طارق"طيب هوصلكم وبعدين هوصل بسمة ولما تخلصوا براحتكم كلمونى"
وصلهم طارق ... وبعدين اخد بسمة معاه..وهو فرحان انه بقى معاها لوحدهم
"بصى بقى انتى تعبتى مع بسنت النهاردة طول اليوم... فانا عازمك على العشا وبعدين هروحك"
"لالا مش هينفع هتأخر"
"مش هنتأخر ولا حاجة... هنتعشى مع بعض واروحك على طول"
سكتت بسمة وهى من جواها فرحانة اوى
وهما نازلين من العربية...نزل طارق بسرعة فتح لها الباب
لما نزلت وقفل العربية... وقف جنبها واخد ايدها فى ايده
اتفاجئت بسمة من حركته... بصت له... ابتسم لها... سكتت
لما قعدوا مع بعض...كانت بسمة ساكتة وهى مستغربة من الاهتمام المفاجئ بيها ده
"انا ليه اول مرة اخد بالى منك النهاردة"
"سلامة النظر ماانا عندكم فى البيت على طول مكنتش اخد بالك من وجودى"
"لا ازاى... انا اقصد انى اول مرة اشوف جمالك ده"
"يمكن علشان الميك اب"
"لا انتى على طول جميلة بس يمكن الواحد لما بيتعود على وجود حد مش بياخد باله منه"
ومعرفتش ترد عليه...وغيرت الموضوع
"احنا كده هنتاخر"
"زهقتى"
"لا..بس خايفة اتاخر"
"وانا مش عايز اسيبك"
"انت النهاردة مش طبيعى خالص..ده طارق العاقل قليل الكلام"
"ومال العقل باللى حصلى النهاردة"
"حصلك ايه"
"خطفتى قلبى"
واتكسفت بسمة ووشها احمر
"طارق...انت بتقول ايه"
"بقول خطفتى قلبى... وعرفت ليه انا كنت بفرح لما بشوفك عندنا.. وكنت بطمن لما اعرف ان بسنت معاكى... وعرفت انا ليه كنت بحلم بيكى كتير كانك واحدة من بيتنا"
"انت فاجئتنى بكلامك ده"
"ياترى مفاجأة حلوة ولا وحشة"
وردت بسمة وهى هتطير من الفرحة
"مفاجأة حلوة اوى اوى ... انا مش مصدقة اللى بسمعه"
"لأ صدقى... انا بحبك يا بسمة"
ومسك ايديها بين ايديه وبص فى عينيها..وهو مش حاسس باى حد ولا حاجة حواليه
"وانتى رأيك ايه؟؟ اكلم ماما؟؟"

هناك 17 تعليقًا:

  1. طولى شويا مش طبيعى يقلها بحبك من اول م تعجبه بحب الكلمه دى تطول قبل ما تتسمع بس عموما روعععه

    ردحذف
  2. اممم عاوزه الحقيقه فعلا مش منطقي ابدا انه يقولها بحبك كده و تخرج معاه تتعشا بعد ما الخطوبه خلصت نقول ان الخطوبه خلصت مثلا 11 بليل لسه في وقت تخرج معاه ال و ايه خايفه تتاخر ؟؟!!! و بعدين ازاي صحيح حبها كده مره واحده و هو لسه يا دوب بدا يلاحطها اي يلاحظ وجودها في حياته النهارده ؟؟؟

    ردحذف
  3. مى
    اولا نورتينى بوجودك
    بصى انا بينت هى قد ايه قريبة لبسنت علشان كده اهلها سايبينها لحد الخطوبة ماتخلص
    اما موضوع الحب السريع ده..مقصود

    ردحذف
  4. اها انا فهمت انت عاوزه تروحي فين بموضوع الحب السريع ده ان بعد كده النارين اللي هيكون طارق بينهم حب لراويه مثلا و حب لمراته و ولاده ؟؟

    فعلا دي حاجه بنشفها حوالينا كل يوم ناس تشوف ناس يعجبها شكلها يتكلموا كلمتين يوافقوا علي بعض و بعد كده يقضوا بقيت حايتهم نادمنين انهم اتسرعوا هما مش هيكرهوا ازواجهم لانهم معظم الاحيان مبتكرهوش بس هيندموا انهم مدوش نفسهم فرصه الاول للتاكد من شعور الحب ده

    انت قصدك كده ؟؟؟ انا فعلا بحس ان ناس كتير بتكون كده

    ردحذف
  5. انتى لسه متعرفيش ان مش بقول صح ولاغلط
    هههههههههههه بعتبره سر من الاسرار الحربية
    تابعى معايا وهتعرفى وبعد القصة ماتخلص اقدر انى اتكلم براااااااااااااحتى

    ردحذف
  6. ايمن شاهين10 مارس، 2012 2:30 ص

    بررررررررررررررررررررررررررررافو يادينا انا عارف انك كاتبه جامدة جداااااااااااااااااا

    ردحذف
  7. انا المتابعنة الجديدة معاكي يادينا وبقرا قصصك وعجبتني اوووووووي مرسياوووووووي يادينا

    ردحذف
  8. حاسة ان البداية سريعة اووووووووووووووووووى

    ردحذف
  9. 7 سنين ولسه واخد باله منها
    الظاهر انها كانت بتحبه ولا ايه

    ردحذف
  10. قصة وأحداث جميلة ومشوقة جدا
    تفسير الاحلام

    ردحذف
  11. كل رواياتك تحفة وبتابعها كلها ومستنية الجديد ياتري ايه

    ردحذف

قول رأيك بلاش تقرا وتقفل من سكات...ارائكم تهمنى