الاثنين، 12 ديسمبر 2011

بين نارين... الحلقة 10

الحلقة 10
وقفل طارق التليفون مع بسمة
وشه اتقلب.. وقام يلف فى المكتب
"اعمل فيها ايه بس ياربى"
دخلت راوية
"استاذ طارق...انا جاهزة للشغل"
"لالالا مش فاضى دلوقتى خالص... بعدين بعدين"
اتحرجت راوية ...عيونها دمعت من كتر احراجها
خرجت بسرعة من المكتب...وهى مستغربة
"اللى كان لسه بيقابلنى بكل ترحاب وفرحة دلوقتى بيشخط فيا"
شافتها السكرتيرة
"مالك يا استاذة راوية"
"مفيش"
شافوا الاتنين طارق خرج من المكتب بسرعة
ورزع باب مكتبه وراه
ومكلمش حد وهو ماشى على غير عادته

طارق سايق بعصبية شديدة... وطالع بيته وكانه رايح خناقة
واول مافتح باب الشقة...نادى بصوت مرعب
"بسسسسسسسسسسسمة"
مردتش عليه وسمع صوت عياطها فى الاوضه
راح لها
"انا عايز افهم ايه اللى قلتيه فى التليفون ده"
وزعقت بسمة لطارق
"اييييييه اللى انا قلته يخليك تقفل فى وشى وكمان تيجى تكمل معايا خناقة فى البيت... قلتلك حامل هو انا مش مراتك وامر طبيعى انى ابقى حامل"
"حمل ايه دلوقتى اللى بتحمليه... ده انتى كنتى بطولك وكنا متشحططين كل واحد فى بيت ولا كنتى بتهتمى بيا ولا قاعدة معايا وكنت حاطط جزمة فى بؤى وساكت وكل شوية اقول معلش كلها كام شهر ونخلص... حتى بعد ماولدتى برضه بتشتكى البت بتزن البت تعبانة البت مش عارف ايه... جاية كمان تقولى لى حامل"
"بدل ما تفرح تعمل كده"
"افرح بايه... هو انا متجوز ارنبة هتجيبلى كل سنة عيل"
"غيرك مش لاقى ضفر عيل"
"ربنا يديهم... انا عايز احس باهتمام مراتى بيا... عايز الاقى ست فى البيت فاضية ورايقة ومتزوقة ومستنيانى بعد اليوم الطويل اللى بشوفه"
"يا سلاااااااااااام وانا اللى صاحية طول الليل والنهار والبت اللى مش بتنام ساعتين على بعض والاكل والشرب والبيت وكل حاجة بعملها...اقطع نفسى انا ولا ايه"
"ماانا لما جبتلك شغالة مشيتيها"
"خلاص نشوف واحدة تانية"
"والله ماانا جايب لك شغالات... هو بمزاجك واحدة تمشى وواحدة تيجى"
"خلاص اللى حصل حصل وانا حامل وخلاص"
"لا مش خلاص... البيبى ده ينزل ولما جودى يبقى عندها سنتين تلاتة ابقى خلفى تانى...مين يقول بنتك عندها 6شهور وتحملى"
"انت اكيد مجنون"
وفجأة ضربها قلم على وشها... من قوته وقعت على الارض
اتفاجئ طارق باللى عمله... وقف لحظة محتار يصالحها ويعتذر لها
بس كده هيبقى موافق على الحمل
ولا يسيبها ... حسم حيرته انه سابها ومشى

قعدت بسمة تعيط...واخدت جودى فى حضنها
وحطت ايدها التانية على بطنها... وهى بتعيط
وحاسة بقهر وألم ومش عارفة تتصرف
حست ان كرامتها اتهانت كتير اوى... مش من ضربة القلم بس
لا لما كمان رافض انه يخلف منها تانى
وبيتهمها باهماله كزوج... وبيعايرها انها كانت تعبانة فى حملها
قامت وهى منكسرة جابت شنطة كبيرة ولمت هدوم جودى وحاجتها المهمة وهدومها... ولما جت عند علبة دهبها
اخدت دهبها هى بس وسابت الشبكة...ونادت على البواب يشيل معاها الشنطة ...واخدت جودى ونزلت

طارق نزل زعلان جدا من رد فعله العنيف مع بسمة
واللى المفروض مكنش يوصل لكده
رن موبايله... شاف انه رقم المكتب
"الو... ايوه يا سحر"
"استاذ طارق فيه مواعيد مع حضرتك النهاردة وانا مش عارفة حضرتك راجع ولا وراك حاجة النهاردة"
"لا انا جاى اهو"
وقفل طارق مع السكرتيرة وحاول يهدى نفسه علشان يعرف يشوف شغله
وصل طارق مكتبه... ولاحظ ان راوية مش موجودة على مكتبها
بعد ما دخل مكتبه... وحضر القضايا اللى هيديها لراوية
وضرب جرس للسكرتيرة
"ادى القضايا دى لراوية وقوليلها تاخد فكرة عنهم علشان نتكلم فيهم بكرة"
"راوية مشيت"
"يعنى ايه مشيت... هى المواعيد بمزاجها"
"بعد ماخرجت من مكتب حضرتك قعدت تعيط كتير وبعد مانزلت هى نزلت وقالت انها مش راجعة تانى"
"طيب ياسحر...روحى انتى  متشكر"
وحس طارق انه كان اوفر مع الناس كلها حتى راوية
مسك موبايله...وجاب رقم راوية واتصل بيها
"الو... ايه يا راوية انتى فين"
"انا مستقيلة من المكتب يااستاذ طارق"
"مستقيلة مرة واحدة...ليه بس كده"
"استقيل قبل ما اتطرد من حضرتك"
"ومين ده اللى يقدر يطردك... المكتب ميستغناش عنك يااستاذة"
"العفو يااستاذ طارق... المكتب دايما مفتوح بوجود حضرتك فيه"
"وحضرتى بيعتذر لحضرتك"
"مفيش داعى للاعتذار... معلش انا مش هقدر اكمل"
"خلاص بقى ياراوية ...انا اسف انا كنت متنرفز غصب عنى"
واتغيرت نبرة راوية وكانها بتتكلم بفرحة بعد الغضب
"خلاص يااستاذ طارق ..حصل خير ..هاجى المكتب بكرة ان شاءالله فى معادى"
"لا بكرة ايه...انتى لازم تيجى دلوقتى...انا محتاجلك جدا"
"دلوقتى...انا قربت من البيت"
"ارجعى تانى...فى قضية مش هديها لحد غيرك...يالا بقى متتاخريش"
"حاضر"
بعد ما قفل طارق مع راوية...مسك القضية اللى قدامه وبدأ يقرا فيها
رن موبايله... شاف الرقم... وشه اتقلب وهو بيرد
"الو... اهلا ياعمى"
"اهلا ايه... انت ايه اللى عملته فى بنتى ده"
"مشكلة وممكن تحصل فى اى بيت"
"مشكلة لما تكونوا مختلفين فى وجهات النظر...انما عايز تسقطها وكمان تضربها ده اللى مش ممكن اسمح بيه ابدا"
"هى اللى غلطت فيا"
"لو غلطت فيك تعالى قولى وانا اجيبلك حقك...انما تضربها انت مش اخدها من الشارع دى بنت ناس ولازم تحترمها"
"بنتك غلطانة ياحاج... رايحة تفكر فى خلفة ولسه بنتها على كتفها"
"خلاص ياطارق...انت مش عايز ابنك اللى جاى انت حر...انما انا عايز بنتى وولادها فى عنيه...ورقة طلاقها توصلها بالذوق احسنلك"
"انت بتهددنى"
"احسب اللى تحسبه... طلقها بارادتك بدل ماارفع لها خلع وشوف بقى لما زمايلك فى المحكمة يشوفوك وانت بتتخلع"

هناك 12 تعليقًا:

  1. حلوةاوىىىىىىىىىىىىى
    بس عايزة بقيت الحلقات بسرعة جداااااااااااااا
    تسلم ايديك

    ردحذف
  2. هههههههههههههههههههه تحفة الحلقة يا مدبتعتنا العظيمة بجد لذيذة وشيقة اوى

    ردحذف
  3. تسلمولى ياقمراااااااااااات
    متحرمش منكم ابدااااااااااا

    ردحذف
  4. حلوه الحلقه دي ... بس برضه راويه اللي المفروض انها بنت متعلمه و واضح انها مثقفه طلعت كمان هبله و بتعيط و تزعل علسشان مديرها قالها مش فاضي دلوقت بعدين ؟؟؟ كانت نص بنات مصر سابت شغلها بقي ....لا بس حلقه حلوه و شخصية طارق دي الشخصيه الوحيده من اول القصه اللي تعتبر واقعيه و ليها ابعاد نفسيه

    ردحذف
  5. ميرسى يامى
    واضح ان القصة بدأت تعجبك
    اتمنى انها تكون عجبتك فعلا

    ردحذف
  6. يا دينا مش عارف اقفل النت ... وصلت للحلقة التاسعة وورايا شغل وعايز اكملها .... احييكي جدا علي القصة اللي شكلي كده هاخلصها النهاردة ... تحياتي

    ردحذف
  7. علاء
    ههههههههه ربنا يخليك
    شوف شغلك وبعدين لما تخلص تعالى كمل
    المدونة موجودة... ومستنية رايك لما توصل لاخر حلقة اتنشرت"لان القصة كلها لسه مخلصتش

    ردحذف
  8. جاااااااامد مووووت القصه

    ردحذف
  9. علي فكرة هي بسمة ال غلطانة اووووووي كماااااااااان مكنش لازم يعني حلوة اووووووووووي يادينا تسلمي جااااااااامدة جدا القصة

    ردحذف
  10. شخصية بسمه دي تافهة وسطحية وبجد مستفزه
    Mima

    ردحذف
  11. شكرا لمجهودك

    ردحذف
  12. اولا قصصك كلها تحفة بجد انا هى الحاجة الوحيدة اللى بتسلينى فى الاجازة ومش شايفة ان بسمة غلطانة ولا حاجة بالعكس هى عندها حق اوى

    ردحذف

قول رأيك بلاش تقرا وتقفل من سكات...ارائكم تهمنى