الخميس، 15 ديسمبر 2011

بين نارين... الحلقة 14

الحلقة 14
نزلت راوية من بيتها ...راحت اشترت 2 بيتزا
وراحت على المكتب
اول ما دخلت كان فيه عمال كتير...حوالى 4 بيشتغلوا فى حيطان المكتب... وكان كل الاثاثات المحروقة مش موجودة
وشافت كرسى خشب واحد
وطارق واقف مع العمال
اول مرة تشوفه مختلف كده
لابس بنطلون جينز وقميص وكوتشى
عمرها ماشافته غير بالبدلة سواء فى المحكمة او المكتب
كان شكله اصغر بكتير من العادى... وكان باين فيه حيوية الشباب وهو واقف مع العمال
كل ده وراوية واقفة عند الباب محسش بيها غير لما خبطت على الباب المفتوح
"راوية؟؟؟ خير... تعالى"
ودخلت راوية ودخلت وراه فى اوضه تانية مفيهاش حد
وفاضية تماما... يدوب ارض وحيطان وسقف
"ايه اللى جابك ياراوية دلوقتى؟؟ انتى مش لسه مخلصة المحكمة من شوية"
"انا قلت انت اكيد متغدتش ... بصراحة صعبت عليا وجبت اكل نتغدى مع بعض... لو مكنش يضايقك يعنى"
"والله انتى بنت حلال كنت لسه بفكر اطلب اى ديلفرى"
"انا مش عارفة انت بتحب ايه فجبت 2بيتزا واحدة سى فود وواحدة بالمشروم"
"بجد انتى تعبتى نفسك اوى... انا مش بغلب فى الاكل ومتعود على الديلفرى"
"ليه؟؟هى المدام مش بتطبخ"
"لا ياستى المدام حامل لتانى مرة وتعبانة فقاعدة عند مامتها"
"ربنا يقومها بالسلامة"
"هجيبلك كرسى من بره ..ثوانى"
راح جاب الكرسى... وكل ده راوية ماسكة البيتزا فى ايديها
"يعنى انا هقعد وحضرتك هتفضل واقف...ميصحش"
"لا ميصحش ان انا اللى اقعد وانتى واقفة"
ضحكت راوية ...
"امممم... يبقى مفيش غير حل واحد... اتفضل امسك"
وناولته البيتزا اللى فى ايديها... وفتحت شنطتها... طلعت جورنال
"يالا ...لسه مقريتهوش بس مش خسارة يبقى ترابيزة وكراسى"
وفردت راوية ورق الجورنال كله على الارض
واخدت منه البيتزا وحطيتها فى النص.. وقلعت جزمتها
وقعدت على ورق الجورنال
"يالا اتفضل اقعد"
"انتى ازاى كده"
"كده ازاى يعنى"
"شاطرة فى كل حاجة وعندك حل لكل حاجة وبتحليلى مشاكلى قبل ما افكر فيها"
"اى خدمة... وبعدين انا شاطرة علشان تلميذة حضرتك ...ناكل بقى"
قعدوا ياكلوا مع بعض... وبعد ما خلصوا سألته راوية عن جلسات تانى يوم وهتعمل ايه فيها
وبعد حوالى ساعة
"انا ماشية يااستاذ طارق...عايز حاجة"
"ربنا يخليكى ...وشكرا على العزومة الحلوة دى"
"العفو...ده من خير حضرتك"
"الدور عليا بكرة اردلك العزومة"
"لالا ترد ايه؟؟؟ معقول برضه"
"ماهو انتى لازم تيجى علشان تعرفينى عملتى ايه فى جلسات بكرة وتتغدى معايا...ولا عايزانى اتغدى لوحدى"
ردت بفرحة مدارية
"حاضر...بعد المحكمة ان شاءالله اجى على هنا"

طارق كمل اليوم لحد الساعة 9 بالليل وهو من 9 الصبح واقف مع العمال... كان تعبان جدااا
بس اول ما دخل البيت اتصل ببسمة يسأل عليها هى وجودى
لانها طول النهار مكلمتوش
"الو... ازيك يا بسمة"
"لسه فاكر تكلمنى دلوقتى ياطارق"
"انا من الصبح واقف على رجلى مع العمال فى المكتب... انا عايز اخلص وافرش فى اسبوع ولا 10 ايام بالكتير اوى"
"وانا وبنتك خلاص مش فى حسبانك"
"انا لو مش مهتم بيكى مكنتش جيت على نفسى وخليتك تروحى عند مامتك علشان تبقى مرتاحة"
"وانا برضه محبتش اقلقك ومرضيتش اتصل بيك واقولك انى نزفت النهاردة وماما ودتنى للدكتور"
"نزيف؟؟ ليه ومن ايه؟؟ والدكتور قالك ايه؟؟"
"الدكتور قال انه انذار باجهاض... وقال لازم انام ومتحركش خالص ولا اطلع سلم ولا اعمل اى مجهود... وادانى علاج وبدأت اخده"
"وانتى عاملة ايه دلوقتى"
"ماما مش مخليانى اقوم من السرير وهى اللى بتعمل كل حاجة ليا ولجودى"
"سلامتك ياحبيبتى... ارتاحى انتى ومتشغليش نفسك غير بصحتك"
"انت بتتريق عليا"
" لا اله الا الله ... وهتريق ليه بس ... بسمة اقفلى انا تعبان ومش قادر للكلام ده"
"انت هتتقمص وتقفل"
"لا انا عايز انام...تصبحى على خير"
"استنى بس... "
"خلاص يا بسمة تصبحى على خير"

بعد مارجعت راوية من المكتب
كانت حاسة انها بتتعامل مع طارق لاول مرة
او واحد تانى غير طارق اللى تعرفه
مكنتش بتفكر فى اى حاجة غير انها فرحانة
ومحاولتش تفكر هى فرحانة ليه اصلا
كل ما كانت تفتح قضية تفتكر طارق
كلامهم مع بعض... وقعدتهم سوا ع الارض
حست انها اقرب واحدة فى المكتب لطارق
وسألتها مامتها
"انتى نزلتى بسرعة كده ليه ياراوية"
"اصل كان لازم اروح المكتب علشان حاجة مهمة"
"حاجة ايه دى؟؟مش المكتب اتحرق"
"ايوه بس انا كنت رايحة للاستاذ طارق نفسه علشان شغل بكرة"
وقطعت راوية الكلام مع مامتها...بتركيزها فى القضايا اللى فى ايدها

حاول طارق ينام بس اتضايق من كلام بسمة
قام...وفضل يلف فى البيت شوية...وراح مسك التليفون واتصل براوية... بعد ما اتصل فكر مش عارف يقولها ايه؟؟
ردت راوية
"الو...ا\طارق"
"ايوه...ازيك ياراوية"
"بخير الحمدلله... انت لسه فى المكتب ولا ايه"
"لا انا فى البيت جيت من شوية"
"حمدالله ع السلامة...تلاقيك مش قادر حاول تستريح وتنام بدرى وبالنسبة للشغل متقلقش خالص كله تمام"
"انا عارف ان الشغل معاكى يبقى تمام... بس انا كنت عايز اسألك على حاجة تانية"
"خير؟؟"
"نسيت اسألك بتحبى ايه؟؟علشان غدا بكرة"

هناك 32 تعليقًا:

  1. اوباااااااااااااااا شكلى هزعل من طاارق وربنا مع بسمه بقى

    ردحذف
  2. يا حنين ههههههههههههههه

    ردحذف
  3. رباب
    متزعليش...هو يدوب بس بيعاملها كويس

    ردحذف
  4. بجد انا متعجبة من طارق جدا وطريقتة بصراحة دى مش حياة وبعدين اذا كانت بسمة تعبانة شوية لازم يستحمل شخصية غريبة ولا كلهم كدة؟

    ردحذف
  5. مظبوط الغالبيه العظمي كده ان مكنش كلهم صفه اساسيه فيهم الاتاتيه بجد لكن لو العكس كانت هي استحملته

    ردحذف
  6. غير معرف
    انا مش عارفة انتى حد واحد كتب 2كومنت
    ولا شخصيتين مختلفين
    لو مختلفين...يبقى انا بتفق مع ان اغلبهم كده فعلا

    وبرد على الكومنت الاول
    اننا مينفعش نقول محدش فيهم غلطان
    بس للاسف كل واحد غلط له عذره
    هو اهتم باللى مهتمة بيه
    وهى مهما كانت تعبانة مينفعش تنساه خالص اوى كده

    ردحذف
  7. التعب مخليها مش قادره وياااااريت الحلقه الجديده لييييز لاني صاحيه من بدري وهموت وانام ومستنيه الحلقه

    ردحذف
  8. غير معرف
    تبقى مش متابعانى "هقولك خبر وحش"
    الخميس والجمعة اجازة وحلقة امبارح كانت استثناء
    يعنى نامى انتى واوعدك لو كتبت الحلقة الجديدة النهاردة هنزلها علشان خاطرك وتبقى تشوفيها بكرة
    "اذا قدرت اخلصها"

    ردحذف
  9. يا لهوووي ده انا هموت من التشويق ده ومش متبعاكي ازاي ده انا خلصت الارشيف كله وزعلانه اوي ان الروايه دي مش كامله طيب هي كام حلقه..... ايه

    ردحذف
  10. منورانى ياايه
    قصدى مش متابعانى على الفيس كمان
    لانى بكتب فيه التطورات يوم بيوم
    يعنى الحلقة نازلة بدرى..متاخر ..وهكذا
    وموضوع كام حلقة ده مش بحدده والله
    انا بكتب لحد القصة ماتخلص
    "انتى متابعة جديدة؟؟؟؟؟"

    ردحذف
  11. اه متابعه جديده بس خلصت الارشيف في اسبوع كنت مش بعرف انام الا لما اخلص الروايه كلها وتاني يوم ابدا في راويه جديده بس تعبانه اوي في الروايه دي اصل انا الفضول والتشويق بيموتني.......ايه

    ردحذف
  12. ايه
    هههههههه معلش التشويق ده من اساسيات المسلسلات
    وان شاءالله تتابعينى كل يوم "وتتعودى على التشويق"
    بجد سعيدة بيكى...نورتيييييييييينى

    ردحذف
  13. من الاول وانا بقول طارق مثال للراجل الشرقي اللي دايما حاطط نفسه اولا ...يعني هو وسط الشغل اللي طول اليوم ملاقاش 5 دقايق يكلم قيهم بنته و مراته و لقي ساعه يقعد يتغدي مع راوبه ؟ هو صحيح انا عجباني شخصية راويه اكتر حاسه انها بنت شخصيه قويه و يمكن اتعاطف مع مشاعرها لطارق بس طارق هو اللي مالوش اي عذر من اي نوع انه يكتر في التاعمل مع واحده تانيه ؟!!

    ردحذف
  14. موافقاكى طبعا ومعنديش اى تعليق على كلامك

    ردحذف
    الردود
    1. والله انتى قصصط تحفه بس بدى طلب انك تعملى حلقات جديده اوجزء تانى من ليست عزراء

      حذف
  15. حلوة اووووووووي يادينا الحلقة مرسي



    انا متابعة جديدة معاكي ياديناوعجبتني القصص ال بتكتبيها اوووووووي

    ردحذف
  16. e7m e7m tarek shklo besthbl :D

    ردحذف
  17. وابتدي ابتدي ابتدي ابتدي المشوار !


    مونه

    ردحذف
  18. انا شيفه ان طارق بيستهبل اوى وراويه كمان المفروض يكون فيه حدود للتعامل هي تقريبا تخطتها ولو مفرملتش هيبقي غلط

    ردحذف
  19. حلوة جدا بجد تحفة وهوا مغلطش انو بيهتم بي وحدة تانية وبيكلمها لانو هوا يعتبر محروم مش لاقي الحب وان مراتو مش مستحملا ولا مقدرا ابدا انا اعرف ستات تعبانة عمرها مبتعرف اجوزتها اي حاجة ولو كان مبيسالش ماهي عارفة انو منيل تعبان ومشغول مش كل شوية قفش انا علي فكرة بنت بس مقدرة اللي الرجالة فية لانهم صعبانين علياا لازم يقدرو شوية ولو هي قدرت اكيد هوا مش هيبص لغيره لانو سعتها مش هيكون محتاج وحدة تانية

    ردحذف
  20. حاجة سخيفة ذارق ذلع خاين ليه كده؟ يعنى هى بسمة كانت بتخلف لوحديها؟
    و راوية زيها زى اى واحدة بتخرب بيت حد تانى

    ردحذف
  21. سهوكة بقى

    ولما هو بيعرف يهتم اوى كده ويسألها عايزة تاكلى ايه ما يخلى الاهتمام ده لمراته وبنته احسن ولا لحد عندهم وهو مشغول يعنى

    ردحذف
  22. اما هو قادر يتكلم ويسال بتحبى ايه وعاوزة تاكلى ايه ويجامل فين دا كله مع مراته؟؟؟؟؟
    انسان غير محترم وراوية كمان لازم تلتزم بحدودها مع راجل متزوج
    اكتر حاجة باكرهها الى تفضل تقول للراجل هى مراتك مش بتعمل لك اكل معقول مش بتصحى تكويلك وتجهز لك فطار قبل ماتنزل وبالمعنى الحرفى اسمها مياعه مش مجرد بنت مصدومة فبتدور على اى كلمة حلوة

    ردحذف
  23. بصراحة انا متضايقة من طارق وراوية دي هي اللي هتخربها خالص

    ردحذف
  24. الصدمه الكبيره لو حب راويه ! :O O.o

    ردحذف
  25. ايه الكلام ده .. يعني هو مش قادر يكلم مراته حتي لو دقيقتين ازيك عاملة ايه . وخلاص !!
    وساعة بحالها يقعد يتغدا مع رواية !!

    ردحذف
  26. هوا هيتجوز راوبه ولا ايه o.O

    ردحذف

قول رأيك بلاش تقرا وتقفل من سكات...ارائكم تهمنى