السبت، 17 ديسمبر 2011

بين نارين...الحلقة 15

الحلقة 15
تانى يوم بعد بعد ما خلصت راوية المحكمة
راحت على المكتب حوالى الساعة 4 العصر
اول ما وصلت على باب المكتب...الباب كان مفتوح
دخلت خطوة...مشفتش العمال بتوع امبارح
والمكتب شكله فاضى ... فكرت
"ياترى حصل ايه خلى محدش موجود والباب مفتوح"
وهى بتفكر ضربت جرس الباب
جه طارق من جوا
"اهلا ياراوية تعالى... اتأخرتى كده ليه"
دخلت راوية بتأنى
"هما العمال فين"
"نزلوا علشان خلصوا تأسيس وبكرة جايين يبدأوا دهان الحيطان... انتى مكسوفة تدخلى ولا خايفة؟"
اتفاجئت بالموقف كله...هى مكسوفة فعلا
انما خايفة؟؟ اكيد لا... عمرها ما شافت من طارق اللى يخوفها
"ساكتة كده ليه ياراوية... اول مرة متبقيش غلباوية"
وحست بخفة دم طارق... وضحكت وهى داخلة
"انا غلباوية؟"
"اه...بس مش رغاية... كلامك دايما بيكون فى المفيد... تعالى واقفلى الباب وراكى"
قفلت راوية الباب...ودخلت ورا طارق
"ايه ده؟؟ جبت الحاجات دى امتى"
"من شوية ...قلت مش معقول هناكل على الارض تانى نزلت جبت الترابيزة دى والكرسيين علشان نتغدى عليهم"
كانت الترابيزة محطوطة وعليها حاجات كتير ملفوفة بورق حرارى
"اتفضلى ياراوية"
راحت راوية تقعد على الكرسى اللى شاورلها عليه طارق
وبدأ يفتح الاكل
"بصى انتى مرضيتيش تقولى هتاكلى ايه وانا معرفش بتحبى فايه فطلبت لحوم وفراخ "
"لمين كل ده...دى وليمة مش عزومة غدا"
"اعتبريها تعبير عن شكرى ليكى... يالا بقى انا مستنيكى من بدرى"
وبعد ماخلصوا اكل ... قام طارق يغسل ايده
وقبل ما يخرج من الاوضة اللى هما فيها
كان فيه فى الارض جرادل البوية... وكام بقعة على الارض
اتزحلق فيهم طارق
وانفجرت راوية فى الضحك على طارق وهو واقع على الارض
وضحك طارق على ضحك راوية...وعلى نفسه وهو لسه ع الارض ... وقامت راوية وهى بتضحك
"مش تخلى بالك ههههههههههههههه"
"هههههههههههه بتضحكى عليا"
وجه طارق يقوم اتزحلق تانى ... وكملوا ضحك الاتنين
"هنفضل نضحك كده وانا مش عارف اقوم"
مدت راوية ايدها لطارق تشده
"خلى رجل بعيدة عن البوية علشان منتزحلقش احنا الاتنين"
وسمع كلامها وحط رجله بعيد عن البوية
ايدها اليمين فى ايده اليمين كأنها بتسلم عليه
وشدته راوية بكل قوتها
مع قوة الشدة... كانت هتقع لورا
لحقها طارق من وسطها بايده الشمال
ايديهم فى ايد بعض... وايده التانية فى وسطها
ارتبكت راوية وهى فى حضنه
وارتبك طارق ... وخاف تفتكره يقصد حاجة هو فعلا ميقصدهاش
بعدوا الاتنين عن بعض بسرعة
واتكلم طارق وهو بيضحك ويبص لهدومه
"هروح ازاى انا كده"
بنطلونه كان ببقع البوية
ضحكت راوية على شكله
"هههههههه مش مشكلة انا عندى حل"
"خير"
"ممكن انزل اشترى لك بنطلون تانى"
"هتعرفى"
"اعتقد لو روحت اى محل وقلت عايزة بنطلون مقاس كذا هختار واحد واجى...مش كيميا يعنى"
"يعنى مش هتعبك معايا"
"ابدا ابدا...تعبك راحة"
وقالها طارق على اسم محل ومقاسه..وادالها فلوس فى البداية رفضت وبعدين مع تصميم طارق ...اخدت فلوس البنطلون

لما رجعت راوية لطارق... عجبه البنطلون اللى جابته
"هدخل اغير واجيلك"
"انا لازم انزل دلوقتى لان ماما كلمتنى وقالتلى انى اتاخرت اوى"
"بسرعة كده"
"بسرعة ايه الساعة بقت 8 وانا هنا من الساعة 4"
"ومتنسيش فيه ساعة كنتى بره... بس بجد محسيتش بالوقت"
"فعلا اليوم عدى بسرعة اوى"
"هستناكى بكرة"
"مش عارفة ربنا يسهل"
"لا لازم تيجى... عايزك بدرى كمان"
"بدرى؟؟ والمحكمة"
"ادى القضايا لاى حد كلها جلسات هتتأجل ولازم تكونى موجودة بكرة"
"ليه لازم"
"اولا ... عايزك تختارى معايا الوان الحيطان... ثانيا عايزك تنزلى تنقى معايا فرش جديد للمكتب"
استغربت راوية... وحاولت متبينش فرحتها بانه مهتم ياخد رأيها
"انا؟؟ عايز تاخد رايي فى كل ده"
"ايوه...انتى ذوقك حلو جدا فى كل حاجة واكيد هتساعدينى فى الاختيار"
وترددت راوية شوية... رغم فرحتها
"هستناكى بكرة الساعة 10 الصبح..ماشى؟؟"
"ماشى"
ورن موبايل طارق... وشاف انها بسمة...رد عليها وراوية واقفة
"الو... الحمد لله يابسمة...انتى صحتك عاملة ايه"
وشاورت له راوية انها ماشية... رد طارق بسرعة
"ثوانى يا بسمة"
وحط ايده على الموبايل علشان يكتم الصوت... ووصل راوية للباب
"هستناكى الصبح متتأخريش عليا"
وودعوا بعض بابتسامة... فيها معانى الاشتياق لبكرة

اول مادخلت راوية البيت... سألتها مامتها
"اتأخرتى ليه كل ده"
"كان عندى شغل"
"انتى من 8 الصبح بره...شغل ايه اللى متواصل لحد دلوقتى"
"ماانا ياماما قلتلك انى هطلع ع المكتب"
"المكتب محروق يبقى شغل ازاى"
"ماهو انا كنت مع الاستاذ طارق بنحضر لشغل بكرة"
"اتغديتى؟؟"
"ايوه..هو طلب اكل فى المكتب"
"يعنى كلكوا بتروحوا المكتب عادى؟؟"
"لا طبعا المكتب لسه بيتوضب"
"يعنى انتى المحامية الوحيدة اللى بتروحى.... اشمعنى"
"علشان انا اصغر واحدة وكلهم خبرة عنى فلازم يقولى كل يوم على شغل تانى يوم ويتمم على شغلى"
"ميصحش كده طالما محدش بيروح... يبقى يشوف شغلك فى المحكمة"
"بس هو مش بييجى المحكمة وبعدين استاذ طارق راجل محترم"
"انا مجبتش سيرة محترم ولا لا...انا بقولك ميصحش تروحيله المكتب لوحدك... متروحيش تانى غير لما كل الناس ترجع ابقى ارجعى زيهم"

هناك 22 تعليقًا:

  1. مش طايق طارق ده خاااالص وشكر بجد يادينا علي الحلقه ومنتظره الجديده علي نااااار ....... ايه

    ردحذف
  2. القصه جميله جدا ونفسي اكلمها ومش لاقيه بقيت الحلقات لو حد قراها قبل كدة ولا جاب باقي الحلقات ياريت يقولى بجد نفسي اكملها اوى واعرف هيحصل ايه

    ردحذف
  3. هي القصه في الارشيف تبعيها من الاول واقفه لحد هنا المفروض دينا تنزلنا الحلقه الجديده النهارده.... ايه

    ردحذف
  4. الأستاذ طارق بهدل كل حاجه كده انا اتخنقت منه ذنبها أيه مراته طيب بجد حرااااااااااام

    ردحذف
  5. يا خساره شكل مفيش حلقه النهارده انا استني لما الروايه دي تخلص خالص وابقي اتبعها بقي..... ايه

    ردحذف
  6. انا ممكن اسئل سؤال هى القصه دى مش خالصه يعنى لسه مكملتش ولسه نازله اول مرة النت ولا نزلت قبل كدة اصل دروت فى النت كتير جدا مقلتش بردة غير الحلقات دى بردة

    ردحذف
  7. معلش يا آيه
    انا اصلا كنت قايلة هاخد الخميس والجمعة من كل اسبوع اجازة
    فالاسبوع ده اخدت السبت مكانهم ^_^
    هنكمل النهاردة ان شاءالله

    ردحذف
  8. غير معرف
    اهلا بيكى متابعة جديدة
    بالنسبة للقصص عموما فهى كلها كتاباتى والمفروض انها متكونش فى اى مكان تانى الا باذنى شخصيا"ردا على انك دورتى ملقيتيهاش على النت"
    وانا بكتب كل يوم حلقة وبنزلها هنا فى المدونة
    وبين نارين بكتبها حاليا يعنى هى لسه مخلصتش فعلا
    وتابعينى يوميا ان شاءالله لنهايتها
    اما القصص اللى خلصت هتلاقيها فى الارشيف
    نورتيييييييينى بوجودك

    ردحذف
  9. القصة حلوه جدا وانا اول مرة اشوفها امبارح وقرات ال15 حلقة ومستنية تنزلي الحلقة الجديدة هي حتنزل امتى؟؟؟؟؟

    ردحذف
  10. ميرسى كتييييييييييير لرأيك
    وان شاءالله تقراى القصص اللى قبلها ويعجبوكى
    الحلقة نزلت وغالبا معاد الحلقة بيكون بالليل
    من 10 وانتى طالعة"مش معاد محدد بالظبط يعنى"

    ردحذف
  11. شكرا على رد حضرتك للسؤال بس بجد قصه جميله جدااااااااا اااااااا انا حبيت اقراها اوى وافضل كل شويه اقعد على النت اشوف حلقات نزلت ولالا كتباتك رائعه بجد

    ردحذف
  12. العفو...انتى نورتينى
    وميرسى كتيييييير على كلامك الحلو ده

    ردحذف
  13. طارق كمان عنده انفصام في الشخصيه ؟؟؟ ليه مع راويه انسان تاني غير مع بسمه ؟ يمنك علشان راويه شخصيه و لسناها طلق و دمها حفيف و زكيه فعلشان كده اسلوبه معاها شخص تاني خالص ؟ و مع اني متعاطفه مع بسمه بس من الاول وهي شخصيه ضعيفه و حاساها بنت هبله كده مالهاش راي عايشه علشان عايشه و خلاص و اكيد طارق شايفها كده لحد دلوقتي برضه مع ان ممكن فعلا يكون بيحبها بطبيعة انها مراته و ام عياله و كده بس طارق مع راويه بياخد راي و يضحك و يهزر مع بسمه بقي غير خااالص

    ردحذف
  14. بيدور على راحته
    بصى كلهم انانيين
    وكلهم معذورين

    ردحذف
  15. بصراحه انا كرهت طارق ده والله اعتبرته مش محترم بطريقته ده انا لو مكان مراته والله لسيبه واطلب الطلاق

    ردحذف
  16. tarek best3bt bgd , hoa msh wa5ed balo ano mtgwz !!
    TU2aa

    ردحذف
  17. والله الاتنين عيزيين مدفع ينفجر في وشهم هما يعنى مش واخدين بالهم من الحاله اللي وصلوا لها

    ردحذف
  18. انا شايفه انو لو كان حاول مع بسمه وقربها لفكرو كانت هتبقى احسن من راوية كمان هو من الخطوبه وباعدها عن حياتو وشغلو واى واحده لو عاملها وشاركها وخد رايها وقالها محتاجك معايا انتى محتاجة تحسينى فى كذا وكذا هتبقى احسن حد المهم يكون بيحب بجد ومش انانى ومؤمن انو بدل ما بيحب هيقدر يوصل مع اللى بيحبوا للى عاوزوا وهو ايه ضمنو ان راويه دى اصلا لو اجوزت وخلفت مش تهملوا ومش تبقى انانيه مثلا....انا مع خطيبى مكنتش بفهموا وقربنى ليه وفهمتو اللى بحتاجو وهو كمان ودى كانت اهم خطوه بجد غيرت حياتى وفكرى وحياتو

    ردحذف
  19. انا بكره طارق اوي بجد انا.كنت بحب فيه شخص الراجل المصري السبور ودمه الخفيف لكن كرهة فيه الرجل الخاين ال بيحس بالسعاده وهو بعيد عن بنتو ومراتو

    ردحذف

قول رأيك بلاش تقرا وتقفل من سكات...ارائكم تهمنى