الاثنين، 19 ديسمبر، 2011

بين نارين... الحلقة 16

الحلقة 16
دخلت راوية اوضتها تفكر فى كلام مامتها
ومكنش قدامها غير انها تسمع كلامها...وقررت انها الصبح تتصل بطارق وتعتذر له بأى حجة

طارق بعد ما غير هدومه وكانت بواقى الاكل على الترابيزة
افتكر راوية... دايما راوية بتحل له اى مشكلة
فى الشغل دايما بتساعده وبتخلص اى حاجة هو عايزها بسرعة
المكتب لما اتحرق قالت له انها الشغل المهم معاها فى البيت
وهتساعده فى استخراج مستندات بديلة
حتى لما وقع راحت اشترت له بنطلون تانى بكل بساطة
لما وقع... وافتكر لما كانت هى هتقع... ولحقها فى حضنه
رنة تليفونه فوقته من شروده
"الو... ازيك يا بسمة"
"ازيك ياطارق... عامل ايه"
"كويس الحمدلله... انتى اخبار صحتك ايه؟"
"تعبانة والله ياطارق وجودى تعبانى اوى"
"مالها"
"كويسة بس عايزانى افضل شايلاها ولما بشيلها بتعب "
"ومامتك مش بتمسكها بدالك ليه"
"ماما عليها كل حاجة وكمان بتهتم بيها بس جودى هى اللى شبطانة فيا... انت مش عايز تشوفنا ولا ايه؟"
"لا ازاى تقولى كده...بس مش عايز اتقابل مع باباكى...حاسس انه مش طايقنى"
"يااااه ياطارق انت لسه فاكر...خلاص بقى...تعالى شوية علشان انت وحشتنى اوى"
"وانتى كمان وحشتينى... انا خلصت هنا وهانزل اجيلك على طول اهو...وجودى فين علشان وحشتنى "
"اهى صاحية اهى ومش هنيمها علشان تشوف باباها حبيبها"
"ماشى...مسافة السكة"

اول ما وصل طارق بيت بسمة... كانت قاعدة هى ومامتها وجودى
مامتها رحبت
الام"ازيك ياطارق... فينك مش بتيجى ليه"
طارق"معلش يا طنط... انتى عارفة ظروفى انا متبهدل فى توضيب المكتب"
الام"ربنا يعينك يارب... هقوم انا اصحى عمك "
وقامت الام ودخلت تصحى جوزها
قعدت بسمة جنب طارق فى نفس الكنبة
وطارق اخد جودى فى حضنه... كانت وحشاه اوى
وحس انها عارفاه وفرحانة لما شافته
بص طارق لبسمة... وحط ايده على كتفها
وضمها ناحيته وقرب منها يبوسها
بعدت بسرعة
"ايه ياطارق...بابا يدخل علينا"
اتفاجئ طارق من رد فعلها
"بابا ازاى يعنى؟؟ ما يدخل علينا هو انتى مش مراتى"
"مراتك ياحبيبى طبعا...بس انا اتكسف انك تبوسنى قدام بابا"
"هو انا لاقيكى اصلا لا قدام بابا ولا مش قدام بابا"
"انت زعلت ياطارق...متزعلش بس انت عارفنى بتكسف"
"طيب انتى وحشتينى وعايزك تروَحى معايا البيت"
"بس.."
"بس ايه بقى؟؟؟ انا مش عارف انتى عبيطة ولا بتستعبطى"
"انت جاى بعد الايام دى كلها وبتشتمنى"
"ماهو انتى مش عايزة تفهمى انك بقالك هنا فترة وكل واحد مننا فى حتة وانا عايز احس ان مراتى معايا"
"وانا يعنى لو جيت معاك انت هتخلى بالك من جودى وهتسيبنى نايمة فى السرير طول النهار زى ماما ما بتعمل"
"لما انتى مش قد المسئولية ولا الجواز والخلفة ولا انك تهتمى براجل اتجوزتى ليه"
"هى دى وحشتينى بتاعتك... هما دول الكلمتين اللى انت جاى تقولهم لى"
"انا جاى مفيش فى نيتى اى حاجة غير انك وحشتينى فعلا...انما رد فعلك المستفز ده هو اللى ضايقنى"
وقعدت بسمة تعيط
"ماهو انت مش مقدر انى تعبانة وفى البيت انت بتسيبنى وبتبقى طول النهار بره ...وانا تعبانة وجودى بتدوخنى غير مسئولية البيت والاكل والشرب "
"خلاص يابسمة...خليكى براحتك"
ومسك جودى حضنها وباسها... وقام ناحية الباب
"هتمشى ياطارق"
"اه... خلاص اتطمنت عليكوا... خلى الفلوس دى معاكى"
"متزعلش ياطارق انا غصب عنى"
"ماشى ماشى"
وقام طارق مشى ...حاولت بسمة انها تراضيه ... بس هو مستناش

مشى طارق وهو متضايق جدا من بسمة
روح البيت... دخل يعمل شاى
وحاول يحضر اى حاجة ياكلها
لما فتح التلاجة ... لقى العلب تقريبا فاضية
"يوووووه نسيت اجيب اكل بدل اللى خلص"
قفل التلاجة... وطفا البوتاجاز
خرج من المطبخ ودخل مكتبه...ومسك كام ملف قدامه
قعد يقلب فى الملفات...واحد والتانى بملل
قام مسك تليفون البيت... واتصل بمامته
اتكلم معاها شوية وكان عايز يحكيلها انه متضايق
بس لما حكت له انها تعبانة ولسه جاية هى وبسنت من عند الدكتور مقدرش يحكيلها ويشيلها همومه...وقفل معاها
حاسس بخنقة وعايز يتكلم...بص فى الساعة 10بالليل
مسك الموبايل واتصل براوية
"الو...ازيك ياراوية"
"استاذ طارق...ازيك انت"
"انا اسف انى بكلمك دلوقتى...كنتى نايمة؟؟"
"لا ابدا انت تكلمنى فى اى وقت... وانا مش بنام دلوقتى"
"فاضية يعنى ممكن اتكلم معاكى شوية"
"اه طبعا.. مال صوتك"
"مخنوق اوى ومش لاقى حد اتكلم معاه...ملقيتش غيرك انتى"
"ده شرف ليا انك تتصل بيا انا... مالك يااستاذ طارق"
"اولا اعتبرينى صديق وبلاش استاذ لما نكون بنتكلم مع بعض... انا متضايق اوى ياراوية حاسس انى ماليش اصحاب ولا حد حاسس بيا خالص"
"ازاى انت كل علاقاتك بالناس كويسة جدا"
"علاقات اجتماعية عادية...انما محدش قريب منى اقدر احكيله على كل اللى جوايا"
"اعتبرنى انا الصديق واحكى....صوتك مش عاجبنى خالص مع انى لما سبتك فى المكتب من شوية كنت عادى"
"ده كان احلى وقت قضيته من فترة كبيرة...مكنتش متقيد باى حاجة ولا شايل هم حاجة وكنت بجد مبسوط من قلبى"
"وايه اللى ضايقك اوى كده"
"حاسس انى اتسرعت او غلطت انى اتجوزت...مراتى من بعد الجواز وهى بعدت عنى اوى ومش بتهتم بيا... دى حتى مش بتحس بيا ولا بتقدر مشاعرى"
"ازاى يعنى"
"بعد ما اتجوزنا وفى حملها الاولانى قضت اغلب فترة الحمل فى بيت اهلها واستحملت وقلت لما تولد هتهتم بيا...طبعا انشغلت بالبنت وكام شهر وحملت تانى وهى حاليا فى بيت اهلها ومش بتهتم بيا خالص... يعنى مثلا انا نسيت اجيب اكل وانا جاى ملقيتش حاجة اتعشا بيها وخلاص طبعا...لان مفيش حد يهتم انا بجيب ايه ولا مجبتش ايه؟؟هدومى بوديها مغسلة... دى حتى مخدتش بالها انى لابس بنطلون جديد ولا سألتنى جبته امتى ولا منين...انتى نمتى؟"
"لا بسمعك... وبصراحة مستغربة جدا... بس الاهم انت هتتعشى ايه؟؟"
"مش مهم الاكل...فيه حاجات اهم من الاكل...الاهتمام والحب"
"استاذ طارق انا هقفل معاك دقيقة بس واكلمك تانى"
"براحتك مفيش مشكلة...انا اسف انى كلمتك فى وقت غير مناسب"
"لا ابدا...هكلمك تانى...سلام"
وقفل طارق بعد ما حس باحراج انها قفلت معاه وهو بيتكلم معاها كده...وفاتت دقيقة واتنين وتلاتةوهى متصلتش
رن موبايله ...رد بسرعة...سمع صوت راجل
عرف انهمن محل تيك اواى وبياخد منه عنوان الاوردر اللى المدام طلبته؟؟؟ استغرب وبعد ماقال عنوانه واكد على الطلب وقفل
فكر هى بسمة عرفت منين انه مأكلش؟؟وهل كده بتصالحه
رن موبايله وهو سرحان ..رد بسرعة
"الو راوية...انا افتكرتك مش هتكلمينى "
"لا ازاى انا قفلت معاك بس علشان ابعتلك اوردر عشا بس بعد ماكلمت المحل افتكرت انى معرفش العنوان فقلت هو يتصل بيك"
"انتى اللى كلمتيهم...انا مش عارف من غيرك كنت هعمل ايه؟؟ انا بجد ارتاحت وانا بكلمك بس مش عايز اكون مضايقك ولا معطلك"
"ابدا ابدا انا مبسوطة جدا انك كلمتنى"
"هسيبك تنامى وترتاحى وهستناكى الصبح زى مااتفقنا ونتغدا مع بعض "
"بس...بس... انا مش هينفع اجى المكتب الصبح ولا اخر النهار الا لما كل الناس ترجع"
"ليه...ومين هيختار معايا كل حاجة زى مااتفقنا"
"معلش...انا بجد اسفة بس مش هينفع"
"خلاص ولا يهمك... ماهو انا دايما لوحدى اشمعنى انتى اللى هتكونى جنبى"
وانهى طارق معاها المكالمة وقفلوا مع بعض

هناك 25 تعليقًا:

  1. ومسمياها بسمه دى نكد ههههههههههههه

    ردحذف
  2. هههههههههه
    الحمدلله انى مسميتهاش فرحة

    ردحذف
  3. و هي برضه راويه لو في موقف بسمه مكنتش هتعرف تهتم اوي كده ؟ بس طارق ده شخصيه زباله دايما اناني و حاطط نفسه الاول حتي مع راويه مبيفكرش فيها هيا هو بس بيفكر ازاي بتريحه وازاي بينبسط و هو بيكلمها لكن هي بقي ؟؟ هل فكر انه كده ممكن غصب عنها تجيلها مشاعر تجاهه طبعا عمره ما فكر كده انا شايفه بعد الحلقه دي ان راويه ضحيه و بسمه ضحيه

    ردحذف
  4. تحليل رائع
    بس منقدرش نعفى بسمة من المسئولية

    ردحذف
    الردود
    1. انتى ليه يا دينا متخاملة على بسمةظ اسه هى مسؤليتها؟ هى عندها بيبيى و حملها صعب و هاتخلف تانى
      طارق انانى

      حذف
  5. والله يا دينا بعد ما وصلت لل16 شكلي كده هاكره الجواز من اصله

    ردحذف
  6. هههههههههههههههه
    مش كل البنات بسمة
    ولا كل الرجالة طارق

    ردحذف
  7. كل الاشخاص عليهم جزء من الغلط :

    بسمه : ظروفها الىل اتحطت فيها دى مخلياها اه تعبانه ومش قادرة تقوم بالمهام الطبيعيه لجوزها : انها تبقى معاه فى بيت واحد وان يحس انه بيرجع تعبان لبيت وفيه اكله وهدوم وحاجة مترتبه

    بس هى ممكن بردو تقوم بجزء من الواجب ده : عن طريق حتى التليفون

    انها تطمن عليه كل شويه : وتبطل بجد كل شويه احنا مش فى بالك ؟ انت فين من الصبح ...الكلام ده حتى وان كانت ممكن يبقى ليها حق فيه..بس الست الذكيه تنقى الوقت او الطريقة ..انما كده يتدوس على الحرج اكتر ..خصوصا ان الظروف خلت طارق يستحمل وضع منقدرش ننكر انه صعب عليه ..وهو على فكرة بياعملها كويس بردو الا حد ما

    طارق: محطوط فى وضع صعب فعلا ..بس بردو مفروض ولو تليفون كل شويه لمراته ..يشاركها احاسيسه او اى حاجة فى باله

    ويحاول يلطف الجو بينه وبني حماه ..عشان يوم كده يخطفه يروحلهم ويقضوا يوم حلو سوا

    راويه : ياريت تركز شويه ومتستمحش لنفسها انها تبقى القلب الحنين اللى يشيل عن طارق ..لانه ابدا مش مكانها وكده بتاذيه

    ردحذف
  8. انتوا جبتوا الذنب كله علي بسمه مع ان طارق ررده عليه جزء من المسئوليه مقدرش تعب مراته وبيحكى مع ست تانيه مع ان ايمن صاحبه كان ممكن يحكي له وراويه عامله فيها مسكينه وانا مش طايقاهالانها بتهتم بيه بشكل اوفر

    ردحذف
  9. الغلط مش علي طارق وحده اصلا بسمه دي شخصية مستفزه اصلا ومدلعه ومبتتحملش المسئولية
    Mima

    ردحذف
  10. بصراحه بسمه دي نكد

    وسطحيه جدا وبتاخد الامور بطريقه غريبه

    ومش عارفه تتعامل مع طبيعة طارق

    وهو كمان اناني وعصبي بزياده

    ردحذف
  11. علي فكرة شخصية طارق دي عجابني جدا بجد انسان محترم بس مراتو هي اللي عبيطة تقريبا وبتستهبل

    ردحذف
  12. بسمه غلطانه اوى ومفروض تقدره هو كلامه كتير يبيقي محتاج تطبطب عليه بكلامها بس هى دايما بتصده

    ردحذف
  13. حلوه خالص ! صدقي انا اسمي بسمه واتعقدت من اسمي! :D

    ردحذف
  14. عاااااااااا بسمة دى مستفزة جدا انسانة كئيبة ونكدية وهبلة اوى

    ردحذف
  15. طارق دا انسان اناني جدا ايه دا يعني مراته تعبانه ومجهده ومشغوله بالبيبي وبجودي وهو كمان بيشتكي منها ايه الواد الرخم دا

    Merna

    ردحذف
  16. طارق ده واطى وراوية خرابة بيوت مصيبة تشيلهم الجوز

    ردحذف
  17. اللي بيعمله طارق دا طبيعي..ناتج عن الفراغ ال حاسس بيه بسبب عدم وجود بسمه وانشغالها وتعبها... اللوم كل اللوم علي راويه مكنش ينفع توافع انهم يكونو اصحاب ولازم تفكر بعقلها لان ال بتعمله دا غلط وحتندم عليه بعدين لان الموضوع حيكبر الا اذا حطت حدود للموضوع دا...

    ردحذف
  18. مكافحة حشرات بمكة
    الحشرات تسبب خطراً كبيراً على صحتك لان هنا انواع تنقل العدوى بين البشر والامراض الخطيرة
    نحن شركة صقر البشاير شركة مكافحة حشرات بمكة ورش مبيدات نقوم بمكافحة الحشرات باستخدام اجود وافضل المبيدات الحشرية المستوردة التي لا تتسبب في الروائح الكريهة التي تضر بصحتك وصحة اسرتك
    نقدم لكم اعلى جودة واقل سعر
    شركة مكافحة حشرات بمكة
    اتصل بنا على 0500941566
    http://www.elbshayr.com/3/Pest-control

    ردحذف
  19. طارق دة فعلا انسان مالوش امان اية يعنى ان مراتة تعبانة هو المفروض ان كل واحد مراتة تعبانة ببص برة وبعدين العيب موش من راوية للاسف الا زيها موش اللوم موش يجى عليها يجى على الشخص الا سمح بكدة من البداية

    ردحذف

قول رأيك بلاش تقرا وتقفل من سكات...ارائكم تهمنى