الثلاثاء، 20 ديسمبر، 2011

بين نارين... الحلقة 18

الحلقة 18
راح طارق اخد بسمة وجودى من بيت باباها
"تحبى يا بسمة نتغدا بره ولا نجيب اكل ونتغدا فى البيت...كده كده البيت فاضى ومفيهوش اكل خالص"
"لا نجيب اكل ونروح البيت احسن"
"احسن برضه"
راح طارق اشترى اكل جاهز للغدا ... واكل للبيت
وهما طالعين البيت...وقف طارق مع البواب
وقاله لو يعرف واحدة تشتغل...بنفس الشروط اللى قالتها بسمة
ووعده البواب انه هيشوف حد
اول ما دخلوا البيت
"يااااااه يابسمة... نورتى بيتك"
"انت بتحسسنى ياطارق انى بسيبك بمزاجى"
"بمزاجك اة غصب عنك النتيجة واحدة.. انى ببقى لوحدى"
"ههههههه انت بتخاف ولا ايه؟"
"بتتريقى يابسمة... انا محتاج وجودك جنبى... وانتى عارفة انى مينفعش اروح اقعد عند ماما علشان بتحرج"
"حاضر ياحبيبى... مش هسيبك تانى"
اتغدوا مع بعض... وقعدوا مع جودى وحس طارق ان البيت مليان سعادة بوجود بسمة وجودى معاه
اخر النهار حوالى الساعة 8 قام طارق يلبس
وقفت بسمة وراه وهو فى المراية... وحضنته وبصت له فى المراية
"انت نازل ياحبيبى"
"ايوه ياحبيبتى...عايزة حاجة"
"لا.. بس مش انت مش وراك شغل اليومين دول.. رايح فين"
"ماهو انتى لو بتسألى هتعرفى ان النهاردة المفروض يخلص الدهان ووبكرة بالليل او بعده الصبح نفرش ونشتغل"
"بالسرعة دى خلصت"
لف لها طارق ومسكها من دقنها
"الحمدلله... ماهو مينفعشى اتاخر عن مصالح الناس اكتر من كده"
باسها من راسها
"مش هتأخر عليكى...هروح اشوف وصلوا لحد فين واجى على طول"
"اوعى تتأخر...هستناك يا حبيبى"
بعد ما طارق نزل جريت بسمة على التليفون واتصلت بمامتها
وبعد السلامات اكدت عليها
"ياماما والنبى حاولى تشوفيلى شغالة بسرعة طارق هيرجع شغله بعد بكرة وهتبقى المسئولية كلها على دماغى"
"حاضر يا بسمة...انا كلمت اكتر من حد وان شاءالله نلاقى واحدة بسرعة"

وصل طارق المكتب وكان لسه حاجات بسيطة ويخلص العمال كل الشغل اللى ناقصهم
واكد عليهم طارق انهم لازم يخلصوا الشغل ده النهاردة حتى لو سهروا فيه للصبح
قعد طارق معاهم حوالى ساعة كانوا خلصوا فيها دهان المكتب كله
وقفل المكتب ونزل رجع على البيت على طول

طول اليوم وراوية قاعدة تفكر فى احساسها بطارق
وغيرتها من بسمة... وكل ما تفكر انهم مع بعض تتجنن
وترجع تقنع نفسها ان احساسها ده غلط..ومينفعش لانه مش متبادل
تفتكر طريقة طارق معاها...تحن له تانى
واخدت قرار انها لازم تكتم احساسها الغلط ده فى قلبها
لان اكيد تفسيراتها لمعاملة طارق دى...كانت بايحاء من احساسها بيه
تانى يوم راحت المحكمة... وكانت فى انتظار ان طارق ييجى ويبدأ شغل...لانها عارفة انه خلص شغل فى المكتب خلاص
بس مجاش المحكمة... وده زود غيرتها اكتر واكتر
معنى كده ان اليوم ده قاعد مع مراته فى البيت
كانت الغيرة بتاكل قلبها وعقلها... وفكرت ان لازم يكون فيه حد

اليومين اللى قضاهم طارق وبسمة وجودى مع بعض فى البيت
كان حاسس بسعادة كبيرة فى وجودهم...وحس قد ايه بيحبهم
واتصلت ام بسمة بيها وكان مضمون المكالمة
"انا لقيت واحدة يابسمة هى معرفة واحدة اعرفها بس فيها كل المواصفات اللى انتى عايزاها...بس فيه مشكلة صغيرة"
"خير ياماما"
"مش هتقيم عندك علشان ليه عيال...هى ممكن تجيلك من 9الصبح ل9بالليل"
"مش مشكله ده كده احسن كتير"
"يعنى ابعتهالك"
"اه ياماما خليها تيجى بكرة الصبح قبل ماطارق ينزل علشان يتفق معاها على المرتب"
"طيب هبعتالكوا الصبح"
وبعد ماقفلت مع مامتها حكت لطارق على المكالمة
"الحمدلله اننا لقينا واحدة بسرعة كده"
"اه والله ده انا كنت قلقانة ومش عارفة هعمل ايه لانى عارفة انك هترجع مش فاضى تانى ولا اشوفك غير كام ساعة فى اليوم"
"ماانتى عارفة ان غصب عنى"
"عارفة ياحبيبى"
"بقولك ايه انا الصبح هروح استلم فرش المكتب ونفرش ان شاءالله...مش هتيجى تتفرجى على المكتب بعد ماخلص"
"طبعا هاجى ان شاءالله... بس بكرة هيكون كل الناس لسه راجعة وبترتب شغلها خليها بعد بكرة بالليل"
"اللى تشوفيه... هتصل انا بقى بالناس علشان كله ييجى بكرة المكتب عادى"

فى عز ماكانت راوية بتفكر فى طارق ومستنية تانى يوم ييجى بسرعة علشان تشوفه...رن موبايلها
بصت لقيت اسم طارق... نطت من الفرحة
كانت فرحتها انه افتكرها وكلمها حتى وهو مع مراته
ردت بفرحة
"الو... ازيك يا طارق"
"ازيك ياراوية عاملة ايه"
"الحمدلله كويسة...وانت اخبارك ايه؟؟عملت ايه النهاردة"
"الحمدلله...بقولك بكرة تعالى فى معاد المكتب عادى اخر النهار علشان نرجع نستقر ونشوف شغلنا"
"ان شاءالله"
"ماشى ياراوية...اشوفك بكرة"
قفلت راوية وشافت ملخص المكالمة... 27ثانية
يعنى كل مكالمتهم دى اقل من نص دقيقة
دفنت راوية راسها فى مخدتها وفضلت تعيط لحد مانامت

اول يوم فى المكتب كان كله مشغول بترتيب مكتبه وشغله
وتقريبا الوقت ضاع فى الترتيب والتنظيم
وراوية حاولت متتعاملش مع طارق خالص لانه مكنش فيه مجال للكلام مع بعض...بس احساسها انه معاها فى نفس المكان واللى يفرق بينهم مجرد حيطة... كان مديها احساس بالراحة

تانى يوم اتأخر طارق عن معاده اللى بييجى فيه المكتب
كانت راوية كل 5دقايق بتبص فى الساعة...لحد ماوصل بعد معاده بساعة تقريبا...بس مكنش لوحده
كان داخل وشايل جودى وبسمه ايدها فى ايده
راوية شافتهم مع بعض...حست انها طعنت فى قلبها طعنة غائرة
وشافت طارق وهو بيعرف بسمة بيها... لانها الوحيدة الجديدة نسبيا فى المكتب...وسلمت عليها وابتسمت لها وفى قلبها كره ليها وغيرة منها... وبعد ما دخلوا مكتب طارق
قعدت راوية مع نفسها وقررت.....

هناك 14 تعليقًا:

  1. لالالالالالالالالالالالالالالا حرام بتعلقينا بجد فى النص كدة قررت ايه ولا هتعمل مصيبه ايه دة انا قاعدة من 10 مستنيه الحلقه وقريت الحب الملعون جميله جدا وبنقرا فى قدام عنيه جميله جدا بردة

    ردحذف
  2. هههههههههه لازم التشويق طبعا
    ميرسى ياجميل على رأيك فى القصص
    وان شاءالله كلهم يعجبوكى

    ردحذف
  3. المفاجاه بقي انها مقررتش تنسحب من خباة طارق و بسمه بالعكس قررت انها تاخد طارق من بسمه و بررت لنفسها القرار ده ان بسمه اصلا متستاهلوش لانها مهمله و مش مهتمه بيه و بدات بقي راويه تنفذ قرارها ههههههههههه سوري اني اتوقعت يا رب يكون توقعي غلط يا دينا

    ردحذف
  4. ههههههههههههههه هنشوف صح ولا غلط
    انتى تتوقعى براحتك مفيش مشكلة خالص
    بحب اسمع توقعاتكم لا تقلقى

    ردحذف
  5. قررت انها تسيب المكتب وتنسحب من حياتهم لان وجودها فى حياه طارق غلط من الاول ومكانش لازم تفكر فيه وهو متجوز وعنده اطفال.صح ولا غلط يا دندن

    ردحذف
  6. لا هى شكلها ينطبق عليها ان كيدهن عظيم تقعد تفكر وتخطط لحد ما تخليه يسيبها وتبقي والحمد لله خربت البيت بس كدة طارق مش هيبقي ليه حجه لانها رجعت البيت تانى وبسمه المفروض تخلي عندها دم وتهتم بيه شويه والا يبقي تستاهل

    ردحذف
  7. قرررررررت ايييييييييه ؟؟؟؟؟؟؟؟؟؟؟

    ردحذف
  8. بعد التوقعات بتاعتكم
    اقروا الحلقة الجديدة بسرررررررعة
    وانتوا هتعرفوا

    ردحذف
  9. يا ترة قرررت ايه ايه التشويق ده؟

    ردحذف
  10. انا مش مستريحة لراوية
    بس يارب تسيبهم ف حالهم وتسيب المكتب خالص

    ردحذف
  11. اعتقد ان اسلوب راويه في التعبير عن مشاعرها متناقض مع شخصيتها.. واحده زيها مجتهده في شغلها ومتفوقه ويمكن الاعتماد عليها..بتكون متحكمه في مشاعرها اكتر من كدا متوصلش لدرجه انها تعيط... وكمان هي لسة طالعه من تجربة مؤلمه قررت بعدها انها مش حتحب تاني.. ياريت تركز في شغلها وتسبها من طارق..الافضل ليها انها تتمني واحد زيه ( بما انها معجبه بيه ) وتفكها من طارق لانه مش بتاعها..

    ردحذف

قول رأيك بلاش تقرا وتقفل من سكات...ارائكم تهمنى