السبت، 24 ديسمبر 2011

بين نارين...الحلقة 21

الحلقة 21
اتفاجئوا بمحمود جاى ناحيتهم
وقفوا هما الاتنين وهما مستغربين
طارق"محمود!! حمدالله ع السلامة"
وسلم عليه محمود وحضنه
محمود"الله يسلمك ياطارق...اخبار ايه؟؟ ازيك ياراوية"
ومد ايده يسلم على راوية
سلمت راوية من غير ماترد عليه
طارق"انت جيت م السفر امتى؟"
محمود"جيت الفجر يدوب روحت البيت حطيت حاجتى وريحت شوية ومقدرتش استنى لحد بالليل جيت اشوفكم"
كانت عينيه على راوية وهو بيقول اشوفكم
راوية واقفة وعينيها بعيد عن محمود..وفجأة
"انا ماشية يااستاذ طارق"
محمود"استنى ياراوية"
مردتش عليه وكملت خطواتها بس محمود مشى وراها ومسكها من ايدها
"استنى ياراوية انا جاى مخصوص علشانك"
راح وراهم طارق
"محمود مينفعش كده احنا فى الشارع"
سابها محمود...وردت راوية
"جاى علشانى ليه...انت بينك وبينى ايه"
محمود"انتى لابسة اسود كده ليه"
طارق"والدها توفى من 4 ايام"
محمود"البقاء لله ياراوية...انا لازم اجى اعزى طنط"
راوية"لا شكرا ...ممكن امشى بقى"
طارق"مع السلامة ياراوية... تعالى معايا يامحمود"
محمود"استنى ياراوية... انا جاى علشانك وعايز اتكلم معاكى"
راوية"مفيش بيننا اى كلام"
طارق"سيبها يامحمود براحتها"
محمود"ده بدل ماتقولها تسمعنى"
وقف طارق بينهم مش قادر يقولها استنى معاه ومش قادر يقولها امشى قدام محمود
محمود"ارجوكى يا راوية... محتاج اتكلم معاكى شوية وانا راضى باى كلام هتقوليهولى بعد ماتسمعينى"
سكتت راوية..وسكت طارق
محمود"يالا ياراوية... تعالى معايا...هبقى اكلمك ياطارق سلااااام"
ومشى محمود بعد ما وسع لراوية انها تتقدمه
وقف طارق...وهو مستغرب كل الحوار اللى دار بينهم
وازاى راوية تمشى معاه كده
ركب عربيته وشافهم وهما بيركبوا تاكسى
طول الطريق وهو متضايق ازاى راوية تمشى مع محمود كده
بعد اللى عمله فيها وغدره ليها
تكون لسه بتحبه؟؟ يمكن...ليه لأ
لالالا مش معقول.. هو مايستاهلهاش
واحدة زى راوية تستاهل واحد يقدرها
كل حاجة فيها حلوة...شكل ومضمون
بس برضه...ازاى تروح معاه... يا بخت اللى هيتجوزها
هيكون معاه واحدة جميلة ومثقفة وذكية وبتتحمل المسئولية
مش زى بسمة... اااه من بسمة... لو كنت قابلت راوية قبل بسمة
اكيد كنت هبقى سعيد معاها مش زى ماانا عايش مع بسمة
بسمة اللى مش حاسة بيا خالص... عكس راوية اللى بتهتم بيا
اعمل ايه لو لقيت راوية ومحمود اتصالحوا
معقول... انا متضايق كده ليه... انا غيران من محمود
ولا غيران على راوية... انا فعلا غيران على راوية سواء محمود او غيره... معنى كده انى ...؟؟؟ معقول بحبها؟؟؟
ايوه بحبها.. هى الوحيدة اللى برتاح فى الكلام معاها
هى الوحيدة اللى بفرح وانا معاها... هى الوحيدة اللى بتجنن وهى بعيد عنى ... هى الوحيدة اللى تقدر تسعدنى
ورن موبايل طارق...
"ايوه يابسمة"
"انت فين ياطارق...جاى امتى"
"خير فى ايه"
"انا تعبت وزهقت بقى...تعالى ودينى عند ماما هى بتشيل عنى كتير"
"لالا انا مش جاى دلوقتى انا عندى تحقيق فى النيابة ومش عارف هخلص امتى"
"انا مقدرتش اعمل اكل"
"مش مهم انا هتصرف...انزلى انتى خدى تاكسى وروحى"
"طيب ... ابقى كلمنى طمنى عليك"
"لما افضى ان شاءالله"
وقفل معاها بسرعة... لانه مكنش فى تفكيره غير راوية
وفكر... يتصل بيها؟؟ طيب محمود هيقول عليه ايه؟؟
مش مهم ممكن يقول اى حاجة بس المهم يقولها مترجعش لمحمود

بعد ما ركبت راوية مع محمود...وهما لسه فى التاكسى
"انت عايز منى ايه يامحمود"
"انا بحبك وعايز تسامحينى"
"بتحبنى؟؟ انت مش اتجوزت"
"ايوه بس كنت مضطر علشان الاقامة انما انا بحبك انتى حبيبتى ورجعت علشان اقولك تسامحينى ونرجع لبعض"
"اتأخرت اوى يامحمود"
"يعنى ايه؟؟"
"يعنى خلاص انت صفحة وانتهت من حياتى ومستحيل ارجعلك تانى... انا بس جيت معاك علشان افهمك كده من غير مااحرجك قدام صاحبك ومن غير مااحرج نفسى فى مكان شغلى"
"يعنى خلاص مفيش فايدة"
"لا مفيش... ومعلش طريقى غير طريقك... على جنب هنا يااسطى لو سمحت"
ونزلت راوية من التاكسى وسابت محمود ... ومشيت من غير ماتبص وراها
وقفت تاكسى تانى... وبعد دقايق..رن تليفونها واول ماردت
"راوية انتى لسه مع محمود"
وابتسمت راوية لما حست بغيرة طارق عليها
"لأ"
"لا ازاى... انتى لسه سايبانى من ربع ساعة وروحتى معاه"
"روحت معاه بس سيبته ومكملتش طريقى معاه"
"يعنى ايه؟؟كلامك ليه معانى كتير"
"كلامى ليه معنى واحد...طريق محمود غير طريقى وانا سيبته كل واحد يكمل طريقه"
"انتى فين بالظبط دلوقتى"
"انا فى تاكسى رايحة على البيت"
"انا عايزك ضرورى ياراوية"
"خير"
"انزلى واستنينى فى اقرب مكان ليكى وانا جاى لك على طول اقولك فيه ايه"
ونزلت راوية فعلا من التاكسى وراحت كافيه كان قريب منها وقعدت تستناه
متأخرش عليها كتير وجه بسرعة وسلم عليها بكل لهفة
"يااااااه ياراوية انا كنت مرعوب تتصالحى مع محمود"
راوية مش مصدقة اللى بتسمعه... وقالت يمكن قصده انه خايف عليها عادى... وحبت تستوضح كلامه
"لا متقلقش محمود انتهى من حياتى ... مسيرى الاقى حد يحبنى واحبه وميغدرش بيا"
"وياترى انتى فيه حد فى حياتك"
"حاليا مفيش غير شغلى"
"وانا؟؟"
"انت ايه؟؟"
"وانا ايه فى حياتك"
سكتت راوية... طارق حاسس باحساسها بيه؟؟؟
"ردى عليا ياراوية... انا ايه فى حياتك"
"انت مهم اوى فى حياتى"
"مهم بس"
"معلش انا لازم اقوم علشان اتأخرت اوى"
"استنى ياراوية... انا عايز اعرف انتى حاسة بيا ولا لأ؟؟"
"تقصد ايه؟؟"
"انتى حاسة انى بحبك ولا لأ... انا بحبك اوى ياراوية"

هناك 30 تعليقًا:

  1. يا نهاااار ابيض ليه كده بس

    ردحذف
  2. يخرب بيتك انت وهي

    ليه كده يا دينا

    ردحذف
  3. اه يا مجنون يا ابن اللاسعة

    ردحذف
    الردود
    1. حلو اوي ابن اللاسعه دي هههههههههه جديده

      حذف
  4. ايه الاهبل دا هو اي واحده يشوفها ويرتاح معاها يبقى خلاص بيحبها وناسي انه متجوز .. والله رجالة اخر زمن xD

    ردحذف
  5. يا مجنووووووووووووون ده لسع خلاااص :D:D

    ردحذف
  6. منظر حلو بس مش ينفع بقى هوة متجوز لازم يبص لمراته واحساسها

    ردحذف
  7. ههههههههههههههههه
    طارق اجمع الناس على انه غلطان
    اما نشوف هيكمل مع راوية ولا هيفوق

    ردحذف
  8. بالنسبة لراويةايه الفرق بينه وبين محمود
    ده مجوز وده مجوز
    فانها ترجع لمحمود احسن كفايه ان حس بغلطته
    وكمان جوازه كان علشان الاقامه

    من رايى انها تسيبها من الاتنين وتريح نفسها

    ردحذف
  9. انا شايف ان ده واقع اكتر الازواج الشرقيين عموما والمصريين خصوصا فبعد الزواج علي طول بيكون شهر العسل واهتمام الزوجة بزوجها بيبقي في اعلي الحدود وبيعيشوا حياة العاشقان لكن الاهتمام من نحية الزوجة بيقل بسبب شغل البيت و وبعدين بدايات الحمل طبعا وبعدين الولادة واول ما ييجي ولي العهد الزوج ده بيتركن علي الرف وبيتحول الاهتمام للمولود الجديد وده طبعا مش مقصود لكن الزوج بيلاقي نفسه مش متجوز بل إنه بقي مطالب مثلا انه يعمل الاكل لنفسه مطالب يغسل لنفسه مطالب بحاجات كتير فبيشوف نفسه كأنه مش متجوز ومحدش مهتم بيه وبيبدأ يدور علي اللي مهتم بيه ..مهتم بتفاصيل حياته حتي لو في أضيق الحدود وبيتعلق بيه وبيبدأ المشوار بهدم البيت السعيد ...متابع ومستني باقي القصة

    ردحذف
  10. صابرينا
    الفرق انها حبت طارق

    ردحذف
  11. علاء
    كلامك ده فعلا تحليل للواقع اللى عايشينه بكل دقة
    ميرسى للمتابعة...نورتنى

    ردحذف
  12. dh eh ally hoa be3mlo dh !!
    Tu2aa

    ردحذف
  13. ده انسان ما يستاهلش الزوجه اللى معاه وهى مجنونه انها تفكر بس مجرد تفكير فى شخص متزوج

    ردحذف
  14. والله راجل في منتهي العقل بجد مرات دي يطلقا ويخلص منهاا ويفضي لي راوية او يتجوزها ويخلي التاية علي زمتوو لانها نكدية وغبية في اسلوبهاا

    ردحذف
    الردود
    1. منتهى العقل!!
      نكديه وغبيه في اسلوبها!!
      هيا بردو اللي غبيه مش كفايه انه ضربها ورضيت ترجعله مش كفايه انها ضحت بكل وسائل الراحه في بيت مامتها عشان تيجي تعيش في بيتها وميحسش بملل مش كفايه انها مستحمله اهماله ليها وتصرفاته الغبيه يعني لما تقوله انا كان عندي نزيف يكلمها شويه وبعدين يقفل دا واد جبله

      حذف
  15. ليه كده يا طارق حراااااااااااااااام عليك ذنبها ايه بسمة انها تعبانة بجد رااااااااااجل شرقى

    ردحذف
  16. حرااااام بجد بسمه ذنبها اييييييييه ؟؟؟؟؟؟؟؟؟؟

    ردحذف
  17. الله يخرب بيته علي بيت راوية
    ياعيني عليكي يابسمة مع انك نكدية شوية

    ردحذف
  18. ايه ده مش مصدقه بجد هوا فيه كده يعني الست انشغلت شويه هيا اه مشغوله ومقرفه شويه بس مش معني كده انوا يحب واحده تانيه ياتري هيعمل ايه في الاخر

    ردحذف
  19. بيحب مين ده مابيحبش غير نفسه والله بسمه دى صعبانه عليا جدااا

    ردحذف
  20. انسان زباله ومتخلف بجد
    محسسني ان مراتو مشغوله بالنادي ولا مشغوله بالشوبنج ولا مشغوله بصحابها واحده حامل ياد يا عبيط عايزه تعمل ايه يا كابتن انت متعرفش ان الولاده تاني اصعب وجع في العالم كتك نيله كتك وكسه بجد انت زباله
    Merna

    ردحذف
  21. ده اتجنن خالث هوا ناسى انو متجوز وعنده بنت وواحد جاى فى السكه ده اتهبل


    Fatma

    ردحذف
  22. اصل الوساخة ليها ناسها

    ردحذف
  23. ايه التسرع دا!!! نفس اسلوبه لحظه ارتباطه ب بسمة...

    ردحذف
  24. اولا هو كان متسرع لحظة ارتباطة ببسمة ثانيا هى نكدية ومقرفة واسلوبها تافة بس هى حامل وتعبانة ولازم هو يقدر دة فعلا هو بقى انانى ومش بيفكر غير فشغلة وسايب مراتة ومش مديها من وقتة خاااالص لا وقال اية عايزها تهتم بية طب واللة دى مجنون ولاسع دى لو قعد يوم واحد بس يكنس ويغسل ويمسح ويغير للعيال ويحميى ويشطف ويغير وييجى بقف زية كدة يقول عايز اهتمام والمسحف ليديلو بالجذمة لاكن بما انة راجل شرقى فلازم يبقى الحق معاة كلنا متعاطفين مع بسمة لان كلنا حطينا نفسنا مكانها لو حطيتوا نفسكوا مكان راوية هتعرفوا ان هى كمان مظلومة وان الحب اعمى لكن هو حب يمتلكها لما عرف ان محمود رجع ولما بسمة مشيت هو مش بيحب راوية هو انانى عايز واحدة تهتم بية وبس يبقى انانى ولا لا؟!

    ردحذف

قول رأيك بلاش تقرا وتقفل من سكات...ارائكم تهمنى