الأحد، 25 ديسمبر 2011

بين نارين... الحلقة 22

الحلقة 22
سكتت راوية من المفاجأة
هى فعلا بتحبه بس مكنتش متخيلة ان هو كمان بيحبها
"ساكتة ليه ياراوية... انا بحبك "
"ساكتة علشان حبنا ده غلط"
"حبنا؟؟ يعنى انتى كمان بتحبينى صح؟؟"
"النتيجة واحدة... حبنا غلط"
"ليه غلط"
"انت نسيت انك متجوز"
"منسيتش... بس انا مش مرتاح معاها خالص انا حاسس انى اتسرعت فى الجوازة دى"
"يعنى ايه؟؟مبتحبهاش"
سكت طارق ومعرفش يرد
"شفت ادى انت سكت اهو...انا شفتك وانت معاها وعارفة انك بتحبها"
"ماهو انا مش بكرهها ومبقيتش بحبها نفس الحب اللى بحبهولك دلوقتى... تقدرى تقولى فى بيننا عشرة وبنتى وابنى اللى لسه هييجى"
"والحل ايه من وجهه نظرك"
"ياراوية انا بقولك انى بحبك من غير ماافكر ده صح ولا غلط"
"بس انا مقدرش احبك من غير ماافكر فى الصح والغلط"
"ماشى ياراوية هنفكر مع بعض"
"انا اتأخرت اوى ولازم امشى"
وقامت راوية مشيت وسابته... وقام بعدها طارق راح على البيت

لما طارق دخل البيت...ومكنش فيه حد لابسمة ولا اكل معمول
غير هدومه ونزل راح على المكتب يقعد هناك لوحده
كان كل تفكيره فى راوية... راوية اكيد بتحبه زى مابيحبها
ايه الصح وايه الغلط... هو معملش حاجة غلط لما حبها
اتصل بيها... ردت عليه بسرعة وقالت انها مش هتعرف تتكلم معاه علشان لسه بيجيلهم ناس يعزوا... وهتقابله فى المكتب
كان بيعد الساعات اللى هييجى فيها معاد راوية
ولما بدأ المحاميين يوصلوا... وصلت راوية...واول ماجت استدعاها
"راوية ...انا محتاجلك معايا وجنبى... انا مش هقدر تفضلى بعيد عنى كده"
"انا مش بعيد بس انا لازم ابعد"
"انتى عايزة تسيبينى"
"ياطارق ارجوك حس بيا...انا من لحظة ماحسيت انى بحبك وانا عايزة ابعد علشان بيتك ومراتك...يعنى انا مش مستحملة اى ضغط زيادة كفاية اللى انا فيه"
"احنا لازم نتجوز"
"انت ناسى ان بابا لسه متوفى من 4 ايام...افكر ازاى فى جواز واقول ايه لماما"
"مش لازم تقولى ... نتجوز وبعد فترة نبقى نقول"
وقامت راوية من ع الكرسى...وقالت وهى بتخرج من المكتب
"مش انا اللى اتجوز فى السر"
خرجت راوية وكان هيجرى وراها طارق... بس اللى منعه ان المكتب كان مليان ناس ولو شافوه بيجرى وراها هيكون لها 100 تفسير... فرجع مكتبه تانى ... وقال يستنى شوية وينده لها
راوية اول ماخرجت اخدت شنطتها بسرعة ونزلت من المكتب

بعد حوالى ساعة نادى طارق للساعى يستدعى راوية
رجع قاله انها مش موجودة ومشيت
اتصل بيها...التليفون مقفول
كل  دقيقة يكرر الاتصال... لدرجة انه معرفش يشتغل
ولحد ما رجع البيت وفضل يتصل بيها ومازال التليفون مقفول

فى المحكمة كان بيستناها من لحظة ماراح
وكان عارف ان عندها جلسات واكيد هتيجى
كان يدوب بيروح يحضر الجلسات اللى وراه ويرجع على قاعة المحامين يستناها
ولما اتأخرت اوى ... سأل عليها صاحبتها
"راوية جت حضرت الجلسة ومشيت على طول"
يااااه للدرجة دى مش عايزة تشوفه
ورن تليفونه ...مسكه بسرعه بس بقى انها بسمة...رد بفتور
"ايوه يابسمة"
"انت فين ياطارق... هو انت دايما كده متتصلش بيا ابدا"
ورد طارق بنرفزة
"وانتى متتصليش وتهتمى بجوزك ليه... انتى يعنى فيكى ايه مختلف عن بقية الستات اللى بتحمل وتولد... هى كل واحدة حامل لازم تسيب جوزها وتنساه اوى كده"
"انت بتزعقلى كده ليه... عموما انا رايحة للدكتور دلوقتى مع ماما وبعرفك انى تعبانة من امبارح ويمكن تكون ولادة"
واتغيرت نبرة صوته
"ولادة فجأة كده"
"بقولك تعبانة من امبارح والدكتور لما قلتله قالى هيكشف واحتمال تكون ولادة...انا معرفش وعموما لو عايز تبقى تيجى تعالى مش عايز براحتك"
"انتى كمان ليكى عين تزعلى"
"ابقى شوف مين اللى ناسى التانى ومش بيسأل عليه وبعد كده هتعرف مين اللى يزعل ومين لا"
"ماشى يابسمة...استنى متروحيش للدكتور غير لما اجيلك"

بعد الكشف قال الدكتور انها ولادة... ودخلت بسمة العمليات
كان طارق موجود معاها طول اليوم
كانت جودى طول اليوم ماسكة فيه... وبتتنطط حواليه
وكل شوية...بابا...بابا
ولما اخد سيف فى حضنه حس انه بيحبه...مع انه مكنش مهتم ان الحمل يكمل او لا بس لما اخده فى حضنه زعل اوى من نفسه لما قال لبسمة لازم البيبى ينزل
بسمة خرجت من المستشفى تانى يوم
تانى يوم فى المحكمة...كان كل الناس بتهنى طارق بالمولود الجديد
وهو كان كل تركيزه انه مستنى راوية
اللى استناها عند القاعة اللى فيها الجلسة بتاعتها
بعد ماخرجت من الجلسة... مشيت على طول
وخرج طارق وراها... ووقفها بره المحكمة
"انتى بتهربى منى ليه"
"علشان مش عارفة اتعامل معاك"
"ليه"
"منين بتحبنى ومنين عايز تتجوزنى فى السر...ده احترامك ليا...اه صحيح نسيت اباركلك على البيبى...مبروك"
"ياراوية انا بحبك...ومش هقدر اكمل مع بسمة"
"يبقى ليه عايز تتجوزنى فى السر"
"علشان مش هقدر اطلقها وهى لسه والدة"
"يعنى انت اخدت قرار انك هتطلقها"
"ايوه...لانى مش هقدر استغنى عنك"
"وهنتجوز قدام الناس كلها"
"ايوه طبعا... بس هستنى شوية"
وفرحت راوية من كلامه
"عموما انا كده كده مش هقدر افاتح ماما فى موضوع جوازنا ده دلوقتى...كمان كام شهر كده تكون انت اتصرفت وظبطت امورك"
"اتفقنا ياحبيبتى... متسيبينيش تانى"
"حاضر... انا لو كنت اقدر ابعد عنك كنت بعدت من زمان"

هناك 35 تعليقًا:

  1. لا حرام كدا بقى انا كرهت الرجاله كلها واتعقدت خلاااااااااااااااااااااااص

    ردحذف
    الردود
    1. وانا كمان والله

      حذف
    2. ده يع خاالص

      جى جى

      حذف
    3. ولا يدايقك المعفن ده يا قمر

      نتعرف يامزه يا قشطه يا بقلاوه انتى

      مراد

      حذف
  2. لا يا راجل واطى واطى يعنى ومعندهوش دم خالص ولا فكر فى بيته ولا ولادة ولا مراته وشكلها فى الاخر هيجي كله على دماغه ويبقي يستاهل

    ردحذف
  3. كلهم نفسسسسسسسس النظام كدا مش قلت رجالة اخر زمن :D

    ردحذف
  4. هههههههههههههههههههههه
    ده احنا جوانا كم نفسنة ناحيتهم
    ههههههه ايه ده يابنات محدش بيلتمس له عذر خااااااااااااااااالص

    ردحذف
  5. عذر في عينه الله لا يوفقك يا طارق كرهتني في الجواز والرجالة

    ردحذف
  6. بصراحة لا مش مبلتمس له العذر خالص
    زى ما هو عايز حد يهتم بيه
    بسمة برده محتاجه للاهتمام ده وخصوصا فى الوقت ده

    ردحذف
  7. انا مبلتمسش ليه العذر خالص ده شخص انانى رواية كمان انانية هو كل اللى همها اذا كان هيجزها ادام الناس ولا لا مفكرتش لحظة انها كانت ممكن تكون مكان بسمة انا عن نفسى مرداش على نفسى اللى مردهش على غيرى
    بجد مدنة تحفة ربنا يوفقك :)

    ردحذف
  8. على فكره انا معجبه جدااااااااا بطريقه كتاباتك بجد ما شا الله عليكى
    انا لسه سامعه عن القصه قريب من صفحه على الفيس ومعرفتش اصبر علشان هما بيحطو حلقه كل يوم فدورت انا ولقيتك
    بجد بهنييكى :)))))))

    ردحذف
  9. لوووووووووووووووووووول طارق ده انسان انانى ومابيفكرش غير فى نفسه حتى لو بسمة غلطانة بس هو المفروض يقدرشوية وكمان راوية كانت لازم تقاوم نفسها وتبعد عنه مش تفرح انه هيطلق مراته ويتجوزها

    ردحذف
  10. أولا تسلم ايدك يا دينا القصة تحفة و خاصة انها تطرح أهم قضية في مجتمعنا أنا صحيح بنت لكن أنا بأيد طارق و لو كنت مكانو كنت هتصررف زايو لأن البنت العربية و شرقية بعد الزواج تنسى الحب الي يربطهابزوجها حبيبها و دا غلط هي لازم تثبت حبها ليه و لو الزواج كدا يبقى من غيرو أحسن

    ردحذف
  11. جاااااااته الارف فى شكله ازاى يعم لكده يعنى ده ايه ده مراته تعبانه ومش مقدر خالص اتفوووووووووووووووووووووو عليه

    ردحذف
  12. bgd dh fzeee3 aweee eh dh 7ram 3lih i n3m basma 3'ltana bs bardo de mrato e3ny menf34 ekranha m3 3'erha w aked b3d kdh hela2y 3eop f rawea
    Tu2aa

    ردحذف
  13. مش لاقيه كلام بس راويه انسانه انانيه هي اتجرحت قبل كده المفروض تكون حسه بغيرها بس هي ما اختلفتش كتيير عن طارق في الانانيه كان ممكن موقفها يتقبل بس لو مكنتش فرحت كده بموضوع الطلاق الرجاله كلهم نوع واحد في طبعهم الغدر لمجرد انهم شافوا حاجه عجبتهم

    ردحذف
  14. هو بسمه غلطانه ومستفذه وهو حقه بس ميبقاش كدا يقولها ويصارحها وهي هتتفهم وتهتم شويه

    ردحذف
  15. ع فكره طاارق ده شخصيه زباله جدا

    ردحذف
  16. مش عارفه انا مش شايفه انى طارق غلطان السبب كله بسمه مش ادتلوا الاهتمام

    وعد

    ردحذف
  17. ايييييييييييييييييه الرجالة دى اللى اى واحدة تهتم بيه شوية يجرى عليها

    شغل عيال والله وهو مايستاهلش بسمة ولا ولاده زبالة

    ردحذف
  18. ايه القرف الي هو فيه ده بجد انانيه منه

    ردحذف
  19. على فكرة بقى هو انانى شويه بس معذور
    بسمه دى بتستهبل مفيش ست فى الدنيا كده
    مدلعه ومش قد المسئوليه وهو نبهها اكتر من مرة
    انا مش بعفيه من الغلط بس شايفه انه معذور وكمان هو مأجرمش وراح عمل حاجه حرام
    لا هو فكر فى شرع ربنا وهيتجوز علشان يمنع نفسه من انه يعمل حاجه حرام
    انا شايفه انا اللوم كله على بسمه

    ردحذف
  20. كلهم غلطانين بس اكتر واحد غلطان هو طارق
    وهو وراوية عايزين ضرب النار

    ردحذف
  21. معلش بس اللى بيعلق ان بسمه تستاهل عشان البنت المصريه بتهمل جوزها بعد الجواز طب الحل بقى انو يتجوز تانى ولما التانيه تخلف وتنشغل يجوز تالت لحد ما تخلص بنات مصر ماهو لو كل واحد فكر يريح التانى ازاى ولو حد قدر ان الحياة الزوجية مشاركه مفيش حاجه اسمها انا راجل اشتغل واتعب ارجع بيتى ارتاح ومفيش حاجه اسمها انا ست وبيطلع عينى وهو مش مقدر والله لو كل واحد جية بس شويه على نفسو وقدر وشارك التانى فى جزء من مسؤلياتو كلو هيبقى تمام

    ردحذف
  22. روايه دلا انسانه زباله ازاى توافق انها تخطف راجل من مراته وولاده ال لسه ميفهموش حاجه دى واحده زباله ازاى تفرح انو هيطلق مراته ويخرب بيته ازاى تقبل انها تبنى سعادتها على انقاض بيت مخروب وتعاست غيرها

    ردحذف
  23. غلط خالص موقفه ده وموقف راويه زباله اوووووووووووي مكنش المفروض توافق وهوا مش ينفع يجوز ويهدم بيته ومراته وعياله مهما هيا مشغوله هيا اه غلطانه بس معذوره وهوا أناني أوووووووووي

    ردحذف
  24. استاذة دينا انتى بجد ممتاااااااااازة ما شاء اللة عليكى وعلى طول تبقى احسن
    وبجد اخصصصصصصصص عليكى يا راوية انتى والزفت طارق وبسمة دى هبلة محفظتش على بيتها وجوزها لكن طارق انانى هو وراوية جداااااااااا

    ردحذف
  25. ربنا يخدك يا صااارق يا غبى يا حيوان يا تييييت ليه كده هيا عملتلك حاجة رجالة ملهاش امان

    ردحذف
  26. ع فكرة بقى يا جماعة صوابعكوا مش زى بعضها ، و لو فيه رجالة زى طارق فيه رجاله ميتحملو المسئولية و بيعشقو مراتتهم لـ درجة الجنون بس دول تقريباً إنقرضو XD

    ردحذف
  27. على فكرة لو ماكنتش راوية دخلت فى حياته ماكنش بعد عن مراته وكان هايستحملها غصب عنه وهايحاول يمشى اموره معاها عشان عياله

    ردحذف
  28. #M#
    انا شايفه ان طارق متسرع مش اكتر... وعموما هو غير قادر علي تحمل المسؤولية- بقصد مسؤليه الجواز- وبسمة كمان ..الاتنين فاهمين غلط كل واحد بيتعامل بانانيه مطلقه ومفيش حج بيقدم تنازل... مع العلم ان دا اساسا طبع في اغلب الرجاله...

    ردحذف
  29. الحلقة حلوة أوووي يا آنسة دينا

    ردحذف

قول رأيك بلاش تقرا وتقفل من سكات...ارائكم تهمنى