الثلاثاء، 27 ديسمبر 2011

بين نارين...الحلقة 23

الحلقة 23
مرت الايام بعد ولادة سيف وبسمة عند مامتها
حتى بعد مااستردت صحتها كانت مش لاحقة تتعامل مع الاتنين اللى فى ايديها...سيف المولود...وجودى اللى يدوب لسه مكملة سنة من اقل من شهر لما سيف اتولد

طارق يدوب يكلم بسمة مرة واحدة فى اليوم ومكالمة بسيطة جدا يسأل عليها وعلى الولاد وخلاص
وكل اسبوع ولا 10 ايام يشتاق انه يشوف جودى وسيف يروح يزورهم ويسيب فلوس لبسمة ويقعد معاهم شوية مش كتير وينزل علشان راوية كانت بتغير عليه من بسمة
وكان بيخاف على زعلها فيقعد مع بسمة والولاد بالكتير ساعة
اما طارق مع راوية فكانت علاقتهم بتزداد قرب من بعض
وكانوا بيتعاملوا مع بعض كالمخطوبين
ولكن الفرق انهم مأعلنوش عن علاقتهم لاى حد
كانوا من وقت مايتقابلوا الصبح فى المحكمة وهما مع بعض ولما يخلصوا ساعات يكملوا اليوم مع بعض لحد ما ييجى معاد المكتب وساعات تروح راوية تتغدى فى البيت وترجع على المكتب تانى ويبقوا مع بعض لحد مايوصلها للبيت

بعد شهرين
كان طارق وراوية بيتغدوا مع بعض
لما رن موبايل طارق
"دى بسمة"
"رد عليها"
"لا مش مهم...هبقى اكلمها بعدين"
"لا رد عليها دلوقتى...انا عايزة اعرف فيه ايه"
ورد طارق على بسمة... علشان يبين ان مفيش حاجة يخبيها
"ازيك يا بسمة"
"ازيك ياطارق...انت فين"
"انا فى مشوار كده وهروح ع المكتب"
"طيب عدى عليا دلوقتى علشان نروح البيت"
"ايه...لالا مش هينفع دلوقتى"
"ليه"
"معلش مش فاضى... وبعدين خليكى عند مامتك علشان تساعدك فى"
"انت مش عايزنى ارجع البيت ليه"
"لا ازاى طبعا عايزك ترجعى"
"يعنى وحشتك زى ماانت وحشتنى"
وبص لرواية اللى قاعدة قدامه ومركزة فى كل الكلام وكمل
"اكيد طبعا"
"طيب هتيجى امتى"
"بالليل ان شاءالله"
"ماشى ياحبيبى هستناك"
"ماشى مع السلامة"
وقفل مع بسمة وكانت راوية لسه بتبص له...عمل نفسه مخدش باله وكمل أكل
"هى عايزة ايه ياطارق"
"مفيش حاجة بتقولى اعدى عليها علشان اخدها"
"تاخدها فين"
"البيت"
قالها طارق بصوت واطى وحط وشه فى الطبق كأنه بيعترف بغلط
"انت مش قلت هتطلقها.. ازاى يعنى ترجعوا تعيشوا مع بعض فى بيت واحد...انت مش عامل لاحساسى اى اعتبار"
"متنسيش انها لسه مراتى ومتكلمناش فى موضوع الطلاق ده"
"هى مراتك وانا ايه...ولا حاجة مش كده.... روح لها ياطارق لحد ماتحدد موقفك وتعرف انت مع مين"
وقامت راوية وسابته ...نادى عليها ...موقفتش
وقفت تاكسى.... وراح وراها يلحقها...ولحقها تحت البيت
"استنى هنا ياراوية... مينفعش كده"
"وايه اللى ينفع انك تعيش مع مراتك وافضل انا لوحدى اضرب اخماس فى اسداس ياترى بيقولوا ايه ياترى بيعملوا ايه ...هو ده اللى ينفع"
"اوعدك انى فى اقرب فرصة هطلقها بس الاقى سبب اقوله لاهلى واهلها"
"يعنى قدامك قد ايه"
"مش كتير ان شاءالله...متزعليش بقى"
"ماشى ياطارق...انا هطلع بقى واشوفك فى المكتب"
"هتوحشينى"
"وانت كمان"

اول راوية ما دخلت البيت
"فيه ايه ياراوية"
"مالك ياماما فيه ايه؟؟"
"طارق ده ايه اللى جايبه وراكى كده ووقفتوا تتكلموا فى الشارع"
واستغربت راوية
"انا شفتك من اول مانزلتى من التاكسى وهو جه وراكى"
"اصل... كان ... كان فيه ورق معايا نسى ياخده...ورق مهم يعنى"
"ومخدوش ليه"
"اخده"
"مشفتش اى اوراق خالص انا شفتكوا بتتكلموا بس"
"فيه ياماما انتى بتسألينى بالطريقة دى ليه"
"علشان حالك المقلوب من يوم ماابوكى مات... انتى عايزة الناس يقولوا البت عيارها فلت بعد ما ابوها مات"
واترفزت راوية ودخلت على اوضتها وهى بتقول
"انا مبعملش حاجة غلط علشان حد يتكلم عليا"
دخلت مامتها وراها
"لما انتى مش بتعملى حاجة غلط حالك مقلوب ليه... اكتر الايام بتخرجى من الصبح مبشوفش وشك غير بالليل وتقوليلى مرة تحقيق فى النيابة مرة واحد فى القسم وكنت معاه...انتى فاكرانى عبيطة"
"ليه يعنى ياماما"
"اشمعنى التحقيقات والاقسام ظهرت دلوقتى ماانتى بقالك كام سنة محامية ومكنتيش بتتأخرى كده"
"خلاص مش هتأخر تانى"
"انا عايزة اعرف فيه ايه؟ وطارق ده انا مش مستريحاله"
"ليه ماله طارق"
"معرفش... انا بسألك ماله ومالك...لو بيضايقك سيبيله المكتب"
"لا مش بيضايقنى...طارق بيحبنى وانا بحبه وكنت مستنية بس لما نفوق من حزننا على بابا وييجى يتكلم معاكى"
قعدت مامتها على السرير من صدمتها من الكلام... واتكلمت بهدوء حزين
"هو مش متجوز"
"متجوز بس مش مرتاح مع مراته وهيطلقها"
"وانتى صدقتيه"
"مصدقوش ليه...انا شايفة انه مش مرتاح معاها"
"عنده عيال؟؟"
"اه..بنت وولد"
"وانتى راضية بخراب البيت"
"انا مالى هو كده كده مش مرتاح معاها وانا مقلتلوش طلقها"
"بذمتك انتى مقتنعة باللى بتقوليه ده"
وقعدت راوية جنب مامتها...ونزلت دموعها
"انا بحبه وهو بيحبنى...مش ذنبى انه مش مرتاح معاها وهيطلقها"
"يابنتى انا خايفة عليكى تكونى نزوة فى حياته وبعد مايفوق يحن لمراته وعياله وانتى تندمى"
"لو كنت نزوة مكنش قال هيتجوزنى"
"كلهم بيقولوا كده...اللى متجوز وعايز يعرف واحدة تانية بيقولها انه مش مرتاح مع مراته ويلف يلف ويرجع لحضن مراته فى الاخر"
"لا هو بيحبنى وانا متأكدة من كده"
"ابعدى عنه احسن لك واحسن لهم"
"مش قادرة ياماما انا حاولت ابعد عنه لما كنت فاكرة انه بيحبها بس هو بيحبنى انا يبقى انا الاحق بيه"
"اتغيرتى ياراوية وبقيتى انانية اوى"
"من حقى احافظ على الانسان اللى بحبه"
"بس هو من حق مراته وعياله... انتى بره "
"لا ياماما انا متاكدة انه بيحبنى"
"ربنا يهديلك نفسك يابنتى...بس اعملى حسابك انا مش موافقة على جوازك منه"
"يعنى ايه"
"يعنى مش هقولك مش هتتجوزيه لانى عارفة انى دلوقتى بقيت لوحدى بعد ابوكى الله يرحمه وممكن متسمعيش كلامى وتنفذى اللى فى دماغك...بس حتى لو اتجوزتيه انا مش راضية عن الجوازة دى"

هناك 19 تعليقًا:

  1. ايوووه كدا ربنا ينور عليكي يا حجه :D

    ردحذف
  2. عندك حق والله

    الله ينور عليكى يا حجة :D

    راوية دى بتستهبل و هتخرب البيت و طارق مفروض يلم نفسه بقا و بسمه تتعدل و تشوف جوزها و اولادها

    ردحذف
  3. اه والله مامتها تمام وراوية عامله هبله وطارق واحد متسرع وبسمه غلطانه المهم جودي وسيف هما اللي تمام ف الحكايه دي :D

    ردحذف
  4. هههههههههههههههه
    بس المهم انها تسمع كلام مامتها

    ردحذف
  5. بجد انو امها بتفهم... بس حرام هي حبتو .. كل الحق ع بسمه ما عرفت اتحافظ على جوزها وبيتها

    ردحذف
  6. ايوووووووووووووووووووووه بققققققققى يا حجه اديهااااااااااااا ع جنبهااااااااااااااااا الكلبه القليله الادب دى

    ردحذف
  7. انا خلاص والله عايزه امووووووووووووووووووووت طارق وروايه دى الله يقطعها

    ردحذف
  8. ayoh b2a 5ly 7ad efo2ha shwea :D
    Tu2aa

    ردحذف
  9. حلوه اوى بيستاذن من حبيبته عشان يقابل مراته والله الاتنين عايزين ضرب النار

    ردحذف
  10. دي بجحة يا ناس وكويس تصرف امها معاها عشان تفقوق لنفسها

    ردحذف
  11. ايووووووووووووووووووووووووووووووون كده ياحجه اديها كمان

    ردحذف
  12. راوية دي ههبلة ولا بتستهبل
    دي معندهاش ريحة الدم
    بصراحة عايزة اولع فيها وف الزفت طارق ده

    ردحذف
  13. انا متغاظه اوووى من البت الانانيه دى نفسي اخل اجبها من شعرها يارب تدوق من نفس الكاس او يتسلى بيها ويرميها زى الكلبه ويرجع لمراته احسن من الاول

    ردحذف
  14. والله احلى ناس فى الحكاية دى كلها الامهات عاقلين كده :)

    ردحذف
  15. والله الست ام راويه دى عثل وزى الفل بس ياريت راويه تفهم وتحس بقا

    ردحذف
  16. وين الحلقة 23 بين نارين

    ردحذف

قول رأيك بلاش تقرا وتقفل من سكات...ارائكم تهمنى