الأحد، 4 ديسمبر 2011

بين نارين... الحلقة 5

الحلقة 5
مسك طارق التليفون...وفضل يبص له وهو مستغرب من رد فعل بسمة... ساب التليفون وقام مسك شوية اوراق فضل يقلب فيهم من غير مايكون شايف الكلام

فى اوضة بسنت...رن موبايلها
"بسمة...ازيك"
صوت بسمة بتعيط
"مش كويسة خالص يابسنت"
"مالك بتعيطى ليه انتى اتخانقتى انتى وطارق"
"لا احنا سبنا بعض"
اتنفضت بسنت من مكانها
"ايه؟؟ايه اللى بتقوليه ده... ازاى يعنى"
وحكت بسمة اللى حصل
"بصراحة يابسمة انتى غلطانة"
"غلطانة علشان عايزة خطيبى يهتم بيا"
"لا طبعا مش قصدى..انا اقصد انك غلطانة فى اختيار التوقيت اللى قلتي فيه وفى رد فعلك كمان"
"يعنى مش من حقى اعاتبه"
"انا بس عايزة اقولك اننا هنا مش بنلحق نشوفه.. ده ساعات بيخرج من 8 الصبح يرجع 12بالليل وانتى عارفة انه فى مرحلة مهمة فى حياته والفرصة الجديدة اللى قدامه"
"انا عارفة كل ده..بس .."
"بس ايه؟؟؟ غلطتى ولا لأ"
"مغلطتش... بس اتسرعت"
"وبعدين...اقوم اكلمه"
"بصى انا هكلمه انا ولو لقيته رد عليا وحش هقولك"
"ماشى وانا مستنية اطمن"

رن موبايل طارق وهو قاعد ماسك اوراقه
"نعم"
"بتكلمنى كده وانا بتصل اصالحك"
"وانتى بتقفلى فى وشى يابسمة"
"انا اسفة ياحبيبى... هو انا ايه اللى زعلنى مش انى بحبك وعايزاك تهتم بيا"
"انا قبل ماانشغل مش قلتلك هنخرج ونتفسح علشان مش ضامن افضى امتى"
"خلاص بقى انا اسفة...ولا انت لسه زعلان"
"كنت هزعل لو مكنتيش كلمتينى بسرعة"
"انا عايزة اقولك حاجة بس لو مش فاضى بلاش"
"لا قولى"
"انا زهقانة من الفراغ اللى انا فيه وانت مشغول على طول.. عايزة اشتغل"
"هتشتغلى ايه؟؟"
"اى حاجة مش لازم فى تخصصى... ممكن اقدم فى مدرسة خاصة ولا حضانة انت عارف انى بحب الاطفال"
"معنديش مانع بس بعد الجواز مفيش شغل نهائى"
"حاضر"
"طب بقولك ايه؟؟ تشتغلى سكرتيرة"
"سكرتيرة ايه؟؟انا؟؟لالالالا"
"خلاص.. انتى الخسرانة"
"وانت يرضيك اشتغل سكرتيرة"
"ماهو هيرضينى علشان هتبقى سكرتيرتى ومعايا فى المكتب"
"بجد؟؟انا موافقة موافقة"
"لا خلاص بقى انتى مش عايزة"
"لا عايزة ابقى معاك على طول...بس انت مش اختارت سكرتيرة خلاص"
"لا مش عجبانى ومشيتها امبارح... وكنت هدور لسه لقيتك بتقوليلى عايزة اشتغل"
"دى فكرة هايلة جداا... هبدا شغل من امتى"
"من بكرة..بس استنى الشغل شغل يعنى مفيش هزار ولا دلع"
"حاضر"
"خلاص هعدى عليكى وانا رايح المكتب اخر النهار"
"هستناك ياحبيبى"

استلمت بسمة الشغل مع طارق
كانت هى سكرتيرة الفترة المسائية... قصاد سكرتيرة الفترة الصباحية
وكان فى المكتب...طارق والاستاذة فاطمة من المكتب القديم
و2محامين جداد اختارهم طارق للمكتب الجديد
استقرت الامور وبدأ المكتب الجديد يحقق نجاح
امتدادا من اسم المكتب القديم
بدأوا يوضبوا الشقة ويختاروا اساسياتها مع بعض على مهلهم
وكان الاتفاق ان بعد ما طارق يتجوز يتم جواز بسنت وايمن فى شقة الام
حددوا معاد الجواز... وقبل الفرح بشهر سابت بسمة المكتب علشان تلحق تكمل حاجاتها وتشرف على التفاصيل الاخيرة فى الشقة

يوم الفرح كانت بسمة ملكة جمال... وطارق كان فى منتهى الوسامة والشياكة
الفرح كان راقى جدا وحضره شخصيات مهمة من معارف طارق
وكان كل الموجودين فى منتهى السعادة

فى شقة بسمة وطارق... الصبح وهما بيفطروا
وطارق بيفطر بعد ما لبس وحضر شنطته
"هى ماما مرضيتش تيجى تبات معانا ليه"
"انا سيبتها براحتها قالت عايزة تبات عند خالى"
"بسنت كانت عروسة زى القمر امبارح... وشوف الصدفة بيننا وبينهم شهرين بالظبط"
"والله لولا انهم اتجوزوا فى بيت ماما مكنوش اتجوزا فى سنين"
"الحمدلله...ايمن طيب وكويس وبيحب بسنت ويستاهلها"
"ماانا لو مكنتش متأكد من كده مكنتش وافقت عليه"
"ربنا يسعدهم"
"يارب...هقوم انا علشان متأخرش"
وقام حضنها واخد راسها يبوسها... بصت له
"طارق...انت لازم تروح المحكمة النهاردة"
"اه طبعا ليه؟؟"
"خلاص مفيش"
"قوليلى مالك"
"مش عارفة بس قلبى مقبوض شوية"
"ياستى خضيتينى... استعيذى بالله من الشيطان الرجيم...انا نازل لاحسن هتأخر"

طارق وهو فى المحكمة وقبل ما يدخل الجلسة
رن موبايله
"الو...ا\طارق "
"ايوه يافندم مين معايا"
"انا سوزان جارتكم وجبت رقم حضرتك من عم سعيد البواب"
"خير يامدام...اؤمرينى"
"ممكن حضرتك تيجى بسرعة... احنا شايفين دخان كتير خارج من شباك المطبخ وبنخبط على الباب المدام مش بتفتح...ياريت تيجى بسرعة"
 

هناك 7 تعليقات:

  1. مش عاجباني شخصية بسمه دي خالص ؟ سطحيه و هبله و معندهاش راي حاسه انها عاوزه تتجوز وخلاص ؟ كمان فكرة المجتمع الذكوري بتتجسد كلايا في طارق ؟ لما بسمه كلمته يقولهو اتا مش زعلان كنت هزعل لو اتاخرتي في مصلحتي مع ان هو اللي المفروض كان يكلمها مش هي اصلا ؟!! و بعدين ايه اللي كل شويه تعيط ؟ مش فاهمه انا يعني ؟!!

    ردحذف
  2. تحليلك هنا صح
    بسمة عقلها صغير
    طارق عنده انانية شوية

    ردحذف
  3. بس على فكره دى طريقت معظم البنات انا مش فاهمه انتو متحاملين على القصه كده ليه جميله جدا على فكره

    ردحذف
  4. انا ليا تعليق عام على كتاباتك يا استاذة دينا وهى انك تقريبا معظم قصصك معتمده فيها على البيت الا غايب فية دور الاب تقريبا الابن والابنه والام والاخ الكبير والبنت الا مستنية اخوها يجهزها وكل البنات عندك بتعيط من اى موقف مع ان فى شخصيات كتير لبنات قوية وبتواجه بدون متعيط .على فكرة انا بحب قصصك ومتبعاها والكلام ده من غير زعل .

    ردحذف
  5. طارق دا محسسنى ان الحياة لونها بمبى كل المشاكل لها حل

    ردحذف

قول رأيك بلاش تقرا وتقفل من سكات...ارائكم تهمنى