الأربعاء، 7 ديسمبر 2011

بين نارين... الحلقة 7

الحلقة 7
دخل طارق من المحكمة... ملقاش نجاة بتجرى عليه تاخد منه شنطته تدخلها المكتب
شاف بسمة جاية ناحيته ببطء من تقل بطنها
"نجااااااااااة"
"مش موجودة...هات الشنطة"
"لالا مش مهم انتى مش قادرة"
"احضرلك الغدا"
"لما نجاة تيجى...هى هتتأخر"
"نجاة نجاة... انا اللى مراتك ياطارق مش هى"
وضحك طارق
"انتى بتغيرى عليا من الشغالة"
"ومغيرش ليه انا مش ست وانت جوزى ونجاة دى بنت حلوة وصغيرة"
"طيب يامراتى وانا جوزك انتى تعرفى عنى انى ممكن ابص لاى واحدة وانا معايا القمر"
"بجد ياطارق"
"طبعا ياحبيبتى... بس بجد هى هتتأخر علشان انا جاى جعان اوى"
"نجاة مشيت خالص ياحبيبى"
واستغرب طارق
"مشيت...ليه وازاى؟؟"
"انا اتضايقت من وجودها واديتها حقها وزيادة"
"بس مين هيخدمك"
"ربنا يقدرنى وكلها شهرين بالكتير وارجع لطبيعتى ومكنش محتاجة حد"
"خلاص براحتك... انا كنت عايزك تبقى مرتاحة"
"انا كده مرتاحة اوى الحمدلله"

فى مكتب طارق...دخلت له السكرتيرة
"ا\طارق فيه ناس عايزين حضرتك"
"مين؟؟ موكلين جداد؟؟"
"لا واحد بيقول عايز حضرتك ويعرفك شخصيا ومعاه واحدة"
"خليه يتفضل"
وخرجت السكرتيرة ودخلت مع الضيوف
ودخل شاب ومعاه بنت واول ما شافهم طارق قام وقف
طارق"اهلااااااااا ... ازيك يا محمود "
محمود"طارق باشا... اخبارك ايه"
طارق"الحمدلله انت فين من زمان...اتفضلوا"
محمود"اعرفك على راوية خطيبتى"
طارق"اهلا وسهلا"
راوية"اهلا بحضرتك"
محمود"مش قلتلك طارق صاحبى من زمان... اصلها مكنتش مصدقة يا سيدى"
طارق"لا ازاى محمود حبيبى من ايام الجيزة"
وضحكوا كلهم مع بعض
محمود"بص بقى ياطارق انا عارف انك مشغول ومش هعطلك.. انا جاى لك فى خدمة"
طارق"اؤمرنى... قتلت ولا سرقت"
محمود"ايه ياعم الفال الوحش ده... راوية خريجة حقوق ولما قالتلى انها عايزة تشتغل قلت مش هلاقى حد احسن منك تتمرن عنده"
طارق"بس كده...تحت امرها تنورنى"
راوية"بجد يا استاذ طارق... ده شرف كبير ليا"
طارق"ورينا شطارتك بقى واثبتى انك محامية شاطرة"
راوية"ان شاءالله ربنا يقدرنى واكون عند حسن ظن حضرتك"
محمود"متشكر اوى ياطارق مش هنعطلك اكتر من كده ونستأذن"
طارق"لا ازاى...انت منورنى"
محمود"لا معلش شوف شغلك انت ومتشكر اوى"
وقام محمود وراوية
راوية"اجى لحضرتك امتى"
طارق"لو عايزة من بكرة تعاليلى المحمة الساعة 9"
راوية"ان شاءالله بكرة الصبح هكون هناك"

فى بيت طارق وبعد مااتغدا هو وبسمة
كانت راجعة من المطبخ... شافها طارق
مسكت دماغها فجأة وحاولت تسند على اى حاجة جنبها
ملحقتش... قام طارق بسرعة وفى نطة واحدة لحقها قبل ما تقع وتتخبط فى الارض
بعد مافاقت بسمة وطارق جنبها
"ايه اللى حصل"
"دوختى تانى... مينفعش كده انا مش هعرف اسيبك لوحدك تانى"
"ليه بس ان شاءالله مش هتتكرر"
"وانا اضمن منين... انتى اتسرعتى لما مشيتى نجاة"
"طارق ارجوك متتكلمش فى الموضوع ده تانى"
"خلاص نشوف واحدة تانية"
"لا مش عايزة حد تانى خلاص"
"والحل"
"هروح اقعد عند ماما الفترة اللى جاية دى...واهو هانت خلاص"
"طب وانا ...البيت عندكم مفيهوش مكان "
"خلاص اقعد انت كمان عند مامتك لحد ماربنا يحلها والايام اللى فاضلة دى تعدى"
"ايام ايه بس...لسه مش اقل من شهر"
"اهو هانت برضه"
"ماشى... ربنا يكملها على خير علشان نخلص بقى من وجع القلب والشحططة دى"

هناك 15 تعليقًا:

  1. هو ايه اللي داخت في الشهر ال 8 دي ؟؟؟؟؟؟

    ردحذف
    الردود
    1. استاذه مى..هو انتى بتنتقدى اى حاجه كده ليه ؟ انا ملاحظه ان انتى مش عاجبك حاجه خالص

      حذف
  2. الدوخة سببها انها صحتها تعبانة مع الحمل
    مش من الحمل بس"يعنى مش دوخة ال3شهور الاولى بس"

    ردحذف
    الردود
    1. تسلم ايدك يا دندن والله ....تصدقينى لو قولتلك ان اجازتى كلها ليل نهار بقرا قصصك والله انا مبسوطه اوى بيكى وبقصصك استرى يا دودو وراكى ناس بتحبك اوى ومستنيه منك المزيد

      حذف
    2. تسلم ايدك يا دندن والله ....تصدقينى لو قولتلك ان اجازتى كلها ليل نهار بقرا قصصك والله انا مبسوطه اوى بيكى وبقصصك استرى يا دودو وراكى ناس بتحبك اوى ومستنيه منك المزيد

      حذف
  3. كانت راجعة من المطبخ... شافها طارق
    مسكت دماغها فجأة وحاولت تسند على اى حاجة جنبها
    ملحقتش... قام طارق بسرعة وفى نطة واحدة لحقها قبل ما تقع وتتخبط فى الارض اسبايدر مان يا خواتى اية الحلوة دى

    ردحذف
  4. هو ازاى تعليقات الناس سخيفه كده..؟!!!

    ردحذف
  5. مش عرفة ازاي كل التعليقات من الاستاذة مي مجدي هدامة اوي كدة انا عن نفسي شيفة ان القصص كلها اكتر من روعة و القصة دي كمان جميلة اوي و اكيد كل حدث من الاحداث الي بتحصل ليها هدف مهم فالي جي و الكاتبة هي الوحيدة الي هتبقي فهمة هي كتبت كدة ليه فيريت بلاش نفضل نعلق علي كل حاجة بالشكل السئ ده و نستني اكيد هنفهم من باقي القصة و احب اعتزر احضرتك اوي يادينا عن اي ردود لا تحمل بداخلها شئ الا الهدم و عدم الرضا بأي شئ انا بجد عيزة ابدي اعجابي الشديد بكل حاجة بتكتبيها و صدقيني انا بتعلم منك حاجات كتيرة بتساعدني فمحاولاتي اني اكتب قصص فعلاً انت كاتبة متميزة و ليكي اسلوبك الخاص الرائع الي بلمسوا فكل قصة بتكتبيها اتمني ان ربنا يوفقك و تفضلي تمتعينا بقصصك المشوقة و رمضان كريم :)

    ردحذف
  6. اية دة يا استاذة هى الحلقة قصيرة اوى كدة لية ؟؟!!

    ردحذف
  7. على فكره فى شخصيه رخمه جدا كل مره بتعمل تعليق ملوش لازمه اللى مش عاجباه ما يقراش احسن يا جماعه
    بس سيبك انتى يادينه بجد انتى استاذه بجد ومبدعه ربنا يوفقك يااااااااااااارب
    .
    .
    رحمه

    ردحذف
  8. yareet aly mosh 3agbo mi2rhash nty mbd3a ya dena wlahii w na mtb3a kol kssk





    yasmen

    ردحذف
  9. بجد قصصك تحفه ومعبره وبحس اني فعلا عايشه الاحداث القصه أنتي فعلا فنانه

    ردحذف
  10. تـــحــــفــه اويي ما شاء الله

    ردحذف
  11. اية البت الرخمة اللى اسمها مى مجدى دى على فكرة يادودو قصصك كلها جميلة

    ردحذف
  12. انا اول مره اعرف حضرتك بس بجد قصصك مشوقه وجميله انا حبيتك بجد وسيبي اللي مبيفهمش يعلق براحته ده دليل علي نجاحك لو قصصك مش عاجباه مش هيستنا الحلقه بتاعتك عشان يقراها

    ردحذف

قول رأيك بلاش تقرا وتقفل من سكات...ارائكم تهمنى