الأحد، 22 يناير 2012

اشجان... الحلقة 14

الحلقة 14
بعد ما رجعت حكت اشجان لمامتها على اللى قالته هناء
"اه طبعا ياريت تتنقل باسمك وتاخديها من عينيه"
"يعنى رأيك اخدها"
"اه طبعا اومال تسيبيهاله"
"بس مش معايا فلوس"
"الفلوس نتصرف فيها ان شاء الله بس اسألى هينفع تبقى اسمك"
"هشوف"
وطول الليل اشجان مستنية الصبح يطلع علشان تروح تشوف حكاية الشقة هتنفع ولا لأ
وفعلا راحت وسألت وعرفت انه ممكن تتحول الشقة باسمها بعد ماتقدم الاوراق اللى تثبت الطلاق وحضانة البنات بعد ماتدفع فلوس الحجز
وراحت الشغل... وبدأت تلم جمعية بسرعة علشان تقدر تجيب فلوس الايجار...كل زمايلها وقفوا جنبها ودخلوا فى الجمعية علشان عارفين ظروفها ... وجمعت المبلغ
راحت دفعت... واتكتبت الشقة باسمها
وطلعت ايصالات الايجار باسمها لوحدها
وكانت فرحة كبيرة ليها...واتفك الشمع الاحمر اللى على الباب

لما جه على يزورهم... بعد يومين بس من موضوع فك الحجز
كانت اشجان فرحانة وهى بتقول
"شفت ياعلى.. الشقة بقت باسمى"
"وانتى فرحانة على ايه؟"
"فرحانة انى اخدتها...حقى وبتاعتى وانا اللى دافعة فلوسها"
"طيب علشان تبقى فاهمة الشقة هتفضل مقفولة وانتى مينفعش تعيشى فيها مع بناتك"
"انا مفكرتش انى اعيش فيها لوحدى... انا قاعدة هنا مع ماما ومش هينفع اقعد لوحدى علشان مدارس البنات هنا"
"كويس انك فاهمة كده... ماهو مينفعش مطلقة ببنات تعيش لوحدها انتى عايزة الناس تتكلم علينا"
حكمت"لا طبعا هى مينفعش تعيش فيها... تبقى تبيعها وتاخد فلوسها احسن"
على"تعمل اللى تعمله المهم متقعدش لوحدها"
واشجان ساكتة ومش بتتكلم لانها اصلا مفكرتش انها تقعد لوحدها
وبعد كام يوم... اتصل بهاء بعلى علشان عايز هدومه اللى فى الشقة
وحدد معاه معاد يوديله هدومه
وراحت اشجان لمت هدومه واديتها لعلى ...يوصلهاله
وكان المتوقع انه ميسألش عن البنات...وفعلا ده اللى حصل
ومن يوم الانفصال اللى كان قبل الطلاق لا بيسأل عليهم ولا شافهم ولا مرة خلال ما يقرب من سنتين
واتعودوا على كده ... والبنات كانوا مرتاحين كده

كان الروتين اليومى لاشجان
بتروح شغلها... وكل يومين ترجع من الشغل على السوق تجيب احتياجات البيت اللى لازماهم... وتكون حكمت محضرة الغدا يتغدوا وتقعد مع البنات تشوف مذاكرتهم او تتابع حكاياتهم واللى حصل فى المدرسة او الدرس وتسمع لكل صغيرة وكبيرة منهم
والمصاريف بتزيد عليها اوى
وفى يوم وهى قاعدة مع البنات ومامتها
"انا عايزة اخد رأيكم فى حاجة"
حكمت"خير"
اشجان"المصاريف بتزيد كل ما بتكبروا وانا تعبت ومفيش قدامى غير انى اشتغل اضافى "
حكمت"ايه الاضافى ده"
اشجان"يعنى بدل مااخرج من الشغل الساعة 2 اخرج 4 وده عليه حافز ييجى 100 جنيه كده"
زينة"وماله ياماما... مفيهاش حاجة"
مى"بس كده هتتأخرى علينا"
حكمت"طيب بدل بالنهار مفيهاش حاجة... بس ده لوحدك ولا معاكى ستات"
اشجان"معايا ستات ورجالة عادى... نص الشغل عندنا بيقعدوا اضافى"
حكمت"خلاص بدل مش لوحدك... اقعدى"
واصبح يوم اشجان بيبتدى من 8 الصبح وبترجع بعد 5 المغرب لو راحت تشترى اى حاجة ولما ترجع بدرى بتكون 4 ونص
ومع ذلك عمرها ما اشتكت من الارهاق علشان تقدر تقعد تتابع بناتها وحكاياتهم وحكايات مامتها
وكانت بتتمنى اجازة الصيف تيجى علشان تترحم شوية من المذاكرة والدروس...ويبقى النهار اطول وتقدر ترتاح ولو ساعة بعد ما ترجع من الشغل
وفى يوم بعد ما رجعت من الشغل... وبعد المغرب
قامت تلبس
"انتى بتلبسى ليه يااشجان"
"رايحة اعزى سمية زميلتى باباها توفى"
"الله يرحمه...وانتى مرواحك هيعمل ايه؟"
"هعزيها"
"انتى مش روحتى الجنازة خلاص"
"روحت الجنازة ورجعت الشغل على طول وبعدين انا هروح مع زميلاتى احنا اتفقنا كلنا اننا هنتقابل بعد المغرب هناك"
"متروحيش"
"ليه مروحش"
"كده...احنا بالليل والوقت متأخر"
"احنا المغرب وانا رايحة عزا مش فرح يعنى مش هتأخر"
وكملت اشجان لبس ونزلت

ومشى الحال بنفس الروتين اليومى ...وبعد اسبوعين
اشجان"بصوا يابنات علشان انتوا بتسمعوا الكلام وحلوين احنا معزومين على سبوع بكرة"
مى"الله سبوع مين ياماما... انا بحب الحاجات دى اوى"
اشجان"واحدة زميلتى ولدت وبكرة سبوع النونو"
حكمت"وانتى هتروحى"
اشجان"طبعا"
حكمت"وتروحى ليه"
اشجان"دى صاحبتى ومجاملانى وانا لازم اروح ارد لها المجاملة وغير كده البنات تغير جو شوية لانهم مبيروحوش فى اى حتة"
حكمت"انتى عايزة تخرجى فى عز الليل وتقولى مجاملة وكلام فارغ"
اشجان"بقول سبوع يعنى يوم ما هتاخر هرجع الساعة 9 ولا 10 وبعدين ياماما انا مبقتش صغيرة علشان كل ما اخرج تقوليلى ليه ولا وبلاش"
حكمت"مش صغيرة بس انتى مطلقة واى حركة محسوبة عليكى والناس ممكن تتكلم ..ده انتى كمان مش مطلقة وبس لا ومعاكى بنات كمان يعنى اى خطوة تتحسب عليكى"
كلام حكمت كان كانه سكينة طعنت بيها اشجان
وهى المطلقة اتحكم عليها بالحبس علشان كلام الناس
كتمت اشجان ألمها جواها ومبينتش لحد
وتانى يوم كان البنات فرحانين انهم هيخرجوا
وفعلا اخدتهم اشجان وراحت السبوع ومسمعتش كلام مامتها
لما رجعت كانت مامتها على السرير بتتفرج على التليفزيون
لما شافتهم دخلوا... اتدورت الجنب التانى واتغطت بالبطانية
"السلام عليكم"
قالتها اشجان... ومامتها مردتش عليها
"ماما انتى هتنامى... اتعشيتى"
ومردتش حكمت... وفهمت اشجان ان مامتها مقموصة علشان خرجت ومسمعتش كلامها... بس اهم حاجة عندها ان بناتها فرحانين لما خرجوا
تانى يوم مقامتش حكمت كالعادة مع البنات
وبعد ماالبنات راحوا مدارسهم قامت حكمت وفطرت لوحدها
ولما صحيت اشجان ولقت مامتها بتفطر لوحدها من غير ما تستناها زى كل يوم
"ايه ياماما فطرتى لوحدك"
وحكمت مش بترد عليها
"عموما انا معملتش حاجة تستدعى انك تخاصمينى"
"لا عملتى لما متعمليش حساب لكلامى وتخرجى برضه انتى وبناتك تبقى عملتى حاجة... المتطلقة المفروض تعمل حساب كلام الناس"
"اعمل حساب الناس علشان روحت اعمل واجب...اومال ليه بتقوليش انى اتاخرت لما اروح السوق ولا لما تبعتينى اشترى اى حاجة يبقى الناس مش هتتكلم"
"لالالا انتى فجرتى اوى...ايه الرد ده"
"فجرت علشان علشان روحت لزميلتى"
"لازم اخوكى يعرف ويشوف شغله معاكى"
"يعرف ايه؟؟؟ يعرف...انا معملتش حاجة اخاف منها ولا انا لسه صغيرة علشان اخويا يخوفنى... وانا مش هكبت بناتى بالعكس انا هخرجهم وافسحهم واعملهم كل اللى نفسهم فيه"

هناك 9 تعليقات:

  1. بجد بتصعب عليه اوى بحس ان اكتر الناس اللي معاها بيظلموها
    rahma

    ردحذف
  2. حرام والله اللي بيعمله فيها ده

    ردحذف
  3. كلام الناس كلام الناس اكتر حاجة بكرهها في حياتى
    هما ايه الناس دول مجرد كائنات ع كوكب
    المهم رب الناس

    ردحذف
  4. إحنا ايوة لازم نعمل حساب كلام الناس .. زي إني مامشيش مع ولد معرفهوش .. مقفش مع ولاد .. مدخلش شقق .. ساعتها الناس ليها حق تتكلم .. بس لما ام مطلقة وتخرج مع بناتها ..فيها إيه دي ..؟! يعني هيقولوا إيه ..؟! وحتي لو قالوا يقولوا زي مايحلي ليهم .. بس انا مش هحبس نفسي فى سجن " كلام الناس"

    ردحذف
    الردود
    1. فى ناس طبعا بتستنى اى غلطه على بنت حتى لو مغلطتش عشان تتكلم عليهم وده اوحش نوع من البشر وعشان هى مطلقه فعلا لازم مامتها تخاف عليها عشان كلام الناس لان الناس هتفكر ان مشيها غلط عشان هى مش بنت هى اتجوزت مره ولو مشيت غلط محدش هيعرف وبالذات انها اتجوزت مدمن انا عن نفسى لما بقف مع صحابى وعدت وحده متجوزه او كانت متجوزه بسمعهم انهم بيقولو كلام على الوحده دى بصراحه كلام يسم البدن وانا ببقا عارف انها كويسه بس فى ناس بتحب الكلام ده ولما اجى ابرأها واقول حرام تتكلمو كده انتو متعرفوش يقولو تعالا نسأل كذا وممكن يخلو الناس كلها تتكلم عليها وانا مبقتش اكلم الصحاب اللى هما كده ولا بقف معاهم حتى عشر دقايق على بعض بس انتو كبنات متعرفوش كلام الشباب او الناس ممكن يكون ازاى هى عندها حق انها عايزه تفرح بناتها ومامتها عندها حق انها تخاف على سمعتها وسمعة بناتها من كلام الناس

      حذف
  5. bgd rbna m3aha enha mst7mla kol da

    ردحذف
  6. ايه الناس دى

    ردحذف
    الردود
    1. كائنات مورهاش غير الكلام على الناس الموئدبة واتهامهم
      باشياء غير حقيقية بالمرة
      حبيبه

      حذف
  7. هو يعني ايه واحدة مطلقة متخرجش ومعاها بنات كمان ليييييييييييييييييييييييييييييييييييييييييه؟
    عشان كلام الناس يعني ايه كلام الناس؟ ممكن حد يفهمني عشان خلاص الموضوع ده بقي بيرفع الضغط

    ردحذف

قول رأيك بلاش تقرا وتقفل من سكات...ارائكم تهمنى