الاثنين، 23 يناير، 2012

اشجان... الحلقة 15

الحلقة 15
وعدت الايام وحكمت بدأت ترجع لطبيعتها معاهم تانى
والايام ماشية على ما يرام لان اشجان لا بتروح ولا تيجى غير يدوب من البيت للشغل للسوق
وخلصت السنة... ونجحوا البنات
وكان الفرحة كبيرة لان زينة خلصت الاعدادية بمجموع كبير
وحكمت كانت طايرة من الفرحة
واشجان من فرحتها عزمت الشغل كله على حاجة ساقعة
وكل ما حد يسألها ايه المناسبة
"زينة بنتى نجحت فى الاعدادية"
وبعد ما خلصت توزيع... جت جنبها واحدة زميلتها
"مبروك يا اشجان"
"الله يبارك فيكى"
"قوليلى هتدخلى زينة ايه؟؟"
"ثانوى طبعا دى مجموعها يجيب الثانوى وهى مستريحة"
"وانتى ناقصة مصاريف"
"مصاريف ازاى"
"يعنى دخليها تجارة ولا صنايع 3سنين وتخلصى انما ثانوى ودروس ووجع قلب وبعدين كلية كمان ومصاريف انتى مش قدها"
"والله انا هسألها واللى هى عايزاه هعمله... ولو عايزة تكمل لو اخر قرش معايا مش هستخسره فى تعليمها بدل هى عايزة تتعلم"
ولما رجعت اشجان كانت لسه بتفكر فى كلام زميلتها
وكان طول اليوم ناس بتبارك سواء بييجوا او بالتليفون
وكان البيت كله فى فرحة... وبعد الناس مامشيوا
"قوليلى يا زينة... عايزة تدخلى ثانوى"
"اه طبعا اومال كنت بذاكر واجيب مجموع ليه"
"يعنى انتى هتقدرى على مذاكرة الثانوى وهتدخلى كلية"
"اه طبعا ان شاءالله"
حكمت"لازم تدخل ثانوى علشان ابوها يعرف تربيتك ازاى"
اشجان"لا انا هدخلها الثانوى علشان دى رغبتها مش علشان اعند معاه"

وتانى يوم بعد ما رجعت اشجان من الشغل
حكمت"تعاااااااااااااااااااااااااالى شوفى بناتك قللاة الادب"
اشجان"ليه عملوا ايه"
زينة ومى"معملناش حاجة هى اللى عمالة تزعق وتقولنا لما تيجى امكم هخليها تقطم رقبتكم"
حكمت"انتوا معملتوش حاجة يا سَفَلة"
اشجان"طيب قوليلى عملوا ايه علشان اتصرف معاهم"
حكمت"فاتحين اغانى بصوت عالى وعمالين يرقصوا حاجة قلة ادب"
اشجان"طيب معلش ياماما... ابقوا وطوا الصوت شوية"
حكمت"هو ده اللى قدرتى عليه انا فاكراكى هتاخدى كل واحدة فيهم قلمين"
اشجان"هما عملوا ايه علشان اخدهم قلمين"
حكمت"يا شيخة بلا قرف على تربيتك الخايبة"
وسابتهم حكمت ودخلت اوضتها وهى بتشتم فيهم
مى"والله ياماما احنا بس فتحنا التسجيل وقعدنا نسقف مع الاغانى ونلعب شوية"
اشجان"ماشى يا مى بس انتوا شايفين ماما بتتضايق ازاى متبقوش تزعلوها علشان مش ناقصين مشاكل"
زينة"ياماما دى الحاجة اللى بتسلينا ومش طول اليوم يعنى بس لو وقفنا فى البلكونة تزعق لو اتكلمنا فى التليفون تزعق"
اشجان"هى تربيتها كده ان كل حاجة عيب... انتم العبوا واتسلوا براحتكم بس من غير ماتضايقوها علشان خاطرى"
زينة ومى"حاضر ياماما"
واتكرر الحوار ده كل يوم
يوميا خناقات بين حكمت والبنات... لاسباب مختلفة
وكلها اسباب من وجهه نظر حكمت انها قلة ادب
ومن وجهه نظر البنات تسليتهم الوحيدة
واشجان فى النص... لاهى عايزة تمشى طريقة تربية مامتها وكل حاجة ضرب وتلطيش
ولا هى عايزة تكبت بناتها اكتر من كده
وفى يوم والبنات كانوا بيشتروا حاجة من تحت البيت ومش موجودين
"ماما مينفعش كل يوم المشاكل دى"
"وهو انا اللى بعملها ولا عيالك"
"بصى ياماما... دول لا بيخرجوا مع اصحاب ولا بيروحوا فى حتة غير معانا ولا ليهم اب يسأل عليهم ولا حد يفرحهم وانا اغلب وقتى فى الشغل عايزانى الحبة اللى بقعد فيها معاهم اشتم واضرب فيهم "
"علشان يتربوا... اومال عيارهم يفلت"
"عيار ايه اللى يفلت انا بناتى الحمدلله مؤدبين وتحت عينى ولما يرقصوا ولا يغنوا جوا البيت ده مش عيب "
"يا شيخة بلا خيبة على طريقتك المايعة"
وسكتت اشجان بعد ماعرفت ان مفيش فايدة
وقالت لنفسها امتى الدراسة تيجى وترحمنى من وجع القلب ده

وعدت شهور الاجازة وكل فين وفين لما ييجى يوم من غير المشكلة اليومية بين حكمت والبنات
وبدأت الدراسة واشجان حمدت ربنا ان الدراسة هتخفف المشاكل
وفى يوم وحكمت بتصحى البنات
وبعد ما قاموا
مى"ماما... بطنى بتوجعنى اووووى"
وقامت اشجان"مالك يا مى"
وبدأت مى تعيط
"بطنى بتوجعنى.... مش قادرة"
"انتى بتقولى كده علشان متروحيش المدرسة"
"لا والله ياماما بطنى بتوجعنى اوى"
"طيب خليكى النهاردة ومتروحيش واما نشوف المغص ده هيستمر لامتى"
وفعلا قعدت مى من المدرسة... وبعد ما رجعت اشجان من الشغل
لقيت مى لسه تعبانة
حكمت"لازم نوديها لدكتور المغص بيروح وبييجى بس لما بييجى بتقعد تعيط جامد"
اشجان"طيب انا هاخدها كمان شوية لما العيادات تفتح"
واخدتها اشجان وراحت للدكتور وبعد الكشف
الدكتور" تاخد الدوا ده وتجيلى تانى بكرة الضهر"
اشجان"هى عندها ايه يادكتور"
الدكتور"بكرة اتأكد... بس تاخد الدوا ونتابع المغص"
ورجعت اشجان وهى قلقانة... وجابت الدوا لمى ومع ذلك المغص مش بيروح... تانى يوم مراحتش اشجان الشغل وتابعت مى
مازالت تعبانة... اخدتها الضهر وراحت للدكتور
الدكتور" كده يبقى تاخديها على المستشفى حالا"
اشجان"ليه يادكتور"
الدكتور"لازم تعمل الزايدة اسبقينى على المستشفى وانا هجيلها بالليل"
واخدتها اشجان وهى قلقانة... واتصلت من الشارع بالبيت
حكمت"ايه يااشجان طمنينى"
اشجان" لازم تعمل الزايدة وانا هاخدها على المستشفى دلوقتى ابقى ابعتيلى هدوم ليا وليها مع زينة كمان ساعة كده"
حكمت"طيب اجيلك"
اشجان"لا ابعتى زينة علشان ترجع على طول تشوف اللى وراها"

بعد ما نزلت زينة حكمت قاعدة قلقانة وبتدعى ربنا يشفى مى رجعت زينة من المستشفى بتعيط
"ايه يا زينة؟؟ بتعيطى كده ليه"
"منظر مى صعب اوى وهى نايمة فى السرير ومتعلق لها محاليل"
"ربنا يشفيها يارب... ربنا يستر... متزعليش وشوفى وذاكرتك والصبح هطبخلهم واروح لهم المستشفى وانتى تبقى تيجى علينا"
قعدت زينة تذاكر... وبعدين دخلوا يناموا بدرى كعادتهم
وهما لسه هيناموا وكنا حوالى الساعة 10 فى عز الشتا
والدنيا هدوووووء... خبط الباب
وسمعت زينة
"ماما حكمت...ماما حكمت..قومى الباب بيخبط"
قامت حكمت مخضوضة
"هسسسس متعمليش صوت مش هنفتح لحد دلوقتى"
والباب مازال بيخبط
"يا ماما حكمت قومى نشوف مين"
"لالا احنا محدش بييجى يزورنا بالليل خالص"
والخبط بيزيد.... قامت حكمت بخوف تقرب من الباب
وزينة وراها... بيتسحبوا من غير صوت
ولما قربوا من الباب...سمعوا صوت اشجان
"افتحى يامامااااااااااا... افتحى يا زييييييينة"

هناك 11 تعليقًا:

  1. فين باقى القصة هى مى ماتت ولاايه؟؟؟؟؟؟؟؟

    ردحذف
  2. ياريت تكملى عاوزه اعر باقى القصه ومتشوقة جدا لان قراتها كل مرة واحده واتصدمت لم ملقتش الباقى ههههههههههههههههههه

    ردحذف
  3. التكملة بكرة ان شاءالله
    كل يوم حلقة ^_^
    نورتووووووونى

    ردحذف
  4. طب بكرة امتى ممكن تقوليلنا معاد عشان نستنها؟؟؟

    ردحذف
  5. مفيش معاد محدد والله
    لانى بكتب الحلقة كل يوم
    بس غالبا بتكون من 10 ل2 تقريبا

    ردحذف
  6. من 10 ل 2 الصبح ولا بالليل

    ردحذف
  7. بالليل بعد 10 مساءا
    واحيانا بتاخر حسب ظروفى والله
    وعموما ياريت تتابعينى من صفحة الفيس كمان لانى دايما بكتب فيها لو الحلقة هتتاخر او هتتلغى مثلا

    ردحذف
  8. جميييييييييييله وانتي بجد كاتبه رائعه واتمني ربنا يوفقك في اعمالك الجمييييله اوي دي ومنتظرين المزيييد

    ردحذف
  9. ميرسى كتييييييييييييييير
    وسعيدة بوجودك ومتابعتك
    نورتييييييييينى

    ردحذف
  10. شكرا على الرد وبجد قصة جميلة اووووى

    ردحذف
    الردود
    1. جميله جدااااااااااااااااااا

      حذف

قول رأيك بلاش تقرا وتقفل من سكات...ارائكم تهمنى