الاثنين، 9 يناير 2012

اشجان...الحلقة 3

الحلقة 3
فكرت اشجان وراحت لمامتها
"ماما...انا عايزة اقولك حاجة"
"قولى"
"انا عارفة انك مش معاكى تجهزينى فإيه رأيك اشتغل"
"اممم تشتغلى!!!"
"ايوه"
"هى فكرة كويسة بس هتشتغلى فين؟؟"
"ياماما أكيد لما هتقولى لقرايبك انى بدور على شغل هيلاقوا لى شغل كويس"
"خلاص انا هقول للعيلة واللى فيه الخير يقدمه ربنا"
وخلال ايام كانت حكمت قالت لاختها واختها قالت لجوزها وجوزها شاف معارفه..وبعد اقل من اسبوع بعد مارجعت اشجان ومامتها من عند خالتها قالت لعادل ولعلى ان اشجان هتشتغل من اول الشهر ومحدش اعترض لانهم عارفين انها فى حاجة للشغل فعلا

تانى يوم وبهاء عندهم كالعادة
"مش انا لقيت شغل يابهاء"
"شغل ايه ده؟؟؟ومين موافق على شغلك اصلا"
"ماما واخواتى وافقوا"
"لالالالا انتى تنسى الموضوع ده خالص"
"انساه ليه"
"لالالا شغل ايه؟؟انتى خليكى قاعدة فى البيت"
"مينفعش يابهاء...بالعربى كده ماما مش معاها تجهزنى وانا هشتغل علشان اجيب حاجتى"
"لا برضه مش موافق"
"انت عارف هشتغل فين وهاخد كام"
"مش مهم"
"مش مهم ازاى...انت عندك حل تانى ليا"
"انا مش موافق وخلاص"
وقعدوا طول اليوم يتكلموا وبهاء رافض بدون سبب واتدخلت حكمت وعلى وعادل لاقناعه بضرورة الشغل لحد ماوافق

اول يوم شغل راحت اشجان محل مسيو انطون اللى هتشتغل فيه
كان مبهر جدا... كان اقسام كتييييير وفيه كل المستلزمات سواء للبيت او الاسرة
قسم موبيليا\اجهزة\ملابس\تجميل... كل مايخطر على بال
اما اهم حاجة كانت المرتب اللى هتاخده...50 جنيه ده مرتبها
يعنى اضعاف مرتب اى موظف... واشتغلت اشجان وكان كل اللى فى المحل بنات فى سنها او اكبر بشوية واندمجت اشجان معاهم

بعد حوالى شهرين جه بهاء الصبح لاشجان قبل ماتنزل المحل
"بهاء؟؟انت مش فى المدرسة؟؟"
"انا عندى ليكى خبر فظيع... وشك حلو عليا"
"خير"
"انا استقلت من المدرسة"
وصرخت اشجان صرخة مكتومة
"هو ده الخبر الفظيع هو فظيع لانه كارثة"
"بالعكس...انا جالى شغل فى شركة اجنبية بمرتب اضعاف اضعاف مرتب المدرسة"
وردت اشجان بفرحة
"بجد صحيح"
"ايوه ومضيت العقد كمان"
"مبروك...يعنى كده الحمدلله هنقدر نجيب حاجتنا فى وقت قليل"
"اه طبعا وبرضه مش لازم نجيب حاجات كتير مالهاش لازمة احنا نجيب الاساسيات علشان نعرف نتجوز بسرعة احنا بقالنا سنتين مخطوبين ويدوب نشد شوية فى اللى ورانا"
"ان شاءالله انا كل شهر بشترى حاجات مهمة وربنا يسهل"

مرت الايام والشهور وبهاء بطل يقعد عند اشجان طول اليوم
وده بسبب ان اشجان اصلا مش موجودة طول اليوم
بس كان بياخدها من الشغل بالليل ويوصلها ويروح بعد العشاء
اما يوم الاحد وهو اجازة اشجان...ده بيخرجوا فيه مع بعض
وفى يوم جه بهاء الضهر وقال لاشجان ومامتها
"قوموا البسوا... فيه مفاجأة"
الام"خير فى ايه؟؟"
"جبت الشقة"
اشجان"بجد؟؟"
بهاء"ايوه يالا قوموا ألبسوا"
وقامت اشجان ومامتها لبسوا بسرعة
واخدهم بهاء ووقف عند عمارة فى وسط البلد... على شارع رئيسى
فرحت اشجان اوى بالمكان... ومامتها عجبها المكان
وطلعوا على السلم...طالعين...طالعين
الام"ايه يابهاء ده انا نفسى اتقطع...انت اخد اخر دور ولا ايه؟؟"
بهاء"خلاص ياطنط...فاضل دور"
وطلعوا...اخر دور... وبهاء مكمل
وحكمت بتبص لاشجان والاتنين مستغربين
ووصلوا للسطح
حكمت بنرفزة"فين الشقة"
بهاء بابتسامة مستفزة
"هنا ياطنط"
الام"هنا فين...انا شايفة سطح"
كل ده اشجان بتسمع ومش فاهمة بهاء يقصد ايه ومستنية تفهم
"ياطنط انا اتكلمت مع صاحب العمارة وقالى انى ممكن ابنى شقة هنا يعنى كانه دور زيادة"
"شقة فى سطح...دى تبقى فضيحة...واقول لعيلتى ايه لما ييجوا يباركولها...اقولهم بنتى هتتجوز على سطح عمارة"
اشجان"معلش ياماما اهو احسن من مفيش"
حكمت"يادى الفضايح... يادى الفضايح"
بهاء"ياطنط هو انا كنت لقيت حل تانى وقلت لا...دى شقة هبنيها على حسابى والراجل كتر خيره مش هياخد منى ايجار ولا حاجة"
حكمت مكنتش طايقة كلام بهاء...سكتت وهى مضطرة
بدأ بهاء بعد كده فى بناء الشقة وكان له مطلق الحرية فى تحديد مساحة المكان...بس هو حدد اوضة واحدة وانتريه ومطبخ وحمام
بمساحة صغيرة جدااا
وسبب تحديده للمساحة دى انه يبقى محتاج يجيب اوضة نوم بس
لان اشجان هى اللى هتجيب الانتريه
وقربت الشقة تخلص... ولا حكمت ولا اشجان شافوها

وفى يوم كانت اشجان بتستنى بهاء علشان نازلين
نادى واحد صاحب عادل ...وردت عليه اشجان
كلمتين ودخلت تنادى لعادل... وكان بهاء جاى وشافها
بعد ماخرجوا اتفاجئت اشجان بكلام بهاء
"ايه اللى هببتيه ده"
"انا؟؟؟ ايه اللى حصل"
"واقفة ساعة تتكلمى مع محمد وتهزروا وتضحكوا"
"ساعة؟؟ونضحك ونهزر من البلكونة ازاى يعنى؟؟والله ماحصل"
"انا شايفك واقفة معاه وبتضحكى معاه وهو عمال يكلمك ووضحك وهزار ...انا كنت واقف من بعيد"
"هو نادى على عادل وانا رديت كلمتين ودخلت"
"لالالا انا مينفعنيش الكلام ده... انتى بتكذبى"
"والله مابكذب... انا فعلا رديت بس دخلت بسرعة"
"لالا انتى متنفعينيش... انا لازم اطلقك"
اشجان مش مصدقة اللى بتسمعه... عادى كده بيقولها اطلقك
بعد كل الحب اللى بيحبهولها
بس لو طلقها... هيقول ايه لاخواتها
هيقول طلقتها علشان بتكلم واحد صاحب اخوها
يعنى مكتوب كتابها وبتكلم واحد تانى...ممكن يصدقوه؟؟
يصدقوه ازاى وده محصلش اصلا؟؟
هتقدر تقنعهم انه محصلش وانه هو اللى مكبر الموضوع؟؟

هناك 11 تعليقًا:

  1. انتى بتعرفى التفاصيل دى كلها ازاى بصراحة طريقة سردك للقصة شيق جدا بالتوفيق يا دندون

    ردحذف
  2. كريم
    نورتنى بعد غياااااااااااااااااااب
    زى ما قلت القصة واقعية فالاحداث من اشجان شخصيا
    اما الحوار والوصف وربط الاحداث ده من العبده لله

    ردحذف
  3. الشيماء مجدي10 يناير 2012 في 4:12 ص

    العبده لله حقيقي رائعه يكفي انك بس تكتبلنا القصه ولمستك اكيد هتبان من غير حاجه وانا رايي في قصصك وفيكي اكيد انتي عارفها انا مش لاقيه وصف يوصف تقديرك علي مجهوداتك وان شاالله دايما موفقه

    ردحذف
  4. الشيماء
    اشكرك من اعماق قلبى على كلامك الرائع
    اسعدتينى بكلامك واتمنى دايما قصصى تعجبك
    ميرسى كتييييييييييييييييييير

    ردحذف
  5. قصصك جميلة اوي يادندن بجد بالتوفيق تجنني

    ردحذف
  6. انا نظرتي متخيبش ابدا رخمممممممممممم

    ردحذف
  7. كالعاده مفيش كلام يتقال!"رائــعه" انا نفسي لما اكبر ابقي زيك انتي قدوه ليـه بــجد! :) <3 .. نفسي تردي عليا :) ..

    ردحذف
  8. أزال المؤلف هذا التعليق.

    ردحذف
  9. انا اللي عامله اخر تعليق بس مكانش عندي حساب :)

    ردحذف
  10. ما شاء الله حلو جداً ،،

    ردحذف
  11. بجد الاحداث مشوقه اووووي

    ردحذف

قول رأيك بلاش تقرا وتقفل من سكات...ارائكم تهمنى