الخميس، 12 يناير 2012

اشجان... الحلقة 5

الحلقة 5
حست اشجان بالامان فى بيت اهلها اكتر بكتير من بيتها
كانت حكمت بتراعيها وبتخدمها بكل حب واهتمام
اما بهاء لما قالتله انها هتقعد عند مامتها فوافق على طول
وكان بيروح لها فى بيت مامتها...وبيتعامل كأنه واحد من البيت
يتغدا ويدخل ينام ..عادى جدا بدون استئذان
وتُحرج اشجان...تدخل وراه تقوله
"قوم يا بهاء...انت هتنام"
"اه شوية كده بس أريح واقوم"
"طيب روح نام فى البيت براحتك"
"لالالا فى البيت هنام وهفتح فى النوم انا بس هريح ساعة واقوم"
وتخرج اشجان من الاوضة محرجة
"هو دخل ينام برضه زى كل يوم"
"ايوه"
"افففففففففف"
من رد حكمت واضح انها مش طايقاه ولا مستحملاه
وساكتة وراضية لانها عايزة اشجان تبقى معاها علشان تعرف تراعيها
اما المصاريف ف من يوم مااشجان اتجوزت وهو مش بيديها اى فلوس فى ايديها نهائى
هى لما بتحتاج حاجة بتجيبها من مرتبها...لانها بتتكسف تطلب منه
اما وهى عند مامتها فكان طبعا اللى بيصرف حكمت
وبهاء... كان بيجيب أكل وهو جاى...احيانا
ولما بيكون جايب أكل معاه... لازم ينادى علي اشجان من تحت
وبأعلى صوته
"نزلى السبَت... انا جايب ....."
وطبعا الجيران كانوا بيسمعوا...ويضربوا المثل بكرَم بهاء
اللى بييجى بيت حماته...شااااااايل ومحمِل من وجهه نظرهم

طالت القعدة فى بيت حكمت واشجان محرجة من تصرفات بهاء
قاعد نايم آكل شارب فى بيت مامتها
واللى بيجيبه ميجيش ربع اللى مامتها بتصرفه وهى عارفة ان مامتها ماشية بالمعاش بالعافية
وف مرة قالت اشجان لبهاء انهم لازم يروحوا بيتهم
وفعلا راحت البيت ...بعد ماوصلها بهاء
"انا نازل اجيب عشا وجاى"
"هتنزل فين دلوقتى...احنا مش اتعشينا عند ماما خلاص"
"ده من تحت بسرعة ...وافرضى حد فينا جاع ميبقاش فيه حاجة"
ونزل بهاء بسرعة البرق قبل ماتلحق اشجان ترد عليه
واتكرر اللى حصل قبل كده... سهر وتأخير
ورعب لاشجان من الاصوات الغريبة اللى بتسمعها ورا الباب
وتأخر ...اتأخر لبعد الفجر
واول مارجع
"كنت فين كل ده يابهاء؟؟؟هو ده اللى نازل تجيب العشا"
"انتى متعرفيش اللى حصل"
"ايه اللى حصل"
"انا نازل قابلت واحد صاحبى وكان عامل مشكلة مع واحد صاحبى تانى فقلت لازم اتدخل واحل المشكلة بينهم"
"بجد؟؟ وعملت ايه"
"اهو قعدت معاهم لحد ما الامور هديت واتصالحوا"
"انا خفت اوى"
"خلاص دى مرة صدفة وخلاص"
"طيب...انا يدوب ألحق انام كام ساعة قبل الشغل"
واتكرر نفس الموقف تانى يوم نفس التأخير
مع تغيير حجة الغياب... واشجان تصدق
بس قررت انها مش هتقعد تانى لوحدها فى البيت...ورجعت لبيت مامتها

فاتت الشهور وكل فين وفين لما اشجان تروح بيتها يوم وترجع تانى يوم من خوفها من الشقة المرعبة دى..واللى بتبقى فيها لوحدها
ورجع الحال تانى على ماهو عليه فى بيت حكمت
بهاء بيتعامل كأنه صاحب بيت
اغلب الوقت اللى بيصرف حكمت ولما بهاء يجيب حاجة لازم يسمع الشارع كله
وجه معاد الولادة...وولدت اشجان فى مستشفى خاص
لانها تبع الشركة اللى بيشتغل فيها بهاء
وجت زينة... وكانت زينة فرحة العيلتين
عيلة اشجان وعيلة بهاء
واشجان وبهاء نفسهم كانوا طايرين بيها
واحتفل بهاء ب زينة
وعمل لها سبوع كبييييير من فرحته بيها
سبوع كان كل اللى يشوفه يفتكر انه فرح مش سبوع

اول يوم روحت فيه اشجان كان يوم السبوع
بعد الناس مامشيت... بهاء نازل هو كمان
"انت نازل يابهاء"
"ايوه"
"رايح فين الساعة دى"
"رايح لجماعة اصحابى قلتلهم انى جايب لهم فول السبوع"
"استنى للصبح"
"مينفعش... انا وعدتهم"
ونزل بهاء... واتكرر نفس الموقف اللى بيحصل كل ما بتكون اشجان فى بيتها
واتأخر بهاء... وخافت اشجان
بس المرة دى معاها زينة
اللى مسكتتش طول الليل من العياط
وبقت اشجان محتارة تعمل ايه مع زينة...مش عارفة
اول مرة تبقى معاها لوحدهم... تسكتها ازاى؟؟؟
وقعدوا الاتنين يعيطوا... اشجان وزينة
وقررت اشجان انها لازم الصبح ترجع تانى على بيت مامتها
على الاقل حكمت مش بتخليها تعمل اى حاجة لزينة
هى اللى بتعملها كل حاجة
وفضلت اشجان صاحية.... لحد ما بهاء رجع
واول ما النهار طلع اخدت اشجان زينة وراحت لمامتها

زينة كانت مش بتنام ساعة على بعضها... وبتعيط كتير
وحكمت واشجان الاتنين بيراعوها... ومفيش فايدة
فات شهر تقريبا على ده الحال من يوم مااتولدت
"بقولك ايه يااشجان... البنت كده بتعيط كتير اوى وانا بقول نوديها لدكتور يشوفها...لتكون حاجة بتوجعها"
"طيب ياماما نروح امتى"
"قومى دلوقتى نوديها لاحسن دكتور اطفال يشوف مالها"
وراحوا لاحسن واشهر دكتور اطفال
مسك الدكتور البنت...وفضل يكشف عليها...ويعيد الكشف تانى
حكمت واشجان بيبصوا لبعض بقلق
الدكتور وشه ميطمنش... خلص كشف واخدت حكمت البنت تلبسها
حكمت"خير يادكتور...مالها"
الدكتور"انتوا ازاى ساكتين كل ده ومكشفتوش من بدرى"
حكمت واشجان ...برقوا عنيهم...
حكمت"ليه؟؟؟مالها"
الدكتور" البنت مولودة بعيب فى القلب ولازم لها رعاية خاصة لحد مانحدد اللى عندها بالظبط بالاشعات والتحاليل"
كتب الدكتور على اسم الاشعة المطلوبة والتحاليل
ونزلوا حكمت واشجان من عند الدكتور
والاتنين بيعيطوا... وكل واحدة تاخد البنت فى حضنها شوية
كأنهم بيودعوها... مجرد ذكر كلمة القلب... معناها...الموت
وحست اشجان ان اول فرحة فى حياتها
بتروح منها قبل ماتلحق تفرح بيها

هناك 12 تعليقًا:

  1. يا حرام ..عنجد انها بتزعل ..وهاد بهاء ما عندو دم ولا اخلاق بالمره

    ردحذف
  2. طبعا جميله كالعاده بس الشعب يريد حلقه طويلههههه
    Rania Fawzy

    ردحذف
  3. نيرو
    وصفك لبهاء صح جدا

    ردحذف
  4. رانيا
    ميرسى ياقمر
    ههههههههه مفيش فايدة
    مش قادرة اقنعكم انها مش قصيرة

    ردحذف
    الردود
    1. هى من جمالها بتخلص بسرعة وبنحسش بيها
      حبيبه

      حذف
  5. القصة المرة دي باينة في احداث وتطورات كتيرة وخصوصا انها حقيقية
    مع اني بحس ان كل قصصك حقيقية وبتخليني اعيش فيهاوفي احداثها رائعة في وصفك يا دينا
    سمية

    ردحذف
  6. حلوه قوي
    بجد معتش في رجاله عندهم دم ده حال شباب كتيرمتجوز ومتعودش يشيل مسؤليه

    ردحذف
  7. سمية
    ميرسى ياحبيبتى على كلامك

    ردحذف
  8. غير معرف
    للاسف صح كتير مش قد المسئولية

    ردحذف
  9. انا حاسة إن بهاء الي بيغمل الصوت عشان يخوفها فتروح تقعد مع مامتها فابالتالي مش هيدفع مليم و هوىواكل شارب نايم ببلاش

    ردحذف
  10. مريوووووووووووووم18 يوليو 2012 3:47 م

    لالالالالالالالا كدة كتير كتير اوووووووووووووي

    ردحذف
  11. hya mamt ashgan asln ely 8ltana enha tgawzha lwa7d zay bha2 da

    loma

    ردحذف

قول رأيك بلاش تقرا وتقفل من سكات...ارائكم تهمنى