الأحد، 15 يناير 2012

اشجان... الحلقة 8

الحلقة 8
مفهمتش اشجان كلام السواق
"ايه يرُص ايه؟؟... مش فاهمة"
"بيرُص ع الجوزة يا مدام... بيحشش"
واتصدمت اشجان من كلام السواق
وفضلت طول الليل تفكر فى كلامه
ولما بهاء رجع... لاحظت تصرفاته بدقة
راجع عينيه مش قادر يفتحها... ولا اكل ولا شرب
دخل اترمى على السرير ونام زى القتيل

تانى يوم فى الشغل حكت اشجان لهناء اللى حصل
"بس اللى اعرفه ان اللى بيحشش مبيبقاش ماسك كده"
"ازاى يعنى؟؟"
"يعنى واحنا صغيرين كنت اسمع ان بابا بيحشش بس كان بيجيب خير كتير فى البيت ولما يرجع شارب ناخد منه فلوس زى مااحنا عايزين ومكنش يستخسر فينا"
"يمكن فلوسه على قد الحشيش بس"
"انتى عارفة بيقبض كام؟؟انا سألت جوزى قال ان مرتبه ميقلش عن 250 جنيه"
"ايه؟؟كام؟؟ لالالا مش معقول ده اللى متعين بقاله 10 سنين مكملش 40 ولا 50جنيه"
"يا بنتى هما شغلهم مرتباتهم عالية غيرنا خالص... لو مش مصدقانى ابقى اسألى ده حتى بهاء بشتغل فى فرع فيه بدلات وحوافز ازيد كمان يعنى ممكن يكون بيجيله زيادة عن كده"
"وكل فلوسه دى بتروح فين؟؟؟ ده مبيصرفش الا كل فين وفين"
"انا مش عارفة انتى عديتى 4 سنين جواز وكل ده متعرفيش جوزك بيقبض كام ولا بيودى فلوسه فين... وازاى معودتيهوش يصرف عليكى وعلى البيت"
"والله ياهناء من اول مااتجوزت وانا كنت بتكسف اطلب منه حاجة ليقول عليا بجحة ولا جريئة وحتى لو جعانة كنت اكسف اقوله ليقول عليا من بيت جوع ولا حاجة"
"يااشجان ايه السذاجة دى... الواحدة مننا لازم تطلب من جوزها وهو اللى يقوم بكل مصاريفها.. ماانا بشتغل زيي زيك اهو وجوزى ميعرفش حاجة عن مرتبى وهو اللى قايم بكل مصاريفى ومصاريف البيت ده الطبيعى"
"ربنا يباركله ويخليهولك يارب"
ودخل عليهم زميلهم فى المكتب راجل فى الخمسينات تقريبا
هناء"بقولك ايه يااستاذ محمد... واحدة جارت اشجان شاكة ان جوزها بيشرب ومش عارفة بيشرب ايه بالظبط متعرفش ازاى تعرف تحدد"
محمد" يعنى فيه حاجات كتير...بس هو بيرجع شكله ايه"
اشجان" هو بيرجع مش قادر يفتح عينيه وينام كتير وفلوسه كتير ومراته متعرفش فلوسه بتروح فين"
محمد"اغلى حاجة البودرة اللهم احفظنا... وعلى كلامك ده ممكن يكون بيشم"
اخدت اشجان الكلام وسكتت خالص
تعمل ايه؟؟؟ تتصرف ازاى؟؟؟ تواجهه؟؟؟ اكيد هينكر
تقول لمين؟؟ متقدرش تقول لمامتها ولا اخواتها
تسكت وتعيش ... طيب تتأكد الاول... بس ازاى؟؟
ومرت الايام ومتغيرش حاله كتير واشجان مش قادرة تتكلم مع حد
واتأكدت انه فلوسه كلها بيستخسرها فى البيت علشان المخدرات
أيا كان نوعها اللى هى متعرفوش...بس النتيجة واحدة
وكان كل خوفها ورعبها على الجنين
اصحابها فى الشغل قالولها ان الادمان بيأثر على الجنين
وحالات كتير بيتشوه الجنين من ادمان الام او الاب
ومكنش فى ايدها حاجة غير انها طول الفترة الباقية من الحمل تدعى ربنا انه يحفظ جنينها من اى سوء

وصلت اشجان للشهر التاسع... وبقت تعبانة وبهاء مبيهتمش بيها نهائى... غرقان فى سهراته
واضطرت اشجان تروح عند مامتها علشان لو تعبت فجأة
وفعلا جه معاد الولادة وراحت المستشفى هى ومامتها
وبهاء لما عرف راح وراهم
ولدت اشجان الساعة 11 بالليل...كان معاهم على وخالة اشجان
وحكمت وبهاء
خرجت الممرضة ومكنش بهاء واقف فى اللحظة دى
"مبروك جابت ولد"
وفرحت حكمت واختها وعلى واول ما قرب بهاء
خالة اشجان"مبروك يابهاء... جابت ولد"
وفرح بهاء"بجد... بجد"
خرجت الممرضة بالبيبى... وراحت عليها حكمت
الممرضة" اتفضلى البنت"
بهاء"بنت؟؟؟"
الخالة"بنت؟؟ اومال اللى خرجت قالت ولد"
الممرضة"لا مش ولد... دى بنت... اتفضلى"
اخدت حكمت البنت بنفس الفرحة... وباركوا لبعض
ونزل بهاء... واختفى
لتانى يوم العصر
واشجان عارفة حاله الملخبط وفهمت انه اختفى علشان حكمت اللى تجيب اكل الوالدة... وسكتت
وفوجئت قبل السبوع بيوم بيعمل سبوع كبير ل مى زى سبوع زينة
سبوع كل الناس اتكلموا عنه وعن البذخ اللى فيه
وبعد ما شدت اشجان حيلها رجعت بالبنتين بيتها
وده علشان مامتها متلاحظش حال بهاء وتلومها اكتر وهى مش ناقصة

لما خلصت اجازة الوضع بقت اشجان تودى البنتين الصبح لحكمت وترجع تاخدهم بعد الشغل واحيانا تقعد لبالليل
فاتت سنة على ولادة مى واتأكدت اشجان ان بهاء مدمن
من حاله الملخبط... وفلوسه اللى بتتبخر.. وقلة صرفه على البيت
كانت الحسرة مالية قلبها وخصوصا انها خايفة تقول على حقيقته
وفى يوم بعد ما نزل العصر... شافت فلوس فى الدولاب
وكعادتها لما بتشوف فلوس مش بتيجى جنبها زى ما هو مأكد عليها
المرة دى مسكت الفلوس واتغاظت..وقالت لنفسها
"معاه كل الفلوس دى وبيضيعها فى السم الهارى"
وفكرت شوية... واخدت جزء من الفلوس ولبست ولبست البنات ونزلت

رجع بهاء الساعة 10بالليل...علشان يغير يهدومه وينزل يكمل سهرته... شاف اشجان فى المطبخ بتمسح وتشيل وتحط
"انتى بتعملى ايه الساعة دى فى المطبخ"
وابتسمت اشجان بفرحة
"بمسح علشان جبت بوتاجاز جديد والعربية هتجيبه بعد 12"
رد بهاء ووشه اتقلب زى الشيطان
"جبتيه منين"
"من عند مسيو انطون"
"لا... جبتى فلوسه منين"
"خدت 300 جنيه من اللى فى الدولاب"
وهجم عليها بهاء وشدها من الارض
وسمعت منه شتايم من اقذر ما يكون... بالام والاب وسب الدين
"الفلوس دى ترجع"
"ترجع ازاى؟؟ انا دفعت خلاص والعربية هتجيبه كمان شوية"
"بقى كده... طيب يا بنت............."
وجرى على انبوبة البوتاجاز...وفتحها
"انا هولع فيكوا انتوا التلاتة... انتى والاتنين دول"
ومسكت اشجان زينة ومى فى حضنها
وهى بتعيط ... وهما بيعيطوا

هناك 13 تعليقًا:

  1. ييييييييييييييييييييييييي لئ هيك كتيييييير ..معقوول يولع فيهم..بجد اشجان بنت مستوره ومسكينه..الله يستر من الحلقه الجاي
    nero

    ردحذف
  2. ماهو تقريبا مش فى وعيه
    المخدرات جننته
    ربنا يستر

    ردحذف
  3. دينا هو انتى اللى كاتبة يوميات بين فى سنة اولى جامعة :) ؟؟
    .
    .
    .
    .
    و على عمووووم كتابتك وهمية بجد ماشالله

    ردحذف
  4. ممكن اعرف حاجات اكتر حضرتك كتبتيها

    ردحذف
  5. اة انا كمان كنت عوزة اسال حضرتك نفس السؤال حضرتك كتبتى يوميات بنت فى سنة اولى جمعة (احمد و منى )

    ردحذف
  6. نورتونى يا جماعة
    لا القصة اللى بتقولوا عليها دى مليش علاقة بيها ومش انا اللى كاتباها
    كل قصصى هنا فى المدونة وهما 10روايات قبل اشجان
    ومكملة باذن الله بعد اشجان
    واللى يحب يقرا اللى فات هيلاقى القصص كلها فى الارشيف على يمين المدونة... تدوس على الشهر يجيبلك الحلقات المكتوبة فى الشهر
    سعيدة بتواجدكم معانا

    ردحذف
  7. اه اوك بس بجد انتى فظيييييعة ماشالله بس انا كان نفسى تكملى قصة حكم القلب بانها تصالحه هههههه :) بس والله هم حلوين اوى ربنا معااااكى

    ردحذف
  8. ربنا يخليكى يااااااااااارب
    وحكم القلب انا نهيتها كده علشان عملوا غلطات كتير وكان لازم متعديش كده بالساهل

    ردحذف
  9. اه عندك حق :) ربنا يوفقك انشاءالله يا حبيبتى انتى

    ردحذف
  10. لا ده مجنون
    rahma

    ردحذف
  11. يابن المجنونة

    ردحذف
  12. يا ابن المجنونه

    ردحذف
  13. انا فهمت انو مبيحبش البنات زى بعض الرجالة
    والشخص دة شخصيتوا حيوانة اووووووووووى

    ردحذف

قول رأيك بلاش تقرا وتقفل من سكات...ارائكم تهمنى