الأحد، 26 فبراير 2012

شبح الماضى... الحلقة 3

الحلقة 3
وقفت عزة...وبدأت ترجع لورا
مشى عمرو ناحيتها وهى بترجع
"د د ده ..... "
وهجم عليها عمرو ومسكها من شعرها
"ده ايه؟؟ بتحاولى تلاقى كلام ... متحاوليش انا سمعت كل حاجة "
"ابعد عنى "
وخلصت نفسها من ايده وبعدت عنه
"بتخونينى... بتخونينى ليه؟؟؟ قصرت معاكى فى ايه؟؟"
"علشان مش طايقاك"
"اومال الحب والدلع ده كله ايه؟؟؟تمثيل انا مش قادر اصدق ...عملت لك ايه علشان تخونينى"
"كنت عايز تفرق بينى وبين حبيبى"
"وهو انا غصبتك على الجواز"
"يا سلااااااااام... لما تيجى انتى لاهلى الغلابة وتقولهم انك هتاخدنى بشنطة هدومى وانت مهندس كبير ومرتبك كام الف جنيه والشركة مدياك شقة جاهزة ومش طالب منهم اى حاجة يبقى مأجربتهمش على الموافقة بزغللة عينيهم بفلوسك... ذنبه ايه حبيبى انه مش فى نفس ظروفك وانه معاهوش فلوس"
"انتى بتقولى ايه؟؟ انتى فاكرة ده مبرر لخيانتك"
"صح ...مكنش ينفع اخون حبيبى واتجوزك"
ومقدرش يمسك نفسه اكتر من كده... وضربها بالقلم
وصرخت عزة فى وشه
"انا بكرهك ومش بطيقك من اول يوم... كنت كل ما بتلمسنى بحس بنار بتحرقنى... بحس انك بتعذبنى بوجودك... بكرهك بكرهك"
ومسكها من شعرها يجرها بره الاوضة
"اطلعى بره زى ماانتى كده"
"افضح نفسك يا عمرو وسط زمايلك... وانا مش هسكت"
وسابها عمرو بعد مااتكسف من الفضيحة... ودخل جاب لها كومة هدوم بالشماعات بتاعتها ورماها على الارض
"البسى.... واخرجى زى ما دخلتى... باللى عليكى بس... وانتى طالق ياخاينة"

على سرير فى مستشفى
رانيا بتفتح عينيها... وباباها جنبها
"حمدالله على سلامتك يا حبيبتى"
"بابا... ماما فين ؟؟؟ وامير؟؟؟"
وارتبك الاب
"كويسين يارانيا"
"هما فين؟؟ عايزة اطمن عليهم"
وحاولت تقوم
"خليكى يارانيا رايحة فين؟؟"
"رايحة اشوفهم"
ومسكها باباها وحاول يقعدها على السرير تانى وعيونه دمعت
" ارتاحى انتى بس"
"بابا... انت بتعيط... حصل ايه؟؟؟ حد جراله حاجة"
رانيا بتعيط وهى بتسأله
"قولى الحقيقة يابابا... حد منهم مات"
وياخدها فى حضنه ويعيط زيادة...وهى تعيط
"مين فيهم يابابا... ماما ؟؟ امير؟؟"
"شدى حيلك يا رانيا... ده قضاء ربنا اننا نفقد الاتنين مع بعض"
وصرخت رانيا صرخة طويلة وفقدت الوعى بعدها

فاتت سنة... وفى بيت عمرو
"الغدا جاهز ياحبيبى"
"حاضر"
ييجى عمرو يتغدا...
"مش ناوى بقى يا عمرو تتجوز"
"ياماما لو سمحتى متجيبيليش سيرة الجواز تانى"
"ليه بس... تجربة وعدت وخلاص"
"انا مبقاش عندى ثقة فى اى واحدة... ولا اناوى ادى اسمى وشرفى لواحدة تانية ابدااا كفاية اللى حصل وصدمتى اللى اخدتها ومكنش يخطر فى بالى انى اتخان ببشاعة كده... انا كنت بثق فيها ومكنش يخطر على بالى اللى حصل ده ابدا"
"يابنى صوابعك مش زى بعضها ومش معنى ان واحدة طلعت وحشة يبقى خلاص"
"ياماما ارجوكى متتكلميش معايا فى الموضوع ده تانى ابدا... جواز مش هتجوز علشان مبقاش عندى ثقة فى اى واحدة"
"طيب اشوفلك بنت من العيلة"
"ولا من العيلة وملا من بره العيلة...خلاص ياماما"
"لا حول ولا قوة الا بالله يارب... كان نفسى اشوفلك حتة عيل وافرح بيه... منها لله اللى كانت السبب"
"مش عايز اسمع سيرتها ياماما"
"طيب تعالى اقعد معايا...انا تعبت من الشحططة دى"
"ياماما متتعبيش نفسك ومتشيليش همى... لو على الاكل انا اغلب وقتى فى الشغل والبيت هشوف حد يبقى ينضفه كل فترة ومينفعش اجى اقعد عندك علشان انتى عارفة ان بيتك هيبقى بعيد اوى عن الشغل... لو تحبى انتى تقعدى معايا تعالى"
"يابنى انا مقدرش اسيب بيتى متعودتش انام على سرير غير سريرى وف نفس الوقت مش هاين عليا اسيبك لوحدك"
"والله ياماما انا كويس ومتشيليش همى ولو حبيتى تيجى يبقى هتنورينى"
"اللى فيه الخير يقدمه ربنا"

ابو رانيا عند دكتور
"يعنى يا دكتور رانيا بقت كويسة دلوقتى"
"هى تعتبر رجعت طبيعية من ساعة ما خرجت من المصحة"
"انا حاسس انها لسه حزينة وكأنهم ماتوا امبارح مش من سنة"
"الصدمة كانت كبيرة عليها وال6 شهور اللى قعدتهم فى المصحة هما عالجوها من الحالة اللى جت لها بس طبعا حزنها على مامتها وخطيبها اكيد مش هينتهى بالسرعة دى لانهم كانوا كل حياتها"
"يعنى انا لو عايز اتكلم معاها فى اى حاجة فى حياتنا اتكلم عادى"
"خلاص اتعامل مع بنتك على انها رانيا بتاعة زمان هى طبيعية جدا دلوقتى وفى كامل قواها العقلية والنفسية والا مكنتش وافقت انها ترجع تشتغل تانى وتتعامل مع الناس "
"طيب يا دكتور ربنا يطمنك"

رانيا قاعدة فى اوضتها... قاعدة وسط سريرها
وحواليها البومات كتير... البومات من وهى صغيرة لحد ماكبرت صور عائلية فيها مامتها فى مناسبات مختلفة
البوم صور خطوبتها مع امير
البوم لصور فى مناسبات مختلفة هى ومامتها وامير
بتتفرج عليهم واحيانا تبتسم مع صورة...تدمع مع صورة تانية
دخل عليها باباها... طبطب عليها وقعد جنبها
"زى كل يوم برضه"
"بحس انهم موجودين معايا يابابا... الصور بتصبرنى"
"بس انتى كده مش هتقدرى تنسيهم"
"وانت يابابا عايزنى انساهم"
"مش قصدى...انا اقصد يعنى انك تعيشى حياتك عادى"
"ماانا عايشة اهو...باكل وبشرب وبنام وبشتغل بس مش عايزة انساهم... ده انا لو نسيتهم مش هسامح نفسى ابدا"
"طيب انا عايز اتكلم معاكى فى موضوع مهم بس عايزك تفهمينى"
"اتفضل يابابا"
"مامتك الله يرحمها كانت كل حاجة فى حياتى وبعد ما راحت وانتى دخلتى المصحة كنت لايص من غيركم... يابنتى مامتك كانت مبتخلينيش اعمل لنفسى حاجة حتى كوباية الشاى كانت بتعملها من غير مااطلبها"
"ماانا عارفة يابابا... قطعت بينا اوى"
"اوى والله... وانتى الحمدلله من يوم ما خرجتى من المصحة وانتى اغلب اليوم فى الشغل ولما بترجعى بتقفلى على نفسك وبتقعدى مع الصور... وانا حاسس بالوحدة لا حد بيكلمنى ولا بكلم حد ولا فى حد يهتم بأكلنا ولا البيت"
"حاضر يابابا انا ههتم بالبيت اكتر"
"انا مش عايز احملك فوق طاقتك"
"طيب اعمل ايه؟"
"ع ... ع ... عايزك... توافقى انى اتجوز"

هناك 20 تعليقًا:

  1. ممتعه جدا بانتظار باقى الحلقات بفارغ الصبر

    ردحذف
  2. يااااااااااااااااة دى رانيا ممكن تتصدم تانى كدا بجد حرام وعزة دى زبالة بجد

    ردحذف
  3. ميرسى كتيييييييييييييييير لمتابعتكم

    ردحذف
  4. دينا عندي فكرة ايه رئيك يبقا عشر حلقات في اليوم ههههههه بجد ممتعه جدا بس كدة حزن من اولها ربنا معاكي يا دينا يا رب
    rahma

    ردحذف
  5. موافقة جداااااااااااااا
    كل قارئ يقرا 10 حلقات من المدونة فى اليوم هههههههه
    مش ده قصدك برضه؟؟؟
    "ايموشن مستعبط"

    ردحذف
  6. l2 bgd l story de waaaaaahm nfsy 23rf a 2ly hai7sl b3dan ... w 3aza de 3aiza darb l naaaaaaaaaaaaaaaaaaaaaaaar w rabna isbr rania w mthe2ly mn 72 babaha f3lan ano ifkr fl gwaz

    ردحذف
  7. بقولك ايه ما تستني كده لحد ما تجميعها كلها وتحطيهالنا :D

    انا امبارح خلصت فوق احتمالي كلها بس كانت جامدة

    ردحذف
  8. ملك
    ميرسى كتير على رأيك ومتابعتك
    وطبعا باباها حقه يتجوز بس هى صدمة ليها

    ردحذف
  9. حسام
    ماهو انا لو استنيت مش هكتب حاجة
    ميرسى كتير على رأيك فى فوق احتمالى
    وفيه قصص خلصت كتير لو تحب تقراهم
    نورررررررررررتنى

    ردحذف
  10. اه انا شايف وعايز اقراهم كلهم والله بس انا في ثانوية عامة والوقت مش مساعدني يعني في الوقت الحالي هتابع دي بس وابقى اكمل الباقي بعدين :)

    ردحذف
  11. ربنا معاك ان شاءالله
    ولما تخلص تبقى تتابع كله براحتك

    ردحذف
  12. انا اللى معتش عندى صقة فى اى واحدة تانى خلاص حسبى الله ونعمة الوكيل

    ردحذف
  13. ابوهاااااااااا عايز يتجوز يادى الصدمه والوكسه الكبيره
    كبدى عليكى يا بنتى

    ردحذف
  14. اتصدمت بموتهم اووووى امها وخطيبهااا مره واحده
    فعلا كانت لازم يجيلها حاله نفسيه
    وطبيعى ان عمرو يتعقد بعد ماشاف الخاينه بتعمل كده
    مش عارفه صدمه رانيا هتبقى ازاى بعد طلب بابها ده بس اى واحده فى مكانها اعتقد ان ردها هيكون صعب

    ردحذف
  15. الحلقة دي تحفة بجد صدمتني جدااااا....بس كلامك بحسة واقعي جدا..مش كلام قصص و افلام..لما بتتكلمي او تحكي عن حاجة ببقي حاسة انها مش تأليف..انها حقيقية

    ردحذف
  16. wlahy shakl ranya w amr hi7bo b3d

    ردحذف
  17. بجد يا دينا مؤثره جدا انا اول ما عرفت ان الاتنين ماتو صوت فى البيت

    ردحذف
  18. حلوه اووي القصه دي عندي احساس ان عمرو هيتجوز رانيا ويكونوا بيحبوا بعض
    على فكره يا دينا انا قريتلك كان حلم وحكم القلب وبين ناريين وابغض الحلال وهل يشفع الحب واقوى حب وفوق احتمالي والحب على كفه ميزان ويوميات حماه وذكرى ساره ولسه بحب وليله حمرا والخائنه
    وبصراحه بجد ما شاء الله عليكي موهوبه بجد بجد انتي انسانه جميله اووي
    Merna

    ردحذف
  19. هيهيهيهيهيهيهي مش عارفة ناو هي رعب ولا رومانسي ولا ايه ؟؟!

    ردحذف
  20. لحد الوقتى كل حاجه عندى داخله فى بعضها

    ردحذف

قول رأيك بلاش تقرا وتقفل من سكات...ارائكم تهمنى