الحلقة 38 والاخيرة
الشهور بتعدى والحال بيسوء اكتر واكتر
بهاء بيزيد فى ادمانه وجوا البيت وبدل الحمام بقى فى الاوضة وبعد ماكان والباب مقفول بقى والباب مردود
واشجان كل ماتشوف انه بقى مش عامل اى اعتبار لحد تثور اكتر وكل مرة تزعق وتصرخ على الفاضى
وصحتها بقت على قدها بقالها 7سنين بتخدم مامتها المريضة وفى بيتها وكمان بناتها لما يحتاجوها
مبقتش قادرة حتى تزعق... لما تزعق تحس انها بتنهى قلبها ع الفاضى
والبنات كل مابيشوفوا بهاء بيبهدلوه على اللى بيعمله وخصوصا مى اللى مبتسكتلوش على اى موقف...وهو بارد ولا بيرد ولا بيتغير
والمصروف اللى بيدفعه بهاء بيقل كل شوية
واشجان لما تشتكى لعلى
"انا كبرت يااشجان ومبقتش قادر لمشاكل بهاء استحملى بقى وخلاص مع انى سمعت ان فى شغله مبيعملش للعملاء شغلهم الا لما بياخد منهم فلوس والناس بتدفع علشان شغلهم ميتعطلش"
"يخربيته يعنى بيفرض اتاوات ع الناس كمان...ومنشف ريقى على الفلوس...طيب يدينى من مرتبه الحلال وياخد الحرام ويصرفه على القرف بتاعه "
"هنعمل ايه بقى...هو الادمان بهدله استحملى يمكن يموت وتاخدى المكافاة بتاعته انتى والبنات وكمان المعاش"
"انا تعبت اوى وهو خلاص بيزيد جبروت"
ومتلاقيش حد جنبها... وتسكت ولما يحصل مشكلة جديدة
تتصل باخواته... اللى ييجوا فعلا
"بصى يااشجان انتى استحملتيه كتير كملى جميلك بقى يعنى هترميه بعد ما بقيتوا جدود"
"انا تعبت وهو مش بيتغير"
"لا يتغير غصب عنه"
ويتكلموا معاه...يوعدهم بالتغيير للاحسن
والوعود تروح على الفاضى... وترجع ريما لعادتها القديمة
وفى مرة جربت اشجان تتكلم معاه بالسياسة والعقل
"بص يا بهاء... انا مش بعد 30سنة هقولك بطل مخدرات خلاص انا عارفة انها بقت فى دمك... بس ادينى مصروف اقدر امشى بيه البيت معقول واحد زيك بيصرف على بنت واحدة مش قادر على مصاريفها"
"صح انتى معاكى حق... تاخدى كام مصروف ويبقى مليش دعوة بأى حاجة"
"قول انت اللى تدفعه كام من غير مشاكل"
"هديكى 800جنيه"
"ولو ان نانسى بتاخد دروس ب250 جنيه غير مصروفها غير مصروف البيت بس ماشى هاتهم وانا اتصرف"
"خلاص مفيش داعى تعزمى بناتك بقى علشان مفيش فلوس"
"هو انت متجوزنى بيهم ولاد راجل تانى مثلا...انت اب غريب وملكش دعوة ببناتى لما اعوز اعزمهم هجيب لهم انا من معايا"
واتفقوا...وولا شهر نفذ بهاء الاتفاق
بقى يديها مرة 250 مرة 300 ويوم ما يديها 400 جنيه يقعد يطلب اكلات كل يوم صنف مختلف وكأن الفلوس معاها بتولِد
ورجع تانى للشتيمة على اى موقف... ومبقتش قادرة تستحمل الاهانات دى بعد العمر ده كله... وفى يوم مع مشكلة جالها حالة من الصراخ الهيستيرى
"انزل مش عايزاك فى بيتى... مش عايزاك تعيش معايا"
وجه اخواته...ومى والجيران اتدخلوا...وهدأوها...وسكتت
حكمت بقت حالتها الصحية بتتأخر اكتر واكتر وبقت اشجان بتراعيها اكتر واكتر وكانت هى اولوية حياتها
وفى يوم جه قعد بهاء مع اشجان بهدوء
"بصى يا اشجان... انا عارف انك تعبتى كتير واستحملتينى كتير انا عايز اعوضك وهطلعك عمرة اللى نفسك فيها"
"بجد يا بهاء... لو عملت كده هسامحك على كل اللى فات والله يااااااااااه ده انا نفسى فيها من زمان من قبل جواز البنات بس كنت بقول جواز البنات اولى ومن بعد جوازهم وانا مش عارفة اوفر قرش اطلع بيه"
"انا عملت جمعية تبقى تقبضيها وتحجزى على طول..بس ابقى ادعيلى اوعى تدعى عليا هناك"
"لا والله هدعيلك ان ربنا يهديك"
وعاشت اشجان مع احلامها باليوم اللى تزور فيه الكعبة وقالت ان دى الحاجة اللى تعوض صبرها فعلا
وكأن كلام بهاء كان مجرد تخدير موضعى ومسكن لاشجان
وراح على ما راح...وكانت صدمة كبيرة لما عرفت من زميلته بالصدفة
"ده طلع من الجمعية بقاله كام شهر...قال مزنوق فى فلوس واخد فلوسه وطلع"
وقعدت اشجان ليالى تبكى فى صلاتها وتدعى ربنا يخلصها منه
وفى اواخر 2009
بصى يااشجان...احنا المفروض مستوانا يبقى غير كده"
"قول لنفسك"
"انا هعمل قرض كبير شوية اسدد منه اللى باقى من قرض جواز مى واجيبلك اى حاجة دهب بدل ماانتى مش معاكى غير الدبلة ونجيب عربية..مش معقول اجواز بناتى واصحابى يبقوا راكبين عربيات وانا لأ"
"انت حر... انا لا بصدق كلامك ولا بثق فيه"
وسكتت اشجان وهى عارفة ان عمره ماقال كلمة صدق
وبعدها بأيام...لقيته داخل البيت
"تعالوا شوفوا عربيتى الجديدة"
وشاور على عربية فى الشارع...واشجان مش مصدقاه...غير لما شافته ركبها فعلا... وجت مى
"انت عملت قرض بكام يابابا"
"عملت ب50 ألف... 10 اتخصموا باقى القرض القديم... واشتريت العربية ب30 وخلى ال10 دول معاكى لحد ماانزل واجى واقولك تعملى ايه"
"طيب هاخد ماما وننزل نشوف حاجة دهب"
وبكل عجرفة وتكبر
"لاااا انا بقول خليهم معاكى ومتتصرفيش فى اى حاجة الا لما اقولك...واوعى تدى امك حاجة الا لما اجى"
وفضل طالع نازل يدخل يشم او ياخد حقنة من غير ما يكلمهم
وبالليل... صرخت مى فى وشه
"انت بتذلنا ما تيجى عنا وتكلمنى وتقولى الفلوس دى اعمل بيها ايه"
"بصى انا مستلف من امى واخواتى حوالى الفين جنيه سدديهم... وهاتى مصروف ليا الفين جنيه...وانزلى اشترى لى هدوم داخلى وخروج وبيت من كله وحاجات نضيفه واقسمى 500جنيه انتى واختك... وهاتى لنانسى كام طقم وادى الباقى لامك مصروف للبيت ومتسألنيش عن حاجة كام شهر"
"انت مش كنت قايلها هتجيبلها دهب"
"مش مهم"
"لا مهم بقى واول حاجة انى هاخدها اجيبلها اى حاجة...دى كل ماتجيب حاجة تبيعها علشان البيت"
"ماشى ماشى"
ونزلوا ودفعت مى كل اللى قال عليه...وهدومه اتكلفت حوالى الفين جنيه... والباقى مش مكفى انها تجيب حاجة لاشجان...بس صممت انها تجيبلها غويشة بسيطة ..حاجة تفرحها بيها وخلاص
واللى اتبقى بعد ده كله الف جنيه بس... وبقت تصرف اشجان منهم بالمعقول لحد ما خلصوا بعد شهر ونص...ولما قالت لبهاء انها عايزة مصروف
"لاااااااااا ما انتى اخد 10 الاف جنيه"
"10 الاف منين؟؟؟ مش كنت سالف وانت اخدت وجبنا هدوم ليك واللى اتبقى 1000جنيه اسأل مى"
"مليش فيه...انتى متطلبيش منى حاجة اتصرفى مليش دعوة"
وبقى يتعامل على انه اللى بيدى الاف وهى اللى غلطت
لحد ما قابلت زميلته صدفة فى الشارع...وعرفت ان القرض كان بعد سداد القرض الاولانى...مستلم 50 الف جنيه فى ايده
وحكت اشجان للبنات وكانوا هيتجننوا
زينة"طيب اقولكم حاجة... احمد كان معاه العربية وشاف العقد لقى ان العربية ب22الف جنيه بس مش 30 زى ماقال"
مى"يخربيتك يابابا... يعنى 22 و10 يبقوا 32 الف جنيه اللى ظهرهم...واخد مننا الفين يعنى اخد هو للشرب اللى بيشربه ده 20 الف جنيه"
اشجان"ومش راضى يدفع مصروف للبيت وانا مش معايا ولا مليم مصروف...ومضطرة ابيع الغويشة اللى عينه فيها"
زينة"ولا تبيعى ولا حاجة"
اشجان"مش معايا اجيب لقمة...وهو بييجى يفتح زوره ع الاكل"
كانت درجة الكراهية من اشجان وصلت لاخر مداها لدرجة انها مبقتش طايقة تسمع صوته
ده غير ان كل شتيمته من اقذر الشتايم ومبقتش قادرة تستحمل
وفى مشكلة... وبعد خناق من الطرفين
"انا خلاص مش عايزاه...ولا يدخل البيت تانى"
وصممت اشجان... وجت لها مى وزينة
وأيدوا موقفها...ونانسى كانت مؤيداهم جدا...لانها كمان كانت مش طايقة وجوده فى البيت
وقفلت اشجان الباب...ولما جه يفتح...مفتحوش
وردت مى"ماما مش عايزاك تانى...روح لاهلك"
وقف يشتم على السلم... ويخبط فى الباب...ويرزع فيه
وهما ولا بيفتحوا...وقعد يهددهم
"ده بيتى وهدخله بالعافية"
مى"طيب ابقى ادخله بالعافية كده واحنا نلبسك مصيبة ندخلك بيها السجن"
وفضل رايح جاى كام يوم يحاول يدخل... كانت اشجان غيرت طبلة الباب... ومى اخدت هدومه الاساسية وبعتتها بيت مامته
وقررت اشجان انها محتاجة تعيش فى استقرار بعيد عن الشتيمة والاهانة وقلة الادب وتربى بنتها زى ماربت زينة ونانسى
وكفاية ان شبابها ضاع فى صبرها عليه
وفضل اخواته يحاولوا يرجعوه البيت...واشجان رافضة تماما
وخرج من البيت فى بداية 2010
ورفعت قضية نفقة لنانسى... ومرفعتش طلاق لان العصمة فى ايدها...وخافت تطلق نفسها منه يردها هو تانى ويتحكم فيها
وبعد شهرين من خروجه... وكانت مى عندها..لما رن التليفون
وكان عادل على التليفون...وسمعتها مى بتصرخ وتعيط
"بجد يا عادل... انا مش مصدقة"
مى"ايه ياماما... ماله...طيب حد جراله حاجة"
واشجان بتكلم اخوها وقفلت معاه ولسه بتعيط
مى"ياماما قولى فى ايه... موتينى من القلق"
وقالت اشجان بعياط وهى مش قادرة تكمل جملة على بعضها
"عادل... بيقولى...اعمل باسبور... علشان بعت فلوس لعلى... وحجزلى عمرة خلاص"
وعيطت مى ونانسى وهما بيحضنوا بعض...فى نفس اللحظة اللى كانت زينة جاية بتخبط لما شافتهم كلهم بيعيطوا...واتكرر نفس الحوار اللى حصل مع مى وبعد القلق اتقلب الجو كله عياط فرح
وحست اشجان ان كل ما بتبعد عن بهاء حياتها بتبقى احلى واهدأ وربنا بيكافئها اما وجوده بيشيل البركة من البيت تمامااااا
وبعد ما رجعت اشجان من العمرة... صحة حكمت كانت بتتدهور اكتر واكتر... لحد ما وقعت مرة واحدة فى شهر اغسطس 2010 ودخلت المستشفى...ودخلت غيبوبة
والدكتور قالهم
"هى عندها نزيف فى المخ... ومع كبر سنها مفيش اى امل للتحسن وهى فى اواخر ايامها... ومحدش عارف هتقعد كده ايام ولا اسابيع ولا شهور"
وبعد 10 ايام قال الدكتور انها تخرج لان المستشفى زى البيت فى الحالة دى
وخرجت حكمت من المستشفى... وكانت اشجان قاعدة جنبها ومش قادرة تسيبها... وكانت حكمت بتفوق تكلمها وتغيب عن الوعى تانى
ولما بتفوق عارفة اشجان وبناتها كويس جدا انما مفيش جملة واحدة بتقولها... وكانت خدمتها صعبة جدا لانها طريحة الفراش... وعادل بيبعت كل اللى تحتاجه مامته وعلى بيساعد اشجان انما اشجان مش قادرة حتى تروح الشغل وتسيبها... وكانت بتروح تمضى وترجع لها... وكانت مى اغلب وقتها مع اشجان بتساعدها
اما زينة... بعد جوازها بكام سنة رجعت تانى تهتم بموهبتها وساعدها النت انها تنشر رسوماتها فى اماكن كتير
وبدأت تتعرف وتشتهر وبقى ليها معجبين بفنها ده غير انها كانت احيانا ترسم لبعض المجلات او اغلفة كتب بعض الكاريكاتيرات
ورغم انشغالها كانت بتروح يوم فى الاسبوع تقعد مع حكمت من الصبح لحد مااشجان تروح الشغل وترجع
بس كانت مى هى المتواجدة بشكل اكبر رغم انها بقت ام لطفلين بس كان ارتباطها بحكمت اقوى من مسئولياتها
وبعد شهرين بالظبط من تعب حكمت... توفت
وكانت صدمة كبيرة لاشجان... صدمة رغم انها متوقعة الا انها كانت مؤلمة ومحزنة جدا لانهم تقريبا مكنوش بيفترقوا ابدا طول حياتهم
وقوة ايمان اشجان صبرها كتير على فراق مامتها
ورجعت بيتها... وكانت قاعدة هى ونانسى
وحست بحرية كبيرة من غير بهاء...رغم انها مكنتش بتخرج نهائى الا انها كانت حاسة براحة كبيرة فى البيت
وقررت انها تغير الاوضة اللى كان بينام فيها علشان مفيش اى حاجة تفكرها بوجوده وباعت الاوضة...وغيرت كل معالمها وفرشتها بفرش مختلف تماما
وكانت حاسة ان ربنا معاها فى كل خطوة تخطوها
واتحكم لها بنفقة لنانسى بمبلغ مكنش على بالها...رغم انه مش قد غلاء المعيشة بس كانت راضية
كانت مى على علاقة بعمتها... المقيمة فى بيت الجدة
وعرفت من عمتها انهم خرجوه من البيت بعد ما صبروا عليها حوالى 8شهور وكان بيعمل نفس اللى بيعمله فى بيت اشجان
المخدرات بياخدها فى البيت... الشتيمة لكل الموجودين على اى سبب... لما يشوف خطيب بنتها يبوز فى وشه وعايز يتحكم فى اخته وبناتها رغم وجود باباهم...مش بيشارك فى مصروف البيت وكمان بياخد من مامته فلوس
وقرروا اخواته انه يخرج من البيت...ويعيش لوحده
وبالفعل...خرج وبقى مالوش اى مكان...وراح أجر اوضة فى لوكاندة درجة عاشرة
وكان بيبعت هدومه ل مى تغسلها...اما زينة مجرد ما يلمح لها بأكل ولا هدوم تصده فورا
وفى يوم وكانوا كلهم متجمعين مع بعض البنات واشجان وعلى
مى"بابا كلمنى وقال انه عايز يتعالج وانا وديته المستشفى"
على"والله يامى عملتها قبلك ورجع زى ماكان وانيل"
مى"انا روحت معاه ومضيت على اقرار فى المستشفى علشان خاطر ربنا"
زينة"هع استنى بقى ياماما اسطوانة جديدة انا اتعالجت وانا بقيت كويس...وعلشان تبقوا عارفين هو دخل المستشفى بس علشان نومة واكلة وكارت جديد يلعب بيه انما مش هيتعالج "
اشجان"يغور ولا متعالج ولا من غير مايتعالج"
مى"هو عايزك تزوريه يا زينة...وروحيله علشان حرام"
زينة"مش فاضية ...وهو فين اصلا"
مى"فى مستشفى الامراض العقلية"
زينة"اااااه ...الله يكون فى عون المجانين اللى هناك...هيجننهم اكتر ماهما ياعينى"
اشجان"روحى يا زينة علشان حرام"
وراحت زينة مع احمد وزاروه...وزينة كلها يقين بألاعيبه
وبالفعل بعد ماخرج قال لمى انه بقى كويس وعايز يرجع...وصدوه كلهم تماماااا
وحصلت الثورة...ومع الانفلات الامنى اللى حصل بعد جمعة الغضب...كان على اتصال يومى او يكاد يكون لحظى بالبنات التلاتة علشان يطمن عليهم
وفى مكالمة من مكالماته لمى
"بصى يامى قولى لامك مينفعش يبقوا لوحدهم فى البيت والبلطجية بيدخلوا البيوت...انا هروح وانام فى اى مكان ومش هاخد غير سرير"
واتصلوا بزينة وهما خايفين...واتصلت بيه زينة وكلمته بمنتهى العصبية والحزم والترهيب
"بص بقى بيت ماما ده متفكرش انك تروح عنده ولو بس فكرت انك تروح...روح وانا مش مسئولة عن اللى هيحصل"
"هيحصل ايه...انتى بتهددينى"
"ايوه بهددك اقسم بالله لو روحت هناك لانا بنفسى اللى هبلغ عنك امن الدولة واقول ان انت منضم لتنظيم سرى خارجى وانك عايز تقلب نظام الحكم وشوف بقى لما تتاخد وعلى ماتثبت انك ملكش دعوة بالسياسة يكون حصل ايه"
بعد الكلمتين اللى قالتهم زينة...جر ناعم معاها وقال لها
"انا بس خايف عليهم"
"لا متخافش وملكش دعوة بيهم"
بعد المكالمة دى... ولما حكت اشجان لعادل... بعتلها فلوس مع واحد صاحبه فى نفس اليوم...وقالها تعمل باب حديد علشان يبقوا مطمنين من ناحية بهاء ومن ناحية اى حد ممكن يتهجم عليهم
وبعد ما خلصت الثورة ورجعت الحياة لطبيعتها
زينة"بصى بقى ياماما... طول ماانتى على ذمته ممكن يكرر اللى حصل قبل كده فى اى لحظة ويدخل تانى"
اشجان"ماانا لو طلقته ممكن يردنى"
زينة"خلاص ارفعى خلع...والخلع ميقدرش يرجعك من نفسه"
ورفعت اشجان قضية خلع... وعاشت مع نانسى مستقرين
والبنات زينة مستقرة فى حياتها ومحققة نجاح وشهرة فى مجالها
مى مستقرة فى حياتها بس مكرسة كل حياتها لبيتها وجوزها وولادها
اما بهاء ...
فعايش لوحده وغرقان فى ادمانه
وبيدفع فلوس للوكاندات يااما يتهدد بالطرد
مفيش حد بيحبه لا اهله ولا ولاده ولا اى حد من معارفه
لا حد بيطبخ له لقمة...ولا يغسله غسيله
ولا البنات بيسمحوا له بزيارتهم
وكل ما يحاول مع بناته انه يرجع لاشجان
يصدوه ويبهدلوه ومحدش بيديله ريق حلو ابدا
وده اللى وصلناله فى وقتنا هذا فبراير 2012
النهااااااااااااااااااااااااااااااااااااااااااااااااااااااااااية
المخدرات .... حياة مدمرة
ردحذفانا لله وانا اليه راجعون
---------
والبنت الصغيرة اشجان البريئة داقت اصعب الابتلاءات بسبب حب واوهام... عمر الحب ما جاب من وراه غير الهموم
انا تابعت للاخر فى صمت
ردحذفاتعلمت من قوه صبر ماما أشجان وتحملها حاجات كتيره وكل اللى شافته كان ابتلاء من ربنا علشان بيحبها ربنا يكتبلها الجنه ان شاء الله , زينه ومى ونانسى ربنا يحميهم بجد وينجحوا اكتر واكتر فى حياتهم , وانتى يا دينا شخصيه رائعه فى اسلوبك وكتابتك ومنتظرين تألق أكتر من كده ومن نجاح لنجاح بأمر الله :)
مشمشه
انا قرأت كل الحلقات .. هي كانت فعلا عيشة صعبة كتيييييير على البنات ..
ردحذفربنا يكوون معاهم :))
استمري .. انتي كاتبة فعلا رائعة ;)
الى الامام
هاااااي نهايه كل ظاالم...بس لساا هو ما شاف اشي من عزاااب الله..وفرررررررحت كتير انها اشجان طلعت عمره..اشجاان والبنااات بستاهلو كل خير..وبتعجبني جرئهم وصدهم لابوهم لانو بستاااهل دووئهم السم الله يسموو...ناااايس كتيييير ديناااا حلقاااتك كلها روعه
ردحذفnero
في البدايه احب اشكرك يادينا علي القصه الصعبه دي انتي روتيها بطريقه حلوه كما لو انك كنتي متعايشه معاهم وانشاء الله الايام الجايه تبقي كلها فرحه وسعاده للعيله كلها وان بعد العسر يسرا بس احب اوجه نصيحه للبنات ان ابوهم ده صله رحم حرام قطعها معلش يتمو اخر جميل لهم ويبرو وفرج ربنا قريب ان شاء الله
ردحذفبجد بجد بجد تحفه يا دندونتي و ربنا يخليكي لينا يا قمر و بجد اشجان دي من الناس اللي عاشت حايتها كلها تعبانه و ربنا يعوضها خير ان شاء الله
ردحذفrahma
دي جزاء اشجان عشان بدأت حياتها بحب حرام
ردحذفبس حبها لربنا و ايمانها بيه هو اللي بارك لها في بناتها و بقيت حياتها
قصة حلووووووووة اووووي تسلم ايدك بجد
طبعا مش هقول اد ايه رائعه وكده لان دى حقيقه مسلم بيها بس بجد قصه جميله جدا وانا اتاثرت بيها اناahmed aliقعدت2يوم علشان اخلصها فيهم بجد انت كاتبه رائعه
ردحذفmaskina achgan w banetha w allah yente9em men baha
ردحذفيااااااااااااااااااااااااااااااااااااااه
ردحذفبس بجد بجد بجد بجد روووووووووووووووعه الرواعييييييييع بجد
يااااااااه والله مش مصدقة انها خلصت
ردحذفعجبني قصتهم اوووووووي اووووووي بجد
وألقاء رائع جدًا منك
شكرًااااا
هى فى الاساس بعدت عن الدين و نست حديث الرسول (ان اتاكم من ترضون دينه و خلقه فزوجوه)و جرت ورا اوهام حب المراهقة و اسوأ من كدة امها و اخواتها خافوا من كلام الناس و محطوش بنتهم فى اعتبارهم رغم انهم كانوا عارفين اخلاقه بحكم ان عادل و على كانوا شباب زية و جيران و بعدين ربنا نجاها مره لما قدرت تطلق منه ليه ترجعله تانى ؟؟؟؟؟؟؟؟ كان لازم ده يحصلها لانها شخصيه متردده اتزرع جواها الخوف اكتر شخصية عجبتنى هى زينة انتابها لحظات ضعف بس كانت ثابتة على موقفها شكرا يا دينا على سرد الاحداث بطريقة رائعة حسيت انى شايفة شخصيات القصة قدامى
ردحذفمش مسدقه ان القصه دى خلصت ... فيها كميه نكد غير طبيعيه اكتر روايه قراتها فى البلوج نكد كدا.. بس نهايتها جميييييييييله جدا...
حذفواللى حبيته فىها كمان العرسان اللى كانوا واقفين طوابير للبنتين مش عارفه الموضوع كان زمان طرى وفيه عرسان زى الورد امال دلوقتى الحاله ناشفه ليه6_6 ..زى كل روايه جاااااااااااااااامده من روايتك هايله ويارب دايما فى تقدم
sama
دى ست غبيه قوووووووووووى اللى كانت بتصدقوا وترحعلو لاكتر من مره ومش بتحرم خالص وعذبت نفسها وعيالها
ردحذفlikeeeee 7lwa aweee bs ashgan kant 8bea 7bten anha sm7too kteer w kdh bs 7lwa bardo
ردحذفحلوة أوي وكلها دروس ومواعظ... تسلم الأيادي
ردحذفمونه
انا تعبت جدا من الاحداث الي في القصة و اخييييييييييييييييييييييييرا
ردحذفالقصه جميله اوى وانا تابعت حلقة بحلقة وانا متشوقه ليها والله قصه جميله
ردحذف(جوجو)
والنبى يادينا لما تعرفى اى اخبار عن بهاء لما ربنا ياخده يعنى ولا حاجه او واحد من ولاد الحلال يديلو علقة موت ابقى نزليها كتكمله كده بالله عليكى اصلى عاوزو يغورفى داهيه بصراحه بالمناسبه يعنى هو قاعد فين بالظبط ولا هما قاعدين فين؟
ردحذفهههههههههههههههههههههههه ضحكتينى والله
حذفالقصة دى رعبتنى من الجواز جدا
ردحذفبجد فى ناس كتير وحشة اوى
بس هى رااااااااائعه احداثها فوق الوصف
بالجد القصه حلووه اووي وواقعيه .. وانا قريتها كلها وعجبتني جدآ .. وبتحصل كتيير في عالمنا .. تسلمي يا دينا ..
ردحذفروووعه القصه بجد تسلم ايدك والنهايه حلوه كتير الله يعطيك العافيه
ردحذفامانة عليكى لما تشوفى اشجان بوسيلى ايديها وراسها وبلغيها تحياتى واعتزازى وتقديرى لها
ردحذفوقوليلها تحمد ربنا لان فى ناس كتير اوى غيرها حالهم اصعب من حالها
وقوليلها تحمد ربنا اوى ان اخواتها بيعاملوها كدا
وقوليلها ان فى غيرك بنات ابوهم ميت سابلهم ذكريات بيتعايروا بيها وامهم رغم كفاحها معاهم بس الحمد لله كان شغلها كبير وحلو ومخليها عايشة ميسورة الحمد لله
الا ان هى ملقتش راجل يقف جنبها لا اخ ولا اخوات زوجها ولا اى حد حتى الجار ولا الغريب اللى بيقف جنبها مرة ولا اتنين مدفوع تمنهم فلوس وخدمات مسبقا بتدفع تمن الوقفة دى لاحقا ابتزاز او تهديد او طمع او مشاكل كل محورها انه بيت حريم بدون راجل يعنى مطمع
كنت وانا بقرأ القصة كل ما اشوف على وعادل قريبين منها كدا وواقفين جنبها وقفة صح افرح اوى ومن جوايا يكون كل قلبى تفاؤل ان مهما حصل مش هيكون زى غيابهم
مش زيى كان نفسى يكون لى حد يقفلى على الاقل لما يتقدملى عريس بدل ما يقفوا جنبى ويقعدوا بس فى قاعدة الرجالة ييجوا عشان ياخدوا عريسي لحد من بناتهم لدرجة مرة اتشدد وقاعد يفاصل فى 200 جنيه فى المؤخر زى ما اكون عربية لمون ولا مرة وانا قاعدة وفى وشى اتكلموا عليا وطفشوا عريسى دا غير انهم بياخدوا بس عمر ما حد صرف عليا جنيه منهم
الحمد لله على كل حال
انتى مبدعة يا دينا الله يزيدك من علمه
انتي مبدعه الصراحه انتي مرطبته ؟؟؟؟؟؟؟؟؟؟؟؟؟
ردحذفبحبكككككككككككككككككككككككككك يا دنيا
ردحذفاشجان ام عظيمه ربنا يجازيها خير ويعوضها ف الجنه
ردحذفوانتى رائعه يا دودو
رائعة يا دينا كالعادة بس مش عارفة ليه حاسة ان زينة دى هى انتى
ردحذفياسمين
بجد يادينا قصة رائعةوعجبتنى اوى شخصية اشجان على صبرها والعيشة المرة الى كانت عايشها وربنا كرمها ببناتها الى ربتهم احسن تربيا وانتى ربنا جزاها خير بالعمرة بس يادينا علاقة البنات بالاب متنفعش علشان مهما ان كان صلة الرحم ولو حتة بلكلما الحلوة وفى الاخر بتمنى ليكى يادينا كل التوفيق
ردحذفبجد قصة جميلة جدا انا اسمى اشجان بس مستحيل اقدر استحمل اللى بطلت القصة استحملتة
ردحذفيااااااااااااااااااااااه اكتر من رااااااائعه صدقينى القصه مؤثره وواقعيه جدا جدا لدرجه انى شيلت الهم ^^ أرفعلك القبعه تحفه جدااااااااااااااااا
ردحذفعجبتنى جدا القصه وهما عملو الصح وعدهم عنه احسن شيئ
ردحذفالقصة جميلة اوى وحقيقية فعلا مشكورة عنها
ردحذفالقصه جميله اوى و ربنا يكفينا الشر من واحد زى بهاء ده
ردحذفدينا ممكن بس سؤال
ردحذفهو انتي عرفتي كل ده من فين مهو يا اما انتي واحده منهم يا اما قريبتهم لدرجه كبيره اووي
sero
ربنا يعوضها
ردحذفبس قوليلى يادينا
ايه كميت العرسان الى كانت فى القصه دى
بس بجد تسلم ايديكى
لأول مره بعلق كانت القصه مؤثره ومتعبه .. بتمنى لأبطال القصه الحقيقيين السعاده وراحة البال.. واكيد الله رح يجازبهم على صبرهم
ردحذفوللأستاذه دينا بحب أحكيلك انك كاتبه رااااائعه قصصك ممتعه جدا ومشوقه..الله يوفقك بحياتك وماتحرمينا من ابداعاتك.. (نوره) ♥
ربنا ما يكتبش علينا العيشه الصعبة دي أبدا يارب
ردحذفقصه حلوة جدا بجد تسلم ايديكي
ردحذفالقصة روعة ومعبرة بجد
ردحذففعلا انتي كاتبة مبدعة
بصى انا اول مرة هعملك كومنت على حلقة
ردحذفانا قرات تقريبا كل مسلسلاتك وبصراحة انتى رائعة
انا كنت بقرأ المسلسل مبعرفش اقوم الا وانا مخلصاة مهما كان كبير وطويل
اسلوبك رائع وتأليفك ممتع وكا مرة فكرة مختلفة بس عايزة اقولك حاجة
لولا ان انا عرفة اسلوبك ومتابعاكى مكنتش كملت القصة دى تقريبا من الحلقة السابعة
طولتى فيها اوووووووووووووووووووووووووووووووووووى والاحداث كانت مملة جدا
وكان فيها مشاهد ملهاش لازمة خالص وكلام مفيش فية فايدة وكمان شخصياتهم
يعنى البنات كانومستفزين كل شوية عريس عريس
واشجان كمان بتسمع كلامهم كتييييييييييييييييييييييييييييييييير وكأن هى ال بنتهم
ولا حكمت مللة جدا ومسيطرة
واشجان دى هبلة كل شوية ترجعلة وترجع تعيط وكأنها مظلومة ما هى عرفة ال فيها
المهم ياريت القصة ال جاية تراعى فيها موضوع الملل دا
وعلى فكرة ليست عذراء وااااااااااااااااااااااااو وبتابع كل يوم
استمرى
بجد تسلم ايديك.....القصة جميـــــــــــلة جدا....وحقيقة جدا
ردحذفحلو جدا
ردحذفاشجان ددى مكافحة ربنا يكرمها
جميييييييييييييييييييييييييله اووووووووووووووي القصه دي يا دينا انتي مبدعه اووووووي
ردحذفعلى فكره انتى لو كنتى قولتى انه عمل حادثه ومات كانت تبقى القصه احلى لان كده اشجان هتبقى فى امان اكتر واكتر ومش هتبقى خايفه بعد كده من اى حاجه والبنات كمان
ردحذفGamda ya dina bas kan nefsi baha2 yemoot men edmano fe el nehaya bas yala aho a7san men mafeesh bas bgd tare2to mostafeza awi bas bgd 7elwa awiiiiiiii ya dina we teslam 2eedek
ردحذفقرات اكتر من قصة
ردحذفوبحق ابداعك راااااااااااااااااائع
ماشاء الله فعلا متميزة جداااااااااااااا
والسؤال هي دي اشجان ولا مصر
اعتقد مصر هي اشجان واشجان هي مصر
تحفة فنية في منتهي العمق والحرفية والروعة
ana et32dt mn elrega;a bgd mn kotr ma hma bytl3o f qesask andal .. w bzaat en elqessa dii waq3iia .. :( bas kl3ada entiii mobd3a w abd3tii .. <3
ردحذفأنا مش عارفة انتي هتشوفي كومنتي ده ولا لاء .. بس انا جديدة ف متابعينك وقريتلك قصص كتييييييييييييييييييير ليكي ..
ردحذفبس دي فعلااااااااااااااا انا مش عارفة اقولك عليهااا ايه اشجان دي فعلااا لازم يتعملها تمثااااااال من دهب وانتي فعلااااا طريقتك ف الكتابة فظييييييييييييييييييييييييييييييييعه وتسلم ايدك انا لو تصدقيني انا قريتها ف يومين مقدرتش اسيبها الا لما اخلصهااااا
♥ ♥
قصة تحفة بس الى كان صعب انها حقيقية انا بجد بتمنى ان اشجان تعيش فى سعادة لانها ام عظيمة ومثال لاى ام صبورة روعة
ردحذفوكالعادة ابداع يا دينا
gOgO
زيينه ده عسسسسسسسسسل خالص
ردحذفما شاء الله عليكي يا استاذه دينا كل قصصك مبدعه فيها انا خلصت القصه في يومين من حلاوتها في طريقه السررد بس اللي صعبان عليا بجد اشجان و ربنا معاكي و من نجاح ل نجاح يا رب و تبقي مشهوره اكتر و اكتر و مستنيين نشوفلك كتاب ان شاء الله :) بالتوفيق يا رب :) :) :)
ردحذفقصة رهيبة وجعتلى قلبى اووووووووووى الله يصبرها ويجازيها خير اشجان ويهنى بناتها يارب وتسلم ايدك مدام دينا
ردحذفأزال المؤلف هذا التعليق.
ردحذفحقيقي قصة تحفة اويىىىىىىىىىىىىىىىى
ردحذفانا موش عارفه ابتلاء دة قصدى بهاء ممتش ليه
ردحذفحارقلى دمى من اول القصه اللهى يحرق دمة
انا بس عايزة اسئل سؤال هي اسامي الناس الفي القصه حقيقة ولا انتي قولتها ولا ايه :/
ردحذفتحفه جدا يا استاذه دينا واحلى ما فيها انها واقعيه جدا والمشاكل اللى فيها فعلا بتتكرر كل يوم وفى كذا بيت ممكن تكون مش بالحجم دا بس موجوده وبجد هرجع اقولك برده اسلوبك تحفه اووووووووى
ردحذفايـــــــــــــــــات
بجد يا دينا انتي هايله القصه تخفه احلى قصه قرأتها ليكي بجد لو كنتي مقلتيش انها حقيقيه كنت اتهمتك بالمبالغه حاجه صعبه جداااااااااااااااااااااااااااااااااااااااااااااااااااا بس انا كميه الكره الي في قلبي لبهاء لا توصف انا اعرف واحد اسمه بهاء قربت اكره هوا كمان
ردحذفريمان الهنداوي
يعععععععععع ... ابشع قصصك
ردحذفbgd ashgan de gamaaaaم 3shan tsbowr koم dh
ردحذفتسلمممممممممممممممممم ايدك
ردحذفبصراحه اوفر اوي اللي شافته ده تحسي انهم عيله مكتوب عليها الهم والحزن والشقي بجد
ردحذفالقصه صعبه اوى بجد وصعب يكون حد عاش كده ف الواقع بس النهايه الحمد لله الى حد ما حلوه ومؤلمه اكتر ان فعلا اللى يخش طريق الادمان مبيطلعش منه :( ربنا يوفق بناتها يارب ويعينها دايما
ردحذفالقصة صعبة اووووووووي ومؤثرة تسلم ايييييييييييييييدك
ردحذفتحفففففففففففففففففففففففففففه والله الأدمان بيبوظ الدنيـآ ودي فعلا نهـآيه اي واحد كده
ردحذفجامدة اوى تسلم ايدك يااستاذة دينا
ردحذفحبيبه
حلوة بس كئيبة لان ده الواقع
ردحذفالقصه جميله وفعلا واقعيه وتسلم ايدك ،وبجد ربنا بهدي بهاء لو لسه عايش ويكرم اشجان وبناتها وجوازهم وياريت لو بقا في مغامرات خلال السنتين دول لبهاء والبنات تعملي جزء كمان وكمان لو بتقابلي اشجان بلغيها احترامي وتقديري وحبي ليها ولبناتها وقوللها ربنا يكرمك انتي وبناتك ويجازيكوا خير علي كل اللي شوفتوه واستحملتوه وربنا يكرمك ع قد ما صبرتي واتحملتي وربيتي بناتك ويبعد عنك بهاء لو كان لسه عايش بالقرف اللي بياخده ولا لو كان بطل برده وربنا يحميكوا ويبعد عنكوا ولاد الحرام ويسهلكوا حياتكم ويناولك الحج والعمره اللي بتتمنيهم تاني انتي وبناتك ويرحم مامتك ويدخلها الجنه يارب :* <3 :)
ردحذفاعتقد ان القصه ليها بعد سياسى والله اعلم
ردحذفبجد القصة دي تحفه ومعبره
ردحذفتسلم ايديكي 😃
دينا انا بجد استمتعت بكل القصص بتاعتك اللى قريتها
ردحذفبس فعلا القصة دى كان ففيها مط وتطويل بزيادة اوى ومحستش انه كان كل دة لازم يفضل يتعاد كل شوية
حتى وانتى بتقولى اكتر من مرة وسط السرد اننم استمروا على كذا وكذا كنتى بتعيدى الكلام كتيييير مش مجرد انك بتوضحى ان حالهم كما هو
فيه اجزاء وتفاصيل كتير كانت مملة وطويلة بدون داعى بس منكرش انى استفدت من الشخصيات والاحداث لكن الصراحة اوقات كتير كنت باحس بالملل بس باكمل عشان عايزة اعرف النهاية
ربنا يوفقك ومن نجاح لنجاح وياريت تتقبلى رايى لانك فعلا كاتبة ناجحة بس القصة دى تفتقر للتشويق والمتعة وهى مش افضل كتاباتك اكيد
الحب عمره ما كان وحش الحب حاجه جميله بس المشكله في الشخص اللي بيتعامل كأنه بيفهم في الحب الحب ده جوا قلبنا احنا بنحس بيه
ردحذفقصة رائعة
ردحذفجزاك الله خيرا
قصة رائعة
ردحذفجزاك الله خيرا
القصة والاحداث رووووعه ... بجد استمتعت بقراءتها جدا ... وفكرتنى بقصة حد قريب منى جدا في احداثها ....... ربنا يهدى الجميع يارب ... اما زينة شخصيتها جدا عجبتنى ... اما اشجان كانت سلبية ولما وافقت ترجع لبهاء بعض الطلاق كان غباء منها ومتوقعتش انها تقع في الفخ ده . ... حكمت خالها حال امهاتنا بالضبط كل حاجة عيب وحرام .
ردحذفرخممممه جدااااا
ردحذفرائعة
ردحذفدينا انتى راااائعه
ردحذف