الاثنين، 19 مارس 2012

اقوى حب... الحلقة 1

الحلقة 1
امل فى اوضتها بتصلى... بتدخل مامتها وتفتح النور
"لما تخلصى تعالى اخوكى عايزك"
وتخرج الام وتكون امل فى الركعة الاخيرة...تسلم وتخرج لاخوها
"السلام عليكم"
"وعليكم السلام... تعالى عايزك"
"خير"
"انتى رايحة بكرة الجامعة"
"ان شاءالله"
"طيب شوفى موضوع التحويل ده"
"بس احول ليه ماانا كده كويس"
"انتى عارفة انى مش عايز اختلاط ... حولى على اى كلية كلها بنات"
"بس التنسيق جه على اعلام وانا عايزة ادرس اعلام"
"كله زى بعضه اهى شهادة والست فى الاخر مالهاش غير بيتها وجوزها وعيالها"
"معلش بلاش التحويل وانا هعمل كل اللى انت عايزه"
"مش عايز اختلاط بأى شاب ولا اى بنت تكون كده ولا كده ولا مش محتشمة ولبسك وحجابك يكون واسع وميبانش الا وشك"
"وهو انا لبسى غير كده... ومن غير ماتقول انا مش بختلط بحد"
"هنشوف... ولو عرفت انك بتختلطى بحد مش هيحصلك كويس"
وسكتت امل... وبصت لمامتها وهى مستاءة من طريقة كلام ابراهيم
"انا هقوم بقى... مش عايزة حاجة ياامى اجيبهالك من تحت"
"ربنا يباركلك يابنى... ماتقعد تتعشى معانا"
"لا معلش علشان ألحق اروح ... امل اول ماتاخدى جدول محاضراتك اكتبيهولى"
"حاضر"
وقام ابراهيم نزل... وقعدت امل مع مامتها
"شفتى بيكلمنى ازاى"
"معلش يا امل..لازم تسمعى كلامه هو مين بيراعينا وبيصرف علينا غيره"
"بس انا مبعملش حاجة غلط"
"يبقى خايفة من ايه"
"مش خايفة بس ضايقتنى طريقة كلامه... انا مبقيتش صغيرة"
"لااااا اسمعى مش علشان دخلتى الجامعة تفتكرى نفسك كبرتى علينا ... ممكن يقعدك فى البيت"
وقامت الام تلم الغسيل من البلكونة وسابت امل قاعدة مكانها

فى المطار
مازن بيسلم على مامته وباباه
الام"خلى بالك من نفسك ياحبيبى"
وبتحضنه بحب وحنان
الاب"خلى بالك ان دى اخر فرصة ليك فى سنة اولى لو سقطت تانى هتتفصل من الكلية"
الام"بعد الشر... اوعى يامازن تسقط تانى كفاية"
مازن"طيب وصوا عليا الدكاترة"
الاب"مش عيب يبقى مامتك وباباك اساتذة جامعة ونروح لزمايلنا ونقولهم نجحوا ابننا الفاشل"
مازن"يابابا انا زهقت من القعدة لوحدى ليل نهار"
الاب"استرجل كده وبلاش كلام عيال.. احنا بنشقى فى الغربة علشان مين"
مازن"طيب ماتيجى انتى ياماما تقعدى معايا وبابا خليه فى شغله"
الام"ياحبيبى مينفعش وبعدين لو سيبت مكانى هناك واحدة تانية بتغير منى وبتكرهنى هتاخده بسهولة ويبقى انا كده اديتهولها ع الطبطاب"
الاب"يالا بقى مفيش وقت للكلام ده"
والاب مشى لقدام... والام حضنت مازن ومشيت ورا جوزها
وفضل مازن يبص لهم لحد مااختفوا عن نظره

ايمن... واقف فى البلكونة فى بيته بيبص فى ساعته
مستنى شروق وهى راجعة من الدرس
ولما شافها داخلة الشارع... بصت له
ودخلت العمارة اللى قصاده
دخل ايمن لمامته وهى قاعدة على ماكينة الخياطة
"ماما... كلمتى بابا"
سكتت الام ومردتش
"مامااا.... قلتى لبابا"
"بص ياايمن ابوك كالعادة لما قلتله انك عايز فلوس زعق وقال مش معاه"
"ياماما انا مطلبتش كتير انا بس عايز اجيب طقمين اروح بيهم الكلية انا بقالى قد ايه مشتريتش لبس"
"على عينى يابنى والله... بص انا قدرت اتصرف فى 50 جنيه ربنا رزقنى بيهم...خد مشى نفسك بيهم"
"50 جنيه دول يدوب مصروف "
"العين بصيرة والايد قصيرة... منه لله ابوك اللى حوجنى للناس"
كملت ام ايمن خياطة
بص لها ايمن واخد ال50 جنيه وقام

ايناس قاعدة فى البيت... قفلت اللاب وقامت من اوضتها
دخلت المطبخ ... عملت نسكافيه
ورجعت تانى اوضتها..فتحت اللاب
الزهق واضح جدا عليها
مسكت موبايلها...اتصلت بمامتها
"ازيك ياماما... هتيجى امتى"
وترد الام فى عيادتها
"لسه يا ايناس عندى كشوفات كتير"
"ياماما انا زهقت من القعدة لوحدى"
"وانا بس اعمل ايه... انا مش فاضية للكلام ده لما ارجع نبقى نتكلم"
وقفلت الام مع ايناس...
مسكت ايناس الموبايل... واتصلت ب منى اختها
"الو ... ازيك يامنى وحشتينى"
"حبيبتى ياانوسة ازيك"
"ازيك انتى... عاملة ايه فى شهر العسل"
"مبسوطة اوى ياحبيبتى عقبالك"
"هترجعى امتى"
"على اخر الاسبوع ان شاءالله"
"انتى وحشتينى اوى ونفسى تيجى بقى"
"اول ماارجع هجيلك "
"انتى عارفة من ساعة مااتجوزتى وانا قاعدة لوحدى بابا وماما بييجوا على النوم...حتى الاكل باكل لوحدى"
"ياحبيبتى معلش... حاولى تسلى نفسك ولما ابقى ارجع بيتى مش هبقى اسيبك انا اجيلك انتى تجيلى واهو نسلى بعض زى زمان"
"ماشى ياحبيبتى... ترجعى بالسلامة"
"الله يسلمك"

فى اول يوم كلية
امل قاعدة فى اول المدرج الى جنب لوحدها
ايناس قاعدة فى صف فى النص على جنب لوحدها
ايمن قاعد فى جنب تانى بعيد ومكسوف لانه حاسس انه اقل واحد
مازن قاعد ورا خالص لوحده... لان كل الدفعة بالنسبة له جديدة ميعرفش حد منهم واصحابه بقوا فى سنة تالتة
بعد اول محاضرة
كل واحد فيهم بيلم حاجته... وبيخرج بره المدرج

امل .. نقلت الجدول وخرجت بره الجامعة

ايناس..  قعدت فى الكافتيريا وطلبت نسكافيه
قاعدة لوحدها وبتبص على كل الناس حواليها مجموعات محدش لوحده غيرها.... اول ما جه النسكافيه قامت تمشى من غير ماتشربه

ايمن... مشى بسرعة بعد المحاضرة

مازن... راح لمجموعة من اصحابه وقعد معاهم
"ايه يامازن باباك ومامتك لسه موجودين"
"لا سافروا امبارح"
"اشطه يعنى السهرة عندك بالليل"
"اشطه... هتجيب انت ولا اتصرف انا"


هناك 26 تعليقًا:

  1. هو بصراحة شكلها مشوق بس من كتر الاشخاص الى الحاجة الوحيدة الى تلغبت بس شكلها حلو

    ردحذف
  2. hiya bayen 3aliha 7lwa awiiii

    ردحذف
  3. dool nas ktera 2wii w 27dasha hatb2a 2ktrr f3lan 7aga tl3'bt gdan bs shklaha haib2a gameed isa ..

    ردحذف
  4. tO7fa bGd ante ra23a :)

    ردحذف
  5. مبرووووك يا دندونة على البداية الرائعة .. يااااااي انا متحمسة للقصة .. والمواضيع الاجتماعية اللي واضح انو حتناقشها القصة مهمة جداً .. بالتوفيق في كتابة باقي الحلقات
    ميما من العراق

    ردحذف
  6. ميرسى كتيييييييييييير لارائكم
    وبالنسبة للشخصيات كلها كام حلقة وهتحفظوا الاسماء متقلقوش
    نورتووووووووووووووووونى

    ردحذف
    الردود
    1. انا متابعه القصه دى كل يوم فى صفحه اسمها ازميلتى على الفيس بوك بصراحه هى جميله جداااااااا

      حذف
  7. حلوه اوووووووووووووووى بجد الدنيا بقت ماشيه كده

    ردحذف
  8. بجد انت فنانة ربنا يوفقك

    ندي

    ردحذف
    الردود
    1. السلام عليكم
      انا لولا سمير اللي كنت نشرت يوميات حماة في منتدى وصفات كليوباترا
      اسمحي لي انشر الرواية دي كمان و أكيد هيكون عنوانها بقلم الكاتبة دينا عماد
      الكل في المنتدى أحب يوميات حماة جدا و يطالبوا برواية أخري و اذا وافقتي لك جزيل الشكر
      أرجوكي لا تحرمينا من المتعة

      حذف
  9. السلام عليكم
    أنا لولا سمير اللي كنت نشرت يوميات حماة في منتدى وصفات كليوباترا
    اسمحي لي انشر الرواية دي كمان و أكيد هيكون عنوانها بقلم الكاتبة دينا عماد
    الكل في المنتدى أحب يوميات حماة جدا و يطالبوا برواية أخري و اذا وافقتي لك جزيل الشكر
    أرجوكي لا تحرمينا من المتعة

    ردحذف
  10. وعليكم السلام يالولا
    اهلا بيكى...واكيد مفيش مانع طبعا
    وعلى فكرة انا عملت كمان جزء تانى من يوميات حماة لو تحبى تنشريه فى المنتدى
    عموما انا معنديش اى مانع على اى قصة اهم حاجة اسمى فى العنوان مع اسم القصة زى مااتفقنا قبل كده
    ونورتينى ياقمر

    ردحذف
  11. جميييييلة يا دينا ولهىىىىىىىىىىىىى اوى اوى

    ردحذف
  12. ادخل الارشيف منين انا بحب كل كتاباتك بجد رائعه

    ردحذف
  13. ادخل الارشيف منين انا بحب كل كتاباتك بجد رائعه

    ردحذف
  14. حلوة اوى البداية ان شاء الله رواية روعة

    ردحذف
  15. مشكلتى مع الاسماء فى كل قصه :(

    ردحذف
  16. واضح من اسم القصه انها جميله ربنا يوفقك يارب والي التقدم الدائم

    ردحذف
  17. حلوة اووى

    ردحذف
  18. تسلم ايدك والله يا استاذه دينا القصة روعه ... كل حلقة بتجذب للحلقه اللي بعديها لدرجة اني خلصتها في يومين ... هي اينعم تعبتني نفسيا بس جميلة جدا جدا

    ردحذف
  19. ممتاز يا دينا اسلوبك رائع واقعي ومشوق

    ردحذف
  20. ممتاز يا دينا اسلوبك رائع واقعي ومشوق

    ردحذف
  21. ارووع سيرفر ماتين بمميزات مدههشة

    ماتين السيف للتحميل :


    MediaFire :
    http://www.mediafire.com/download/dw91s7as579gisi/mt2sword%282%29.exe

    ردحذف

قول رأيك بلاش تقرا وتقفل من سكات...ارائكم تهمنى