الاثنين، 26 مارس، 2012

اقوى حب... الحلقة 5

الحلقة 5
رجعت امل البيت... واول ما دخلت على اوضتها
دخل وراها ابراهيم
"مالك"
"مفيش حاجة"
"جبتى الجدول"
"اه... اتفضل"
اخد ابراهيم الجدول وخرج وهو بيقولها
"يالا علشان تتغدى معانا"
"حاضر"

ايناس قاعدة مع منى اختها
"منى حبيبتى عايزة حاجة اعملهالك قبل ما امشى"
"انتى هتمشى ليه"
"مفيش شوية وابقى ارجعلك تانى"
"لالا بلاش تمشى الله يخليكى خليكى قاعدة معانا... ده حتى حسن مأكد عليا مسيبكيش تروحى ابدا"
"ليه بس انا قلت من الاول كام يوم هنا وكام يوم هناك"
"علشان خاطرى خليكى معايا...حتى فى الشهور الاولانية دى مش ماما قالت انى ممكن اتعب...محتاجاكى هتسيبينى؟؟"
وبعد تفكير للحظات
"لا طبعا مقدرش اسيبك"
جه حسن وهما قاعدين
"ازيكم... ازيك ياحبيبتى... ازيك ياايناس"
وراح قعد جنب منى
ايناس"الحمدلله... هقوم احضرلك الغدا"
حسن"وانتوا مش هتتغدوا معايا"
منى"معلش بقى احنا سبقناك"
دخلت ايناس المطبخ... وهى واقفة بتسخن الاكل
لقيت حسن وراها
"احنا هنتغدا ايه النهاردة"
كان قريب منها اوى وهى واقفة... بحجة انه بيبص على الاكل اللى على البوتاجاز
لو طلعت لقدام هتلزق فى البوتاجاز
لو رجعت لورا هتلزق فيه
يمينها حيطة وشمالها ايده اللى بيشيل بيها غطا الحلة اللى على البوتاجاز
مسكت الغطا اللى فى ايده
وندهت على اختها
"يا منااااااااااااااا تعالى شوفى جوزك"
ارتبك حسن وساب اللى فى ايده ورجع لورا وبعد عنها
حسن"ايه فى ايه؟"
وصوت منى"فى ايه يا ايناس"
وخرجت ايناس من المطبخ
"مش قادر يستنى الاكل لما يسخن وعمال يقولى هناكل ايه هناكل ايه"
وضحكت منى
"انا اتخضيت يا بنتى قلت زعلك ولا حاجة"
ورد حسن وهو بيحاول يظبط صوته المتوتر
"وانا اقدر ازعل ايناس برضه اخت مراتى حبيبتى"

بعد يومين فى الجامعة وبين المحاضرات
راح ايمن لمازن
"ايه يامازن هنعمل ايه فى العملى"
"مش عارف بس يمكن البنات يتصروفوا ويعملوه"
"وافرض عملوه ومكتبوش اسمنا"
"دى تبقى قلة اصل منهم"
"ليه هو احنا اشتغلنا ولا عملنا حاجة"
"وهو احنا عارفين نتلم عليهم"
"تعالى نشوفهم اكيد موجودين ونتكلم معاهم ونشوف"
"يالا"
وراح ايمن ومازن يدوروا عليهم
شافوا ايناس قاعدة فى جنب لوحدها بتتكلم فى التليفون
وقفوا بعيد ولما خلصت... راحوا الاتنين ناحيتها
وقفوا قصادها وكل واحد مستنى التانى يبدأ
بصت لهم ايناس... نظرات تساؤل فى عينيها
"صباح الخير ياايناس"
"اهلا"
"انا ايمن وده مازن زمايلك فى الدفعة"
ابتسمت لهم بترحيب
"اه عارفاكم طبعا...خير"
ايمن"انتى نسيتى ان مطلوب مننا مجلة كل اسبوع والمفروض نبدأ نشتغل فيها"
ايناس"ااااااه صحيح... انا مش نسيت بس كنت فاكراكم هتتصرفوا"
مازن"يعنى ايه نتصرف... المفروض انتوا اللى تعملوها"
ايناس"نعم.. المفروض؟؟واحنا؟؟احنا مين؟؟"
مازن"يعنى ده شغل انتوا البنات تقدروا تعملوه اسهل"
ايناس"ده على اى اساس... على اساس مثلا العملى على البنات والنظرى عليكم"
مازن"انتى بتتريقى عليا"
ايناس"انت اللى بتقول كلام غريب"
ايمن"ايه ياجماعة صلوا ع النبى.... احنا كلنا هنساعد بعض مش حد اه وحد لا"
ايناس وهى بتبص لايمن"ايوه كده هو ده الكلام"
ايمن"طيب فين امل بقى"
مازن"لو معاكى تليفونها اتصلى بيها شوفيها فين"
ايناس"معتقدش ان دار بيننا كلمتين على بعض مش تبادل ارقام تليفونات"
ايمن"اهى... هناك اهى"
وكانت امل جاية ناحيتهم... استنوا لما قربت منهم
وبدأت ايناس بالكلام معاها
"امل... انتى معانا فى المجلة صح"
ووقفت امل مش قادرة ترد... تسيبهم وتمشى ولا تقف تكلمهم
يعنى هتقف تكلم ناس مينفعش تختلط بيهم
سواء ايناس بلبسها وشعرها اللى يبين ان اخلاقها مختلفة تماما عنها
او الشباب اللى مش ممكن تختلط بيهم ابدا
مازن"ايه ساكتة كده ليه...انتى سامعانا"
وشاور لها بايده باشارات الصم والبكم
احرجت امل... ووقفت لحظات بتحاول تستجمع شجاعتها ترد عليه
بس حست بالدم بيغلى فى وشها وراسها.... والدموع بتملى عينيها
سابتهم وجريت
ايناس "تصدق انت مستفز ومعندكش دم"
وجريت ايناس وراها... وحاول ايمن يروح وراهم...بس شاف امل دخلت الحمام وايناس دخلت وراها
رجع ايمن تانى لمازن اللى واقف مكانه وباين عليه الاحراج
"انت ليه احرجتها كده"
"انا اللى محرج جدا.... انا مكنتش اقصد اضايقها انا فاكرها بجد مش بتتكلم او عندها مشكلة لانى مشفتهاش بتكلم حد قبل كده"
"بس ده مكنش باين من كلامك"
"والله مااقصد حاجة وحشة...انا شاورت لها علشان بس ترد علينا"
"لازم تعتذر لها يا مازن لان ميصحش كده"
"حاضر ...طبعا طبعا"

لما دخلت امل الحمام كانت بتعيط اوى وايناس وراها
"متزعليش ياامل"
طبطبت عليها... وطلعت مناديل من شنطتها
"اهدى بقى... انتى بتعيطى ليه بس"
امل مش بترد... بتعيط بس
"لا بقى كفاية... الموضوع مش مستاهل كنتى رديتى عليه ولا اديتيله قلم على وشه بدل ماتعملى فى نفسك كده"
وضحكت امل من جملة ايناس...لما تخيلت نفسها بتضرب مازن
"بتضحكى...الحمدلله...بس بتضحكى على ايه"
"بتقولى اضربه"
"اه تضربيه ولا تزعلى نفسك بالشكل ده"
بدأت امل تمسح دموعها وغسلت وشها
"خلاص هديتى الحمدلله...على فكرة انا شتمتهولك"
"يستاهل... اصله احرجنى اوى"
"انتى اللى باين عليكى حساسة زيادة عن اللزوم"
"مش حساسة ولا حاجة بس اول مرة شاب يكلمنى وتكون بالطريقة دى مقدرتش بجد"
"بصى انا نسيت اعرفك بنفسى"
"عارفاكى ياايناس"
وابتسمت لها ايناس...
"بصى بقى انتى هتخرجى ولو شفتيه خليكى واثقة من نفسك وتردى عليه وخدى حقك منه"
"لا انا مش عايزة اتكلم معاه"
"امممم بس..."
"بس ايه؟؟"
"العملى اللى كلنا لازم نشتغل فيه مع بعض على فكرة السيكشن كله بدا يقسم الشغل انا شايفاهم ده فيه بداوا يعملوا المجلة كمان"
"بس انا مقدرش اختلط بشباب خالص... اخويا لو عرف مش عارفة ممكن يعمل ايه"
"بس انتى مش بتختلطى للدلع ولا الهزار دى دراسة وضرورة"
"انا عندى فكرة... انا وانتى نعمل شغلنا مع بعض وهما يعملوا شغلهم مع بعض"
"ماشى... مفيش مشكلة... انتى ناوية تقضى باقى اليوم هنا فى الحمام"
وبصت امل فى ساعتها وهى بتضحك
"يالا ... معاد المحاضرة كمان 5 دقايق...يدوب نلحق"
وخرجوا الاتنين.... رايحين على المحاضرة
ايمن ومازن كانوا مستنيينهم قدام باب المدرج
ولما قربوا امل وايناس علشان يدخلوا المحاضرة

هناك 11 تعليقًا:

  1. L'histoire est très intéressante ...:D Je ne peux pas attendre jusqu'à ce que le prochain épisode je suis devenu curieux de savoir ce qui se passera
    Vraiment excellé
    jaiiiiiime <3 <3 <3

    ردحذف
  2. ههههههههههههههه يستاهل حسن .. ايناس نشفت دمه :‏p‏ .. واخيرا الاربعة تعرفوا على بعض ^__^
    الحلقة رووووووعة وتستاهل الأنتظار
    ميما من العراق

    ردحذف
  3. pour RA7MA:
    essayes decrire en arab car Dina est une egyptienne et elle ne comprend pas le francais,englais peut etre mai pour la langue fransaise je pense pas que persons va comprendre ici
    SOUMAIA

    ردحذف
  4. دندونتي القصة الجديدة باين عليها حلوة قوي ومليانة مغامرات فكرتينا بايام الجامعة الي كانت من احلى ايام حياتي بس باين ان الحكاية والعلاقة حتتطور بين مازن وامل ومازن &وبين ايمن وامل
    تسلم ايديك يا احلى دينا وحشتييييييني
    سمية(سوما)

    ردحذف
  5. تحفه الحلقة النهارده " عشان يدخلوا المحاضره " هاه وبعدين
    شوقتينى جدا .. حد يقف عند دى حتخلينى على اعصابى من اللى حيجرا بعد كده منتظره حلقة بكره بفارغ الصبر
    حلوه اوى الحلقة والقصه بجد جامده وعجبانى اوى فكرة
    الشخصيات المختلفة واسلوب الحياة المختلف

    ردحذف
  6. حلوة اوى اوى اوى
    انا احمد جعفر

    ردحذف
  7. اه طيب انا القصة عجباني اوي تسلم ايدك تحفة و اسف مكنتش اعرف الكلام دا و merci b1 4ir ma3rouf inak lafitili nazari lil 7ikaya di merci mara tanya :))))))

    ردحذف
  8. اسلوبك في الكتابة مشوق جدا. . الله يوفقك ان شاء الله :-)

    آلاء من الأردن

    ردحذف
  9. ايوة بقي

    ردحذف
  10. bgad elrewaya dy ta7fa

    ردحذف

قول رأيك بلاش تقرا وتقفل من سكات...ارائكم تهمنى