الاثنين، 2 أبريل 2012

اقوى حب... الحلقة 12

الحلقة 12
امل بتنهار وهى شايفة مامتها قدامها مش بترد عليها
مش عارفة تتصل... مسكت التليفون واتصلت بايناس
الموبايل بيرن ... ومفيش رد
بتتصل تانى وهى بتحاول تفوق مامتها وهى بتعيط
"الو... مازن الحقنى ماما وقعت قدامى فجأة ومش بترد عليا... انا مش عارفة اتصرف واخويا مسافر... طيب حاضر هتصل اهو .. انت عارف العنوان ايوه تدخل الشارع ده على طول هتلاقى عمارة 15 فى الوش "
واول ما قفلت معاه اتصلت بالاسعاف
الاسعاف وصل وامل لسه لوحدها
وهما بيشيلوا مامتها كانت بتعيط وشبه منهارة
وصل لها مازن
"متقلقيش ياامل ...ان شاءالله خير"
"انا مش عارفة حصل لها ايه... كانت بتكلمنى عادى"
"هنشوف اهو"
خلال كلامهم كانت مامتها بقت فى الاسعاف
"تعالى معايا فى العربية"
"لا انا هركب معاها "
"ماشى... انا وراكم اهو متخافيش"

ايناس قاعدة فى الانتريه وعادل خارج من الحمام
"انا نازل...مش عايزة حاجة"
ايناس بتبص له بعيون باردة ودموع متحجرة
راح ناحية الباب فعلا
"مش هتقومى تبصى قبل ماافتح لاحسن حد يشوفنى"
قامت ايناس من مكانها بخطوات بطيئة
وقبل ماتفتح الباب
"فاضل ايام على الامتحانات... وبعدها تيجى تتقدم لى بقى"
"اه طبعا طبعا... متقلقيش بس"
فتحت ايناس الباب وبصت بره
"مفيش حد"
مال عليها وباسها فى خدها بسرعة
"باى يا قمر"

امل ومازن فى المستشفى
امل بتعيط بصمت ومازن مش لاقى كلام يقوله يهديها بيه
والام بيعملوا لها فحوصات
"انا هكلم ايناس يمكن مامتها تعرف حد هنا يوصى على مامتك ويهتموا بيها اكتر"
"ماشى بس انا اتصلت بيها مردتش مش عارفة ليه"
"خلينا نجرب تانى يمكن مسمعتوش ولا حاجة"
"مازن انا بس عايزة اقولك حاجة"
"قولى"
"عايزة اعرف حساب المستشفى هيكون ازاى يقدروا يعنى يستنوا لما اخويا ييجى ويحاسبهم...انا شايفة مستوى المستشفى هنا عالى"
"متشيليش هم الفلوس"
"لا معلش هما بس يستنوا لحد مااخويا ييجى واكيد يتصرف"
"يابنتى عيب عليكى الكلام ده... نطمن بس على مامتك الاول"
ومازن ماسك التليفون بيتصل بايناس

ايناس قاعدة مكانها على الكنبة وضامة ركبها لحضنها وسرحانة
رن الموبايل...اول ما رن
افتكرت والموبايل بيرن وهى واقفة جنب الباب بعد ما جه عادل
وهى بين احضانه... وبتحاول تقاومه بضعف واستسلام
مستسلمة لقبلاته المتلاحقة.... وايده اللى بدأت تفتح اول زرار فى بيجامتها والموبايل بيرن
حركت راسها بحركة لا ارادية كأنها بتطرد الفكرة دى من راسها
ومسكت الموبايل اللى كان لسه بيرن
"الو... ازيك يامازن"
"ايناس انتى فين "
"انا فى البيت ليه؟؟"
"امل اتصلت بيكى كتير وانتى مردتيش"
"مسمعتوش...وانت عرفت منين هو انت كلمت امل"
"امل كلمتنى مامتها تعبت اوى واحنا فى المستشفى دلوقتى"
قام مازن من جنب امل... وراح بعيد شوية
"هينفع تيجى ياايناس امل لوحدها وواضح ان مالهاش حد يبقى معاها وكمان لو مامتك تعرف حد هنا"
وقاطعته ايناس
"انا جاية حاضر...انتوا في مستشفى ايه... طيب طيب مسافة السكة"
قفلت معاه ولسه داخلة اوضتها جرس الباب ضرب
اتخضت...راحت بخطوات بطيئة وبصت من العين
شافت بتاع الديلفرى... فتحت حاسبته واخدت الاكل حطته على الترابيزة القريبة منها ودخلت تلبس

خرجت مامة امل من الفحوصات وهى محطوط لها التنفس الصناعى... جريت عليها امل واتطمنت انها عايشة
وسألت الممرضات وهما ماشيين بالسرير
"هى كويسة"
"الدكتور قال لازم تدخل العناية المركزة"
مازن"هسأل الدكتور"
امل"هروح انا مع ماما"
الممرضة"ممنوع... الزيارة من الساعة2 للساعة 4 بس"
امل"مينفعش اسيبها"
الممرضة"دى عناية مركزة ومينفعش يقعد معاها مرافق"
بصت امل لمازن
"طيب هى عايزة تطمن على مامتها"
"تقدرى تكلميها دلوقتى وتيجى بكرة فى معاد الزيارة"
الام واضح عليها الاجهاد وبتحاول تطمن امل
"ماما انتى كويسة.... متخافيش هتبقى كويسة ان شاءالله"
بصت الام لمازن فى تساؤل
"ده مازن زميلى... معرفتش اتصرف لما وقعتى هو اللى جابنا هنا"
"سلامتك ياطنط ان شاءالله تقومى بالسلامة"
كان الحوار ده كله وهما ماشيين لحد ماوصلوا للعناية المركزة وكانت فى نفس الدور
"خلاص ياجماعة تقدروا تيجوا بكرة"
مالت امل على مامتها وباستها وهى بتعيط
طبطبت عليها مامتها وابتسمت لها علشان تطمنها
بعد مادخلت الام العناية المركزة... راحت امل ومازن للدكتور اللى قالهم انها ازمة قلبية ومحتاجة كام يوم فى العناية المركزة وهتبقى كويسة
"انا هتصل بايناس اقولها متجيش بقى وانا اوصلك البيت"
"طيب... هشوف الحسابات"
"طيب انا جاى معاكى وبعدين اكلم ايناس"
فى الحسابات... اتفاجئت ان حساب الفحوصات واول ليلة فى العناية المركزة 800 جنيه ويبقى الحساب لسه مفتوح
امل لموظف الحسابات
"انا ممكن ادفع 200 دلوقتى مش كده"
"والله ياانسة اقل حاجة ممكن تسيبى 500 جنيه والباقى يتضاف على الفاتورة... اسف ده نظام مستشفى"
"بس ...انا.."
مازن"تعالى ياامل عايزك"
واخدها بعيد شوية
"بصى انا معايا فلوس خدى دلوقتى وابقى اخدهم بعدين"
واخدت امل 300 جنيه على ال200 اللى معاها ودفعت المبلغ ده تحت الحساب لحد مااخوها ييجى
"انا كل ده نسيت اتصل بابراهيم من لبختى"
"طيب كلميه وطمنيه... بس لو جه ولقانى هيعملك مشكلة طبعا"
"هو مسافر عند قرايب مراته... وانا بجد مش عارفة اشكرك ازاى انك نجدتنى بس مش هقدر اقول لابراهيم يشكرك لانه هيسيب المهم وماما ويمسك فى مين ده وتكلميه ليه"
"مفهوم طبعا...وبعدين شكرا ايه بس هو فيه شكر بين الاخوات انتى مش عارفة انى بعتبركم انتى وايناس وايمن اخواتى"
"عارفة والله يامازن وانا كمان بعتبركم اخواتى"
ايناس بتتصل اهى شكلها وصلت
"ايوه ياايناس... لا خليكى متطلعيش احنا نازلين"

قدام المستشفى... وعند عربية ايناس
ايناس"كل ده حصل فجأة كده"
امل"الحمدلله انها جت على قد كده"
مازن"ايناس...مامتك متعرفش حد هنا يوصى على مامة امل فى الاهتمام يعنى وكده"
ايناس"متقلقش انا هشوف ماما وبابا واكيد هيتصرفوا"
ورن موبايل مازن... ورد وهما لسه واقفين
"الو.. اه فى مشوار بس وجاى على طول لالالا ياعادل متمشيش انا جاى البيت على طول اهو"
سمعت ايناس اسم عادل مشاعر كتير حست بيها
حب... حنين... قلق... ندم
"انا ماشى بقى يا بنات عايزين حاجة... انا هبقى احكى لايمن اللى حصل بس انا مرضيتش اقوله لانه بيتعب فى الشغل وقلت انا اسِد مكانه"
امل"ربنا يخليك يامازن بجد متشكرة اوى انا هفضل شايلة جميلك ده طول عمرى"
مازن"تانى هو فيه جمايل بيننا"
امل"بجد انا كنت متلخبطة ولولا لنك قلتلى اتصل بالاسعاف يمكن مكناش لحقنا ماما"
مازن"متقوليش كده...ربنا يشفيها ان شاءالله...سلام"
ومشى مازن... وركبت امل مع ايناس
"تعالى باتى معايا ياامل بدل ماتباتى لوحدك"
"لا معلش مش هينفع علشان لما ابراهيم ييجى يلاقينى فى البيت"
"يعنى مش هتخافى "
"هخاف بس هعمل ايه بقى ربنا يخليلى ماما وترجع البيت بالسلامة "
"بصى تعالى نروح لماما العيادة واستأذنها انى ابات عندك علشان مش عايزة اسيك لوحدك"
"ربنا يخليكم ليا انا مش عارفة من غيركم كنت عملت ايه"

فى بيت امل... والساعة وصلت 4 الفجر
"انا اول مرة احب ياامل وبحبه اوى"
"بس كل الفترة دى ولا باين عليكم... بس عايزة اقولك حاجة ومتزعليش منى"
"قولى"
"كل لما بتقوليله على الخطوبة مش بيرد عليكى رد واضح وكمان انتى اللى بتبدأى وهو مش بيبدأ يعنى شوفى مثلا ايمن بيشتغل وبيدرس وكل ده علشان اللى بيحبها فاكرة لما عرفنا عليها وقال خطيبتى...انتى بقى عادل بيعمل ايه يطمنك بيه"
"ماهو لسه مخلصش دراسة"
"بصى بدل كل اللى بينكم تليفونات وكلام اديله فرصة لحد ما يخلص ولو لقيتيه معملش حاجة اقطعى علاقتك بيه"
"مش تليفونات وبس"
"اومال ايه"
قالتها امل بخضة
"اقصد يعنى ساعات كنا بنخرج مع بعض"
"متخرجيش معاه تانى وشوفى نيته ايه علشان تفضلى غالية فى عينه "
كلام امل ببراءة بس كان بيوجع ايناس... اللى مقدرتش تقولها اكتر من ان اللى بينهم حب برئ
 "انا هنام بقى ياامل تصبحى على خير وبكرة بدرى هروح معلش علشان بتحرج اوى من اخوكى.. هو هييجى الصبح زى ماقالك"
 "اه قال الصبح ومتشكرة اوى ياايناس على وقفتك جنبى"

ايناس فى بيتها تانى يوم... وبتكلم عادل فى الموبايل
"كده ياعادل متكلمنيش امبارح خالص"
"معلش ياحبيبتى...بقولك ايه انتى لوحدك صح...اعدى عليكى شوية"
"لا... انا ندمانة اوى من اللى حصل بينا امبارح"
"ليه يعنى هو حصل ايه"
"انت بتتكلم كأنه عادى ومحصلش حاجة"
"ايوه عادى...اللى حصل بيننا ده بيحصل بين اى اتنين بيحبوا بعض"
"لا ياعادل مش عادى ولا اللى بيحبوا بعض لازم يحصل بينهم حاجات من دى"
"متكبريش الموضوع اهم حاجة انتى سليمة زى ماانتى ... وبدل بنحب بعض يبقى مفيش بيننا اى حواجز ولا حدود... ولا كسوف"

هناك 11 تعليقًا:

  1. ابن ال................... بس ايناس كانت المفروض تقاااوم :@@@
    انا قرفانة منوا و بصراحة منها عشان ماكنش المفروض يحصل كده
    ميمو

    ردحذف
  2. ايناس غلطانة كتيييير .. وعادل ده واحد يستاهل الحرق بجاز وسخ .. اتفاجأت بمازن وشهامته .. فرحت لان ماما امل ما ماتت .. بس ايمن الحلقة دي شبه مختفي
    تسلم ايدك يا دودو على هالابداع ويارب دايما تبقي بهالمستوى واحسن
    ميما من العراق

    ردحذف
    الردود
    1. الحلقة جميلة جدا عادل ده انسان ........ ومع الاسف فى ناس زيه كتير وايناس غلطانة جداا عشان مقاومتوش البنت المفروض تبقى غالية قدام الشخص اللى مرتبطة بيه حتى لو كانو مخطوبين لان بعد كدة هيعاملها معاملة سيئة وهترخص فى عينه....... اما مازن على قد ماهو انسان مكبر وتصرفاته معظمها غلط بس انسان شهم وبيعتبر اصحابه البنات زى اخواته

      حذف
  3. الحلقة حلوة كتير واهم شي انه ايناس سليمة انا خفت كتير لتقوم تورط نفسها في قصص ما الها داعي بس يا ريت ما تعيدها لانه مش كل مرة بتسلم الجرة وبتعدي على هيك شي بسيط يعني لو عادتها اكيد راح تضعف اكتر وتخسر اكتر يا رب تكبر عقلها وتضل غالية وعزيزة نفس وتنسى عادل هاد

    ومازن على فكرة انا حبيت شخصيته كتير كتير بس يا ريت هو التاني يبطل يلي بيعملو الغلط ويترك صحبة عادل بس اكتر شخصية حبيتها مازن :)
    تسلم ايدك مبدعة كعادتك

    ردحذف
  4. برييييئة برااااااءة القطط يا امل عسولة بجد
    وإيناس بموت فيها بجد بس هقول إيه علي الشيطان إللي لعب فى عقلها
    وإزاي يكلمها فى حاجة زي دي .. الواد دا عبيط ولا عنده مشاكل
    ياريت ايناس تفوووق قبل فوات الآوان بقي
    وحسن بقاله فترة مختفي يعني
    وأيمن وحششششني .. :D :D

    ردحذف
  5. بجد رائعة
    بس
    الى محيرنى
    انة بيفول
    انها سلية
    امال
    اية
    الى حصل

    ردحذف
  6. القصه جميله جدآآآآآآآآآآآآآآ.......المفروض ان ايناس كانت عارفه بموضوع االبنت اللى كانت عند الدكتور وعارفه ان حاه زى دى غلط ف ازاى توصل للمرحله دى

    ردحذف
  7. القصة جميلة اوووووووووووى

    ردحذف
  8. عادل ده مر عليا واحد زيه

    ردحذف
  9. ana 7azena awe ana nfsy awala3 feh beba

    ردحذف
  10. كويس ان ايناس موقعتش ف الغلط الاكبر بس اتمني تفوق من اللي هيا فيه وتعمل الصح

    ردحذف

قول رأيك بلاش تقرا وتقفل من سكات...ارائكم تهمنى