الجمعة، 6 أبريل، 2012

اقوى حب... الحلقة 15

الحلقة 15
توترت ايناس من كلام عادل
مازن لما شافهم راح عليهم بسرعة
"فيه حاجة"
نظراته لعادل وايناس متسائلة
عادل"لا انا كنت بطمن على الامتحان..وانت عملت ايه"
مشيت ايناس قبل مايرد مازن على عادل
راحت على امل
"انا ماشية"
ايمن"خليكى احنا قاعدين مع بعض"
امل"مالك ياايناس"
ايناس"عايزة امشى"
جه مازن عليهم
"هو ضايقك فى حاجة ياايناس"
ايناس"لا ابدا... هتقومى معايا"
امل"اه...سلام ياجماعة"

بعد ما امل وايناس قاموا
"هو فيه ايه"
"مش عارف يا مازن"
"انت مش ملاحظ ان ايناس متغيرة"
"وهى دى حاجة محتاجة ملاحظة... مش هى خالص بس يمكن علشان الامتحانات"
"مالها الامتحانات هى اول امتحانات تيجى علينا... انا قلقان"
"قلقان من ايه"
"كلام عادل معاها وارتباكها وبعد ماقالت رايحة الحمام رجعت ومشيت...فيه حاجة مش طبيعية"
"يمكن فيه حاجة بينها وبين عادل"
"دى تبقى مصيبة"
"مصيبة ليه؟؟ انت بتحبها ولا ايه"
"بحبها زى اختى هى وامل بخاف عليهم زى مايكونوا اخواتى بالظبط معرفش انا ليه بخاف عليهم كده...المشكلة فى عادل نفسه عادل وحش ياايمن ومعندوش ضمير وانا خايف على ايناس منه"
"طيب ما تحذرها منه"
"صح انا لازم اتكلم معاها واقولها متصدقوش لو كان بيحاول يتقرب منها "

فى العربية
"بطلى عياط ياايناس هو انتى لسه شفتى فى ايه"
"طريقته ياامل قلقانى... ماتيجى معايا البيت نشوف فى ايه"
"طيب...متخافيش بقى "
فى البيت... وقدام اللاب توب...الاتنين قاعدين جنب بعض
ايناس بتفتح الميل بتاعها وهى بترتعش
الاتنين برقوا عينيهم... امل بعدت وشها عن الشاشة
ايناس بتصرخ
"لالا محصلش.. مش انا... والله مش انا"
ومسكت موبايلها فتحته
"بتعملى ايه"
"هتصل بيه الحيوان ده"
وبعد ما اتصلت ...التليفون كان مقفول
"قافل تليفونه"
"اكيد فى الامتحان"
ايناس بتعيط
"مش انا ياامل...مش كلهم صورى"
"يعنى ايه مش كلهم"
"يعنى الصور العادية دى انا فعلا وانا بكلمه ع الكام انما الصور الفظيعة مش انا"
"وهو عمل كده ليه"
"اكيد علشان يضايقنى...انا خايفة اوى"
"مش هى مش انتى..زمتخافيش"
"مخافش ازاى بس..انتى نفسك مش قادرة تبصى عليها يبقى مش عايزانى اخاف ...لو اهلى وصلهم صور زى دى ممكن يجرالهم ايه ولا فى الجامعة ولا اى حد يعرفنى ...انا حاسة انى هموت من الرعب"
"اكيد بيعمل كده علشان يرجع يسيطر عليكى تانى.. ده مش بنى ادم اوعى تسمعى كلامه تانى ياايناس... اسمعى كلام ربنا واكيد ربنا هينجيكى منه اوعى تخافى من انسان ربنا اقوى منه"
"كلامك ياامل عامل زى النور اللى بيظهرلى فى عز الضلمة اللى انا فيها"
"متخافيش احنا اهو بنفكر مع بعض وكمان هنتصرف مع بعض متقلقيش مش هسيبك"
"انتى مش خايفة"
"هخاف من ايه .. هو ماسك عليا......"
وحست امل انها احرجت ايناس بكلامها...لان ايناس عيطت تانى بعد ماكانت بدأت تهدا
"والله مااقصد...اقصد يعنى بس انى اطمنك اننا هنفكر ونتصرف مع بعض يعنى انتى مش لوحدك"
"انا عارفة انى غلطت غلط كبير واستاهل اللى يجرالى بس برضه الحمدلله انى مغلطتش اكتر من كده وانى لسه زى ما انا"
"الحمدلله...انا هقوم بقى علشان متأخرش وخليكى فاتحة تليفونك علشان لو اتصل تشوفى هو باعتلك الصور دى ليه...شوفى دماغه فيها ايه...وحاولى تشترى منه على قد ماتقدرى وتشوفى دماغه لحد مانفهم وبعدين نقرر هنتصرف ازاى"
"حاضر"

مازن قاعد فى البيت... بيتغدا لوحده كالعادة
ورن موبايله
"الو.. الحمدلله ... انتى عاملة ايه ياماما... كويس... كان كويس وحليت الحمدلله كويس... متقلقيش بذاكر... خير... لا عربيتى كويسة مش عايز اغيرها... قولى ياماما عايزة تقولى ايه... ازاى مش هينفع تيجوا فى الصيف...يعنى حتى شهور الاجازة كمان مش هتيجوا فيها... خلاص ياماما... اجى انا اعمل ايه؟؟ مش عارف... سيبينى افكر... لا مش عايز حاجة شكرا... مع السلامة"
بص مازن فى ملخص المكالمة
"هو ده اللى انتوا فاضيين لى فيه كام دقيقة فى اليوم"
لم الاكل اللى قدامه من غير ما يكمله... وبكل ضيق حاول يمسك اى كتاب يذاكر منه... مقدرش يذاكر وقام نزل

ايناس قاعدة على اعصابها.... 3 ساعات بعدها رن موبايلها ولقيت انه عادل ..حاولت تمسك اعصابها وهى بترد عليه
"حبيبة قلبى... اخيرا رديتى على موبايلك"
"وانا لو حبيبتك تعمل معايا كده"
"حبيبتى طبعا ومينفعش تسيبينى بمزاجك"
"انت عايز منى ايه"
"ولا حاجة... نحب بعض"
"انت محافظتش على الحب اللى انا حبيتهولك اللى اعرفه ان اللى بيحب حد يخاف عليه مش يفبركله صور"
"خلاص اثبتيلى انك لسه بتحبينى وقوليلى حد عندك"
ومقدرتش تمسك نفسها اكتر من كده وانفجرت فيه
"انا بكرهك وبقرف منك ومن كلامك "
"بقى كده... صورك الحلوة هتنزل فى اكونت ع الفيس باسمك وعنوانك وتليفونك وكل بياناتك الحقيقية وابقى خلى ماما الدكتورة تنظم لك المواعيد"
"يا قذر يا زبالة يا حيوان...اتفو عليك وعلى اخلاقك الواطية"
"اشتمى كويس انا هدفعك تمن لسانك الطويل ده يا بنت ال...."
وقفلت ايناس التليفون خالص
وانهارت وهى بتعيط... واتصلت بامل على التليفون الارضى وهى بتعيط ومش عارفة تتكلم من كتر انهيارها"

امل ردت على تليفون ايناس... وكل اللى فهمته صوتها بتعيط
"ياايناس مش فاهمة حاجة منك... حاضر حاضر"
"فى ايه ياامل"
"ايناس تعبانة ياماما وعايزانى...هروح لها شوية"
"وبعدين لاحسن اخوكى ييجى فجأة تبقى مصيبة"
"ولا مصيبة ولا حاجة لو جه فجأة قوليله انى روحت اجيب ورق مهم لامتحان المادة الجاية"
"هتخلينى اكذب ياامل..وده ينفع"
"وهو انا ياماما بعمل حاجة غلط...صاحبتى اللى وقفت جنبى فى ظروفك وساعدتنى اتخلى عنها..ده يرضيكى يعنى"
"لا.. قومى روحى بس متتأخريش"
"حاضر"

امل وايناس قاعدين فى كافيه قريب من بيت ايناس
ايناس مازالت منهارة... وهى بتحكى لامل
لحد ما سكتت من كتر ماتعبت
"ايناس الموضوع كبر اوى كده وانتى لازم تقولى لمامتك اكيد هى هتعرف تتصرف من غير ما تأذيكى"
"انتى بتقولى ايه...مينفعش طبعا"
"اومال هنعمل ايه...اوعى تسمعى تهديداته"
"لا طبعا خلاص بس لو قلت لماما اكيد بابا هيعرف ومنى وحسن الزفت كمان اكيد هيمسكهالى"
"والعمل"
"مش عارفة"
وانهارت من تانى

مازن وايمن ماشيين بالعربية
"روق بقى يامازن... متعرفش ظروفهم ايه"
"كل همهم الفلوس...قبل ماتقولى انهم مش جايين بتقولى مش عايز تغير العربية...بيرشونى بالفلوس علشان ينسوا انهم خلفونى"
"طيب احمد ربنا انهم بيرمولك فلوس...انا لا ابويا حاسس بوجودى ولا بيدينى فلوس ده بياخد منى كمان"
"خلفونا ليه لما هما مش هيقدروا يراعونا"
"استنى استنى... مش دى عربية ايناس"
"اه هى"
"كويس .... انا كنت عايز اديها ملزمة معايا كانت طالباها منى والحمدلله اننا قابلناها"
"لتكون قاعدة مع حد واحنا نسبب لها احراج"
"اركن هنا...هاخد الملزمة لو لقيتها لوحدها او مع صاحباتها هديها الملزمة وامشى لو لقيتها مع حد مش هخليها تشوفنى علشان محرجهاش"
ونزل ايمن... دخل الكافيه... شافها قاعدة مع امل
شاور لمازن من على الباب انه ييجى
وراح ناحيتهم
"الندالة اللى من ورانا دى... بتعملوا ... ايه ده مالك ياايناس"
ايمن كان داخل يهزر معاهم قبل ما يشوف عيون ايناس ودموعها
امل"ايمن.. ايه اللى جابكم هنا"
ايمن"شفنا عربية ايناس صدفة"
امل"شفتم؟؟"
ايمن"اه مازن معايا"
مازن وصل عندهم... شاف ايمن واقف
مازن"حد معاكم"
امل"لا"
مازن"وانت واقف كده ليه...ايه ده مالك ياايناس"
قعدوا الاتنين معاهم
ايمن"مالها بتعيط ومبتردش علينا"
بصت امل لايناس... وايناس بتعيط
امل"طيب ايمن ومازن يمكن يساعدونا"
ايمن ومازن"فى ايه\\ اكيد بس فى ايه"
ايناس بصت لامل وهى خايفة ...امل فهمتها
طبطبت على ايدها
"لازم يعرفوا الموقف اللى انتى فيه واللى انتى مظلومة فيه ومعملتيش اى حاجة"
اطمنت ايناس ان امل مش هتقول كل الحكاية
وفعلا حكت امل وايناس ان العلاقة كانت حب وانه بدأ يهددها علشان ترضخ له
"ابن ال.... انا حذرته"
ايمن"وانت كنت تعرف"
مازن"اعرف انه واطى معرفش ان فيه حاجة بينه وبين ايناس... مقلتليش ليه...مسألتنيش ليه طيب"
امل"انت هتلومها دلوقتى يامازن...اللى حصل حصل المهم نتصرف ازاى"
وبص ايمن ومازن لبعض
ايمن" والله لوريه السافل ده... هو فاكر بنات الناس لعبة"
مازن"لازم نتصرف...متخافيش مش هنسيبك"
امل"الصور معاه وعلى االايميل وياعالم عمل اكونت كمان ولا لسه"
ايمن"احنا نكسر رقبته ونهدده باى حاجة"
مازن"لا ولا التهديد ولا الضرب هينفعوا لان بعد مانضربه ممكن يتغاظ اكتر"
ايمن"هنعمل ايه"
مازن بنرفزة"ماانا بفكر اهو...اصبر شوية"
رن موبايل ايمن.... رد وهو معاهم
"الو...ايوه يا شروق"
شروق بتعيط" الحقنى يا ايمن"

هناك 6 تعليقات:

  1. الحلقه روووووووووووووووووووووووووعه لسه هستنى لبكرة مش قادرة بجد يالهوووووووووووووووى عليك يا عادل يا .....................ويا .............ويا .............ويا كل .............فى الدنيااااااااااااااااااااا دى كلهاااااااااااا :@ :@: @:@

    ردحذف
  2. يااارب ايمن ومازن يخلصوا ايناس من الزفت اللي اسمه عادل ده
    انا ما اعرف كيف رح استنى لحلقة بكرة عايزة اعرف مالها شروق
    ومثل ما بقولك دائماً >> ^__^ keep it up dodo
    ميما من العراق

    ردحذف
  3. بجد كل حلقه اجمل من الى قبلها ونفسى اعرف اخيرها ايه ويارب ايمن ومازن يساعدوها ويعرفوا يطلعوها من الحكايه دى

    ردحذف
  4. فاطمة
    ميما
    sad smile
    ربنا يخليكم ياقمرات على وجودكم وكومنتاتكم اللى بتسعدنى
    واشتموا عادل براحتكم هههههههههه

    ردحذف
  5. براااااااااااحة يادينا ابوس إيديكي
    طاخ طاخ طاخ مشاكل
    يا أما عريس جالها يا اما حلت وحش فى الإمتحان او نجحت
    او ماتت مثلا اه اه بتحصل

    ردحذف
  6. الحلقة روعة بجد يا دينا متعرفيش قد ايه روايات بتفيدنى وبستمتع بيها اووووووووووووى

    ردحذف

قول رأيك بلاش تقرا وتقفل من سكات...ارائكم تهمنى