السبت، 7 أبريل 2012

اقوى حب... الحلقة 16

الحلقة 16
"مالك يا شروق... انتى فين"
"انا فى البيت"
"بتعيطى ليه"
"علشان انت كلامك طلع صح... قرايبنا عندنا وسمعتهم بيطلبوا ايدى لابنهم"
ورد وهو بيزعق لها
"وبتقوليلى ليه...علشان اقولك مبروك... ماشى يا شروق مبروك عليكى"
"انت بتزعقلى"
"وانتى بتعيطى لى انا ليه... فى ايدى ايه اعمله"
"خلاص ياايمن انا غلطانة انى كلمتك...مع السلامة"
وقفل ايمن معاها والنار طالعة من عينيه
وكلهم سألوه فى نفس واحد
"حصل ايه"
"الهانم بتقولى ان عندهم عريس بيخطبها... بكل بجاحة"
مازن"اهدا ياعم... عادى بكرة تعرف غيرها"
ايمن بيحاول يكون طبيعى... حاسس ان دموعه هتنزل
امل"انت ردك عليها كان قاسى اوى ياايمن"
ايمن"يعنى عايزانى ابارك لها مثلا"
ايناس"ايمن انت انسان كويس وبتحبها وهى شكلها بتحبك بلاش تقسى عليها كده"
ايمن"اعمل لها ايه"
امل"اقف جنبها ومتخليهاش تحس انها لوحدها"
مازن"خلاص انا هتصرف"
ايمن"هتعمل ايه وانت تعرف العريس ده"
مازن"عريس مين يا ايمن انت كمان انا بتكلم فى مشكلة ايناس"
ايناس"والنبى بجد لقيت حل"
مازن"اه اطمنى خلاص"
ايمن"هتعمل ايه"
مازن"خليك فى مشكلتك انت بس وانا هتصرف"
امل"انا هقوم بقى قبل ما تحصلى مشكلة انا كمان"
مازن"استنى اوصلك"
امل"لا يا سيدى انا حظى حلو وممكن الاقى اخويا فى وشى"
ايناس"هوصلك ياامل "
امل"ايمن هتعمل ايه"
ايمن"مش عارف"
امل"كلمها"

مشيوا امل وايناس... وايمن مع مازن بيوصله
وهو فى العربية مع مازن كمان مش عارف يقعد ولا يتكلم من ضيقه وخنقته... مسك الموبايل واتصل بيها
"الو... اقول مبروك ياعروسة"
"انت مش اتخليت عنى وانا محتجالك بتتريق عليا ليه"
"انا اتخلى عنك... انتى اللى جاية تقوليلى هتتخطبى"
"اولا انا قلت اتقدملى مقلتش اتخطبت...ثانيا قلتلك قبل كده انا بحبك انت ومش هحب حد غيرك كنت فاكراك هتقوينى مش تيجى عليا"
"متزعليش انا بحبك وبغير عليكى ومستحملتش تقولي كده"
ضحك مازن وهو جنبه
"ياناس راعوا شعور شاب وحيد مفيش حد يقوله ربع الكلام ده"
وارتبك ايمن... وبص لمازن وهو مكسوف
"شروق هكلمك لما اروح... علشان نعرف ناخد راحتنا...هو العريس لسه عندك"
"لا... انا قلت لبابا مش عايزاه ولا عايزة ارتبط بدرى خالص وبابا اصلا مكنش عنده الرغبة انه يخلينى ارتبط بدرى"
"اومال ليه حرق الدم ده"
"ماهو ده حصل بعد مكالمتنا مش قبلها"
"طيب ياحبيبتى متزعليش منى واول ما اروح هكلمك"
بعد ما قفل معاها... ضحك مازن وهو بيقوله
"حلو الحب مش كده"
"هتعرف لما تجرب"
"مش عارف ليه محبيتش خالص ولا حاسس ان فيه واحدة ممكن احس انى بحبها اوى بالدرجة اللى بسمع عنها دى"
"مين عارف مش يمكن ييجى الحب فجأة"
"ربنا يجيبه بالسلامة...حتى الحب سايبنى زى ماما وبابا"
"هتعمل ايه مع الزفت عادل ده"
"فكرة كده فى دماغى وربنا يسهل"

بعد يومين
اتصل مازن بايناس الضهر... وكان يوم مفيهوش امتحان
"الو... ازيك يا مازن"
"ازيك انتى ياايناس... بقولك ايه انتى لوحدك ولا حد معاكى"
وبرقت ايناس عينيها... حتى مازن كمان زيهم
وبيفكر بنفس طريقتهم... وليه لا ماهو راجل زى كل الرجالة
بنفس التفكير ... وخصوصا بعد ماعرف حكاية عادل
"ايناس سامعانى... انتى لوحدك"
"وانت بتسأل ليه"
قالتها وهى شبه بتزعق
"مالك ؟؟بصى لو حد عندك اتحججى باى حجة وانزلى عايزك ضرورى"
"عايزنى فى ايه"
"تعالى بس انا قدامى 10 دقايق وابقى فى الكافيه اللى اتقابلنا فيه اول امبارح...الموضوع مهم"
"طيب جاية"
قالتها ايناس وهى قلقانة منه وفى نفس الوقت وجودهم فى مكان عام مطمنها

لما وصلت ايناس...شافت مازن قاعد
راحت ناحيته وقعدت قصاده
"خدى ياايناس"
"ايه ده"
"ده الهارد بتاع كمبيوتر عادل"
مسكته ايناس وهى مش مصدقة نفسها...هتطير م الفرحة
واتكسفت من نفسها علشان ظنت فى مازن ظن سوء
"انت جبته ازاى"
"عملت مغامرة وربنا ستر"
"ههههه احكيلى"
"مفيش يا ستى انا عارف ان النهاردة عادل عنده امتحان من 9 ال12 روحت بيته الساعة 10 وقلت لمامته انه محتاج حاجة من الكمبيوتر وعايزها الساعة 12 ومش هيلحق ييجى بعد الامتحان وبعتنى اخدها...مامته طبعا ولا سألت حاجة ايه ولا هى فاهمة انا هعمل ايه...دخلت فتحت الكمبيوتر وكان مفتوح على الفيس والميل دايركت دخلت اتأكدت ان مفيش حاجة ع الفيس ولا الميل وقمت فاكك الجهاز وجبت لك الهارد بحاله علشان خفت لو مسحتهم يرجعهم تانى ويضايقك"
"ولما يعرف"
"ولا يقدر يواجهنى ولو واجهنى هتصرف انا ملكيش دعوة"
"مازن انا مش عارفة اقولك ايه...انا اسفة"
"اسفة على ايه"
"حاجات كتير ... اسفة انى صدقت عادل وخبيت عليك واسفة انى خفت منك النهاردة"
"خفتى منى انا"
"لما قلتلى انتى لوحدك خفت"
"انا بسألك علشان نزولك ميبقاش فيه مشكلة لو مامتك او باباكى فى البيت وعموما احسن برضه لما تخافى على نفسك انا مش زعلان"
"انت رائع يامازن"
"وانتى كمان ياايناس ...لولا انى عارف انك كويسة جدا واكيد متعمليش حاجة غلط مكنتش ساعدتك"
"ربنا يخليك ليا ونفضل دايما اصحاب"
"ربنا يخليكوا انتوا ليا ونفضل دايما اخوات"
"انا هكلم امل اطمنها"
"ماشى... يالا بقى علشان الامتحانات السنة دى كانت منحوسة اوى وكل واحد فينا حصلت له مشاكل افقدته تركيزه"
"ربنا يستر ويعدى السنة دى على خير"

يوم النتيجة...كانوا كلهم مع بعض
امل وايناس بيعيطوا... ومازن وايمن بيحاولوا يهدوهم
مازن"بقولكم ايه بقى احنا الحمدلله اننا عدينا...احنا اه شيلنا مواد بس كلنا طالعين سنة 3 مع بعض ودى اهم حاجة اننا مش هنتفرق"
ايمن"صح دى اهم حاجة... ولا ايه رايكم"
امل وايناس بطلوا عياط وابتسموا
"طبعا طبعا"
مازن"انا عازمكم على الغدا بقى النهاردة علشان هسافر اقضى الاجازة عند ماما وبابا ومش هعرف اشوفكم غير السنة الجاية"
امل"يااااااه هنقعد الاجازة كلها منشوفكش يا مازن"
مازن"لو معجبنيش الحال هاجى ومش هطول"
ايناس"امل اتجرأت ومبقتش تخاف من اخوها"
امل"ماهو خلاص بقى عارف انى مستغناش عن ايناس وانى بروح لها واخرج معاها...ميعرفش ان فيه ايمن ومازن والا كانت مصيبة"
ايمن"المهم اننا مع بعض... على فكرة شروق هتنضم لنا السنة الجاية لانها ناوية على اعلام برضه"
ايناس"جميييييل وتبقوا مع بعض كل يوم..ومعانا طبعا"

فى اول يوم دراسة... اتجمعوا مع بعض كلهم... ومعاهم شروق
كانوا كلهم مشتاقين لبعض شوق الاخوة والاصحاب
وهما قاعدين فجأة... قالهم مازن
"بصوا بقى انا عايز اقولكم حاجة مهمة جداااااااااا ولازم تعرفوها"

هناك 14 تعليقًا:

  1. ya dodo el 7l2 so8yraa awiii :(:(
    nesma tantawy

    ردحذف
  2. لالالالالالالالالالالالالالالالا حرام عليكي يا دينا نفضل مستنى لحد بكره عشان نعرف الحاجه المهمه يا تشويقـــــــــاتك و قسوتك عليناههههههه
    الحلقه كانت جامده بعد ما اتخلصنا من الزفت عادل
    تسلم الايادي يا دودو

    ردحذف
  3. بجد الحلقه تحفه ويااارب يبعد عنهم عادل وانا حاسه ان مازن بيحب ايناس وهيه دى الحاجه المهمه الى هوه عاوز يقولها

    ردحذف
  4. ايه ايه ايه ايه الحاجة المهمة دى ها
    ها
    ها ونبى قوووول :((((((((

    ردحذف
  5. ارجوكى نزلى الحلقه اللى بعدها عايزة اعرف الحاجه المهمه بتاعت مازن ارجووووووكى يادينا :((

    ردحذف
  6. الحلقة فين يا ديناااااااا

    تغريد

    ردحذف
  7. لولولولولوييييششش واخيرا خلصنا من عادل بس معقوله يسكت وميعملش حاجة ؟؟!!
    فرحت كتير لانو شروق ما انخطبت ^__^
    والفضول رح يقتلني عاوزة اعرف ايه هي الحاجة اللي هيقولها مازن
    عن جد تسلم ايدك يا دودو ودوووم الابداع يارب
    ميما من العراق

    ردحذف
  8. akiiiiiiiiiiiiiiiid hai2o ano bi7b 2ml .. w 3'areba i3ny n 3adel msh 3ml 7aga b 5soos l hard 2ly b2a msh mwgood

    ردحذف
  9. مممممممممممممممممممممم

    قطعتيها في حته انا هيجرالي حاجه من كده عاوز اعر ايه هوه اللي مهم اللي هيقوله

    ردحذف
  10. دينا انتي ليه كده
    المفروض ان ده زي مسلسل يعني كل يوم في معاد محدد تنزلي الحلقة بجد انا ببقي علي نار حرام عليكي كده
    و ياريت كلامي ميكنش تقيل عليكي
    تقبلي مروري يا قمر
    اختك داليا

    ردحذف
  11. شكرا جزيلااااااااااااا لوجودكم
    وتعليقاتكم ... متحرمش منكم ابدا
    وتنورووووووووووووووووووونى دايما

    ردحذف
  12. داليا
    اهلا بيكى وبرأيك طبعا مش تقيل ولا حاجة
    بس الحلقات مش بتكون عندى جاهزة وانا بنزلها
    لأ .. انا بألف يوم بيوم
    وانا زى اى حد بيحصلى ظروف اسرية او صحية او ايا كانت ممكن تعطلنى عن الكتابة
    واليومين دول عندى ظروف ومع ذلك كتبت علشان بحترم انتظاركم جداااا
    مع انى المفروض ارتاح يوم ولا اتنين فى الاسبوع بس مش بحب اسيبكم متشوقين او متضايقين علشان مفيش حلقة...فبكتبها علشانكم مهما كنت تعبانة
    وساعات مبقدرش لا يكلف الله نفسا الا وسعها
    يارب تكون وجهه نظرى وصلت
    نورتينى بوجودك وان شاءالله تكونى معانا دايما

    ردحذف
  13. جريت اوي احداث الحلقة دي
    والوقت جري اوي ع فكرة
    تمام الحلقة

    ردحذف
  14. الحلقة تحفة يا دينا

    ردحذف

قول رأيك بلاش تقرا وتقفل من سكات...ارائكم تهمنى