الخميس، 12 أبريل 2012

اقوى حب... الحلقة 20

الحلقة 20
جه الاسعاف... اخد مازن
ايناس جريت على عربيتها ومعاها امل
ايمن"ولاء متقفليش المجلة غيرفى معادها عادى"
ولاء"حاضر...بس عايزين نطمن"
ايمن"اكيد اكيد اى جديد هتصل بيكى"
الكلام كان بسرعة قبل مايروح ايمن يركب مع ايناس وامل

فى المستشفى
ال3 واقفين قدام العمليات... متوترين
ايمن"مش المفروض نقول لاهله"
امل"هنقولهم ايه ؟؟هو احنا عارفين ماله؟؟"
ايناس"هو مفيش حد يطمنا كده... دول بقالهم كتير"
واستمروا على نفس القلق لحد ما خرج دكتور من الدكاترة اللى كانوا جوه
ايمن"طمنا يا دكتور... مازن كويس"
الدكتور"محتاجين نقل دم لانه نزف كتير ...بس اهم حاجة الخبطة مكنتش فى راسه يعنى مجرد جروح فى الراس انما الجمجمة والمخ سليم... خيطنا كل الجروح اللى فى اماكن متفرقة ودلوقتى لازم نعمل تركيب شرايح فى الفخد "
ايمن"يعنى بجد مفيش خطر"
الدكتور"لا الحمدلله... هنعمل العملية فورا"
ايمن"ماشى يادكتور... اهم حاجة يكون كويس"
امل وايناس"الحمد لله... الحمدلله"
بعد ما مشى الدكتور
ايمن"لازم بقى اهله يعرفوا ودلوقتى نقدر نطمنهم"
ايناس"وانت تعرف ارقامهم"
امل"موبايل مازن اهو معايا واحد اداهولى ساعة الحادثة"
اخد ايمن الموبايل...دور فيه
"فيه ماما وفيه بابا متهيألى اكلم باباه احسن"
امل"اه طبعا لان مامته حرام هتتخض اوى"
واتصل ايمن بالرقم المكتوب عليه بابا
"الو... السلام عليكم"
"مازن ازيك"
"انا ايمن صاحب مازن"
صوت الاب بقلق
"مازن فين؟؟مازن حصله حاجة"
"مازن بخير بس حادثة بسيطة وهيبقى كويس ان شاءالله"
"قولى الحقيقة مازن حصله حاجة"
"لا والله مازن هيبقى بخير ان شاءالله بس فى العمليات ... ياريت حضرتك ومامته تيجوا فى اقرب وقت"
"ان شاءالله...على اول طيارة"

خرج مازن من العمليات...
فضلوا قاعدين معاه...لحد ما بدأ يفوق
اتكلم كلام بسيط ونام تانى ومردش عليهم
قلقوا عليه... سألوا الممرضة
"متخافوش هو اخد مسكنات قوية علشان ينام..النوم احسن له "
رن موبايل امل...كان ابراهيم
"انتى فين ياامل"
"انا بركب اهو"
"الساعة بقت 5 وانتى بترجعى 4 كل ده فين"
"اتأخرنا شوية بس... بس خلصت خلاص"
بعد ماقفلت
ايناس"قومى انتى علشان متتأخريش انا قاعدة وايمن معايا اهو"
امل"ربنا يشفيه شكله وهو نايم كده يقطع القلب"
ايناس"اه والله مكناش نعرف انه غالى علينا كده"
امل"ان شاءالله يبقى كويس... افرضى باباه ومامته مجوش"
ايمن"انا مش هسيبه خالص ولو محدش جه من اهله هبات معاه..اطمنوا وانتى ياايناس لو عايزة تروحى روحى انتى"
ايناس"لا انا هنزل اجيب اى حاجة نتغدا بيها واوصل امل وارجعلك"

اول مادخلت امل بيتها...لقيت ابراهيم موجود
"ايه حكاية المحاضرات اللى بتتأخر كتير كده"
"معرفش الدكتور ساعات بيتأخر انا ذنبى ايه"
"طيب بعد كده لما يتأخر متحضريش وارجعى بدرى"
"ازاى يعنى"
"زى مابقولك كده...واهى هانت كلها السنة دى ونخلص من كل ده"
"ان شاءالله"
"متتأخريش عن معادك تانى ..انا بقولك اهو"
"حااااااااااااااااضر"
قالتها ودخلت اوضتها
"خلى بالك عليها ياماما مش هفضل حاطط عينى فى وسط راسى كتير كده"
"هى بس عملت ايه"
"وانا هستنى لما تعمل... حاسس انها مخبية حاجة انا مش عارفها"
"يو ياابراهيم...هتخبى ايه يعنى"
ابراهيم بتفكير"مش عارف"

فى نفس اليوم... وصل اهل مازن
ايمن بيزوره كل يوم
ايناس بتزوره كل يوم
امل بتسأل عليه ويوم تروح الكلية ويوم للمجلة

خرج مازن من المستشفى بعد اسبوع
بالاسعاف... لانه ممنوع من الحركة
مامته وباباه معاه وبيراعوه
وبعد يومين من رجوعه البيت
الام"مازن احنا هنحجزلك معانا"
مازن"تحجزولى فين"
الاب"تسافر معانا"
مازن"اسافر ازاى ...هو انا بقوم من مكانى"
الاب"احنا اخدنا اسبوعين ودى اقصى اجازة نقدر ناخدها"
الام"وعلشان تكون وسطنا واعرف اراعيك "
مازن"وهتراعينى ازاى وانتى وراكى شغل"
الام"هنجيب حد يقعد معاك طول فترة الشغل"
مازن "انا عايز افضل هنا...ده انا كنت مخنوق فى الاجازة اللى قضيتها هناك مع انى كنت حر قادر انزل واطلع واروح واجى عايزنى وانا عاجز كده اروح اتخنق هناك"
الام"ماهو انا مينفعش اسيبك ومينفعش اسيب شغلى"
ورن جرس الباب... قام الاب يشوف مين
ايمن جه يزور مازن كالعادة... دخل ايمن الاوضة
الام"اهلا ياايمن... تعالى اتكلم مع مازن وشوف دماغه الناشفة"
ايمن"خير... مزعل مامتك ليه يا مازن"
وحكت الام لايمن... ومازن مُصر على موقفه
وحاول ايمن يقنعه ان كلامهم صح
"انا مش مسافر... تجيبلى حد يشتغل هنا بدل هناك وخلاص"
الام"وهو فيه وقت ندور... هشوف طيب"

فى المجلة... كانوا امل وايناس فى مكتبهم
دخل لهم واحد اول مرة يشوفوه
"صباح الخير... انا ايهاب المحاسب اللى كنت جاى يوم الحادثة"
ايناس"اه...اهلا اهلا..اتفضل اقعد"
ايهاب"معلش انا جاى بس اقولكم انى معروض عليا شغل وانا ارتبطت معاكم بكلمة ومش عارف انتوا لسه محتاجين لى ولا اشوف الشغل التانى"
بصوا لبعض ايناس وامل
امل"لا طبعا محتاجينلك...بس هو من يوم الحادثة واحنا مش مستقرين...اسفين ان محدش اتصل بيك"
ايهاب"ابدا مفيش مشكلة...انا مقدر الظروف...طيب استأذن ولما الظروف تستقر حد يكلمنى وانا جاهز للشغل فى اى وقت"
قام يمشى
ايناس"لحظة ..استنى دقيقة بس"
وقامت ايناس بره..واتصلت بايمن
"ايمن المحاسب هنا ... انت جاى امتى...طيب هخليه يستنى لحد ماتيجى"
ودخلت ايناس...
"ممكن تستنى ايمن وتستلم الشغل النهاردة ان شاءالله"

لما وصل ايمن واتفقوا مع ايهاب على الشغل..قعد مع ايناس وامل
"اهل مازن مسافرين بكرة... وملقوش حد يراعيه... انا هبقى معاه الفترة الجاية دى وممكن ابقى مش فاضى اجى المجلة... حاولى ياامل تبقى انتى وايناس متواجدين هنا كتير علشان المجلة متقفش"
امل"حاضر... بس انت هتعمل ايه "
ايمن"مازن نفسيته تعبانة من قلة حركته دى وكمان اهله هيسيبوه فنفسيته تعبت اكتر... مينفعش اسيبه انا كمان..حرام مين يساعده ومين يشوف طلباته... ربنا يقدرنى ومش هسيبه غير لما يتحرك ان شاءالله"
ايناس"هو لسه كتير لحد ما يتحرك"
ايمن"الدكتور قال اسبوعين كمان وممكن يتحرك جوه البيت على خفيف وبعد اسبوعين تانيين يبدأ علاج طبيعى وربنا يسهل...هقوم انا بقى اشوف شغلى"
بعد ما قام ايمن ... الاتنين قاعدين زعلانين على حال مازن
"واحنا مش هنساعدهم ياامل"
"المفروض نعمل ايه"
"انا عن نفسى مازن وقف معايا فى موضوع عادل ولازم اردله جميله ...انا هبقى اروح اعملهم اكل وكمان اكيد ايمن لا هيعرف يتعامل مع الغسالة ولا يقوم بمراعاته فى شغل البيت"
"وانا مش هنسى لمازن انه جالى بسرعة يوم ما ماما تعبت بس هعمل ايه"
"ماهو انا مينفعش اروح بيته لوحدى...نروح مع بعض ساعة كده فى اليوم نشوف محتاجين ايه نعمله وكفاية على ايمن انه هيفضل معاه 24ساعة"
امل قعدت تفكر وهى مترددة
"انتى مترددة كده ليه؟؟دى مساعدة مريض وكمان مش اى حد ده مازن اللى وقف جنبنا كلنا"
"ماشى ياايناس بس نروح الصبح قبل الكلية علشان متأخرش عن معاد الرجوع بتاع كل يوم مش عايزة مشاكل مع ابراهيم"
"ماشى.. نروح الساعة 9 قبل المحاضرات"

امل وايناس بيروحوا كل يوم
نفسية مازن بتتحسن فى وجودهم
هما فعلا مبيقعدوش كتير بس بيعملوا كل احتياجات البيت من تنضيف واكل وغسيل وينزلوا يروحوا الكلية او المجلة

بعد 10 ايام فاتوا ...وكان فاضل ايام ويسمح الدكتور لمازن بالحركة
امل وايناس بيتقابلوا... ويروحوا مع بعض عند مازن

ابراهيم وهو رايح شغله اتصل بيه مديره وبعته مأمورية لفرع من فروع الشركة

امل وايناس نازلين من العربية وطالعين عمارة مازن

ابراهيم فى التاكسى... لمح امل وايناس

وقف التاكسى... نزل ومشى وراهم من غير ما يشوفوه

هما طالعين... وهوا وراهم
خبطوا وفتح لهم ايمن... دخلوا وقفلوا الباب وراهم
ابراهيم مش مصدق نفسه... حب يختبر اخته قبل ما يتصرف
اتصل بيها على الموبايل
"الو... ازيك ياامل...انتى فين... فى الجامعة.. ماشى"
خبط الباب بكل عصبية ...رزع على الباب
ايمن بيفتح الباب ... ووراه امل وايناس

وقفت امل ووشها اصفر وبصوت مبيطلعش
"ابراهيم"

هناك 16 تعليقًا:

  1. ياه موقفها صعب


    تغريد

    ردحذف
  2. ايه ده ايه ده لأ احنا ماتفقناش على كده يادينا

    ردحذف
  3. لا حرام عليكى انتى كل مرة تشوقينا بالاسلوب ده حرام بجد ايه اللى هيحصل فى امل ربنا يستر

    ردحذف
  4. yalahweeeee :| :D :D
    Ana awel mara akteb comment bs m2drtsh amsek nafsy elmaraady :D
    Bgad ur writtings are Extraordinary ! Kol 7ala2a betzawed fodooliii Aktar waktar :D !!
    Keep up the good work b2a ;)

    Maro xD!

    ردحذف
  5. يالهويز ع الللى هيحصلك يا امل ياعينى عليكى بجد يا دينا اجمل مافيكى بتشوقينا للحلقه اللى جايه بس ابقى طولى الحلقات شويه

    ردحذف
  6. بشكركم جداااااااااااااا
    والله كلامكم الحلو ده بيخلينى عايزة اقدملكم كل اللى يعجبكم ويسعدكم
    نورتووووووووووووووووووووووونى
    وكومنتات بقى ع الحلقات الجاية مش عايزة كسل هههههههههه

    ردحذف
  7. الحمد لله مازن محصلوش حاجة ... يااااااي خلص امل راحت فيها ‏p‏: ... كنت مستنية المشهد ده من حلقتين او تلاتة
    دودو على كل التشويق اللي بتعمليه ده لازم نديكي لقب "ملكة التشويق" ^__^
    ميما من العراق

    ردحذف
  8. aml 3'ltanaa!!! mafesh a2y mobrar ysm7 l bent enaah tro7 sha2t wald 7ata lw kant t3baan!! 7ata lw kan we2f gmbaah!:D:D b3'd el nazr ana ba7b ktbteek geedaan

    ردحذف
  9. يا ريت بلييييل يجي بسرعة و نفسي امل و مازن يحبوا بعض :]

    ردحذف
  10. شكله هيرتكب جرييييييمة ده اكيييد يعنى مش هيكفيها القتل فيها او ممكن يحبسها ومش يخرجها ابدا ابدا ابدا عايزة بقيه الحلقه يا دينا بالله عليكى :(

    ردحذف
  11. طبيعي كان لازم يعرف بطريقة غلط
    وطبيعي إنه يتصرف بطريقة غلط وتفكيره يكون غلط كمان مهما كانت ثقته فى اخته
    مش هتفاجئ لو قتلها والله
    لإني قلت من الأول دا مش خوف دا حب سيطرة
    وكمان عشان يعمل راجل قدام اصحابهاا
    عبيط اوي اوي

    ردحذف
  12. mariom معجبة بحضرتك27 يوليو 2012 في 4:40 ص

    كنت حاسة بس متخيلتش كدة اوووووي ربنا يستر

    ردحذف
  13. يااااااااااااااااااااااااااااااالهووووووووووووووووووووووى ابراهيم

    ردحذف
  14. تحفة بجد الحلقة جميلة اوى

    ردحذف
  15. احم .. اوبااا بأه

    ردحذف
  16. alby wak3 mny 7ram kda bgad
    beba

    ردحذف

قول رأيك بلاش تقرا وتقفل من سكات...ارائكم تهمنى