الجمعة، 13 أبريل 2012

اقوى حب... الحلقة 21

الحلقة 21
شدها ابراهيم من ايدها... بمنتهى العنف
"استنى بس ياابراهيم...هفهمك"
"ولا كلمة خالص"
قالها ونظرات عينه كلها نار
ماسكها بمنهى القوة والعنف وبيجرى بيها على السلم
كأنه بيجرها... وقف تاكسى
زقها ورا وقعد جنبها
"ياابراهيم انت فاهم غلط"
مردش عليها مجرد برق لها بس وبص على سواق التاكسى
فهمت امل انها تسكت خالص

فتح ابراهيم الباب بالمفتاح...وزق امل جوا
واول ما قفل الباب...
"هفهمك ياابراهيم"
لف وضربها بالقلم على وشها...
جت الام من المطبخ على المشهد ده
الام"فيه ايه"
وهجم ابراهيم على امل... ضرب ضرب متواصل
حاولت الام تحوش
"بتضربها كده ليه ...اتكلم فيه ايه"
"بنتك جايبها من شقة"
لطمت الام على وشها... وقعدت تعيط
"يا مصيبتى... شقة ... شقة ياامل"
امل بتعيط ومن كتر الضرب مش لاحقة تتكلم
شدها ودخلها اوضتها... فتح شنطتها واخدت الموبايل
"من دلوقتى مفيش موبايل ولا تليفون ولا خروج ولا كلية وهتفضلى فى البيت زى الكلبة لحد ماتموتى او ييجى حد يرضى يتجوزك"
امل بتعيط ومقدرتش تسكت
"حرام عليك...انا هحكيلك انا كنت هناك علشان..."
"اسكتى خالص ولا طايق اسمع صوتك وان كانت ماما مش قادرة عليكى من النهاردة انا جاى اقعد هنا وخليكى كده مشحططانى وراكى يا فاجرة يا قليلة الادب"
"انت ازاى متخيل انى اعمل حاجة غلط"
"لما اكلمك وتقوليلى فى الجامعة الاقيكى فى شقة كنتى بتعملى ايه بتصلى"
"طيب انا راضية بكل اللى تعمله ومش هناقشك بس متمنعنيش من الكلية"
"انسى خلااااااااااص الكلية اللى قلبت حالك دى مش شايفاها تانى"
"هتضيع مستقبلى على اخر سنة"
"ولو على اخر يوم... مش هتخرجى من هنا غير على قبرك يا بيت جوزك"
"طيب الامتحانات"
"خلاص انتهينا قلت مفيش نزول نهائى"
خرج من الاوضة وهى بتعيط... جاب مقص وقطع سلك التليفون... وحط موبايلها فى جيبه
"انا رايح شغلى ياماما... ومفيش خروج من باب البيت ليها نهائى وبعد الشغل هروح اجيب الفت والعيال وهنيجى نقعد هنا لحد ما تتأدب...اوعى اى حد ييجى يكلمها ولا تفتحى الباب لحد خالص"
الام قاعدة بتعيط بس ومصدقة كل كلمة قالها ابراهيم ومأيداه

بعد مانزلت امل مع ابراهيم
ايناس وايمن واقفين ساكتين مندهشين ومش عارفين هيحصل ايه
مازن بينادى عليهم من اوضته..دخلوا له الاتنين
سألهم ايه اللى حصل... حكوا له
ايمن"تفتكرى ممكن يفهم غلط"
ايناس"هو بيفهم غير غلط المهم رد فعله هيكون ايه؟؟"
مازن"يعنى ايه رد فعله هيكون ايه؟؟ هو ممكن يعمل ايه"
ايمن"مش عارف بس واحد بطريقته مانعها من كل حاجة وبيشك فى كل حاجة هيعمل ايه معاها"
ايناس"انا مرعوبة عليها ومش عارفة اعمل ايه"
مازن"اتصلى بيها"
ايناس"خايفة.. شوية كده واكلمها يكون الموضوع هدا شوية"
بعد ساعة خلصت ايناس وقبل ماتنزل
مازن"اتصلى بأمل كده وشوفى ايه الاخبار"
اتصلت ايناس...
"الموبايل مقفول"
ايمن"جربى تليفون البيت كده"
واتصلت ايناس بتليفون البيت...
"جرس ومحدش بيرد"
ايمن"وبعدين ايه القلق ده...ليكون عمل فيها حاجة"
ايناس"بعد الشر... يمكن لسه مروحوش البيت"
مازن"ولو لسه مروحوش مامتها فين"
ايناس"مش عارفة بقى متخوفونيش... انا هروح المجلة وهحاول اكلمها واول مااطمن هكلمكم"

طول اليوم وايناس مش عارفة توصل لامل من التليفونات
تانى يوم امل مظهرتش برضه... فات 3 ايام
وفى مكالمة بينها وبين ايمن
"ايناس احنا لازم نطمن على امل مش هينفع كده"
"انا هموت م القلق عليها ومش عارفة اتصرف"
"روحى لها البيت"
"تفتكر يعنى اروح عادى ماهو اكيد اخوها مش طايقنى"
"روحى الصبح واخوها فى شغله"
"هروح لوحدى؟؟ بصراحة خايفة"
"هبعت معاكى شروق واسألوا عليها وشوفوا مش بتيجى ليه وليه مفيش تليفونات شغالة"
"طيب ابقى شوف هقابل شروق فين وازاى وربنا يستر"

تانى يوم وحوالى الساعة 11 الصبح
راحت ايناس وشروق عند امل
الام فتحت لهم الباب... ووقفت
"نعم"
"ازيك يا طنط انا ايناس صاحبة امل"
"اه ...صاحبتها اللى بوظتيها وشقلبتى كيانها"
واتحرجت ايناس من الكلام...وشافت امل جاية تجرى من جوه
"ماما عيب كده... ازيك ياايناس"
الام"اخرسى يابت وادخلى جوه"
ايناس"انا عايزة اطمن على امل مش بتيجى ليه"
الام"خلاص امل هتقعد فى البيت ومش هتكمل"
امل بتعيط وهى واقفة ورا مامتها... ايناس مصدومة
شروق ساكتة خالص... الام :
"مش عايزين حد ييجى تانى... ولا تحاولى تكلميها تانى"
ورزعت الام الباب فى وشهم
نزلوا وهما مش بينطقوا من الاحراج اللى هما فيه

الايام بتمر
امل بتتعامل معاملة ذليلة ومحدش بيديها اى فرصة يسمعوا لها
وكل اللى مقتنعين بيه ان حبسها هو الحل الوحيد
مع سوء معاملة من كل الموجودين

مازن بدأ يتحرك وبعدين بدأ العلاج الطبيعى وبقى يروح المجلة والكلية بس مش كل يوم

ايهاب المحاسب الجديد اشتغل معاهم ولان مالوش مكان فمكنش فيه غير مكتب امل يقعد عليه
ال3 كل ما يتجمعوا من غير امل حاسين ان حاجة مهمة ناقصاهم
ناقصهم وجودها وشغلها وحماسها وكل حاجة مش مكتملة من غير وجود امل

ايناس بحكم قعدتها فى نفس المكتب مع ايهاب
اتعرفوا على بعض اكتر وعرفت كل ظروفه
انه من اسرة متوسطة وكان خاطب واحدة زميلته وفسخوا الخطوبة لقلة امكانياته وعلشان كده ساب الشغل اللى كان فيه وجه يشتغل فى المجلة

ال4 بيتعاملوا مع اللى بيشتغلوا بدون حواجز انهم اصحاب المجلة

فات وقت والامتحانات قربت..وفى يوم قررت امل انها تحاول مع ابراهيم انها تروح الامتحانات...واستنت لما كان قاعد لوحده
"ابراهيم انا عارفة انى غلطت ومكنش المفروض اروح اى مكان انت متعرفوش بس سيبنى اروح الامتحانات وانا مش هكلم حد خالص"
"الموضوع منتهى وياريت مسمعش صوتك لانى لا طايق صوتك ولا طايق اشوفك قدامى"
مشيت امل من قدامه ودخلت اوضتها...كانت بتعيط كتير
شافت موبايل ابراهيم فى الشاحن
مسكته بسرعة واتصلت بايناس
"ايناس..انا امل..وحشتينى ووحشتونى كلكم.. لا خلاص مفيش فايدة حتى الامتحانات مانعنى منها ... بيقول مش هنزل م البيت تانى الا يا ميتة يا متجوزة ... هعمل ايه مش راضى يسمعنى... حاولت احكى مفيش فايدة... هو شايف انى عار ومستنى راجل تانى ييجى يشيل العار من عليه...امرى لله ربنا عالم انى عمرى ماعملت حاجة تغضبه...هقفل معاكى لاحسن صوته جاى...مع السلامة"
قفلت امل بسرعة... ومسحت رقم ايناس وسابت التليفون مكانه

كانت ايناس فى المجلة لما جت لها المكالمة
قامت وراحت لايمن ومازن وحكتلهم المكالمة كلها
ال3 زعلانين وساكتين خالص
مازن"يعنى امل مستقبلها هيضيع بسببى"
ايمن"وانت ذنبك ايه بس"
ايناس"انت ملكش ذنب يامازن...انا اللى اقترحت عليها اننا نيجى عندك بس مكنش يخطر فى بالى ان كل ده هيحصل"
ايمن"مش عارف احنا ممكن نعمل ايه علشان نساعدها"
مازن"انا كده ضيعت مستقبلها"
مازن بيتكلم باحساس كبير بالذنب... وايناس وايمن ساكتين كل واحد بيفكر ممكن يساعدها ازاى"
مازن"يعنى مقالتش ان فيه اى امل انها بس تحضر الامتحانات"
ايناس"اخوها حالف عليها ما هتعتب باب البيت الا ياعلى بيت جوزها يا بعد الشر عليها يعنى لو حصلها حاجة"
ايمن"راجل متخلف"
ايناس"متخلف وغبى..مش راضى حتى يسمعها"
مازن"خلاص مفيش غير حل واحد"
وانتبهوا له الاتنين...على امل
"انا هروح اطلب ايدها من اخوها واقوله نكتب الكتاب... متهيالى كده بقى يبقى نفذ شرطه انها تتجوز...وامل تحضر الامتحانات ومستقبلها ميضيعش بسببى"
استغربوا الاتنين
ايناس"تتجوزها؟؟؟"
ايمن"انت مجنون"
مازن"مجنون ليه...علشان عايز انقذها وانقذ مستقبلها ابقى مجنون"
ايمن"وهو اخوها هيوافق؟؟ اهلك انت هيوافقوا؟؟ انتوا بتحبوا بعض اصلا علشان تتجوزوا... هتتجوزها رد جميل؟؟"

هناك 23 تعليقًا:

  1. دينا انا اسمى نور بجد يا دينا انا بعشق قصصك بس كبرى الحلقات شويه علشان صغيره جدا جدا وبجد ميرسى على مجهودك الرائع ده انا فعلا بتعلم حاجات كتير اوى من القصص دى

    ردحذف
  2. حلقه روعه روعه روعه روووووووووووووووووعه تسلمي على كتاباتك الرائعه
    > جيلان <

    ردحذف
  3. واااااااااااااااااااو هيتجوزها بجد بجد

    ردحذف
  4. انا اول مره اكتب تعليق هنا فى المدونة بس بتابعك من الفيس علطول وبكتب كومنتات فى الفيس وبجد انتى كاتبه رائعة وهايله وقرات كل المدونة والقصص كلها تحفة بجد

    ردحذف
  5. واااااااو صدمتيني يا دودو بنهاية هالحلقة .. انا اتوقعت ان ممكن مازن وامل يحبو بعض .. بس مش يتجوزو على طول وبالطريقة دي
    ربنا يستر وابراهيم التحفة اللي فاكر نفسه راجل ده يوافق
    بجد حلقة تستحق الانتظار تسلم الايادي يا دودو .. ومش عارفة هستنى للحلقة الجاية ازاي
    ميما من العراق

    ردحذف
  6. Wahmeya el 7la2a de w kont motwake3a rad el f3l da mn mazen :D

    3andy so2aal bas hya el story mn kam 7la2a ?!

    Mestanyeen el ba2e ♥ great job ♥

    Maro ♥

    ردحذف
  7. واوووووووووووووووووووووووو تحفه يادينا بجد روعه بس فكرك الجواز ده ينفع رد جميل بس امممممم على العموم انا هاستنى الحلقه القادمه ان شاء الله
    تسلم الايادى

    ردحذف
  8. خليهم يحبو بعض يا دينا ميتجوزهاش كده وخلاص رد جميل شويه رومانسيه بئه وطبعا تسلم ايدك متألقه كالعاده ماشاء الله عليكى ربنا يكرمك

    zeina

    ردحذف
  9. تسلم دماغك يامازن
    بس انت كده هتربط نفسك بمستقبل معاهااااا
    كملي بسرعة يادينا

    ردحذف
  10. ماااااااااااااازن ده تمام اووووووووى

    وجدع

    ردحذف
  11. حلقه تجنن بجد لاااا ده انا حاقعد على نار أستنى الحلقه اللي بعدها

    ردحذف
  12. حلقه بجد تحفه وانا متشوقه جداااا اني اعرف ايه الي هيحصل في الحلقه الي جايه وربنا يخليكي لينا ويخلي كتاباتك الرائعه
    nody

    ردحذف
  13. روووووووووووووووووووعه قصصك بجد
    انا متابعه كل قصه
    و بنبهر كل مره
    ماااااااا شاء الله
    و حتى تعرفي انو ليكي متابعين من بلدان تانيه ايضاا انا جزائريه

    ردحذف
  14. فين الحلقه الجديده يا ديناااااااااااااااا

    ردحذف
  15. دينا انا هموت لو ماشوفتش الحلقه الجديده بليز نزليها انا عايزه اقراها

    ردحذف
  16. شكرا جزيلااااااااا لوجودكم
    وتشجيعكم ربنا يخليكم ليا يااااااااارب
    واهلا بكل متابعينى من خارج مصر
    نورتوووووووووووووووووونى

    ردحذف
  17. mariom معجبة بحضرتك27 يوليو 2012 في 4:52 ص

    و الله مش هتصدقي اني كنت عارفة من ابداعتك ان ده هيحصل اه و حيات ربنا و كمان مازن مش ايمن بجد انتي مبدعة

    ردحذف
  18. انا كنت حاسه انه هيعمل كده

    ردحذف
  19. دينااااا انتي خطييييييرة ملكيش حل تسلم ايديكييييييي

    ريموووو

    ردحذف
  20. مفيش حل
    ربنا يخليكي ي قمر وتسلم الايااادي .. انا بحبك وبحب كتاباتك اويييي
    ولاء

    ردحذف
  21. الواد مازن ده جدع اوي

    ردحذف
  22. واااااااااااو ايوة كدة يا دينا خلى القصة تحلو تسلم ايدك

    ردحذف
  23. انتي بجد مذهله !!
    عمري ما في كاتب شدني زيك !!
    انا بخلص 3 - 4 روايات في اليوم والله :D

    استمري انتي بجد مبدعععععععه <3


    #نوران

    ردحذف

قول رأيك بلاش تقرا وتقفل من سكات...ارائكم تهمنى