الأربعاء، 25 أبريل 2012

اقوى حب... الحلقة 31

الحلقة 31
بعد ما رجعت ايناس البيت بالليل
قعدت تستنى مامتها او باباها... واتأخروا فدخلت تنام
تانى يوم الصبح... لحقتهم وهما لسه بيلبسوا
ايناس"عايزاكم فى موضوع مهم"
الاب"خير... مبقتيش تعوزينا الا لما بيكون وراكى خبر مش ولابد"
الام وهى بتحاول تخفف من حدة الاب
"خير ياايناس... عايزانا فى ايه"
ايناس"ايهاب اقترح اننا نقدم معاد الجواز"
الاب"وهو احنا حددنا معاد م الاول... احنا وافقنا وخلاص"
الام"مبروك ياايناس... جاب الشقة"
ايناس"لسه... يعنى ممكن نتجوز فى بيت مامته وباباه لحد..."
الاب"اتفضلى شوفى بنتك بتقول ايه"
الام"ليه ياايناس... ليه تتجوزى فى بيت اهله"
ايناس"ظروفه كده ياماما وانا وعدته انى هقف جنبه لحد ماظروفه تتحسن"
الاب"انا من الاول شايف انه مش من مستوانا ولا يناسبنا"
ايناس"مالوش لازمة الكلام ده دلوقتى يابابا... انا مقتنعة بيه ومش هسيبه"
الاب"بس الناس بتتمنى تحسن مستواها انتى بتنزلى معاه حتى مش بترفعيه معاكى"
ايناس"هو رافض اى مساعدة منى"
الاب"وهو انا قصدى تديله فلوس... انا بقول بدل مايجيبلك شقة على الاقل فى نفس مستواكى عايزك تتجوزى فى شقة اهله اللى فى حتة اى كلام"
الام"باباكى كلامه صح ياايناس... مينفعش تتجوزوا فى بيت اهله"
ايناس"يبقى هنفضل مخطوبين سنين طويلة"
الاب"مخطوبة اللى بيربطكم دبلتين احسن ماتتجوزيه وتربطى نفسك بيه وكده كده النهاية معروفة ومش هتستحملى"
ايناس"مين قال مش هستحمل...انا وهو بنحب بعض"
الام"ولو رفضنا ياايناس"
ايناس"اكيد مش هعمل حاجة غصب عنكم...بس هحاول اقنعكم"
الاب"يعنى بتقولك م الاخر هفضل ازن عليكم"
ايناس"وليه ترفضوا "
الام"علشان...."
الاب"استنى استنى"
وشاور للام انها تسكت...وبص لايناس
"انتى مقتنعة وعايزاه صح"
هزت ايناس راسها بالايجاب
"اوك ياايناس...اتجوزيه فى شقة اهله اتجوزيه فى اوضة فوق سطوح بس متجيش تشتكى له منه فى اى حاجة بعد كده... ولو جيتى طلبتى تدخلى انا مش هتدخل وساعتها هقولك ده اختيارك"

فى المجلة واول ما وصلت ايناس
دخل وراها ايهاب
"كلمتى اهلك"
"ايوه"
"وقالوا ايه"
"كانوا رافضين طبعا بس انا اقنعتهم"
"مالك يا ايناس بتتكلمى وانتى مش فرحانة زى ماانا فرحان كده"
"قلقانة يا ايهاب خايفة نكون اتسرعنا"
"ندمانة انك ارتبطتى بيا"
"لا مش قصدى انت قصدى جوازنا مع اهلك"
مسك ايدها وهو بيقول
"ياحبيبتى اوعدك محدش هيزعلك خالص ولا حد يتدخل فى اى حاجة تخصك... واعتبرى ان البيت بيتك...ده وعد منى"
حست ايناس بالصدق فى كل كلمة بيقولها ايهاب
وفى نفس الوقت كلام باباها بيرن فى ودنها ان محدش هيقف جنبها لو فشلت مع ايهاب
"ننزل بقى ندور على اوضة نوم وتيجى تشوفى عايزة اى توضيب معين فى الاوضة ونحدد معاد الفرح"
"خلى اختيار التوضيب لما يكون لينا شقة ... وضبها انت على ذوقك لانها هتكون مؤقتة"
"حاضر"

بعد ايام... جت امل المجلة مع مازن
قاعدة هى وايناس لوحدهم فى المكتب
ودخلت عليهم ولاء
"فيه ايميلات جت من وكلاء التوزيع اللى راسلناهم قبل كده "
ايناس"مازن مش فى مكتبه"
ولاء"نزل من شوية"
امل"ورينى كده ياولاء"
اخدت امل الايميلات اللى طبعتها ولاء
امل"دول عايزين حد مننا يكلمهم"
ايناس"لما مازن ييجى بقى هو اللى ماسك الحكاية دى من اولها"
امل"خلاص ياولاء لما مازن ييجى قوليله ييجيلنا قبل ما ينزل تانى ولا يدخل على مكتبه"
ولاء"حاضر"
خرجت ولاء وبعد ساعة جه مازن
مازن"ايه حكاية الايميلات دى"
امل"شوف اهو"
اخد منها الورق..وبعد دقايق
"انا رايح مكتبى هكلمهم"
غاب مازن حوالى نص ساعة
"ايه ياامل ماتقومى نشوف مازن عمل ايه شكله اتلبخ فى الشغل ونسى يعرفنا"
"تعالى ده ممكن ينسى نفسه مش ينسانا بس"
دخلوا على مازن مكتبه كان بيتكلم فى التليفون
"مينفعش بقى كده... كتير اسبوع .. انا مش فاهم يعنى ازاى قاعد كل ده... مزهقتش... ماشى ماشى يعنى معايا... الله يسلمك...سلام"
بعد ماقفل الموبايل
"ايمن بيسلم عليكم"
ايناس"هو ده اللى كان معاك ع التليفون... اخباره ايه وحشنا والله"
امل"اه والله وحشنا هو جاى النهاردة"
مازن"النهاردة ايه بس ده بيستهبل بيقولى مش نازل قبل اسبوع كمان"
ايناس"ههههههه الواد ما صدق يتجوز وهيقعد فى البيت"
مازن"انا مش عارف مش مكفيه اسبوع عايز مينزلش اسبوع كمان"
بصت امل لمازن اللى بيتكلم بكل بساطة... وافتكرت انه نزل وسابها بعد تالت يوم...وقارنت بينه وبين ايمن اللى مش عايز يتحرك من البيت اسبوعين...وافتكرت كلام مامتها
"انا ممكن اكون مقصَرة فى ايه"
مكنتش سامعاهم وهما بيتكلموا... ومعرفتش هما كانوا بيقولوا ايه
ايناس"لا ياعم انا هتجوز ومش رايحة معاكوا اى فى حتة"
امل باستغراب
"تروحى فين"
ايناس" اييييه انتى مش معانا ولا ايه"
امل"معلش دوخت شوية فمركزتش"
قام مازن من مكانه
"مالك ياامل...تعبانة؟؟"
امل"لالالا متقلقش دوخة وراحت خلاص...كنتوا بتقول ايه"
مازن"دلوقتى كلمت الناس اللى بعتوا الايميلات عايزين نمضى معاهم عقود ونتفق على نسب التوزيع يعنى لازم نسافر وحاولت أأجل معاهم السفر علشان خاطر سى ايمن فاحتمال نسافر كمان اسبوعين الرياض وبيروت ودبى"
ايناس"يا محظوظييييييييييييين"
مازن"عايزة تيجى معانا تعالى... بس هنقضيها شغل مش فسح"
ايناس"لا ياعم ... هتروحى ياامل مش كده"
امل قبل ماترد رد مازن
"لا طبعا تيجى فين وهى حامل كده"
امل"انا فعلا تعبانة وهمشى...سلام"
مازن"استنى... تعبانة مالك"
امل"مفيش حاسة انى عايزة ارتاح وانام فى سريرى"
مازن"حبيبتى معلش مش هينفع اوصلك فيه معاد مهم لعميل جاى هنتفق على حملة اعلانات كبيرة"
ايناس ساكتة خالص ومش عايزة تتدخل بينهم
ايناس"خلاص يامازن متقلقش هوصلها وارجع على طول"
نزلوا امل وايناس... طول الطريق وهما الاتنين ساكتين
امل مش عايزة تتكلم... وايناس خايفة تسألها

فى المطار
ايمن وشروق ومازن وامل وايناس مع بعض
شروق بتعيط وماسكة فى ايمن...وايمن محاوطها بدراعه على كتفها وبيحاول يهديها علشان تبطل عياط
مازن وامل وايناس واقفين مع بعض
مازن"ايناس خلى بالك من امل "
ايناس"حاضر انا مش هبقى فى المجلة ده فاضل 10ايام على فرحى ..بس متقلقش هبقى معاها لو احتاجتلى"
امل"متقلقش يامازن انا لو لقيت نفسى تعبانة مش هروح المجلة واتابع من البيت"
مازن"ياعم ايمن كفاية الاحضان دى بقى الناس هتتفرج علينا"
امل بصوت واطى"بس يامازن عيب كده"
ايمن"انا مش عارف سفر ايه وشغل ايه وتاخدونى من عروستى كده"
مازن"ده بيقول اخدناه؟؟ انت مش مكفيك الانتخة اللى فاتت دى كلها"
ضم ايمن شروق لحضنه اكتر
"لا طبعا مش مكفيانى"
مازن"شروق انتى اللى هيبقى عليكى العبءالاكبر فى المجلة هتقدرى ولا لا"
شروق"متقلقش يامازن... بس متتأخروش"
وكملت عياط... ايمن مسح لها دموعها
"مش هنتأخر ان شاءالله ياحبيبتى... يعنى كفاية خمس ست ايام بالكتير ولا ايه يامازن"
مازن"اه كفاية اوى "
وسمعوا صوت النداء على الركاب
اتعلقت شروق فى ايمن وزاد عياطها... وايمن بيطبطب عليها
مازن سلم على امل وباسها فى خدها وجبينها
"خلى بالك من نفسك... لو تعبانة متنزليش م البيت"
امل"حاضر... ابقى كلمنى اول ماتوصل"
مشى مازن وايمن... ووقفوا ال3 مع بعض
ايناس وشروق وامل
شروق بتعيط بصوت... وامل نازلة من عينيها دموع صامتة

ايناس بتروح كل يوم بيت اهل ايهاب بتفرش حاجتها لوحدها
لان مامتها مش فاضية تروح معاها او بتشترى حاجات ناقصاها

امل بتروح المجلة كل يوم وبتنزل تعمل موضوعاتها الصحفية
ومامتها مش عاجبها انها بتتعب نفسها كتير وهى حامل

شروق مش بتروح الكلية وموجودة كل يوم فى المجلة مع امل

شروق قاعدة فى المكتب مع امل... كل شوية بتشوف تليفون شروق بيرن وترد على ايمن
وتروح تتكلم من المكتب التانى ... لوحدها
ميعديش ساعتين من غير مكالمة من ايمن لشروق
اما مازن فكان بيكلمها مرة الصبح يسأل عليها
ومرة تانية بالليل يطمن على يومها ويحكى لها على يومه

بعد 6 ايام... خلصوا ايمن ومازن جولتهم
وراحوا ايناس وامل وشروق يجيبوهم من المطار

هناك 12 تعليقًا:

  1. اكرهك يا مازن

    ردحذف
  2. روعه الرواعيييييييع يا دينا
    بس يا خوسارة شكل مازن مش بيحب امل خااااااالص :'(

    ردحذف
  3. اكيييييييييد مازن هيندم ع تصرفاته بس للاسف لما هتحصل مشكله وممكن امل تفهم سبب ارتباطه بيها من الاول وانو كان مجرد شفقه عليها بس بجد حرام وانا حاسه اان ايناس ظلمت نفسها بالسرعه وهتندم لانها اكيد هتقابل مشاكل معاها بالنسبه انها متعوده ع مستوى معين اما ايمن فربنا يوفقه بجد هو اللى لحد دلوقتى كله ماشى معاه تمام واكيد برضه هنفهم ايه سبب تسميه القصه باقوى حب ياترى وقت مايحس مازن بامل فعلا بس بجد متشوقه للحلقات الجايه واعرف نهايه هذه القصه بجد رااااااااااااااائعه من لى سوالك يالله

    ردحذف
  4. بجد حلقة النهاردة جميلة جداا .....وررررررررررررررررروعة ....بس ليه مازن مش حاسس بحب امل هو مش قال انوا حبها او بيحبها ؟؟

    ردحذف
  5. ياربي يامازن عليك خلاص البت هتقتلك والله
    وهي طبعا هتعرف انه مكانش بيحبها
    ولا يمكن تقتنع بإي حد يقولها الحب بعد الجواز بيختفي
    صوعبانة عليا اوي
    وإيناس انا مش معاها ابدا ابدا فى قرارها دا
    صعب انك تحسي انك لو وقعتي محدش هيكون جمبك يسندك
    والمفروض انها مكنتش تقبل بعد ما ابوها قالها الكلام دا
    والمفروض برضو ان ايهاب يكون مقدر الموقف حتي لو كان مستواه الإجتماعي مش قد كده
    بس لازم ميقولهاش تعيش معاه فى بيت العيلة
    وبعدين انا مش طمنة لبيت العيلة دا حساه بجد هيبقى خنقة بالنسبالها ومش هتعرف تاخد راحتها فيه
    شرووووووووووق وأيمن زي العثثثثثل بجد
    عاجبني جدًا جدًا جدًا جدًا
    ربنا يخليييهم لبعضيييييتهم
    كملي كملي

    ردحذف
    الردود
    1. فعلا معكي حق وانا كمان حبه قصه شروق وايمن اووووووووووووووووووووووووووووي وربنا يخليهم م بعض
      :) ☺♥

      حذف
  6. انا اتشديت اوي للقصه بس امل لوعرفت الحقيقه هتتصدم صدمه كبيره خصوصا ان مازن اول حب فحياتها حرااااااااااااااااام

    ردحذف
  7. هي القصه هتخلص امتي نفسي اعرف النهايه :((((((((((((((((((((((

    ردحذف
  8. حلقه رووعه يا دينا تسلم ايدك :)

    ردحذف
  9. روعه بس مازن شكله كدا مش بيحب امل :(

    ردحذف
  10. مازن غبى اوى فى الحلقة دى

    فاطمة

    ردحذف

قول رأيك بلاش تقرا وتقفل من سكات...ارائكم تهمنى