الأربعاء، 30 مايو 2012

يوميات حماة الجزء التانى الحلقة 11

الحلقة 11
قعدت استنى عند نادية لحد الساعة مابقت 3 واتصل بيا يوسف يقولى انه جاى ياخدنى
"انا همشى بقى يانادية"
"مش هتستنى اسماء"
"لا خلاص هى حرة بدل مبتسألش على امها وكمان معملتليش احترام وهى عارفة انى جاية"
"يمكن حاجة عطلتها"
"يا شيخة بلا قلة ذوق"
"روقى ياايمان متضايقيش نفسك"
"المهم انتى اول ماتحددى معاد سفرك قوليلى"
"طبعا من غير ماتقولى"
وسلمنا على بعض ونزلت

لما رجعت اسماء حوالى الساعة 5
"ايمان كانت هنا يااسماء وزعلت لما اتأخرتى"
"انشغلت اوى علشان كنت بتفق على المحل الجديد"
"ابقى كلميها علشان متزعلش"
"طيب"
واتصلت اسماء بايمان وكانت فعلا زعلانة منها
"خلاص بقى ياماما متزعليش... انا جاية لك النهاردة اشوفك ونقعد نحكى مع بعض براحتنا"
"قولى لنادية تيجى معاكى"
"لالالا بقولك عايزة اقعد معاكى براحتنا... هتغدى وشوية واجى"

انا قاعدة مستنية العيال... انا عارفة ان احمد هيخلص شغله متأخر بس مش مهم المهم انى اشوفه ويقعد معايا شوية
حضرت الكيك اللى احمد بيحبه... يوسف قاعد مستنى يوسف الصغير ... الواد بيوحشنا كتير اوى
جرس الباب رن... روحت افتح بلهفة وفرحة
"ازيك يا ماما"
لقيت اسماء قدامى... انا زعلانة منها سلمت عليها من غير نفس ودخلت قعدت وهى قفلت الباب ودخلت ورايا
"ازيك يابابا"
سلمت على يوسف وجت قعدت جنبى
"مالك ياماما بتسلمى عليا من غير نفس ليه"
"ايه مش حاسة بنفسك"
يوسف"ايه اللى حصل بس ياايمان"
ايمان"لما اروح بيتها وهى عارفة انى رايحة لها واقعد استناها وهى متجيش ده يبقى اسمه ايه غير قلة ذوق وعدم احترام"
اسماء"ياماما والله كنت جاية بدرى بس استنى احكيلك اللى حصل"
يوسف بيحاول يهدى كالعادة
"اسمعى منها يمكن حصل حاجة عطلتها"
ايمان"خليك دايما مع ولادك عليا كده"
يوسف"انتى هتقلبى عليا ليه بس انا بقولك نسمعها وبعدين نحكم"
اسماء فرحانة بمساندة يوسف ليها... طبعا طول عمره ميحبش يزعلهم
"النهاردة كنت رايحة اشوف محلين المهم شفت واحد فى مول وكل اللى كنت عايزاه لقيته فيه... اتصلت بهشام وجه اتفق مع صاحب المحل وجاب المحامى وعملوا العقد ودفع ايجار سنة وخلاص هنبتدى نوضب فيه من بكرة علشان كده معرفتش اسيب كل ده واجى"
يوسف"مبروك يااسماء ربنا يجعله فاتحة خير عليكى"
ايمان"والموبايلات دى معانا منظر ولا علشان موقف زى ده"
اسماء"متزعليش ياماما بقى"
ورن جرس الباب... قمت بسرعة افتح
لقيت مى ومعاها يوسف
"اهلا اهلا بحبيبى"
اخدته منها وسلمت مى عليا ودخلت سلمت على يوسف واسماء
يوسف اخد منى يوسف الصغير وقعد يدلعه
كلنا قاعدين ويوسف طاير بيوسف ومش عايز يسيبه ابدا
مى"احمد هيحاول ييجى بدرى ان شاءالله علشان يلحق يقعد معانا شوية ... والله ياماما كل يوم بييجى ياخدنى من عند ماما وهو فى العربية وبيبقى مستعجل علشان يروح ينام"
ايمان"ربنا يعينه... بس بلاش ينسانا اوى كده"
مى"وهو يقدر يستغنى عنكم ابدا... هى ظروفه بس"
يوسف"انا مش عايز غير الواد ابن ال... ده"
مى"ان شاءالله يابابا حتى لو احمد مش فاضى انا هبقى اجيبه واجى"
اسماء"على كده بقى انتى كل يوم عند مامتك"
مى"اه والله يااسماء كل يوم بنروح الصبح نودى عندها يوسف وارجع انا عليها واحمد يبقى ييجى بالليل ع 11 او 12 كده ياخدنا ونروح"
اسماء"بس شكلك اتغير خالص يامى بعد الولادة والرضاعة كده احلى من كده بكتير الاول.. بصراحة اوحشيتى "
مى بضحك" هعمل ايه بقى الحمل والولادة بيعملوا كده"
اسماء بزعيق"قصدك ايه"
مى بارتباك"مقصدش حاجة"
انا لقيت الاتنين هيمسكوا ف بعض وانا عارفة اسماء مجرد ماتيجى سيرة الخلفة تتعفرت... غصب عنها برضه
ايمان"تعالى يااسماء اعمليلنا اى حاجة حلوة م اللى كنتى بتعمليهالنا "
اسماء"لما اعرف الاول دى قصدها ايه"
بدأت عيون مى تدمع... يوسف انتبه للكلام
يوسف"ايه يااسماء مالك... انتو مش بتتكلموا عادى بتزعقى كده ليه"
اسماء"علشان اللى فاكرة نفسها بقت الامرة الناهية دى وتقولكم هجيبلكم يوسف ومش عارفة ايه... ايه خلاص جابت حتة من السما يعنى بابنها ده "
مى"لا بقى كده كتير وانتى كل ماتشوفينى تعملى كده"
وقامت مى وهى بتاخد يوسف من يوسف
يوسف"والله ماانتى ماشية من بيتى زعلانة ابدا... وانتى يااسماء اهدى بالله شوية متكرهيش الناس فيكى"
انا ولاول مرة ابقى مش عارفة اتكلم خالص... مى مغلطتش خالص واسماء هى اللى جرت شكلها ومش قادرة اجى على اسماء علشان هى كمان غصب عنها وازمتها النفسية هى اللى بتحركها
اسماء"انت بتنصرها عليا يابابا"
يوسف"انتوا الاتنين ولادى ومنصرش غير الحق"
اسماء"خلاص خلاص... خلى احمد ومراته بقى ينفعوكوا"
ايمان"انتى عايزة تزعلى الناس ومحدش يرد ولا يتكلم"
اسماء"انا؟؟ انا ياماما"
ومقدرتش اسكت اكتر من كده
"طريقتك خلت نادية هتاخد البنت وتسافر وعايزة تعملى مشاكل مع مرات اخوكى واخوكى وهتتقمصى من ابوكى وامك... انتى فاكرة هتقدرى تعيشى فى الدنيا لوحدك من غير حد حواليكى"
وقعدت اسماء تعيط...
مى"متزعليش يا اسماء انا مقصدتش اللى فهمتيه ده"
ايمان"وانتى يامى متزعليش... وانتى يااسماء متزعليش... هنقضى اليوم فى عكننة بقى"
مى"لا ياماما ان شاءالله ربنا مايجيبش حاجة وحشة ابدا"
يوسف"ربنا يهديكم يارب"

ايام قليلة وكانت نادية هتسافر...سفرها كان مضايقنى بعد مااتعودت على وجودها وكنت حاسة كمان ان هشام متضايق
انما اسماء كانت اكتر واحدة فرحانة... مش مهتمة باى حاجة ولا اى حد غير المحل وتجهيزاته ... جهزت المحل لانها كانت عايزة تعمل الافتتاح بسرعة
سافرت نادية واخدت جنى
وبعد اسبوع من سفر نادية كان افتتاح المحل
كان لسه حوالى اسبوعين على العمرة
حضرنا الافتتاح...انا ويوسف واحمد ومى وهشام
لما روحنا البيت لقيت يوسف بيقولى
"النهاردة كنت فرحان اوى وانا شايف ولادى فرحانين"
"الحمدلله ربنا يهديها اسماء ويراضيها علشان فرحتنا تكمل"
"يارب... بقولك ايه؟؟ عايز اقولك حاجة بس متضحكيش عليا"
"قول يايوسف مالك"
"عايز انام وانتى قاعدة جنبى وبتطبطبى عليا"
"حاضر يا يوسف"
يوسف مدد على السرير وهو بيبص لى ... عيونه فيها دموع محبوسة... مددت جنبه وطبطبت عليه
نام... شفت دمعة نزلت من عينه وهو مغمض
مسحت دمعته وكملت طبطبة عليه لحد ما نعست
قلقت من النوم الساعة حوالى 6 الصبح
لقيت يوسف نايم زى ماهو... وانا تقريبا وانا نايمة شيلت ايدى من عليه... لما لقيته زى ماهو طبطبت عليه تانى
بطبط عليه وهو ثابت مبيتحركش... حطيت ايدى على صدره وانا بقول اعوذبالله من وساوس الشيطان.... اترعبت...صدره مبيتحركش ومفيش اى نفس
هزيته علشان اصحيه... مبيردش عليا
صوتى بيروح وانا بنادى عليه مش عايزة افكر ممكن يكون حصل له ايه
اتصلت باحمد وانا بعيط
"الحقنى يااحمد... ابوك مبيردش عليا ومبيتحركش"
احمد قالى اتصل بالاسعاف بسرعة وهو فى بسرعة هيكون عندى
الاسعاف وصل قبل احمد... المسعف بيكشف وانا واقفة قلبى هيقف
"البقاءلله ده متوفى من اكتر من ساعتين"
انا مش عارفة رد فعلى كان ازاى... كنت بعيط واصرخ واجرى فى البيت كله وارجع اوضته تانى مش عارفة اعمل ايه ولا اروح فين
احمد وصل... شافنى... فهم ... بقى يعيط وهو بيحاول يهدينى... انا مش مصدقة ده كان لسه امبارح واقف معانا وف وسطنا...هو اه تعبان بقاله فترة بس متخيلتش انه ممكن يسيبنى لوحدى... مفكرتش ممكن حياتى تبقى عاملة ازاى من بعدُه
اااااااااااااه يا حرقة قلبى

هناك 13 تعليقًا:

  1. لالالالالالالالالالالالالالالالا حرااام ليه كده زعلتينى اوووى :'(

    ردحذف
  2. الحلقة الجاي وينتاااااا؟؟؟؟؟؟

    ردحذف
  3. leh bs kda z3lteny :'(
    doda

    ردحذف
  4. طب والله كنت خايفة انك تعمليها فينا وكنت عايزة ارد عليكي من كام حلقة فات و وقولك اوعي تموتي الراجل ..يالهوي خلاص بقينا فاهمين بعض Didi ʚɞ Makky

    ردحذف
  5. Leeh bs ya Dina 7ram 3leeky wallahy akeed b2a Nadia haterga3 Masr w t23od m3 Eman b3d elly 7sal da :(
    Bs elly mday2any bgd Asmaa rezla awyy rabena yhdeeha ya rab
    W 3omoman momkeen tdeeny esmek 3la Twitter plz?

    ردحذف
  6. بصي يا دينا هي اكيد لما تروح العمره هتفابل الست الي قابلتها قبل كدا و هتواسيها برده
    اسماعيل العاصي

    ردحذف
  7. akeed nadia htetgawez sa7eb yosef elle mrato matet :))

    ردحذف
  8. اخس عليكي يا دينا وجعتي قلبي اوووووووووي بموت يوسف ده والله

    ايمان دي زي اي ام موجودة في حياتنا اليومية زي امي وزي حماتي وفراق الزوج وخصوصا لما

    يكون زوج واخ وحبيب وصاحب صعب اوي اوي بجد

    ردحذف
  9. ربنا يخليكم يااااااااااااااااااااااارب
    ومتحرمش من متابعتكم ابداااااااااااااا

    okaway
    الاكونت بتاع تويتر بدخله كل كام شهر انما تواجدى الاكبر ع الفيس بوك
    واسم اكونت تويتر crosswords2010
    اكونت الفيس dina emad
    اكونت جود ريدز دينا عماد

    ردحذف
  10. الحلقة 12 مش قلتي بدك تنزليها مبارح بالليل هي ما نزلت؟؟
    انا عالبيج مش عم يطلع عندي اخر بوستات ؟؟؟

    ردحذف
  11. ya 3ene bgd s3bt 3lya nadya awii b2t lwa7dha :'(

    ردحذف
  12. لا حول ولا قوة الا بالله .. البقاء لله ,, ربنا يصبرها و يعنها على اللي جاي والله زعلت :( اتمنى الاوضاع تتحسن و تقدر تكمل حياتها و قدر الله و ما شاء فعل ..


    انا قرأت اول جزء و شكلي هخلص التاني اهوووو :)
    هههههههههههههه انا هموت و انام بس كبرت ف دماغي اخلصه بقى .. كتاباتك حلو جداا و الاحداااث شدااااااااااااااني جدااااااااا .. ف تقدم دايما ان شاء الله ;)

    ردحذف
  13. ربنا يصبرها
    احتمال بعد كده تتجوز عزت عشان هما الاتنين كده بقوا لوحدهم
    مجرد احتمال ضئيل جدا

    ردحذف

قول رأيك بلاش تقرا وتقفل من سكات...ارائكم تهمنى