الخميس، 14 يونيو 2012

يوميات حماة الجزء التانى الحلقة 22

الحلقة 22
وصل هشام المحل ومعاه جنى وبعد ماجريت جنى على حضن هايدى... كان هشام قاعد سرحان
"مالك"
"ايه..لا مفيش حاجة"
"لا اكيد فيه حاجة...ولا مش عايز تقولى"
"لا بجد مفيش حاجة"
"انا بقى فيه حاجة"
"خير"
"السمسار كلمنى النهاردة وقال المشترى جاهز لشقتنا وفيه شقتين تانيين بنفس السعر عايزنا نروح نشوفهم... ممكن تيجى معانا"
"انتى هتروحى الشقة القديمة"
"لا طبعا انا اقصد الشقق الجديدة"
"طيب روحى مع مامتك انا مليش لزوم"
"يعنى انت وقفت جنبى من اول الموضوع كله هتسيبنى دلوقتى... انا تقلت عليك انا عارفة...انا اسفة"
"متزعليش ياهايدى"
"انا مقدرش ازعل منك"
"هنروح امتى طيب"
ابتسمت هايدى بفرحة
"بجد هتيجى معانا"
"زى ماقلتى وقفت جنبك م الاول ومش هينفع اسيبكم دلوقتى"
"بكرة ان شاءالله بعد مانقفل المحل"
"لا بكرة انا يمكن مجيش"
وباستغراب واحباط"متجيش ليه"
"بكرة اول زيارة لاسماء وهنروح لها انا ومامتها ان شاءالله"
"وهتخلص امتى"
"مش عارف"
"يعنى مش جاى خالص بكرة"
"مش عارف ياهايدى لو على الشقق نشوفها بعد بكرة"
"انا مش بسأل علشان الشقق... علشان مش هشوفك بكرة"
ودخلوا زباين وقامت هايدى تبيع لهم
وهشام بيفكر فى كلمتها... هى تقصد ايه؟؟
والقرب اللى بقى بينهم ده معناه ايه وممكن يوصل لفين
اللى بينهم ده مش اكتر من صداقة وارتياح ومساعدة
"ايوه هو كده بس مش اكتر انا برتاح لها وهى برتاح لى "
دى الجملة اللى انها بيها هشام حواره الداخلى
وقربت منه هايدى بابتسامة
"هاخد جنى نجيب ايس كريم"
هز هشام راسه بابتسامة ليها وبوسة لجنى قبل ماتروح معاها

النهاردة هروح لاسماء بقالى اسبوعين مكلمتهاش ولا شفتها
هاخد لها معايا الحاجات اللى بتحبها
ياعينى عليكى يابنتى كل ده قاعدة لوحدك
هنعمل ايه يمكن يكون احسن ليها
هشام جه ياخدنى وروحنا لها
اول ما دخلنا الاوضة بتاعتها اخدتها فى حضنى كانت وحشانى اوى
هشام وهو بيسلم عليها... اترمت فى حضنه وقعدت تعيط
هشام اخدها فى حضنه وبيطبطب عليها
"انا هطلع اطمن احمد عليكى علشان كان قلقان وعايز يطمن"
خرجت علشان اسيبهم لوحدهم مع بعض

هشام"مالك ياحبيبتى بتعيطى ليه"
اسماء"وحشتنى اوى ياهشام والبيت وحشنى"
هشام"معلش علشان تبقى كويسة وترجعى نعيش زى ماكنا مبسوطين "
اسماء"هرجع امتى...قول للدكتور انى عايزة ارجع البيت"
هشام"حاضر... ياحبيبتى البيت من غيرك وحش والله وانا مستحمل بعدك غصب عنى بس علشان تبقى كويسة"
"طنط نادية وجنى عاملين ايه"
"كويسين الحمدلله"
"والمحل ياهشام؟؟؟ سايبه خالص"
رد هشام بقلق من رد فعلها "بروح كل يوم"
ردت بفرحة"بجد؟؟ ربنا يخليك ليا انا تعبتك كتير معايا وان شاءالله لما اطلع هننظم حياتنا بنظام يخلينا احنا الاتنين مبسوطين"
"ان شاءالله ياحبيبتى... وانا هكلم الدكتور انك اول ماتتحسنى يخرجك على طول"
دخلت ايمان وكان معاها احمد على التليفون
سابهم هشام وراح يتكلم مع الدكتور
وبعد مااتكلم مع الدكتور وسأله ممكن ترجع البيت امتى
"ممكن كمان اسبوعين تخرج بس تكمل جلسات على حسب الحالة ممكن شهر كمان وممكن اكتر حاجة بسيطة"
فرح هشام ان اسماء هترجع البيت تانى قريب
"وممكن تروح شغلها وتتعامل معانا فى البيت عادى وخصوصا مع بنتى"
"اه ...عادى بس بمتابعة العلاج"

فاتوا الاسبوعين اللى كانت فيهم اسماء فى المستشفى وكانت الزيارة مرتين فى الاسبوع
هشام روتينه اليومى متغيرش كل يوم فى المحل مع هايدى
وبيدوروا مع بعض على شقة
وكان معاهم وهما بيكتبوا العقد وكل الاجراءات معاهم
واثناء وجود هشام فى شغله فى اتصالات سريعة بينهم
مبقتش بسبب الشغل...كانت مجرد اتصالات بس
مش مهم المضمون المهم انهم بيتكلموا لحد مايتقابلوا
مبقاش بينهم القاب... هو هشام زى ما هى هايدى
وهما مع بعض فى المحل
"هايدى عايز اقولك حاجة مهمة"
"قول"
"بكرة اسماء هتخرج من المصحة"
"مبروك حاسة انك فرحان"
"الله يبارك فيكى..اه طبعا فرحان انها هترجع"
"معنى كده انها هترجع المحل؟؟"
"اكيد"
"وانت مش هتيجى؟؟؟وحتى لو جيت مش هنتكلم مع بعض زى مااحنا كده دلوقتى"
"اكيد"
"يعنى ايه؟؟بعد ماحسيت ان جنبى صديق بيساندنى وبيخاف عليا"
"انا جنبك لو احتجتيلى"
"يعنى ايه"
"يعنى ممكن نتكلم فى التليفون لو عايزانى فى حاجة"
"انا مستغناش عنك"
سكت هشام وسكتت هايدى ... سكوت لحد مادخل زباين

"حمدالله على السلامة يااسماء نورتى بيتك"
"ربنا يخليكى ياطنط"
استقبلتها نادية بفرحة...وهشام وراها داخل بشنطة هدومها
دخلت اسماء وهى بتدور بعينيها على جنى
"فين جنى ...وحشتنى"
بصت نادية لهشام وابتسموا لبعض
"نايمة يااسماء...ادخلى انتى ارتاحى ولما تصحى هجيبهالك"
دخلت اسماء على اوضتها...وهشام وراها
بعد ماغيرت اسماء هدومها... وكان هشام قاعد بيقلب فى موبايله
راحت اسماء وقعدت على طرف الكنبة اللى قاعد عليه..وايدها على كتفه... وايدها التانية مسكت دقنه علشان يبص لها
"انا بحبك اوى ياهشام... انت استحملتنى كتير... انا اسفة"
قربها منه وحضنها
"انا اللى بحبك اوى يااسماء ومبسوط انك بقيتى كويسة"

اسماء رجعت المحل وبقت بتروح الصبح وترجع فى نفس معاد هشام علشان تبقى موجودة فى البيت معاه
علاقتها اتحسنت بجنى ورجعت جنى تحبها زى الاول
نادية فرحانة باسماء انها خلصت علاجها بعد شهر من خروجها من المصحة
هشام وهايدى بينهم مكالمات كتير فى الوقت اللى بيبقى فيه بره البيت... واحيانا مقابلات سريعة ومن غير اسباب بناء على رغبة هايدى انها تشوفه

هشام داخل اوضته ينام ... دخلت اسماء وراه
"هشام عايزاك فى حاجة مهمة"
"خير يااسماء"
"فيه حاجة ملاحظاها وعايزة اخد رأيك فيها بخصوص هايدى"
وارتبك هشام.... اسماء حست بحاجة؟؟ لو سألته هيقولها ايه؟؟
"انا ملاحظة انها كانت مهملة المحل المرة الفترة اللى فاتت ايرادات المحل قلت عن ايام وجودى... تكون بتسرقنى"
واتنهد هشام وهو بياخد نفسه ان اسماء بتتكلم فى موضوع تانى خالص
"سرقة معتقدش بس المحل فعلا كان مهمل لاننا كنا بنجيب نفس الموديلات وبنكررها لان انتى عارفة مليش فى الشغل ده وكان فيه زباين كتير بييجوا ويمشوا علشان مفيش جديد"
"معنى كده اننا لازم نسافر نجيب بضاعة جديدة"
"انا معنديش اجازات خالص يااسماء"
"والعمل... ممكن اسافر انا اجيب البضاعة وارجع على طول يعنى 4 او 5 ايام بالكتير...معلش استحمل المحل فيهم "
سكتت اسماء مستنية رد هشام
"ماشى يااسماء... سافرى وشوفى شغلك بس متتأخريش"

اسماء وصلت فرنسا وراحت على الاوتيل اللى نزلت فيه قبل كده
لما وصلت كانوا بالليل... قعدت فى المطعم تتعشا
لاحظت وجود شاب قاعد قصادها وبيبص عليها
حاولت تفتكر شافته فين قبل كده... فكرت فكرت وبعد شوية مش قليلين افتكرت انها شافته فى المطار قبل ماتركب الطيارة
غالبا كان معاها على نفس الطيارة
حاولت تتجنب نظراته المتقطعة ليها
خلصت العشا وطلعت تنام

تانى يوم الصبح نزلت وراحت على المحلات اللى فيها احدث الموديلات تتفرج وتشوف الموديلات والاسعار
بعدها اخدت تاكسى وراحت على المصنع اللى اشترت منه المرة اللى فاتت... قابلت صاحب المصنع واتفرجت على احدث الموديلات عنده وحددت الطلبية بتاعتها ومشيت

رجعت على الاوتيل... دخلت المطعم تتغدا
اول مادخلت شافت نفس الشاب اللى كان قاعد بيقوم وياخد حاجته من على الترابيزة ولما شافها داخلة... قعد تانى مكانه

مفكرتش كتير وقعدت طلبت الغدا
وهى بتتغدا فضولها كان بيخليها تبص على الشاب ده
كان بيتابعها بنظرات متقطعة... ومفيش اى اكل قدامه يدل انه لسه بيتغدا

قلقت...مين ده وبيبص عليها كده ليه
خلصت اكلها ... وهى قايمة شافته جاى ناحيتها
وقبل ماتقوم لقيته بيقولها
"مساء الخير مدام اسماء... ممكن نتكلم مع بعض شوية"

هناك 11 تعليقًا:

  1. اوباااااااااااااااااا علي اسماء...لا بجد الحلقة دي شوقتني اكتر للي بعدها

    ردحذف
  2. اوباااااااااااااااااااااااا دى احلوت اوى يا دندون شكل الاوضاع هتتغير خالص

    ردحذف
  3. konchi hiya illi 7at5ounou ????? mich momken w hichem haykoun 3amal ih fi ghiyeb asma2!!! ya rab tjib il 3awe9eb salima!!

    ردحذف
  4. هههههههههههههههههههههه ايه العيله دى :D

    ردحذف
  5. انا اول مرة اعلق
    بس انا متابعاكي بقالي فترة طويلة و قريت قصص كتيييييير ليكي و انشاء الله هقرأهم كلهم
    انا اشك ان الراجل ده دكتور نفسي و هما بعتينو معاها xD
    بس هشام ده محتاج حد ينبهه من علاقته بهايدي و اتمنى انها تكون امه مش هايدي طبعا يا رب متعرف :D

    NaDa

    ردحذف
  6. bgd el 7al2a 2day 7lwa awy....bs ho eh hesham haywsl l fyn m3 hedy ?

    ردحذف
  7. حلوة يادينا مرسي ليكي انتي عارفة انا اكتر قصة قرتها وعجبتني هي حكم القلب دي وانا متابعة جديدة معاكي يادينا وحفضل علي طول متابعاكي تسلمي يادينا

    المتابعة الجديدة

    ردحذف
  8. قصصك جميله جدا يا دودو ربنا يخليكى ..بجد تحفه3>
    ToTy

    ردحذف
  9. منورييييييييييييييييييييييين
    وسعيدة بكومنتاتكم وتفاعلكم مع القصة
    وان شاءالله تعجبكم للنهاية

    ردحذف
  10. انا زعلانة اوى من علاقة هشام و هايدى :( و انا متاكدة ان اسماء هتصد الراجل دة و تاكدى دة من متابعة شخصيتها فى الحلقات الى فاتت لانها بتحب هشام اوى ، ياخوفى بس لو هشام حب هايدى :(

    ردحذف
  11. fen al 7l2a al 23 ???

    ردحذف

قول رأيك بلاش تقرا وتقفل من سكات...ارائكم تهمنى