الأربعاء، 20 يونيو 2012

يوميات حماة الجزء التانى الحلقة 25

الحلقة 25
مى واحمد فى العربية... مى بتعيط
"يامى متعيطيش "
"انا حاسة انك مخبى عليا الحقيقة... طيب قولى حصلها ايه"
"كل اللى اعرفه قلتهولك... مامتك اغمى عليها ومفاقتش باباكى ومصطفى خدوها المستشفى ..خافوا يقولولك تنزلى ازاى لوحدك دلوقتى انتى ويوسف فاتصلوا بيا انا علشان اقولك.. بس ده كل اللى حصل"
"يا حبيبتى ياماما... يارب يكون ده اللى حصل بجد"
"وهما هيكذبوا ليه بس"
"علشان متصدمش"
"بس لو حصل حاجة لاقدر الله كان على الاقل قالولى...متخافيش"
مى بتعيط لحد ما وصلوا قدام المستشفى...نزلت مى بسرعة ووراها احمد وهو شايل يوسف
دخلوا المستشفى وعلى الباب اتصل احمد بحماه
"الو...احنا فى المستشفى انتوا فين بالظبط... طيب طالعين حالا"
"هما فين"
"تعالى بيقولوا فى الدور التالت عند الاشعة"
طلعوا فى الاسانسير ولما وصلوا الدور التالت شافت مى باباها ومصطفى وراحت عليهم
"ايه اللى حصل...ماما مالها"
الاب"لما حاولنا نفوقها ومعرفناش اتصلنا بالاسعاف جابها وهنا فاقت الحمدلله بس بيعملولها اشعة"
مى"المغص برضه؟؟"
مصطفى"ايوه يامى و100 مرة اقولها تكشف ومتوافقش وتقولى هبقى كويسة بالمسكنات"
بعد دقايق خرجت الام من الاشعة والممرضات بيجروها بسرير المستشفى... راحت مى معاها وهى بتعيط
"سلامتك ياماما"
"الله يسلمك يامى...متخافيش انا كويسة"
راحت مى مع مامتها الاوضة
واستنى احمد مع حماه وهو بيسأل عن نتيجة الاشعة
"لسه بكرة الصبح الدكتور اللى هيتابع الحالة ممكن يقول التشخيص بالظبط "

نزلت اسماء وهى عارفة هشام مستنيها فين
مخدتش بالها ان هايدى وراها من بعيد
هشام مستنيها واول ما شاف اسماء... ركبت جنبه ومشيوا
هايدى واقفة تبص عليهم ودموعها نازلة
"هايدى انا بجرى وراكى وانتى اخدة فى وشك ومستنيتينيش ليه"
"شفتى جه ياخدها من بعيد ومجاش المحل ومش بيرد عليا"
"انتى اتصلتى بيه"
"ايوه"
"غلطانة"
"انتى اللى بتقوليلى غلطانة... وانتى عارفة انا بحبه قد ايه"
"عارفة ومبقولش غلطانة انك بتحبيه انتى غلطانة علشان اتصلتى بيه"
"اعمل ايه يعنى"
"بت ياهايدى فاكرة ام حلمى"
"ام حلمى مين؟؟"
"اللى كانت فى الشارع اللى بعدينا"
" بتاعة الكوتشينة والفنجان"
"عليكى نوووور... انا اعرف انها بتعمل اعمال حلو اوى ماتيجى تعملك عمل لهشام تخليه يشوف اسماء الزفتة دى قردة"
"بجد؟؟وهو ممكن"
"ليه لا ماتيجى نجرب"
"بس انا اخاف اروح المنطقة هناك علشان عاطف"
"بصى هروح انا واشوف المطلوب ايه وكده وابقى اقولك"
"بجد؟؟طيب هتروحى امتى"
"اجازتى بعد 3ايام هبقى اروح لها فى الاجازة علشان بيبقى عندها زحمة اوى"
"طيب والفلوس اللى هتدفيعها انا هيديهالك"
"ده غصب عنك اومال هدفعها انا بس لما تبقى مدام هشام بقى متبقيش تنسى صاحبتك اللى وقفت جنبك"
"انا والله مااقدر ده انتى خيرك عليا"
"انتى اختى يابت متقوليش كده بس لما تلعب معاكى متنسيش اختك"
"عينيا ليكى... بس والنبى تجيبيلى منها فايدة"

انا قاعدة بتكلم مع عزت... كنا حوالى الساعة 1بالليل
"هتيجى بكرة الصبح"
"لا خليها بعده"
"مالك بقى لك فترة كده مش مقبلة على الدار زى الاول"
"ياعزت حاسة ان الناس اللى كنا بنتجمع مع بعض ومحليين القعدة هناك اتفرقنا بعد الحاجة روحية الله يرحمها وبعدين بعد قرار سلوى ورفعت بتاع جوازهم ده وهما مبقوش بييجوا"
"طيب نروح احنا نقعد مع بعض"
"مااحنا بنتكلم اهو اى وقت فى اليوم مش لازم يعنى ننزل نروح هناك مخصوص"
"والملل ...انا عن نفسى بفضل زهقان طول النهار والليل لاالتليفزيون فيه حاجة عِدلة والجرايد بخلصها وافضل قاعد وشى ف وش الحيطة"
"ومين سمعك ياعزت انا شوية واحس انى هتكلم مع حيطان البيت"
"بس انتى ولادك هنا جنبك انما انا يارا بينى وبينها بلاد"
"جنبى؟؟ماكل واحد فيهم ليه حياته وفين وفين لما يفضوا"
وسمعت صوت كأن حد بيفتح الباب .. انا خفت
"ثوانى ياعزت اشوف فيه صوت ع الباب"
"صوت ايه؟؟ومين دلوقتى"
"مش عارفة هقوم اشوف اهو"
"اوعى تفتحى لحد دلوقتى"
"لالالا انا هبص من العين السحرية واشوف"
"طيب انا معاكى ع التليفون وابقى طمنينى"
قمت اشوف مين ع الباب... لما بصيت لقيت احمد وشايل يوسف نايم وبيحاول يفتح الباب بالمفتاح... وانا كنت قافلة الترباس
قلقت ايه اللى جابهم دلوقتى...فتحت بسرعة
"ايه يااحمد ..مالك؟؟"
"مفيش ياماما ...هدخل انيم يوسف واحكيلك"
قال وهو بيدخل وانا قلقت من جيتهم هما الاانين دلوقتى
احمد وهو داخل لمح سماعة التليفون مرفوعة
انا شفته وهو بيبص على التليفون وافتكرت عزت
كنت هنسى انه ع التليفون...روحت اكلمه
"الو... ده احمد ... مش عارفة... الصبح ان شاءالله... مع السلامة"
قفلت لقيت احمد قدامى
"مين ياماما"
"مين ايه"
"بتكلمى مين دلوقتى"
"طمنى انت الاول ايه اللى جابك انت وابنك دلوقتى ...فين مى"
"هحكيلك لما تقوليلى بتكلمى مين"
"وانت مالك بكلم مين انت بتتكلم معايا كده ليه"
"علشان حاسس انك بتكلمى الراجل الرخم ده اللى اسمه عزت"
"ولو بكلمه يعنى فيها ايه"
"نعم... بتكلميه دلوقتى ليه ان شاءالله وازاى تسمحيله يكلمك دلوقتى"
"تصدق خوفتنى... ماشاءالله شايفاك راجل اوى وبتزعق لامك"
"مش بزعق بس طريقتك مستفزة ياماما"
"وانت قليل الادب... ومش عايزة اعرف جيت ليه... ماهو انا كده كل ماافرح تعكننوا عليا يا خلفة الندامة"
"ايه ...وايه اللى مفرحك ياماما"
"فرحت انى شفتك وانك جيت ...طبعا انت مش فاكر انى بقعد بالشهور مشوفكش وكلها كلمتين فى التليفون وخلاص"
"خلاص ياماما انا اسف بس انا بتعصب من الراجل ده"
"وانا قلتلك قبل كده مبحبش حد يحاسبنى ويقولى اعمل ايه ومعملش ايه مش هتيجى انت دلوقتى وتعلمنى الصح م الغلط"
"خلاص بقى ياماما بس متكلميهوش تانى"
قالها وهو جاى يبوس راسى... بس كلمته الاخرانية دى خلتنى زغدته فى كتفه وانا متنرفزة
"برضه هتقولى اعمل ايه ومعملش ايه"
"طيب هو عايز منك ايه"
"هيعوز ايه يعنى... من قبل ابوك مايموت وهو بيجيلنا وبيكلمنا زى ماهو بيعمل دلوقتى يعنى دى مش حاجة جديدة انما مخك الزبالة ده هو اللى مخليك مش فاهم حاجة"
"ماشى ياماما انتى حرة"
"مش مستنياك تقولها ياروح امك... مراتك فين"
"مى فى المستشفى"
"يامصيبتى...مالها"
"مش هيا ياستى...مامتها تعبانة ودخلت المستشفى وهى هتبات معاها"
"مالها؟"
"معرفش بكرة هيعرفوا... هتعشينى ولا انام خفيف"
"متهونش عليا انيمك من غير عشا مع انك حرقت دمى"
"خلاص بقى يامونمون ياجميل انت"
الواد ضحك عليا بكلمتين خلانى اضحك... ماهو انا كمان مسكتلوش برضه..قال ايه بيغير عليا...الواد اتهبل

تانى يوم فى المستشفى... وبعد الدكتور ماشاف الاشعة
متكلمش قدام الام ولا مى... ولما خرج من الاوضة
سأله ابوم مى عن الحالة
"الاشعة مبينة ان فيه اورام صغيرة فى اكتر من مكان فى البطن"
"ازاى دى مكنتش بتشتكى"
"يمكن كانت بتسكت انما الاورام واضحة جدا"
"والعمل يادكتور"
"لازم عملية استئصال للاورام دى وبعد كده نحللها ونشوف "
"لاحول ولا قوة الا بالله... يعنى حالتها متأخرة"
"مش هقدر اقولك غير مابعد تحليل الاورام ونشوف حميدة ولا خبيثة"
"بس اللى اعرفه ان اى عملية بتزيد من انتشارها فى الجسم"
"كمان مينفعش نسيبها كده"
"امتى ممكن تعملها"
"بكرة الصبح"

اسماء قاعدة فى المحل الضهر... بتكتب رسالة رومانسية لهشام تفاجئه بيها... حست بحد بيكلمها
"مساء الخير"
بصت شافت وليد قدامها ومعاه بوكيه ورد
"وليد... اهلا وسهلا اتفضل"
"ازيك يامدام اسماء... اتفضلى"
هو بيديها البوكيه... وهايدى وقفت الكلام اللى كانت بتقوله لما سمعت اسم وليد ومعاه الورد
"مكنش له لزوم تتعب نفسك"
"ازاى متقوليش كده... دى اقل حاجة ممكن اقدمهالك"
"ميرسى... وماما اخبارها ايه وحنان والولاد"
"بخير الحمدلله ماما عملت الاشعات وكويسة بس هى بتحب تتدلع عليا عارفة انى بخاف عيها وحنان والولاد رجعوا بيتهم بعد ماانا رجعت"
"ابقى سلملى عليهم... وحمدالله على سلامتك"
"الله يسلمك... هستأذن انا"
"استنى رايح فين... انا عايزاك"
"بعدين الدنيا مش هتطير انا جاى المول هنا تانى بالليل"
"بس احتمال مجيش بالليل "
"ياستى اهم حاجة ان الشغل يعجبك وان مجيتيش بالليل يبقى اى وقت تانى مش هيحصل حاجة"
ابتسمت له اسماء ردا على ابتسامته قبل مايمشى
هايدى بتبص للاتنين وبعد ما مشى
"مين ده يامدام اسماء"
"ده المستورِد اللى هيجيب لنا الشغل بعد كده "

وليد عند حنان فى بيتها ... جايب هدايا لولادها
"انا هقوم بقى ياحنان مش عايزة حاجة"
"ايه ياوليد انت مقعدتش"
"ماانتى عارفة ملحقتش انام بعد ماوصلت وعايز ارتاح شوية"
"اه صحيح ايه المشوار المهم اللى انت قلت لازم تروحه اول ماوصلت"
"كنت بشكر اسماء"
"اااااااه ...بس يعنى الشكر ده مكنش يستنى لبالليل او بكرة؟؟ وبعدين ياوليد انت اول مرة تامن فى الفلوس لحد ماتعرفوش"
"بس اسماء اعرفها كويس"
استغربت حنان
"تعرفها ازاى؟؟ وبعدين بتتكلم عليها بطريقة تقلق"
"تقلق ليه"
"انا عارفة انها متجوزة واحساسى بيقولى ان طريقة كلامك عنها دى مش زى اى حد تانى وكمان انك اول ماتيجى تروح لها؟؟؟ مش فاهمة اللى بيحصل ده معناه ايه"
سكت وليد وبص بعيد عن عين حنان
"وليد رد عليا... انت علاقتك بيها ايه"
"هى متعرفنيش غير من كام يوم فى فرنسا"
"وانت؟؟"
"انا شفتها فى المحل من فترة قريبة حتى استغربت لما شفتها لانى كنت فاكر ان صاحب المحل ده راجل... لما سألت عرفت انه جوزها وهى صاحبة المحل بس كانت تعبانة ومبتجيش ... من اول مرة شفتها وهى شدتنى حسيت انى اعرفها من زمان... واتفاجئت بيها فى المطار وانا مسافر كانت صدفة غريبة والاغرب اننا نزلنا فى نفس الفندق حسيت ان القدر بيجمعنا وعرفتها بنفسى واتكلمنا فى الشغل واتوالت الصدف اللى قربتنا من بعض زى مكالمتك انتى وماما وهى معايا "
"بس كل اللى بتقوله ده بتعذب نفسك ع الفاضى لانها ممكن جدا تكون بتحب جوزها ومش ممكن تفكر فيك"
"على فكرة جوزها بيخونها"
"عرفت منين"
"مش بقولك كنت بشوف جوزها على انه صاحب المحل وكانت البنت اللى بتشتغل هناك على طول قاعدة معاه وشفتهم اكتر من مرة نازلين مع بعض وبيركبوا العربية"
"وانت هتستغل ده وتقولها؟؟"
"الله يسامحك ياحنان انتى تفتكرى انا ممكن اعمل كده"
"اومال هتعمل ايه"
"مش عايز غير انى ابقى قريب منها حتى لو علاقة شغل بس انا راضى بس لو حصل انها عرفت عن علاقة جوزها بالبنت دى اكيد هتكون محتاجة حد يقف جنبها ومش هتلاقى حد يخاف عليها زيي"
واتنهدت حنان وطبطبت على كتفه وقالت وهى مش عاجبها الكلام
"ربنا يقدم اللى فيه الخير"

هناك 16 تعليقًا:

  1. ايه ده بقه ليه التعقيد ده يعنى
    هى القصة كام حلقة

    ردحذف
  2. كنت متوقعه الموضوع ده تحفة بجد

    ردحذف
  3. فى رسالتين عايزة ارد بيهم على تعليقات فاتت يارب اصحابهم يشوفوها
    ميما من العراق
    انا فاكراكى كويس طبعا ووحشتنى كومنتاتك وربنا يعينك وينجحك ان شاءالله

    ام مروان
    انا فعلا مش بنزل الحلقات يومين فى الاسبوع بس غالبا متابعى المدونة مش عارفين كده لانى كتبت ده فى الفيس بوك
    بصى الاجازة مبدئيا الاتنين والجمعة"بس ممكن تتغير لو حصل اى ظرف عندى لانى بكتب يوم بيوم"
    "يعنى متحاوليش فى حكاية كام حلقة ورا بعض دى هههههههههههه"

    ردحذف
  4. ايه
    الحلقات مش محددة بس قربنا من النهاية

    ردحذف
  5. طيب ربنا يسهل وبليز تخلى النهاية حلوة انا بجد مش ناقصة نكد وداخلة على امتحانات

    ردحذف
  6. اه انتي كده بدأتي تحنني قلبنا علي اللي بين اسماء و الراجل ده وشكلك بتمهدي لنا الطريق عشان كل واحد يشوف حياته....بس لا والنبي خليهم متجوزين و بيحبوا بعض"مع اني حاسة ان في حاجات ناقصة بينهم" بس احسن ما اتنين متجوزين يسيبوا بعض عشان اتنين تانيين :(
    didi makky

    ردحذف
  7. اهو انا مش قلقني غير هايدي و عمايلها و وليييد اللي تلعلنا في البخت ده ههههههه بس مفيش قصة مفيهاش صراعات و انا عارفاااااكي بتتوصيش ف موضوع الصراعاات ده D:

    هو مش عزت يتجوز ايمان و يونسوا بعض بقى و ده الافضل لهم :)
    بس محدش يعارض من الولاد بس بالله الواحد يربي و يكبر و يجوزهم و كمان محتاج منهم اذن ف يبقالي ونس ولا !!

    مع العلم اني لسه ف ال 20 P:

    ياريييييييييييييييييييييييت تلحقيني بالجدييدة بجد عايزه اعرف النهايه :)

    ردحذف
  8. هايدي دى اللهي لا تكسب ولا تخسر تفضل فالاوف سايد .... اما بالنسبه لوليد دة ربنا يهدييه و مايعملش حاجه كدة ولا كدة ;) .... تسلم ايدك يا رب يا دينا انا بفضل اتابعك و انا فثانويه عامه (ثانويه عامه و العيشه مرة) .......

    emo

    ردحذف
    الردود
    1. على فكرة انا متابعه حضرتك بقى لى 3 شهور وقريت كل الموجود فى المدونه بس دى اول مرة اكتب فيها كومنت وعاحبنى اسلوب حضرتك جدا وتقريبا انا بدخل المدونه كل يوم على الرغم ان انا فى ثانويه عامه برضو وعلى فكرة الحلقه جمييييييييييله جدا

      حذف
    2. بليييييييييييييييز يا دينا بلاش هشام واسماء ينفصلوا بلاااش هشام يروح للى اسمها هايدى دى.. عايزين نهايه سعيده يا دينا
      sama

      حذف
  9. el mawdoo3 b2a gamed 3ala el 2a5eeeeeeeeer mobd3a walahi y dina
    batot

    ردحذف
  10. eh dh al modo3 beos3 w 4klo hetwl bs rbna ystor xDD
    bs 7l2a 7lwaaa aweee w mstnen al7l2a ally b3deha isa mtt25re4 3lina b2a
    Tu2aa

    ردحذف
  11. يارب تكون النهايه سعيده

    ردحذف
  12. انا بعشق القصة دي ونفسي متخلص

    ردحذف
  13. انا بعشق القصة دي ونفسي متخلص

    ردحذف

قول رأيك بلاش تقرا وتقفل من سكات...ارائكم تهمنى