السبت، 23 يونيو 2012

يوميات حماة الجزء التانى الحلقة 28

الحلقة 28
هشام اول ماشاف الدموع فى عين نادية
جرى عليها "مين ياماما؟؟ فى ايه؟"
اسماء واقفة القلق ربط لسانها
نادية بدموعها"ناجى عمل حادثة"
اخد منها هشام السماعة...سمع صوت باباه
"متخافيش يانادية انا كويس"
"الو يا بابا... ايه اللى حصل"
"متقلقوش ربنا ستر... انا قلت لازم اقولكم"
نادية قاعدة بتعيط واسماء لما سمعت هشام بيقول بابا اطمنت
قعدت جنب نادية تطبطب عليها
"بتعيطى ليه بس ياطنط... مش هو كويس"
نادية بتبص لهشام وهو بيتكلم... وقامت
"هات اكلمه"
اخدت التليفون
"ايوه ياناجى ... هجيلك على اول طيارة... لا جاية اكيد وبعدها يانرجع مع بعض يا نفضل مع بعض... مع السلامة"
بعد ماقفلت
"انا هسافر ياهشام وهاخد جنى معايا"
"ياماما بيقول بقى كويس وحادثة بسيطة وهو فى البيت عادى...انتى مكبرة الموضوع كده ليه خوفتينى"
"انا اللى قلبى اتقبض لما سمعت صوته وبيقولى عمل حادثة... اكتر كلمة وجعتنى لما قال خفت اموت وانا لوحدى... انا هرجع امريكا ياهشام ولو ناجى صمم يفضل هناك هقعد معاه"
"طيب اقوم انا انام فى الليلة اللى مش عايزة تعدى دى...اسماء تعالى اقولك"
اسماء افتكرت ان التليفون انقذها من رد فعل هشام
"لا انا قاعدة مع طنط نادية شوية"
هشام وهو فى طريقة للوضة
"لا تعالى وابقى ارجعى اقعدى معاها "
نادية بتنشف دموعها وبتتصل تشوف مواعيد الطيران
قامت اسماء دخلت ورا هشام...بتحاول تبتسم
"عايز حاجة ياحبيبى"
"شيلى الهبل اللى حطيتيه تحت المرتبة واوعى تتكرر تانى"
"اسمع بس ياهشام دى قالتلى حاجات محدش يعرفها وقالتلى العمل فين وهتطلعه ازاى... علشان خاطرى ده املى الوحيد"
"انتى يامتعلمة يامثقفة هتصدقى الكلام الفارغ ده... والله العظيم يااسماء لو كررتيها ولا روحتيلها تانى لهتشوفى منى رد فعل متتوقعيهوش"
"انت بتهددنى ياهشام"
"بهددك بحذرك سميها زى ماتسميها ...ده اللى ناقص نمشى ورا كلام الدجل والشعوذة... افرضى البوليس طب عليكم تروحى فى داهية ونتفضح... انا مش مصدق انك سمعتى كلام واحدة متخلفة زى هايدى دى ومشيتى وراها"
"خلاص ياهشام انا اسفة بس انت كده مش حاسس بيا"
"مش هرد عليكى... شيلى بقى الزفت خلينى انام"
راحت اسماء على العمل وشالته
"اعمل فيه ايه"
"انا اعرف... احرقيه"
ونام هشام على السرير
"اطفى النور واطلعى بره بقى"
وسمعت كلامه وخرجت من الاوضة بسرعة
                ****************************
"لسه منمتيش ياطنط"
"لسه ... فيه طيارة بكرة الساعة 12 الضهر وحجزت ان شاءالله"
"ممكن اسألك سؤال"
"اسألى يااسماء"
"انا مستغربة رد فعلك ده... يعنى القلق والخوف على عموناجى وانتم بقالكم كذا سنة منفصلين"
"لما حسيت انه كان ممكن يموت بعد الشر وهو لوحده صعب عليا اوى وقلت مش هنعيش قد ماعشنا... ليه اسيبه كل واحد فينا فى بلد واحنا دلوقتى محتاجين بعض اكتر من الاول... ومتنسيش برضه ان بيننا ايام حلوة كتير افتكرتها كلها"
حضنتها اسماء لما حست قد ايه بتتكلم بحب وعطف عن ناجى لاول مرة
"هتاخدى جنى ليه؟؟ سيبيها معايا"
"مقدرش اسيبها يااسماء جنى حتة منى ومش هقدر اسافر من غيرها... انا هحاول اقنع ناجى يرجع مصر"
"ان شاءالله"

تانى يوم فى المحل ...هايدى عايزة تسأل اسماء بس محبتش تبين انها متشوقة تعرف
جه وليد من السفر وقعد مع اسماء شوية
الساعة وصلت 3 واسماء لسه قاعدة وعرفت انها قاعدة النهاردة مش هتمشى
والساعة 6 اتصل بيها هشام... وركزت هايدى مع المكالمة
"حبيبى هتوصل امتى... طيب ساعة واكون فى البيت ان شاءالله... ترجع بالسلامة... مع السلامة"
وقامت اسماء وقعدت هايدى ترتب الشغل اللى وصل قبلها بيوم
وبعد نص ساعة جت هبه
"ايه الاخبار حطتله العمل"
"اكيد انا مرضيتش اسألها علشان متفهمش انى مهتمة"
"جدعة يابت بقيتى ناصحة اهو"
وعلى انتهاء اليوم وهبه وهايدى ماشيين مع بعض ونازلين من المول رن موبايل هايدى... بتفتح شنطتها وهى بتطلع التليفون
قالت بصرخة فرح
"هشام... هشام اللى بيتصل"
هبه"يابنت الايه ياام حلمى العمل اشتغل بالسرعة دى... ردى ردى"
ردت هايدى وهى بتاخد نفسها بصعوبة وبتحاول تبقى على هدوئها
"الو... انت عامل ايه؟؟ نتقابل؟؟؟ دلوقتى؟؟"
بصت لهبه...هبه هزت راسها بمعنى قولى آه
"طيب... انا قفلت المحل ولسه مخرجتش من المول... هستناك"
بعد ماقفلت... مسكت قلبها
"قلبى هيقف ياهبه مش قادرة... معقول هو اللى اتصل بيا وعايز يشوفنى"
"مش قلتلك سرها باتع... هتستنيه فين"
"على اول الشارع"
نزلوا ولما وصلوا على اول الشارع مشيت هبه ووقفت هايدى تستنى هشام

هبه نزلت من الميكروباص مكان مابتنزل كل يوم
وهى ماشية فى طريقها لمحت عاطف واقف عند القهوة
عملت نفسها مش شايفاه وكملت طريقها
اول ما شافها راح وراها ولف وقف قصادها
"استنى عندك"
"عايز ايه"
"هايدى فين"
"معرفش"
"وحياة امك... انتى هتعمليهم عليا يابت"
"لم نفسك ياعاطف بدل ماافرج عليك الشارع"
"عرفينى طريقها وانا مش هتعرضلك تانى"
"وافرض اعرف بس هى مبتحبكش مش عارفة حب ايه ده اللى يخليك عايز تتجوزها بالعافية"
"مزاجى كده عايزها هى...وبعد ما دخلتنى القسم حطيتها فى دماغى اكتر وم الاخر كده هاخدها يعنى هاخدها"
مردتش عليه ومشيت وسابته... جرها من دراعها
"قوليلى راحت فين"
بصت له بغدر...وفجأة صرخت
"الحقوووووووووووووونى... الحقووووووووووووووونى"
واتلم الناس عليهم فى الشارع منهم اللى يعرفوهم ومنهم اللى ميعرفوهمش... واستغلت هبه الزحمة وجريت على بيتها
وبعد الناس مااتفرقوا راح عاطف قعد ع القهوة مع واحد صاحبه
"دلوقتى ييجى سيد واللى معاه انا هتصل بالرجالة ييجوا"
"لالالا سيبك متتصلش بحد لما ييجى سيد هنثبته بكلمتين واعتذرله ونعدى الليلة... بس ورحمة ابويا هبه دى ليها ترتيب علشان تعرف ان عاطف ميتلعبش بيه ابداااا"

انا مش عارفة اقول لاحمد واسماء ازاى
كل مااكون بكلم حد منهم مقدرش اقولهم
مفيش حل غير انى اجمعهم هنا مع بعض واقولهم
لما اتصل بيهم الاتنين بيقولولى هنبقى نيجى من غير مايحددوا معاد
ولما صممت انى عايزاهم ضرورى قالوا هييجوا بكرة الصبح قبل الشغل... طول الليل بفكر هبدأ الكلام ازاى
مع اول رنة جرس الباب اللى بتدل ان حد فيهم جه
نسيت كل الكلام اللى كنت ناوية اقوله
فتحت الباب وكانت اسماء... دخلت وقعدنا نتكلم
كانت بتحكى وانا مش مركزة معاها فى اى حاجة
ورن جرس الباب تانى... ووصل احمد
بعد السلامات السريعة من احمد
"خير ياماما واضح ان فيه حاجة مهمة زى ماقلتى"
ايمان"اه فيه"
اسماء"خير ياماما"
احمد"قولى ياماما بسرعة الله يخليكى ورايا شغل"
ايمان"انتم مش ملاحظين انى بقيت بشحتكم علشان اشوفكم"
اسماء"ازاى بس ياماما متقوليش كده"
احمد"انا بخرج من الصبح وبرجع بيتى بالليل ياماما وعلى يدك يبقى ايه لزوم الكلام ده"
ايمان"وانا محدش فيكم حاسس بيا وبوحدتى"
احمد واسماء بيبصوا لبعض
احمد"كلامك ده مش مريحنى... وحاسس ان وراه مصيبة"
اسماء"مصيبة ايه بس لالا اكيد ماما زهقانة وعايزة تتكلم معانا صح؟"
واستجمعت شجاعتى وانا بحاول اتكلم بكل ثقة
"كل واحد فيكم له حياته... وانا من حقى يبقى..."
وقاطعنى احمد وهو بيزعق
"ايوه... من حقك ايه بقى؟؟ شامم ريحة الواطى عزت"
ايمان"احترم نفسك يااحمد واتكلم معايا كويس"
اسماء"لالالا احمد انت بتتسرع ليه اكيد ماما متقصدش كده"
وبصوا لى الاتنين
احمد"تقصدى كده ولا متقصديش؟"
اسماء وهى بتعيط"متقصديش صح؟؟؟ مش معقول تكونى نسيتى بابا بالسرعة دى"
احمد"يا حلاوة ياولاد امى الست العاقلة عايزة تتجوز وهى جدة"
ايمان"قلتلك احترم نفسك"
احمد"كذبينى وقولى انى بتجنى عليكى... انا كنت حاسس ان الدحلاب ده بيكلمك وهو نيته وحشة...المصيبة انك كنتى بتجاريه"
ايمان"اخرس بقى انت زودتها اوى"
احمد"زودتها ايه والفضيحة اللى عايزة تعمليها دى يبقى مين اللى زودها"
اسماء بتعيط ومبتتكلمش
ايمان"بتعيطى ليه"
اسماء"مش مصدقة....عايزة تتجوزى وبابا لسه ميت من سنة وكام شهر"
ايمان"وهو انا اقدر انسى يوسف ده حبيبى وجوزى وعشرة عمرى"
اسماء"اومال عايزة تخونيه ليه"
ايمان"اخونه؟؟ انا كنت فاكراكى هتحسى بيا"
احمد"حسى بيها يااسماء...حسى ان ست عدت الستين فاكرة نفسها صغيرة وعايزة تتجوز"
احمد كلامه بيجرحنى... مهما كان مينفعش يكلمنى كده
احمد"ساكتة ليه يااسماء.... اتصدمتى فى امك صح... بصى ياماما اخر كلام عندى ياانا يا الراجل ...روحى وراه وانسى انك أم"
بصيت لاسماء يمكن تحس بيا... دموعى نازلة من كلامه الجارح
احمد بص لى
"كمان بتعيطى علشانه... انا نازل"
راح ع الباب وانا بنادى عليه
"استنى يا احمد... لسه بنتكلم"
احمد "معنديش كلام اقوله تانى... اختارى انتى"
اسماء"استنى يااحمد خدنى معاك"
وبصت لى وكملت
" يا احنا يا هو"
نزلوا الاتنين ورزعوا الباب وانا قلبى بيتقطع وراهم

هناك 13 تعليقًا:

  1. الصراحة عندهم حق ايه دخ ست عجوزة وجوزها لسه ميت وتفكر ففى وحدة وكلام فارغ تروح تحفظ قران ولا جامع وتعمل حاجة حلوة فى اخر ايامها ايه دى

    ردحذف
  2. انا شايف انهم انانيين كده وكان لازم يدوا لامهم فرصه تبدا من جديد او بمعنى تاني تكمل حياتها بدل ماتعيش لوحدهاوهما كل واحد ومشاغله

    ردحذف
  3. ما هو يا يقعدوا معاها وبدل احساس الوحدة ده يا اما يسبوها تجوز وتكمل اخر ايامها لان الحياة فى الزمن ده محدش فاضى لحد

    ردحذف
  4. لاااااااا بجد هما وحشين قوي وفيها ايه يعني مش بدل اعدتها لوحدها حرام يعني ولا هايبقي حلو لما تروح دار مسنين وتعد فيه ولا لما يجرالها حاجة ومحدش حاسس بيها لان ولادها مش بيعرفوها غير فين وفين
    وهما اللي غلطانين هما اللي وصلوها لكدا لو كانوا بجد مقربين منها مكانتش هتحس بالوحدة

    ردحذف
  5. FàTmà ḾòĦàmêd
    Enty bt2oly kda 3ashan mesh fe mkanha bas am sure en ay 7ad fe mkanha mesh hy2ol kda , ayn kan mknsh ynfa3 weladha y3amluha kda 3la el22l ytfahmo m3aha ya tkn3hm ya ykn3uha we Ahmed 8lt gamed fe mamto 7ata law z3l mnha mesh ldrgt kalamo dah ( and that's my opinion )
    Esraa Reda

    ردحذف
  6. Esraa Reda
    عندك حق والله بس انا بعيب ع الستات الكبار اللى يتجوزو فى السن ده بحس انهم متصابيين وفاكرين نفسهم صغيرين زى ما قال احمد :D وانا لو فى موقفهم كنت عملت كده الصراحة :D

    ردحذف
  7. bsra7a homa 3ndhom 72 w hya kman 3ndha 72 el w7da di e7sas bash3 awiiii may7ssh byh eli eli garbo homa bytklmo keda 3shan by7boha bardo w msh 3awzeen yshofoha m3 7ad tani
    batot

    ردحذف
  8. لالالالالالالالالا احمد واسماء كدا انانيين جداااااااااا هى مهما ان كان من حقها تتجوز والمفروض يشجعوها مش يقفوا ضدها

    ردحذف
  9. هى المفروض تتشوف اى حاجة تانية تسليه غير الجواز لووووو كان حد قريب
    منى كنت عاتبت علية

    ردحذف
  10. بجد عندهم حق يعني دي ست عدت ال 60

    ردحذف
  11. ياجماعه مش بالسن الفكره فى الوحده لو حتى عندها 100 سنه وعايزه حد يبقى معاها الوحده وحشه برضو ومهما هتحاول تشغل وقتها بحفظ قران او اعمال خيريه هيبقى اد ايه فاليوم 3 ساعات فاليوم طيب وبقيت ال 24 ساعه تعمل فيهم ايه دى حتى تلاقيها مبتعرفش تنام كويس وهى لواحدها

    ردحذف
  12. متخلفين وبيفكروا بطريقة رجعية اية يعنى اية يعنى لو اتجوزوا واستمتعوا بايامهم الاخيرة البلد دى بجد بقت متخلفة وتفكير الى فيها متخلف

    ردحذف
  13. مين قال الجواز حرام في اي سن . حقها

    ردحذف

قول رأيك بلاش تقرا وتقفل من سكات...ارائكم تهمنى