الأربعاء، 18 يوليو، 2012

جريمة قتل الحلقة 13

الحلقة 13
دخلت سمر عند مريم السكرتيرة الجديدة
"صباح الخير يامريم"
وقامت مريم تسلم عليها
"اهلا ياسمر ازيك ياحبيبتى...وحشتينى والله"
"وانتى كمان عاملة ايه"
"الحمدلله"
"هو دكتور عا..."
واتفتح الباب فجأة وخرج شهاب وهو متنرفز
شهاب"سمر؟؟!! ايه اللى جابك هنا"
سمر"جاية لدكتور عاصم"
شهاب"ليه"
سمر"بعدين ياشهاب"
كانت بتتكلم وهى متجهه لمكتب عاصم...اللى كان بابه مفتوح
شافها عاصم ... وشاف شهاب وراها
"انت لسه واقف... مش قلتلك روح شوف شغلك"
التفتت سمر لشهاب اللى واقف وراها وعينيه كلها شر
بص لها شهاب
"انا تحت فى الاقتصادى لما تخلصى تعاليلى"
مشى شهاب ودخلت سمر وقفلت باب المكتب عليها
واقفة تبص له بتحدى
"فى ايه؟؟ايه اللى جابك هنا دلوقتى"
"جيت علشان اخد حقى منك"
"حق ايه ياام حق... انتى ليكى عندى ايه"
"ليا شرفى اللى ضيعته لما اغتصبتنى "
"نعم ياروح امك ماكان كله بمزاجك....ولا نسيتى"
"انا منسيتش...انا فهمت كل حاجة....دوا الصداع اللى كان ع البار فى ايطاليا والعصير اللى شربته وبعدها مقدرتش اقاومك"
"انتى جاية ترمى جتتك عليا...دوا ايه وصداع ايه اللى بتقولى عليه"
"والله العظيم ياعاصم لو ماصلحت غلطتك وكتبت عليا لاروح اقول لماما واعمل فيك بلاغ وهتبقى فضيحتك وسيرتك على كل لسان"
وضحك بسخرية
"هتفضحى نفسك"
"معنديش حاجة اخسرها خلاص"
"وشهاب"
"مش هرتبط بيه على غش..ومش خايفة انه يعرف الحقيقة"
وبدأ عاصم يخاف من تحديها من غير ما يبين
"جبتى القوة دى منين"
"علشان مبقاش عندى حاجة اخسرها بعد اللى ضاع"
"طلباتك"
"تكتب عليا وبعد كده تطلقنى علشان ميشرفنيش انى ارتبط بواحد زيك"
"لالالا ده احنا لساننا طول كمان"
"طولة اللسان متجيش حاجة جنب اللى عملته فيا"
خبطت مريم على الباب...وبعدين دخلت
"د.عاصم اوضة العمليات جاهزة "
عاصم"طيب انا رايح اهو"
خرجت مريم وقفلت وراها الباب...قام عاصم بسرعة
"انا عندى عملية دلوقتى... استنينى هرجعلك"
"مردتش عليا"
"لما ارجع هعملك اللى انتى عايزاه"

طلع عاصم اوضة العمليات...وكان كله جاهز
جت عليه ممرضة
"د.شهاب عنده شغل فى الاقتصادى وبيقول د.محمد يدخل معاك العملية دلوقتى"
"ماشى ماشى سيبيه براحته... شوفيلى د. على موجود"
"اه موجود كان عنده عملية من شوية"
"روحى قوليله د.عاصم مش فاضى يعمل العملية دى وخليه ييجى هو"
"حاضر يا دكتور"
مشيت الممرضة...وطلع عاصم موبايله
"الو...ازيك يا مرزوق...عايزك فى مصلحة... دلوقتى... واحدة عايزك تخلص منها بأى طريقة والنهاردة ...دلوقتى قبل كمان شوية... هى عندى فى المستشفى دلوقتى ...لا معنديش صورة ليها ع الموبايل... بقولك ايه انت تعالالى المستشفى حالا وقول ع البوابة انك عايزنى وانا هديهم خبر...تطلع لى وهى هتكون عندى فى المكتب قدامها قول انك ليك حد فى الاقتصادى وعايز تأجل دفع الفلوس ولا اى كلام ييجى على بالك ...المهم هتشوفها عندى وبعد انت ماتخرج هى هتمشى وانت تتصرف... عايزك تخلص عليها من غير ما تسيب دليل...فاهم...يالا مستنيك"

لبنى قاعدة فى اوضتها بتعيط من الخوف
اتصلت بفريد
"فريد انت فين... انا خايفة اوى...مش عارفة اعمل ايه... انا معملتش حاجة لسه... هو مش بس عايز الفيلا ده عايزنى كمان اتنازل له عن حضانة ادم... كله الا ابنى ..محدش يقدر يحرمنى منه... اتصرف يافريد... بص هو عارف كل حاجة روح له واتكلم معاه هتنازل له عن كل حاجة الا ادم... يعنى هتروح له... هو بيبقى فى المستشفى دلوقتى وبالليل ف العيادة...يعنى اتطمن.. طيب ابقى عرفنى عملت ايه"
قفلت لبنى معاه وقامت مسحت دموعها وغيرت هدوم النوم ولبست بنطلون وبادى
راحت على اوضة ادم ملقيتوش
نزلت شافته بيلعب فى الجنينة مع الدادة بتاعته
وهى رايحة له ع الجنينة عدت من جنب المكتب
افتكرت امبارح والملفات الكتير والدرج اللى سابته مقفول من غير مايتقفل بالمفتاح
الفضول اخدها انها تدخل وتشوف الملفات فيها ايه
دخلت وهى بتقول لنفسها
"ياترى قفل الدرج قبل ما يخرج ولا مخدش باله"
قعدت ع المكتب وفتحت الدرج اتفتح معاها ببساطة
طلعت الملفات وبدأت تبص فيها

نظرات دهشة على وشها لما بدأت تفهم شغل عاصم
بتبص فى الملفات تباعا واللى تخلصه تحطه على جنب
ملف من ضمن الملفات بعد ما حطته مع اللى اتشافوا
مسكته تانى بلهفة وفزع... وقعدت تقرا الملف تانى
ارتبكت وبلا ارادية
"لالالالا مش ممكن للدرجة دى"
وعيطت بهيستريا وهى بتشتم فى عاصم
"ياواطى ياابن الكلب"
مسكت موبايلها بسرعة وهى بتعيط
"حسين... شفت الواطى الزبالة عمل ايه... عاصم سرق كلية حمادة... اتأكد ياحسين وودى ابنك يعمل سونار حالا...ابقى طمنى"
وقعدت تعيط بهيستريا متواصلة
"الله يخربيتك ياعاصم... ربنا ينتقم منك يا حيوان مش ممكن تكون بنى ادم ابدا"

سمر قاعدة فى مكتب عاصم تستناه
شوية تخبط بصوابعها على المكتب وشوية تفرك ايدها فى بعض
التوتر والقلق مسيطر عليها ولما سمعت الباب بيتفتح وعاصم داخل اخدت نفس محاولة للسيطرة على اعصابها والتظاهر بالقوة قدامه
"مدخلتش العملية علشانك اهو"
"المهم هتعمل ايه"
"هنكتب الكتاب زى ماانتى عايزة"
"كويس...امتى"
"عايزين الاول نتفق هنقول ايه لخديجة ولا مش هنقولها"
قعدوا يتكلموا وبعد حوالى ربع ساعة دخلت مريم
"فيه واحد اسمه مرزوق عايزك يادكتور"
"خليه يدخل"
خرجت مريم ودخل مرزوق
"صباح الفل يادكتور"
واتكلم عن علاج فى الاقتصادى وعن تخفيض تكاليف وكان عينه على سمر من غير ماتاخد بالها
حوالى 5 دقايق ومشى مرزوق
"خلاص ياسمر زى مااتفقنا...انا هروح دلوقتى لخديجة واتكلم معاها وانتى اتعطلى شوية علشان عايز اتكلم معاها قبل ما تيجى"
"انا هنزل لشهاب علشان انهى موضوعى معاه"
"ماشى انا هقوم انا اسبقك بعد ماامشى ابقى روحى لشهاب"
قام عاصم...اخد شنطته وخرج من المكتب
راح ناحية مريم وبصوت واطى
"انا رايح العيادة ومش راجع المستشفى النهاردة لو احتاجتينى ف حاجة مهمة كلمينى على تليفون العيادة لانى احتمال اقفل تليفونى"
وخرج عاصم من المكتب
                      ******************
بعد حوالى 5 دقايق نزلت سمر راحت لشهاب
"اتأخرتى ليه...كنت هنا ليه"
"مفيش حاجة ...شهاب انا عايزة اقولك قرارى النهائى"
شهاب قلقان وبيبص لها بقلق من غير ما يتكلم
سمر بتحاول تقول كلامها كله مرة واحدة
"شهاب انا مش هقدر اكمل معاك على الاقل حاليا محتاجة شوية وقت بص طول الوقت ده مش هينفع نتكلم ولا نتقابل"
وثار شهاب
"انتى بتقولى ايه...حصل ايه علشان تقولى كده...عاصم السبب فى كلامك ده صح؟؟"
وارتبكت سمر
"عاصم؟؟ لا عاصم مالوش دعوة"
"احنا كنا لسه بنتكلم اول امبارح عن الحياة اللى هنبدأها مع بعض تيجى النهاردة تقوليلى مش هكمل...قالك ايه عاصم الكلب ده"
"انت بتزعق ليه...مقلش حاجة وده اخر قرار عندى"
خرجت سمر بسرعة... خرجت بسرعة قبل ماشهاب يشوف دموعها... مش مهم يفتكرها مترددة ولا مالهاش كلمة
المهم متتفضحش وبعد كده لما يبقى معاها ورقة جواز رسمى هتقدر ترفع راسها قصاد اى حد

شهاب واقف مكانه مش عارف يتصرف ولا يتحرك...لحظات وقرر انه يلحق سمر علشان يفهم منها

سمر خرجت من بوابة المستشفى ووقفت توقف تاكسى

شهاب حاول يلحقها هو لسه جوه المستشفى وشايفها بره ع الشارع من ضهرها

مرزوق واقف قصاد المستشفى على الجنب التانى جنب موتوسيكل
اول ما شاف سمر... ركب الموتوسيكل وساق بسرعة

سمر واقفة مستنية تاكسى...شايفة موتوسيكل بيقرب منها بسرعة

مرزوق بيقرب من سمر بسرعة... فتح المطواة وهدا سرعته وطعن سمر فى بطنها وزود سرعته وهرب

شهاب شاف موتوسيكل بيقرب من سمر...بعدها سمر بتقع ع الارض

الناس اتجمعت على سمر وشهاب طلع يجرى عليها وامن المستشفى كلهم اتجمعوا حوالين سمر وهى واقعة ع الارض ودمها حواليها
                          *******************
سمر على النقالة وشهاب بيجرى بيها ناحية العمليات وهو بيعيط
كل المستشفى اتقلبت ونداءات لدكاترة المستشفى للحضور للعمليات

موظفة الاستقبال بتعيط وهى بتقول لزميلتها
"كانت لسه خارجة قدامى حالا... دى داخلة العمليات وهى بتموت"

هناك 18 تعليقًا:

  1. بجد بجد بجد يــادينا القصة كل مرة بتشوقينى ليها اكتر من المرةاللى قبلها
    بجد تسلم ايديك

    نورى

    ردحذف
  2. دينـــــــــــــــــــــــــــــــــا كمـــــــان حلقة ربنا يخليكى

    ردحذف
  3. لاااااااااااااااااااااااااااا حرام عليكي
    هولي

    ردحذف
  4. بجد نحفة

    ردحذف
  5. ياربي ده شيطاااااااااااااااان مش ممكن...تعرفي احلي حاجة عاجباني في القصة دي ايه؟؟؟ ان كل شخصياتها معقدة الي حد ما مش شخصيات عادية ..ونا بحب اوي الابداع الللي من الناحية دي
    didi akky

    ردحذف
  6. كل يوم بستنى الحلقه حرام عليكى يا دينا شوقتينى وبتتاخرى علينا بسرعه يا مبدعه الله يخليكى .... امل

    ردحذف
  7. تحفه والله يا دندون بس ابقي طوليها شويه انا متشوقه للي جاي اوووووي

    ردحذف
  8. ايه بس يا دندن القفلات دى لازم تشوقينا كده بس احساسي بيقولى ان سمر هتتكل ع الله وتموت وهيعرفوا الحقيقة من المذكرات وشهاب هو اللي هيقتل عاصم الكلب ده بس ياريت ف النهايه كلهم يموتوا بس ادم لا لان ادم ف حاله وكل سنة وانتم طيبين

    ردحذف
  9. الحلقه بجد تحفه وانا مستنية الحلقه 14 علي نار

    ردحذف
  10. الحلقة بجد رااائعة تسلم ايدك على الابداع ده وبجد شوقتينى للحلقة اكتر واكتر مستنية الحلقة اللى بعدها على ناااار

    ردحذف
  11. حلووووووووة اوي يادينا بجد كان نفسي تخلص هموت واعرف اخرتها ايه :)

    ردحذف
  12. 7lwa kteeer ya dondn :)
    bas bgd samar sa3bana 3alya 2awii :D

    ردحذف
  13. دودو ياريت عاصم ينتحر ومحدش يموته بس ازاى معرفش

    memo

    ردحذف
  14. 7lwa awee :)
    Next PlzzzzzzZz ^-^

    ردحذف
  15. بجد روووووووووووووووووووووعه كملى بسرعه

    ردحذف
  16. تحفه تحفه تحفه زززعشان خاطري الحلقة اللي بعدها بسرعه انتي ضحكتي علينا في حلقة ..بسرعه بقي عايزه اشوف اللي هيحصل

    ردحذف
  17. بجد حلقة جااااااااااااااااامدة جدا تسلمى يادندن

    ردحذف
  18. ana mst8rba lobna w hya bt2ul 3ala 3aseem waty omal heya eh !!

    ردحذف

قول رأيك بلاش تقرا وتقفل من سكات...ارائكم تهمنى