الأربعاء، 18 يوليو 2012

جريمة قتل الحلقة 14

الحلقة 14
اقدام رجل تصعد السلالم والادوار المتتالية
يمشى فى احد الادوار.. يقف امام باب... يخرج من جيبه مفتاح

نرى الباب وبجانبه مكتوب
د. عاصم فواز
جراحة عامة

يد الرجل تفتح الباب بالمفتاح
يدخل ...يفتح النور... يبص فى الساعة
الساعة تدق 7 ... مساءا

يمشى فى العيادة ويفتح الانوار
يصل لاوضة الكشف... يفتح الباب

محتويات المكتب مبعثرة
كرسى من الكرسيين اللى قدام المكتب مقلوب
اباجورة المكتب واقعة ع الارض
الفازة مكسورة وعليها دم
درج المكتب مفتوح
اثار الدم تملا المكان

وجنب المكتب جثة
جثة د.عاصم فواز

يصرخ رشدى موظف العيادة
يطلب النجدة بعد ما يتجمع حنفى البواب وبعض سكان العمارة

العيادة من اول الباب لحد المكتب اللى فيه عاصم كلها مباحث ورجال البحث الجنائى
مفتش المباحث حمدى بسيونى بيعاين المكان
جه عسكرى"وكيل النيابة وصل ياباشا"
دخل محمود يوسف وكيل النيابة وسلم عليه حمدى
"اهلا محمود بيه"
"ازيك يا حمدى بيه"
"بخير الحمدلله"
"ايه الحكاية"
"د.عاصم صاحب العيادة مقتول فى اوضة الكشف...اللى اكتشف الجثة رشدى الموظف ... سلاح الجريمة الطبنجة دى ... المكتب زى ماسعادتك شايف مقلوب مما يدل على مقاومة اثناء القتل..الطب الشرعى بيقول ان الوفاة كانت فى حدود من 5ل6 ... اخد 3طلقات... والبحث الجنائى شغال "
بص محمود على الجثة ... وصرح بنقلها للطب الشرعى

لبنى قاعدة فى الفيلا...بتتصل بفريد تليفونه مقفول
"ايه الغباء ده مش يطمنى عمل ايه ولا حصل ايه؟؟اففف عليك يافريد مش مقدر ابدا اللى انا فيه"
بتعيد الاتصال وكل مرة التليفون مقفول
الساعة بتدق 8 مساءا وجرس الباب بيرن
فتحت الشغالة... ظابط و2 عساكر

فى مكتب حمدى مفتش المباحث
"ها ... احكى يا رشدى اللى حصل بالظبط"
"ياباشا انا جيت ف معادى زى كل يوم فتحت ودخلت وكانت كل حاجة عادية ولما وصلت لاوضة الكشف شفت المنظر البشع ده بس ده كل اللى حصل"
"هو القتيل متعود انه يكون موجود فى العيادة فى الوقت ده"
"الدكتور ساعات بييجى فى العيادة بدرى وساعات بييجى متأخر حسب العمليات اللى وراه"
"ملاحظتش اى حاجة غريبة وانت داخل"
"لا بقول لسعادتك كانت كل حاجة طبيعية والنور مطفى والباب انا فاتحه بإيدى"
"طيب لو افتكرت اى حاجة تانية قولهالى"
"حاضر ياباشا"
وشاور له حمدى بالانصراف... خرج رشدى
ودخل المكتب تامر المساعد بتاعه
"مرات القتيل وصلت ولسه متعرفش حاجة"
"عملت عنها تحريات"
"بتتعمل وكلها كام ساعة وتكون التحريات هنا"
"وهات لى بيان من شركة الموبايل بمكالمات عاصم"
"حاضر"
خرج تامر...بعدها دخلت لبنى وهى برتجف من الخوف
"اتفضلى يامدام لبنى"
"هو فيه ايه؟؟؟انا هنا ليه "
"انا اسف فى اللى هقوله... د.عاصم اتقتل فى عيادته"
قالها حمدى وسكت وهو بيراقب رد فعلها
لبنى سمعت الجملة دى... لحظات سكوت وبعدين عيطت
"اتقتل؟؟؟ازاى؟؟ ومين اللى قتله"
"ماهو ده اللى هنعرفه منك"
"انا؟؟ انا معرفش وماليش دعوة بحاجة"
"اهدى يامدام احنا بس عايزين نعرف منك خلافاته اعدائه يعنى كل حاجة تعرفيها"
وبدأت لبنى تسكت وتهدا وفتحت شنطتها
"ممكن ادخن"
شاور لها حمدى بايده بمعنى اتفضلى
ولعت لبنى سيجارة ومسحت دموعها وبدأت تتكلم
"انا معرفش حاجة عن شغل عاصم من ساعة مااتجوزنا واحنا سافرنا ايطاليا ولسه راجعين من سنة... اول ماجينا فتح عاصم المستشفى وبعدين العيادة... مكنتش اعرف حاجة عن شغله لحد امبارح بالليل"
سكتت لبنى وهى سرحانة وبتفتكر المكالمة
اتعدل حمدى ومال لقدام على المكتب
"ها ...امبارح بالليل حصل ايه"
"كان داخل بيتكلم فى التليفون وسمعته بيقول لواحد العمليات والقلب غير الكلية واتكلموا فى فلوس"
"كان بيكلم مين"
"معرفش"
"طيب كنا الساعة كام"
"1تقريبا"
"كملى"
"قاله حولى 300الف جنيه وابعتلى 100كاش"
"يبعتهم امتى...النهاردة مثلا"
"معرفش"
"ها وبعدين"
"وبعدين خفت من الكلام وشفت عاصم طلع ملفات وقراهم واتكلم عن العمليات وقفل...انا خفت وطلعت قبل مايشوفنى"
خلصت سيجارتها... ولعت سيجارة تانية وهى متوترة
"لما طلع ونام كان الفضول قاتلنى انى افهم...اتسحبت ونزلت اشوف ايه الملفات دى"
حمدى بيسمعها وبيركز مع كل كلمة بتقولها
"فتحت شنطته اخد المفاتيح شفت معاه مسدس... وبعدين سمعت صوته رجعت المفاتيح تانى بعد ماكنت فتحت الدرج وقفلته من غير المفتاح... النهاردة الصبح روحت اشوف الدرج فى ايه"
وعيطت بصوت عالى... بكاء ونحيب متواصل
ضغط حمدى على الجرس وطلب من العسكرى كوباية مياه
جاب العسكرى المياه وكانت لبنى لسه بتعيط... شربت شفطة وسابتها...رجع حمدى لورا وهو بيقولها
"كملى... الملفات فيها ايه"
"لقيت اسماء وتواريخ عمليات... كلها بتقول ان اللى بيحصل سرقة اعضاء ... حتى الاطفال مسلموش منه"
وصرخت لبنى وهى بتعيط
"ربنا انتقم منه...ربنا انتقم منه"
سكت حمدى شوية مستغرب انهيارها على سرقة الاعضاء اكتر من عياطها لما عرفت ان جوزها مات
"انتى تعرفى حد من اللى عمله العمليات"
وعيطت لبنى
"ابن اخويا... دخل يعمل الزايدة سرق كليته الواطى معدوم الضمير"
"وايه اللى سكتك؟؟ مبلغتيش ليه"
"كل ده كان النهاردة...انا اتصلت باخويا وقلتله يعمل سونار لابنه ويتأكد"
"وبعدين رد فعله كان ايه"
"كان مش مصدق... اخد ابنه وعمل السونار فى مستشفى الجامعة فى المنصورة وكشف عليه اكتر من دكتور واتأكد فعلا ان الكلية اتسرقت فى العملية"
كانت بتعيط وتسكت بصعوبة علشان تكمل كلامها
"واخوكى فين"
وانتبهت انها ممكن بكلامها ده تكون ورطت حسين
"اخويا فى المنصورة... ومالوش دعوة بحاجة"
وبنظرة ريبة
"ماشى انا بسأل يعنى عمل ايه بعد كده"
"معرفش... رجع البيت وزعلانين طبعا هو ومراته"
"تفتكرى لو انتى مكانه كنتى عملتى ايه"
"معرفش"
"يعنى كان هيبلغ ولا لا"
"اكيد... بس ملحقناش"
"وهو برضه كان هيبلغ عن جوز اخته"
"اكيد... مفيش اغلى من الضنا"
"طيب يامدام تقدرى تتفضلى بس لو افتكرتى اى حاجة ياريت نعرفها على طول... بالمناسبة هو القتيل مالوش قرايب"
"له واحدة قريبته هنا فى القاهرة تبقى بنت عمته وبنتها كانت السكرتيرة بتاعته فى المستشفى والعيادة"
"تمام ...ممكن عنوانها"
ادالها ورقة وقلم تكتب العنوان
"انا معرفش هما ساكنين فين...وهى سابت الشغل مع عاصم"
"ليه؟؟"
"اتخطبت"
"اوك... اتفضلى واحنا هنعرف نوصلها"
                            *******************
دخل تامر المكتب
"المعمل الجنائى رفع البصمات... العيادة عامة واوضة الكشف خاصة كلها بصمات كتير"
"طبيعى ياتامر دى عيادة وبيدخلها كتير... بس اهم حاجة الطبنجة عليها بصمات مين غير عاصم هى دى اللى هتحدد"
"الطبنجة مش عليها بصمات خالص"
"امممم يعنى القاتل مسح البصمات من عليها "
"بس الغريب هو ساب اداة الجريمة ليه"
"الطبنجة بتاعة عاصم وده اللى شهدت بيه مراته"
"اااااااه معنى كده ان القاتل لو كان لابس جوانتى كانت فضلت بصمات عاصم على الطبنجة"
"بالظبط... وسع تحرياتك شوية وعايز اعرف  تفاصيل عن شغل القتيل"
"تمام ياباشا"
"يالا بينا ع المستشفى بتاعته... واستعجلى تحرياتك شوية وابعت استدعيلى اخو لبنى هنا"

فى العناية المركزة... سمر نايمة ومحطوط لها خراطيم متصلة باجهزة
شهاب بيبص عليها ورجع على مكتبه...اللى كانت قاعدة فيه خديجة
"ايه يابنى طمنى"
"خير ان شاءالله"
"هو عاصم فين مجاش ليه يشوف سمر ولا يطمن عليها... هو محدش قاله"
"مش عارف والله"
"انت مكلمتوش"
"لأ"
وعيطت
"ياحبيبتى يابنتى... نفسى اعرف مين اللى عمل فيها كده"
"اهدى بس... قومى انتى روحى ومتقلقيش عليها انا مش هسيبها"
"اروح واسيب بنتى؟؟معقول"
"انا مش هسيبها وهى فى العناية المركزة يعنى مش هتقدرى تعمليلها حاجة"
"برضه اكون جنبها"
"طيب براحتك... هخليهم يشوفوا لحضرتك اوضة تباتى فيها"
خبط جامد على مكتب شهاب
دخلت وهى بتعيط... شهاب وخديجة اتنفضوا يكون حصل حاجة لسمر
"ألحق يادكتور شهاب... د.عاصم اتقتل فى عيادته وفيه ناس من المباحث هنا وبيسألوا على عنوان سمر"
خديجة وشهاب بيبصوا لبعض فى اللحظة اللى دخل فيها حمدى وتامر مكتب شهاب
وبعد ماعرفوا نفسهم لشهاب
شهاب"هو صحيح د.عاصم اتقتل"
حمدى"اومال احنا جايين نهزر"
شهاب"مقصدش انا فاكر حضرتك تبع المحضر بتاع الضهر"
خديجة بتعيط"ياعينى عليك ياعاصم... الله يرحمك يااخويا"
بص لها حمدى...فقدمها شهاب
"الحاجة تبقى قريبة د.عاصم "
حمدى"اااه والدة سمر ... ايه حكاية سمر بقى"
خديجة"حكاية ايه انا بنتى مرمية بين الحياة والموت وبتقولى حكاية"
حمدى"يعنى مينفعش استجوابها"
شهاب"لا يا فندم مينفعش حالتها الصحية لاتسمح...اؤمرنى حضرتك"
حمدى"انت مساعد القتيل...هيبقى لنا كلام كتير مع بعض... الناس هنا فى المستشفى بيتكلموا بسرعة الصاروخ وبيقولوا من غير ما يتسألوا"
وبلع شهاب ريقه بصعوبة وهو بيبص لحمدى وخديجة
حمدى"ممكن نروح مكتب د.عاصم ونتكلم شوية"

فى مكتب عاصم
حمدى قعد وتامر جنبه على كنبة كبيرة فى المكتب... وشهاب جنبهم على كنبة صغيرة
"انت بتشتغل ايه هنا يادكتور بالظبط"
"انا دكتور تخدير ومساعد دكتور عاصم ومدير القسم الاقتصادى"
"ماشاءالله شكلك صغير...بس اكيد شاطر علشان كده وصلت لكل ده"
ارتبك شهاب ودارى ارتباكه بابتسامة مالهاش اى معنى غير انه يعمل نفسه اخد الكلام كإطراء
"كنت بتحضر كل عمليات د.عاصم"
  غ غالبا"
"طيب تمام يعنى عندك علم بشغل تجارة الاعضاء"
وقام شهاب وقف وانفعل
"اعضاء ايه.... لالا معرفش حاجة... انا اصلا كنت هسيب الشغل هنا فى المستشفى لان جالى عقد عمل وكنت مسافر"
"وكنت هتسيبه امتى؟؟"
"يعنى لما اخلص اجراءات السفر واتمم جوازى من سمر"
بص حمدى فى ساعته
"طيب يادكتور... هنتأكد من كل حاجة... بس سؤال قبل مانمشى"
"انت كنت فين النهاردة من 5ل7"
"ده اتهام حضرتك؟؟"
"يا سيدى بندردش مع بعض"
"انا كنت هنا فى المستشفى"
وقام حمدى ومعاه تامر معاه...وخبط على كتف شهاب
"هنكمل بكرة ياريت تكون موجود"
"موجوج يافندم ..انا بايت الليلة هنا"

نزلوا تامر وحمدى وهما بيركبوا عربية حمدى
"الدكتور ده كلامه مرتبك وشكله بيكدب ياحمدى بيه"
"واضح طبعا"
"تفتكر هو القاتل"
"لسه بدرى على ما نتأكد... انا هروح البيت واجى بكرة بدرى... لسه  قدامنا استجواب السكرتيرة اللى جت مكان سمر وحنفى بواب العمارة بتاعة العيادة واما نشوف عاصم كان بيكلم مين فى حكاية الاعضاء دى... والتحريات بتاعتنا هتوضح لنا اكيد حاجات منعرفهاش ...لسسسسه مشوارنا فى القضية دى طويل"


هناك 21 تعليقًا:

  1. الحمد لله انه راح في داهيه بس تقريبا اخو لبنا

    ردحذف
    الردود
    1. حاسه انه فريد

      جى جى

      حذف
    2. وانا حاسه انه شهاب

      حذف
    3. انا حاسة انه مرزوق

      حذف
  2. جاااامده جدا تسلم ايديكي

    ردحذف
  3. مريوووووووووووووم18 يوليو 2012 10:50 م

    ممكن فريد القاتل مدام تليفونوا مقفول بس بجد الحلقة جميلة و مستنية الحلققة الجاية بتشويق اعرف مييييييييين القاتل بجد بجد بحيكي كتابتك رائعة

    ردحذف
  4. ايه كل الاحداث السريعه دي
    انا حاسس ان الشريط بيسف :)
    لو كانت الاحداث ابطئ من كدا شويه
    كان هايبقي افضل يا دينا
    الواحد علشان يترجم الاحداث دا لازم يقرا الحلقه مرتين علي الاقل
    المهم هيه حلقة جامدة جدا
    ومنتظر الباقي بأسرع وقت
    وكل سنة وانتي طيبة بمناسبة شهر رمضان الكريم
    اعادة الله علينا وعليكي باليمن والبركات

    ردحذف
  5. مظنش انه فريد فريد يمكن قفل موبايله من بعد ما كلمها عشان يشتري دماغه هو غالبا اخو لبنى

    ردحذف
  6. عندى احساس انه حسين اخو لبنى هو اللى قتل عاصم


    نورى

    ردحذف
  7. انا حاسة ان القاتل هو مرزوق يمكن اختلف مع عاصم فى الماديات بعد ماضرب سمر و كدة فقتله
    ربنا يستر يا رب
    اللى جاى احلى هههههه
    ماشاءالله عليكى مبدعة درجة اولى
    رمضان كريم عليكوا جميعا ربنا بلغنا رمضان سنوات عديدة و اعمار مديدة

    ردحذف
  8. ممكن تكون خديجه بعد ما قرات مذكرات لبنى ... بس بجد حلقه تحفه ورائعه والنبى يا دينا الحلقات الباقيه بسرعه وكل سنه وانتى طيبه ...... امل

    ردحذف
  9. جميله اوووى الحلقه تسلم ايدك

    ردحذف
  10. Fareed Sure ! Btw l 7ala2a Wahm ya Dina Astamere bgd

    ردحذف
  11. عارفين هيطلع مين في الاخر هيطلع شهاب او اخو لبني بس انا احساسي بيقولي انه شهاب معرفش ليه

    ردحذف
  12. غالبا كده هيبقى وليد والله اعلم يعنى

    ردحذف
  13. بجد الحلقة حلووة اوى تسلم ايدك يا دينااا بجد انا ادمنت قصصك خلاااااص مبقاش يعدى عليا يوم غير لما اقرالك قصة واخلصها كمااان انتى هايلة بجد

    مها اسماعيل

    ردحذف
  14. 7lwa 2awiiii bgd w Dr.3asem dah yastahl bas meen 2lly 2atalo ba2a ??!

    ردحذف
  15. شاكك انها ام سمر !!

    ردحذف
  16. الفاتل هههو فريد

    ردحذف
  17. انا حاسة انو فريييييد

    ردحذف
  18. قصصك حلوة اوي يا دينا ربنا مديكي موهبة خياااالية

    ردحذف

قول رأيك بلاش تقرا وتقفل من سكات...ارائكم تهمنى