الجمعة، 27 يوليو 2012

كان حلم... الحلقة 3

الحلقة 3
وقف ماجد مش عارف نغم مش بتقوم ليه
جرى عليها وف نفس الوقت كان بعض الموجودين لاحظوا وقعتها
واتجمعوا عليها....محاولات افاقتها باءت بالفشل
ماجد بيحاول يفوقها بكل الحاح...مفيش فايدة
مصطفى واقف وسط الناس ومستغرب لهفة ماجد على نغم
ردود الافعال سريعة والتصرفات اسرع...ماجد اتصل بالاسعاف
وقبل ماالاسعاف ييجى عرَض واحد من رواد النادى انه يوديها المستشفى بعربيته اسرع

شالها مصطفى وماجد ونيموها فى العربية
وركبت معاها واحدة من اولياء امور الاطفال اللى كانت بتدربهم نغم

وقف ماجد ومصطفى بيبصوا على العربية وهى ماشية
ماجد"احنا هنسيبها كده"
مصطفى"احنا مالنا ياماجد"
ماجد"انت ايه مش زميلتنا... واللى راحت معاهم دول ناس اغراب"
مصطفى"نعمل ايه طيب"
ماجد"انت لسه هترغى...انا رايح لهم المستشفى"
مصطفى"وانت عارف هيروحوا مستشفى ايه"
ماجد"سمعت الست بتقول نوديها مستشفى الرحمة علشان اقرب مستشفى"

وصل ماجد ومصطفى المستشفى
وهما على السلم شافوا اللى وداها بعربيته نازل
ماجد"سلام عليكم يااستاذ...هى كابتن نغم فاقت"
الرجل"لا هما اخدوها فى الطوارئ وودوها على الرنين المغناطيسى"
ماجد رد بسرعة"متشكرين"
طلع ماجد ومصطفى وراه...ماجد بيسأل فى الاستقبال عن مكان الرنين...وصف له الموظف المكان
ماجد بيهرول ومصطفى وراه
شده مصطفى من دراعه
"ماتقف هنا وفهمنى...مالك ملهوف عليها كده ليه"
"صعبانة عليا يامصطفى ...بلاش؟...وياسيدى لو انت مستعجل ولا وراك حاجة اتفضل انت انا مغصبتكش تيجى معايا"
"ايوه انا ورايا شغل ...انا راجع النادى"
رجع مصطفى وكمل ماجد طريقه
                  ***************
لما وصل ماجد للدور اللى فيه الرنين المغناطيسى
شاف الام وبنتها اللى جت مع نغم
اول ماشافت ماجد راحت عليه
"ياكابتن"
"نعم"
"دى شنطة كابتن نغم اللى كانت معاها لما وقعت انا طلعت الموبايل واتصلت بباباها...معلش خلى الحاجة معاك انا لازم امشى"
ومد ماجد ايده ياخد الشنطة..واتردد
"ممكن حضرتك تسيبيها تحت فى الاستقبال لانى همشى دلوقتى"
"اوك اللى يريحك"
نزلت الام وبنتها...وفضل ماجد واقف وهو قلقان
بعد ربع ساعة شاف الممرضين خارجين بنغم على السرير
وهى زى ماهى فاقدة الوعى
هم انه يروح يسأل الممرضات...لقى 2 بيجروا ناحية نغم وهما بيقولوا "بنتى...بنتى"
فهم ماجد ان دول اهل نغم...فضل واقف يراقبهم من بعيد
خاف يقرب يسألوه ايه اللى حصل
كل مابيفتكر ايه اللى حصل وانه السبب ...بيخاف
مشى ماجد وراهم من بعيد...لحد ماشاف الممرضين بيدخلوا نغم "العناية المركزة"
لما شاف واحدة من الممرضات خارجة...راح ناحيتها
"لو سمحتى هى الانسة اللى دخلتوها من هنا مالها"
"انت تعرفها"
"لالا هى بس صعبت عليا"
"هو لسه الدكتور مشفش نتيجة الاشعة بس شكلها كده دخلت فى غيبوبة"
"غيبوبة؟؟ليه؟؟"
"الناس اللى جابوها بيقولوا وقعت على دماغها"
"وهى مجرد وقعة تعمل كده"
"امر ربنا...بعد اذنك يااستاذ"
مشيت الممرضة وسابته واقف...خاف يهتم اكتر من كده حد يعرفه... فمشى من المستشفى خالص

دخل ماجد البيت... سمع صوت مامته ونشوى فى المطبخ
دخل على طول على اوضته وقفل عليه
سمع صوت نشوى بتقول
"اه والله ياماما سمعت صوت الباب...باين ماجد جه"
الصوت بيقرب من الاوضه...الباب بيتفتح
"انت جيت؟؟مالك فى ايه"
ماجد بيرد وهو مهموم وحزين
"مفيش حاجة"
"انت مش بيبقى عندك شغل دلوقتى"
واترددت كلمة شغل فى دماغ ماجد
"شغل... اه صحيح...المفروض اكون فى النادى مش فى البيت.. انا ايه اللى لخبطنى كده... وبعدين لو حد لاحظ غيابى يقول ايه"
نشوى"ماجد...ماااااااااجد...ايه مالك مبتردش ليه"
ماجد"مفيش يانشوى"
وقام رايح ناحية الباب...قابل مامته قبل مايوصل للباب
"مالك ياماجد"
"مفيش"
خرج بسرعة ورزع الباب وراه قبل مايسيب مجال للاسئلة من مامته او نشوى
وقفوا الاتنين يبصوا لبعض بعد ماجد ماخرج
الام"هو فيه ايه"
رفعت نشوى كتفيها وهى بتقولها"الله اعلم"

نغم نايمة على السرير ومتوصلها اجهزة كتير
مامتها وباباها حواليها...الام بتعيط بصمت متواصل
والاب كل شوية يقول
"لاحول ولا قوة الابالله... استغفر الله العظيم...قدر الله وماشاءفعل"
وكأنه بيصبر نفسه وبيصبر مراته بذكر الله

دخل الدكتور ومعاه ممرضة
الاب"طمنى يادكتور...بنتى مالها"
الدكتور"بصراحة وضعها صعب جدا الخبطة جت مباشرة فى المخ وفيه شرخ بسيط فى الجمجمة بس هيلتئم مش ده اللى يقلق"
الام بدموعها"لو كل ده ميقلقش اومال ايه اللى يقلق"
الدكتور"اولا الغيبوبة اللى دخلت فيها دى محدش يعرف هتفوق منها امتى"
الاب"لا حول ولا قوة الا بالله... الصبر من عندك يارب"
صوت بكاء الام كان اعلى ...طبطبت عليها الممرضة
كمل الدكتور"خلى املكم فى الله كبير ممكن تفوق بعد ساعات او ايام محدش عارف...اللى يقلق اكتر ان الخبطة كانت قريبة اوى من مركز الذاكرة فى المخ"
الاب"وده معناه ايه"
الدكتور"ولا نقدر نعرف غير لما تفوق ونعرف الخبطة اثرت ولا لأ"
الام"ياحبيبتى يابنتى...كان مستخبي لنا فين ده كله"
الممرضة"ادعيلها ياحاجة...بس معلش ربع ساعة واتفضلوا لان دى عناية مركزة ومينفعش فيها القعدة دى"

ماجد بقية اليوم وهو قاعد متضايق ولغى كل التدريبات
احساسه بالذنب بيوجعه وضميره بيأنبه
"بس انا مكنتش اعرف ان هيحصل كده"
التوتر ساد فى النادى كله لما عرفوا ان نغم فى غيبوبة
اخر اليوم بالليل بعد ماخرج ماجد من النادى
سرح وهو بيفكر فى اللى حصل...فضل ماشى لحد ماوصل المستشفى... دخل من الباب الرئيسى وراح عند العناية المركزة
جه ناحيته واحد من الممرضين
"حضرتك بتدور على حاجة"
"اه واحدة قريبتى هنا"
"ممنوع يااستاذ اتفضل دلوقتى وتعالى بكرة فى الزيارة"
طلع ماجد من جيبه 20 جنيه وحطها فى جيب الممرض
"مش هينفع اجى وقت الزيارة انا مش هطول ابص عليها بس"
ابتسم الممرض وهو بينقل ال20 جنيه من جيب البالطو الابيض لجيب البنطلون
"اه فهمت... طيب انا هدخلك دقيقتين بس اسمها ايه"
"نغم اسماعيل"
"دى ف غيبوبة يااستاذ مش هتحس بيك"
"معلش دخلنى ليها بس... بقولك ايه متعرفش حالتها ايه بالظبط"
"والله يااستاذ بيقولوا حالتها خِطرة وصعبانة ع الكل اصلها لسه صغيرة"
كان بيتكلم وهو ماشى وماجد ماشى وراه
وصلوا عند نغم
"انا هخرج اقف بره علشان لو حد جه اخليك تنزل من السلم التانى"

خرج الممرض...بص ماجد على نغم وهى نايمة
دموعه نزلت غصب عنه... قرب منها
مفيش صوت غير صوت الاجهزة
بصوت واطى ومسموع بدأ يكلمها
"سامحينى يانغم... والله ماكنت اقصد كل كده... انا اسف"
اتمنى انها ترد عليه وتقوله انها سامحته
بس كانت كل حاجة زى ماهى نفس صوت الاجهزة
فتح الممرض الباب
"يالا يااستاذ احنا اتفقنا على دقيقتين"
مسح ماجد دموعه وخرج ورا الممرض

دخل ماجد البيت ... حمد ربنا ان مامته مش قاعدة
والبيت كله هادى ومطفى ماعدا نور اوضة نشوى
فهم ان مامته نامت واكيد نشوى مش هتسمعه وهو داخل
دخل اوضته...غير هدومه وحدف نفسه على السرير كأنه بيرمى عليه همومه
فضل نايم وعينه على السقف وكأن السقف شاشة عرض بتعرض احداث اليوم...الدموع نازلة من جنب عينيه على المخدة
"معقول انا عملت كده...ليه ؟؟وازاى قدرت افكر كده"
ميعرفش هو فضل كده قد ايه... هو صحا من النوم بعد غفلة بسيطة على صوت خبط عالى على الباب
قام من النوم... خرج من اوضته
مامته على باب اوضتها ...صحيت على صوت الخبط
نشوى على باب اوضتها... قامت على صوت الخبط
ماجد بيفتح الباب... لقى قدامه ضابط وعساكر
قبل ما يسأل فاجئه الظابط
"فين ماجد عبد السلام"
وبصوت خايف رد ماجد
"انا"
شاور الظابط للعساكر
"اقبضوا عليه"
ماجد"ليه"
الظابط"انت متهم بقتل نغم اسماعيل فيه شاهد شاف الواقعة"
ماجد"قتل!!! هى ماتت؟؟"


هناك 27 تعليقًا:

  1. واضح كده ان الجزء الاخير حلم ولما يصحى هاتكون هى كويسه

    ردحذف
  2. اكيد حلو بس الحلقه حلوه اوووووووووووووووووووي بجد انتي كل كتباتك تحفه

    ردحذف
  3. لالالالالالالا يارب يكون حلم .. please خليه يطلع حلم يا دودو D: .. الحلقة رائـــــعة ووصفك للمشاهد اروع .. مستنية الحلقة الجاية بفاااااارغ الصبر
    ميما من العراق

    ردحذف
  4. تسلم ايديك يا دندون على الحلقه وربنا يستر فى اللى جاى

    ردحذف
  5. تحفه بجد تسلم ايدك

    ردحذف
  6. لا لييييييييييه كده هى ماتت لا حرام انا بدأت اكره اللى اسمه ماجد دة

    ردحذف
  7. mariom معجبة بحضرتك27 يوليو 2012 في 1:59 ص

    لالالا و النبي خليها حلم بلييييييز لازم يكون حلم مش هكمل لو مش حلم خليها حلم بقا عالفكرة القصة روعة و شكله حلم من العنوان كان حلم

    ردحذف
  8. 2atl :O :O La2 ya Dinaaa pllllz 5aleha 7elm :( bas el qesa 7elwa awiii w feha tashweeek

    ردحذف
  9. يانهااااااااااااااار لا يادينا مش كدا حرام عليكي اكيد مش ماتت فعلا اكيد ده هو كان بيحلم ربنا يستررر
    دودو

    ردحذف
    الردود
    1. والله العظيم نغم مش هتمووووووووووووووووووووووووووووت واراهن

      حذف
  10. Akeed 7elm Saaa7 ! 2ule Eno 7elm ya Dinaaa ! Har Asweeeeeeeeeed Na3'am Matmoutsh w Na l kunt ba2ol hatb2a Qesset 7ob Msha3lelaaa :/:/



    Menna

    ردحذف
  11. لالالالالالالالا قتل لا
    دا حللللم
    لالالالالالالالالالا مش عايزين دراما و مأسااه و الجو دا :/

    ردحذف
  12. قتللللللللللللل ؟؟

    اكيد بيحلم

    بس بجد كل اللى شوفته ليكى عاجبنى اوى بجد انتى مبدعه يادينا

    ردحذف
  13. Qatl a salo 3l Naby :/
    A ya DanDan ht3mlY zay mosalsalat Ramadan w tmawety el nas mn awel kam 7al2a wla aaaa :D
    La hytla3 7elm Bs ekmno mDay2 w byQanb Damero :)
    Waitin ;)  

    ردحذف
    الردود
    1. عليه أفضل الصلاة و السلام :)

      جميله جدا دينا بجد قصص كلها حلوة أوي :)
      منتظرة الحلقة الجديدة بفارغ الصبر (^__^)

      حذف
  14. ده حلم ان شااااااااااااااااااءالله
    didi makky

    ردحذف
  15. القصه باين عليها حلووووووة اوى ياريت تكملى بسرعه على فكرة انا قريت كل قصصك اللى فى المدونه كلها فوق الوصف وتجنن ربنا يوفقك

    ردحذف
  16. لا والله دة كاااان حلم :) هههههههه
    انا حاسة ان المسلسل هيبقى كله حلم و يصحى على رحلة شرم مش عارفة ليه :]y

    ردحذف
  17. دينا ارجوكى هو لسة قد اية ع الحلقة الرابعة ؟!؟!؟

    ردحذف
  18. 7lwa 2awiiiiiiii ... bas howa yasthal dah 8las 2awi :((

    ردحذف
  19. مركز الذاكرة يقع فى الفص الجبهى للمخ مش فى الخلف من المخ
    هوا حركة المخ ذات نفسهى هيا الى ممكن تسبب فقدان الذاكرة و اثر الخبطة
    لكن مش علشان هيا وقعت على مؤخرة الرأس تكون قريبة من مركز الذاكرة

    ردحذف
  20. لا بجد هموت واعرف الحلقه الاخيرة لان شكله كده هيطلع بيحلم وحاسه ان هو لسه مش يعرف نغم وهيصحى يروح النادى يلاقى نغم هناك اول يوم تشتغل فيه

    ردحذف
  21. جميله جدا

    ردحذف
  22. يا خبر :O

    ردحذف

قول رأيك بلاش تقرا وتقفل من سكات...ارائكم تهمنى