الأربعاء، 11 يوليو، 2012

جريمة قتل الحلقة 9

الحلقة 9
جريت سمر ورا عاصم اول ما خرج من الاوضة
"انا اسفة... والله ما عايزة ازعلك بس انت كمان حس بيا"
وبنفس نبرة الصوت العالى
"احس اعمل ايه اكتر من كده... جبتلك شقة وبقولك هكتبهالك...ومستنى احل المشاكل اللى هتقابلنا وانتى ولا بتحسى خالص وكمان هتعيطى وتقوليلى لآ ولما نبقى نتجوز... ماانا مستنيتش وبعاملك على انك مراتى من دلوقتى"
قالت وهى بتمنع نفسها من العياط
"خلاص ياعاصم...انا اسفة بس متزعقش علشان خاطرى"
وبصوت اهدا
"بصى ياسمر... انا محبش مراتى تعارضنى هتمشى على طبعى ماشى مش هتقدرى قولى من دلوقتى ويادار ما دخلك شر"
"انا اسفة ياعاصم... انا والله مش طبعى انى اعارض بس خايفة"
"يووووووه هنرجع لنفس الكلام تانى"
"خلاص خلاص...متزعلش نفسك ومتزعلش منى"
لما شافها بتعيط... وحس انها بقت جاهزة للطاعة العمياء
قرب منها وبكل رقة وحنان مصطنع حضنها
"متزعلينيش منك تانى... ولما اقولك حاجة اوعى تعارضينى فيها علشان مزعلش منك"
"حاضر"
"يالا ادخلى اغسلى وشك وتعاليلى"
وراحت سمر ناحية الحمام... وقبل ما تدخل طلع شريط من جيبه
"سمر... ابقى خدى كل يوم حباية من الحبوب دى"
"ايه دى"
"دى حبوب منع الحمل...مش عايزين يحصل حاجة مش مستعدين لها"
"حاضر"

لبنى فى اوضتها ...قاعدة على السرير بتتفرج على مجلة ازياء
رن موبايلها
"الو... ازيك يا حسين... وازى ماما ومايسة .. ايه؟؟ازاى ؟؟امتى؟؟ الف سلامة عليه... طيب هكلم عاصم اسأله وارد عليك... حاضر ...حالا طبعا..سلام"
قفلت مع حسين واتصلت بسرعة بعاصم
"الو... ايوه ياعاصم انت فى العيادة؟.. حسين اتصل بيا وبيقول ان حمادة تعبان ولما راح للدكتور قاله انها زايدة.. بيقولك ترشحله حد كويس يعمله العملية.. بجد؟؟ حاضر هقوله... هكلمه وارجع اكلمك تانى... سلام"
وقفلت مع عاصم واتصلت بحسين
"ايوه ياحسين... عاصم بيقولك هات حمادة دلوقتى على المستشفى بتاعته وهو بنفسه هيقف معاه فى العملية... عادى ياحسين مش متأخر ولا حاجة وعلى ماتوصل القاهرة يكون عاصم خلص العيادة... يالا متتأخروش هو قال هيكلم المستشفى وهيحضروا كل حاجة... انا كمان هسبقكم على هناك... لو حصل انى اتأخرت وانت وصلت قبلى بيقولك اسأل على دكتور شهاب... حاضر ياحسين شوية وهروح ...هستناكم هناك...يالا مع السلامة"

وصلت لبنى المستشفى وراحت على مكتب عاصم
شهاب كان قاعد على مكتب سمر
"مساءالخير"
"اهلا وسهلا... ازيك يامدام... انا شهاب لو حضرتك فاكرانى اتقابلنا يوم الافتتاح"
"اهلا يادكتور... هو عاصم مجاش"
"لا لسه بس كلمنى  وحضرنا احسن سويت فى المستشفى ... تعالى اتفضلى فى مكتب د.عاصم"
دخلها شهاب مكتب عاصم... قعدت
"تحبى ابعت لحضرتك ايه؟"
"ولا حاجة ميرسى"
"طيب بعد اذنك"
خرج شهاب من المكتب... طلعت لبنى علبة السجاير والولاهة قدامها والموبايل... بصت فى الموبايل الساعة كانت 12بالليل
ولعت سيجارة واتصلت بحسين
"الو ...ايه ياحسين اتأخرتوا ليه... وصلتوا... طيب انا موجودة اطلعوا على مكتب عاصم...مع السلامة"
وصل حسين ومايسة وحمادة...ومعاهم مامة لبنى
كان الاهتمام سريع بحمادة وتحضيره للعمليات
                        *****************
خلصت العملية الساعة 4 الفجر
لبنى"يالا ياماما...قومى نروح ونبقى نيجى بكرة"
الام"مش لما نطمن على ابن اخوكى"
لبنى"هو فاق اهو بس لسه تعبان بكرة نبقى نيجى نطمن عليه...يالا ياحسين"
مايسة"لا خليك معايا ياحسين يمكن نحتاج حاجة"
لبنى"اطمنى يامايسة اى حاجة هتحتاجيها هنا هتلاقيها والدكاترة كلهم عارفين ان حمادة قريب صاحب المستشفى يعنى معاملة واهتمام خاص"
مايسة"معلش برضه.. خليه معايا"
لبنى"براحتكم...يالا تصبحو على خير وهجيلكم بكرة ان شاءالله"
                       **********************
فى نفس الوقت فى مكتب عاصم
عاصم قاعد مع شهاب وماسكين التحاليل
وبضحكة سعادة
"حمادة ده جالنا فى الوقت المناسب"
"فعلا ...التحاليل والانسجة ملائمة تماما"
"جدااا... بقولك ايه خد رقم سكرتير الشيخ عبدالله واتصل بيه قوله لازم يجيب ابنه ويكون هنا فى اقرب وقت"
"حاضر"
"قوله لو حتى ياخد طيارة خاصة وييجى...احنا ماصدقنا ان لقينا كلية مناسبة لابنه وده زبون جامد ومتوصى عليه من الجماعة بتوع ايطاليا"
"هههههه ربنا كبير يادكتور... فرجها فى الوقت المناسب... بس يعنى ده قريب المدام وممكن تزعل لو عرفت"
"وهى ايه اللى هيعرفها... الواد صحته كويسة وكده كده احنا عملنا الزايدة فعلا...وهنوريهالم يبقى اى حاجة تانية مش مسئوليتنا"
"تفتكر لو عرفوا ممكن يبلغوا"
"تفكيرك بيروح لبعيد اوى يا شهاب... كبر مخك بقى واللى يقدر يثبت علينا حاجة يثبتها... ده لافيه فاتورة هتتدفع ولا اسمه هيتكتب فى دخول وطقم الدكاترة بتاعنا"
"ماشى يا كبير... اطلع اخطفلى كام ساعة قبل مايطلع الصبح"
"وانا هقوم اروح واجيلك الصبح... اوعى تنسى تتصل بالراجل"
"لا طبعا ..حالا...حد ينسى أكل عيشه"

تانى يوم فى المستشفى كانوا كلهم موجودين
وحمادة بيتحسن وبيتابعوه كل الدكاترة
لبنى"مالك يامايسة"
مايسة"انا مش عارفة راحت فين ... مش لاقية شنطة هدومى وقاعدة من امبارح بنفس الهدوم وبقيت مش طايقة نفسى"
الام"الشنط كلها كانت فى العربية... شنطتك رجعت معايا على بيت لبنى"
مايسة"انا ازاى انسى اخدها وانا طالعة"
لبنى"انتى كنتى ملبوخة بابنك... بقولك ايه قومى تعالى معايا الفيلا تاخدى دش وتغيرى هدومك وترجعى... ومتخافيش ماما وحسين هنا"
الام"قومى يامايسة... انا هنا متقلقيش"
قامت مايسة راحت مع لبنى...اخدت دش وغيرت هدومها بسرعة واخدت شنطتها اللى نسيتها
"يالا يالبنى علشان منتأخرش على حمادة"
وهما رايحين المستشفى...بتفتح لبنى علبة السجاير
"يووو سجايرى خلصت"
"انتى لسه برضه"
"سجاير لسه بس بطلت شرب خمرة"
"الحمدلله..ربنا يهديكى وتبطلى السجاير دى كمان"
"ثوانى يامايسة هنزل اشترى سجاير "
وقفت لبنى قدام كشك... نزلت تشترى سجاير
رن موبايل لبنى ...وهو فى العربية
مايسة خافت على ابنها ليكون تعبان... مسكت تشوف مين
لحظات عدم تصديق ومايسة مبرقة عينيها والموبايل بيرن باسم فريد... جت لبنى وشافتها مبرقة كده
"ايه فى ايه مالك"
"تليفونك بيرن"
مايسة بتدى الموبايل للبنى والاتنين بيبصوا لبعض
مايسة بتبص باستغراب...ولبنى بتبص بارتباك
اخدت لبنى التليفون بعد ماركبت العربية
"الو... ازيك يافريد... كويسة الحمدلله... بعدين... لا مش هينفع... بعدين نتكلم... يمكن معرفش النهاردة ولا بكرة... حسين وماما ومايسة عندى... طيب.. متتصلش انت انا هبقى اتصل... مايسة معايا اهى ...ماشى مع السلامة"
خلصت المكالمة ودورت العربية وساقت
مايسة بتبص لها ومستغربة من المكالمة اللى حصلت قدامها دى
"هتفضلى تبصى لى كتير يامايسة... اظن كل حاجة واضحة"
"انا مش عارفة انطق من ساعة ماشفت اسمه على التليفون... عرفتى طريقه منين ولا بيكلمك ليه وانتى نسيتى انك زوجة وام"
لبنى ساكتة...ومايسة مستنية لبنى تتكلم
"ردى عليا يالبنى... ايه اللى بينك وبين فريد"
ردت لبنى بعصبية وهى بتولع سيجارة
"اللى بينى وبينه انتى عارفاه من زمان"
"معدش ينفع يالبنى... معدش ينفع تحبى واحد وانتى متجوزة واحد تانى... افرضى جوزك هو اللى كان معاكى"
"عاصم يعرف فريد"
"يعرفه ازاى... وانتى ليه بتكلميه طيب"
"بكلمه علشان ناوية اتطلق من عاصم ونتجوز"
"تتطلقى ازاى؟؟ تفتكرى عاصم ولا حسين هيوافقوا"
"حسين مالوش كلمة عليا ...عاصم كتبلى الفيلا ولما اتطلق هقعد فيها مع ادم وفريد طبعا"
"لااااا انتى احكيلى وفهمينى عرفتوا طريق بعض ازاى ... وانا مش مأيداكى فى حكاية الطلاق"
"ده قرار نهائى خلاص يا مايسة... وهحكيلك اتقابلنا ازاى"

قبل شهر من الحادثة
عاصم بيلبس ورايح المستشفى
ولبنى صاحية... وواقفة له على باب الاوضة
"عايزاك فى موضوع مهم قبل ماتنزل"
"ملاحظ انك بقالك اسبوع كده مبوزة ف وشى على طول وكل ما اقربلك تبعدى وتتحججى بحجج فارغة... فى ايه"
"بص ياعاصم انا الفترة اللى فاتت دى كنت بفكر فى قرار مهم... انا عايزة اتطلق"
"تتطلقى؟؟"
"ايوه... حياتنا مع بعض مش هتنفع"
"ليه"
"انت على طول سايبنا انا وادم وانت من المستشفى للعيادة "
"والله... ودى حاجة جديدة عليكى مااحنا من يوم مااتجوزنا وانا بشتغل طول اليوم ودى حاجة عمرك ما اشتكيتى منها"
"زهقت ياعاصم ومش قادرة اكمل"
"عندك اسباب تانية"
"فرق السن اللى بيننا"
"وده اتفاجئتى بيه دلوقتى؟؟؟ ومتهيألى فرق السن اللى بيننا ده مش مأثر على حاجة بيننا ...ولا ايييييه؟؟"
"ده قرار ياعاصم... انا مش قادرة اكمل حياتى معاك"
"بس انا مش هطلقك يالبنى"
"اوك... هتتخلع"
"هى وصلت للدرجة دى... عموما فكرى تانى "
"ده قرار نهائى"
"انا هسيبك تفكرى اسبوع كمان ...ومهما كان قرارك انا راضية"
خرج من الاوضة وهى وسعت من طريقه..ومنزلتش وراه
               *********************
عاصم فى العربية... بيضحك وبيكلم نفسه
"تتطلق... وبعد ما كتبتلها الفيلا دى بتحلم"
مسك موبايله وهى بيسوق...واتصل
"الو... سلطان باشا ازيك... معلش بكلمك ع الصبح كده... بس كنت عايزك فى موضوع مهم وخاص... الامر لله ... كنت عايز 2 من رجالتك تكون بتثق فيهم كويس... من النهاردة ومن دلوقتى محتاجهم... مسألتنيش يعنى عايزهم ليه؟؟؟ يعنى يقدروا يعملوا اى حاجة... طيب انا عايزهم يراقبوا مراتى... ايوه مراتى... عايزهم يراقبوها زى ضلها ويقولولى تفاصيل تحركاتها بالظبط وبالصور كمان لو ينفع... اكتب عندك العنوان ورقم عربيتها ... هبعتلك صورتها فى رسالة... هى دلوقتى فى البيت... يعنى خلال ساعة هتكون جبتهم؟؟ انا مش عارف اقولك ايه؟؟ متشكر جداا... لالا محدش يجيلى ابقى خليهم يتصلوا بيا وانا اقولهم يعملوا ايه؟؟ طلباتهم اوامر واللى يطلبوه هياخدوه بزيادة كمان... متشكر ... متشكر جدا... فى رعاية الله... الف سلامة"

هناك 15 تعليقًا:

  1. تسلم ايدك يا دوندون

    ردحذف
  2. تمتم كده لبني هتتظبط :D

    ردحذف
  3. دينا دينا دينا
    طلب خاص جدا يعني لو سمحتي
    عايزاكي كدا ف الاخر تعمليلي مذبحة جماعية وتقتليلي كل الجماعة اللي ف القصة دي
    اعتبريها فرة وقضت عليهم
    دا مفيهمش واحد نضيف يا اوةختشي
    عاصم .. واطي وبايع ضميره ومعدوم الاخلاق ويستاهل الحرق بجاز
    لبني .. خاينة وبتجري ورا الفلوس ومعندهاش احترام لذاتها
    فريد .. سمح لنفسه انه يخون نفسه ويمشي ورا لبني
    شهاب .. النسخة الصغيرة من عصام "وانا عندي احساس جامد انه هيتقلب عليه"

    لو ملقتيش شخصية تقتلهم يا دندن انا ممكن تدخليني ف القصة عادي باسم فاعل خير يعرفهم علي عزرائيل ويطلع
    ولا من شاف ولا من دري :D

    ردحذف
    الردود
    1. hhhhhhhhhhhhhhhhhhhhhhhhhh w ana m3aki ya o5ty ;)

      حذف
  4. dina lo sm7ty hoa anty msh begelk 7aga ze notifications 3ala alkss al adema asl ana lsa bkr2 fehom w kdh w anty msh btrde 3lia 5aleC :(
    Tu2aa

    ردحذف
  5. انا اللى مفرحنى ان الزفت اللى اسمه عاصم دة هيموت ف النهاية احسن احسن

    ردحذف
  6. حلقه حلوه يا دينا اوى بس ايه بقه عاصم ده طلع صايع ..

    ردحذف
  7. Ana O2ayD Ra2y Al sayDa el FaDla f MawDo3 el mazba7a el Gma3ya D :D D aa el Maas D w Kol Koom w Zft el teen 3esam Da Kom taany 5aals
    7asBya Allah w n3ma el wakel Feh :@
    Ana 3ayza Nha2yto tKon Ma2sawya B 3'baa2 yt3azb w w ymooot 3la Batee2 KDa :@

    ردحذف
  8. حلوة اوي الحلقة يادينا فيها احداث كتير كده و والله فعلا اللي مصبرني هو ان عاصم هيموت بس المشكلة ف الباقي نفسي افرح فيهم :)

    ردحذف
  9. Wade7 N fe egma3 3ala mawdo3 elmazba7a el gama3ya da
    Ana aked ma3akom :D :D howa a7san 7al shehab ye2tel 3asem w y3mel 7adsa w ymot w lobna te2tel fared w samar te2tel lobna w tanta7er w ymoto fe tabat w nabat xD
    NaDa

    ردحذف
  10. اه منك يا عاااااااصم ادعي عليك بأيه ؟؟!! .. بس انا فرحانة عشان لبنى شكلها هتنكشف ^___________^ .. وعلى فكرة انا كمان معاكو بفكرة المذبحة الجماعية
    حلقــــــــــــة جامدة يا دودو .. keep it up
    ميما من العراق

    ردحذف
  11. عاصم بيتكلم كأنه البرئ المظلوم فى الحكاية
    والله بجد إحنا عايزين نحطهم نولع فيهم كلهم
    حتي سمر والله مسلمة وهلاص
    انا كل إللي غايظني آآآآآآآدم هيعمل إيييه .. :D :D
    ملهوش حس ولا خبر من أول الـقصة ..
    كملي ياديييناااا

    ردحذف
  12. 7ram 3liki ea dina ana aret al7op al ml3on w knt nawea a2ra odam 3neh bs 5ft leh kdh bs al kss al r3b de ana b5aaaf :(
    Tu2aa

    ردحذف
  13. كلها ع بعض عيله زباله الصراحة :D

    ردحذف
  14. انا لاااااااازم ان شاء الله اقرأ كل قصصك انا قريت معظمها بس ان شاء الله هقرأها كلها و استمرى بجد قصص تحفةة بس عايزةة اعرف هو حضرتك بتألفيهم و لاا حضرتك اللى بتكتبيهم ؟؟؟ ^_^

    ردحذف

قول رأيك بلاش تقرا وتقفل من سكات...ارائكم تهمنى