الجمعة، 10 أغسطس 2012

كان حلم... الحلقة 13

الحلقة 13
ماجد بيتصل بنغم زى ما قالت له
اتصال ومفيش حد بيرد
استغرب...هى اكيد روحت من زمان
وملحقتش تنام...استنى شوية واتصل تانى
اتصال بدون رد لحد التليفون ما يفصل
دخلت عليه نشوى
"ايه ياماجد ...انت فين"
"تعالى يانشوى"
دخلت وقعدت جنبه
"احكيلى بقى"
"استنى اجرب بس تانى"
واتصل ماجد بنغم...اتصال بدون رد لحد التليفون ما فصل
حط ماجد التليفون جنبه وبص لنشوى
"بصى ياستى فاكرة لما طلبت منك تكلمى واحدة زميلتى تسألى عليها"
"اللى كانت فاقدة الذاكرة"
"الله ينور عليكى... هى دى بقى... كانت زميلة مفيش بيننا حتى الكلام العادى لانى مكنتش طايقها...لحد ما وقعت فى يوم بعد التمرين"
"وقعت ازاى"
وتعمد ماجد انه يلغى من الحكاية الجزء اللى هو نفسه ينساه او يلغيه من حياته...انه سبب الوقعة...وكمل الحكاية من غير السبب الحقيقى

نغم لسه فى اوضتها مع مامتها
"يعنى ايه مستنى معاد"
"علشان تتقابلوا وتشوفيه"
"وهو بابا وافق من غير مايقولى"
"باباكى بيقول ييجى وتشوفيه مقالش هييجى اول يوم تتجوزيه"
وبصت الام على الكومودينو
"هو موبايلك بينور ويطفى كده ليه"
قامت الام تشوف التليفون...حاولت نغم تسبقها بس اتحركت ببطء علشان ميبانش لهفتها
"مكتوب اتصال ومفيش اسم"
"هاتى ياماما كده ورينى"
اخد الموبايل وحمدت ربنا انها مش مسجلة ماجد بأى اسم غير نقطة بس وكانت عاملة حساب موقف زى ده
"ده باين المنبه بتاع الموبايل بيخرف"
"انا استغربت لما لقيت مكتوب اتصال...مين هيتصل بيكى ف وقت زى ده"
"مفيش طبعا... ماما بقولك ايه مابلاش العريس ده"
"يابنتى لو فيه سبب مقنع ماشى انما مفيش...طيب على الاقل شوفيه"
"اشوفه بس"
"ايوه شوفيه واتكلمى معاه لو معجبكيش خلاص انتى حرة"
"ماشى ياماما... الوقت اللى تحددوه"
قامت الام وهى بتدعيلها
"ربنا يجعله من حدك ومن نصيبك"
خرجت الام... وقفلت نغم عليها الاوضة لما مامتها بعدت
واتصلت بماجد
                  *********************
ماجد وهو قاعد مع نشوى
"دى الحكاية باختصار"
"انا مش عايزة اختصار...انا عايزة تفاصيل"
ورن موبايل ماجد...وشاف انها نغم
بص لنشوى
"بعدين بقى يانشوى"
"اااااه...سهلووووو ياعم"
خرجت نشوى من الاوضة...ورد ماجد بلهفة على نغم
"الو..حبيبتى انتى فين"
"معلش يا حبيبى ماما كانت عندى فى الاوضة وشافت التليفون"
"وبعدين حصل اى مشاكل"
"لا الحمدلله انا اصلا كنت عاملة الموبايل سايلنت ومش مسجلاك باسم"
"اومال كاتبة اسمى ايه"
"عاملة نقطة بس كده علشان لو الموبايل رن وماما ولا بابا شافوه محدش يفهم حاجة"
"ايه التخطيط ده"
"اهو على قدى"
"تعرفى انك وحشتينى اوى"
"عارفة"
"بجد"
"اه طبعا...علشان انت كمان وحشتنى"
"ااااااه"
"مالك ياماجد"
"قلبى مش مستحمل الحب ده كله"
"سلامة قلبك... قول لقلبك يجمد علشان كل يوم بحبه اكتر"
"بجد يانغم هتفضلى تحبينى كده"
"لو انت بطلت تحبنى ممكن ساعتها حبى يقل"
"انا ابطل احبك؟؟ ده انا حاسس ان الحب اللى بحبه ليكى عمره ما هيقل ولا يتغير...عارفة لما بشوف اتنين بيحبوا بعض بحس ان حبهم ميجيش حاجة جنب الحب اللى بحبهولك"
"ربنا يخليك ليا ويفضل حبنا يكبر ويكبر كل يوم"
"من كتر السعادة اللى انا فيها خايف"
"خايف من ايه"
"خايف ظروفى المادية تكون عقبة قصادنا ويجيلك حد جاهز واهلك يوافقوا عليه"
"وانت عرفت منين"
"عرفت ايه...هو انتى فيه حد فعلا متقدملك"
ندمت نغم انها وقعت بلسانها وقالت لماجد...هى مكنتش عايزة تقوله
"ملكش دعوة بالكلام ده انا هتصرف"
"يعنى ايه تتصرفى...وانا ايه طرطور"
"ايه الاسلوب ده ياماجد"
"انا عايز افهم انتى حد اتقدملك"
"ايوه"
"ومقلتليش"
"ايوه"
"ليه"
"لان الموضوع مش مهم"
"يعنى ايه مش مهم يانغم... انتى رفضتيه يعنى"
"بص ياماجد طريقتك فى الكلام مش عاجبانى"
"وعايزانى اتكلم ازاى...انا عمال ابنى احلام وانتى ف لحظة تهدى كل احلامى"
"علشان كده مكنتش هقولك"
"كمان عايزة تخبى عليا"
"ماهو لما قلتلك اهو شفت واحد تانى خالص"
"انتى عايزة ايه يعنى...عايزانى اقولك مبروك"
"عارف انا عايزة ايه"
"ايه"
"عايزة انام...تصبح على خير"
"استنى يانغم لما اخلص كلامى"
"معلش ياماجد...بلاش نتكلم دلوقتى مع السلامة"
قفلت نغم مع ماجد ودموعها على خدها
هى مش عارفة مين صح ومين غلط
بس اللى هى متأكدة منه انها زعلانة من كلام ماجد
                         ******************
ماجد بعد مانغم قفلت كان متضايق منها ومن نفسه
متضايق منها انها خبت عليه وعرف بالصدفة منها
ومتضايق من نفسه انه مقدرش يمسك اعصابه وزعلها

طول الليل والاتنين كل واحد فيهم مش عارف ينام لانه بيفكر فى التانى
كل واحد زعلان من نفسه ومن التانى

تانى يوم الجمعة...قام ماجد ف معاده راح النادى
وهو فى النادى بيفكر فى نغم...عايز يكلمها ومتردد
مسك الموبايل يكلمها...وقبل مايتصل سمع الاذان
حط الموبايل فى جيبه وهو بيقول لنفسه
"اكلمها بعد الصلاة احسن"

وبره الاوضة باباها ومامتها
"انا نازل اصلى الجمعة مش عايزة حاجة"
"اه... الدوا بتاع نغم قرب يخلص هات علبة وانت جاى"
"طيب هاتى الروشتة"
"ثوانى اجيبها من جوه"
دخلت الام اوضة نغم تجيب الروشتة
نغم نايمة فى اوضتها...بعد مانامت الصبح من التفكير والحزن
مامتها بتدور على الروشتة فى درج الكومودينو
ملقيتش الروشتة.... فتحت علبة الدوا وبتشد حتة من الورقة المكتوب فيها الاسم...وهى بتقطعها ايدها وقعت موبايل نغم بدون قصد
صحيت نغم على صوت رزعة الموبايل
"فى ايه ياماما"
"معلش يانغم موبايلك وقع...شوفيه كده هيشتغل ولا لا"
قامت نغم تلم الموبايل اللى بقى 3حتت من ع الارض
صوت باباها من بره
"يا فاااااااااااطمة...بتعملى ايه كل ده"
نغم ركبت البطارية وحطت الغطا...وفتحت الموبايل
"الموبايل مبيفتحش"
الام"مكنش قصدى اوقعه يانغم"
"ولا يهمك ياماما ...فداكى"
"هاتى اديه لابوكى يوديه لحد يصلحه "
فتحت نغم الموبايل وشالت الشريحة وادت الموبايل لمامتها
اخدت الام الموبايل من نغم وخرجت من الاوضة
حاولت نغم انها تنام تانى... بس تفكيرها فى ماجد كان مخليها مش عارفة تنام
"ياترى ممكن يتصل بيا... ولو اتصل هيلاقى التليفون مقفول... بس لو عايز يكلمنى ممكن يبعتلى مسدج ع الميل ولا الفيس"
قامت نغم ببطء وكسل وهى بتبص فى الساعة
"مش هيرجع من النادى قبل 4"

ماجد بعد ما خلص صلاة الجمعة.. اتصل بنغم علشان يصالحها
اتفاجئ ان الموبايل مقفول
"بتقفلى الموبايل يانغم... للدرجة دى بتتلككى"
كمل ماجد شغل فى النادى... وف معاده روح البيت
اول حاجة عملها بعد ماوصل البيت... دخل اوضته وفتح اللاب توب
"نشووووووووووى"
جت نشوى تجرى من المطبخ
"ايه ياماجد"
"هو النت ماله"
"فاصل من امبارح بالليل"
"ليه"
"معرفش بكرة الصبح هتصل بالشركة واشوف"
رد وهو متنرفز
"طيب"
حاول يتصل تانى بنغم... الموبايل مقفول
مرة و2 و10 و30 الموبايل مقفول

نغم ومامتها وباباها قاعدين بيتغدوا
"موبايلك يانغم هجيبهولك بكرة وانا راجع من الشغل يكون اتصلح"
نغم"شكرا يابابا"
الام"معلش ياحبيبتى انا السبب"
نغم"ولا يهمك ياماما...بسيطة"
الاب"محمد قابلنى النهاردة وانا راجع وسألنى عن الرد"
نغم"محمد مين"
الاب"انتى مش قلتيلها يافاطمة"
الام"العريس يانغم"
هزت نغم راسها بمعنى افتكرته
الاب"هو هييجى بكرة الساعة 8 بس لوحده علشان يتعرفوا على بعض"
الام"اهلا وسهلا يشرف اى وقت"
نغم"الحمدلله "
قامت نغم من غير ماتكمل اكلها...علشان تروح تفتح النت
دخلت نغم اوضتها وفتحت الميل والفيس علشان تستنى ماجد
طول اليوم وهى بتستنى من غير ما يظهر ولا يفتح خالص

تانى يوم فى النادى
راحت نغم النادى فى معادها
مكنش حد موجود... مصطفى ويسرا فى اجازة علشان بيخلصوا اوراق السفر
قعدت على البيسين وهى بتدور بعينيها على ماجد
مش عارفة لما ييجى هتكلمه ولا لأ
بعد ربع ساعة شافت ماجد ... هى بتبص عليه بطرف عينيها وهى لابسة نضارة شمس وراسها فى اتجاه بعيد عنه علشان ميعرفش انها بتبص عليه
حست بيه بيقرب منها وبيقعد معاها... من غير مايتكلم
دقايق صامتة بينهم محدش فيهم بيتكلم...قامت نغم تمشى
مسك ايدها وهى معدية من جنبه
"استنى"
"نعم"
"فى ايه"
قعدت تانى واستغربت من سؤاله
"معرفش فى ايه....شوف انت"
"هو المفروض مين اللى يزعل من التانى...بتخبى عليا يانغم حاجة مهمة زى دى"
"وانت شايف ان مهم انى اقولك وانا عارفة انى مش هوافق...ولو قلتلك هتفتكرنى بعمل افلام بقى لما البنت تقول للى بتحبه متقدملى عريس علشان يغير والحاجات دى...خفت تفتكرنى بمثل عليك"
"لا مكنتش هفتكرك بتمثلى عليا"
قالها وهو بيبتسم لها...وكمل كلامه
"بس من اول مشكلة يانغم تاخدى جنب وتقفلى موبايلك"
"قال يعنى انت سألت ولا اهتميت"
"اومال عرفت منين ان موبايلك مقفول"
"مش مقفول...الموبايل بيتصلح ياماجد وفضلت قاعدة طول اليوم وطول الليل فاكراك هتسأل عليا ولا تكلمنى ع النت"
"والله النت عندنا فاصل من اول امبارح ومعرفتش اكلمك خالص"
"انا خفت اوى من قسوتك دى لما حسيت انك مسألتش عليا خالص"
"وانا اقدر... ياحبيبتى انا بحبك ومهما يحصل بيننا حتى لو زعلنا مع بعض شوية برضه مقدرش اشيل منك ولا اقسى عليكى"
نزلت دموع نغم من ورا النضارة
شال ماجد النضارة من على عينيها...ومسح دموعها بطرف صباعه
"مش عايز اشوف دموعك تانى"
هزت راسها وهى بتبتسم له
"قوليلى بقى ...رفضتى العريس"
"لسه"
"يعنى ايه لسه؟؟"
"يعنى هو لسه هييجى النهاردة علشان نتعرف على بعض"

هناك 22 تعليقًا:

  1. تسلم ايدك ..عارفة حاجة انا عشت الحب يلي هما عاشو وزيادة بس للاسف كان حلم :(

    ردحذف
    الردود
    1. كله حلم كده مفيش حقيقة ابدااا...ربنا يوفق

      حذف
    2. معليش ربنا يعوض عليكى انشلء اﻷه ويبقى حقيقه

      حذف
  2. ههههههههههههههههههه يا حلااوة يا ولاد

    ردحذف
    الردود
    1. والله نفس اللي انا قولته يا بطة ههههههههه

      حذف
  3. حلوه بس الاحداث فيها مكنتش كتير

    ردحذف
  4. dah aked haytyan 3eshtha 3ala 2a5er bo2een dol :P:D looollzZ xD

    ردحذف
  5. Ha2aaaW xD Allah Yer7amek ya Na3'aam ! :D
    Btw Gamda l 7ala2a ya Gamiil ;)


    Menna =)

    ردحذف
  6. aho ana ma b7bCh ama el wa7d y3od yfakarr m3 nafso w ydrab a5mas f asdas.. elmafrod yfakar f 3ozrr ay 7aga kda msh y3od yfakarr f elly yza3alo w yday2o mn el tany ,, rabna yehdy :)
    Gameela Gedaan bs aa el reDa Da tawellty el mara D ya3ny ;) :DDD

    ردحذف
  7. Bgd tslm 2fkarek,7lwa gdn :D

    ردحذف
  8. حلوة اووووووووووووووووووووووووووووووووووي

    ردحذف
  9. جاااامدة يا دينا
    قريت كل قصصك وكلها روعة بجد

    ردحذف
  10. feen l-7al2a l-gDeDa pa2a

    ردحذف
  11. استاذة دينا
    احيكى بشدة على انك استطعتى ارجاعى الى القراءة مرة اخرى بعد فترة انقطاع طويلة وحين اعود اليها على غير ما كنت اتوقع ان تكون هذه العودة فى الروايات التى لم اقرأ اى رواية منذ ما يقرب من 10 سنوات ولكن باسلوبك الساحر و البسيط المتعمق فى نفس الوقت هو ما جعلنى اقرأ كل الروايات التى بالارشيف بل و انتظر يوميا الحقلات الجديدة من الرواية التى بين ايدينا لقد جعلنى اسلوبك الراقى البسيط المتعمق فى الرواية ان اعيش فى الروايات و شخصياتها و اتفاعل معها و اشعر اننى اعيش بينهم و هم يعيشون بيننا .
    اهنأك على نجاحك الكبير و ارجو ان تظلى فى نفس الطريق مع التطوير و اتمنى لكى دوام النجاح و التوفيق و ارجو التواصل دوما اصدقاء حقيقين .
    Sherif Sakr
    http://www.facebook.com/#!/sherif.sakr.92

    ردحذف
  12. كل القصص حلوة وبتجنن ... رائعة انتي ... كملي بقية القصة بليز دودي

    ردحذف
  13. دينا بقينا يوم الأحد فين حلقة يوم السبت :(

    ردحذف
  14. حلوه جداااااااااااا بس مع الاسف الحب ده مبقاش موجود

    ردحذف
  15. بجد بجد تسلم ايديكى يادينا واللهى انتى حببتينى فى القراءه وبجد احنا مفتقضين الحب ده الايام دى
    انتى بجدانسانا رائعه مش قادره اقولك انى بسبب قصصك انا ابتسمت ابتسامه بقالى كتيييييييير مبتسمتهاش
    بجد محتاجين منك المزيد والمزيد
    .
    .رحمه

    ردحذف
  16. مش لاقيه كلام بجد

    ردحذف
  17. بجد حلوووووووة اوووووى...انتى رجعتينى اقرا تانى من جديد والاقى نفسى

    ردحذف
  18. جميله اوي يا دينا ربنا يوفقك

    ردحذف

قول رأيك بلاش تقرا وتقفل من سكات...ارائكم تهمنى