الجمعة، 24 أغسطس، 2012

ابغض الحلال... الحلقة 2

الحلقة 2
بعد 6 سنين
الباب بيخبط على بيت سمير
نوال بتفتح الباب
"ازيك يانوال"
"الحمدلله ياعمتو"
دخلت مديحة ومعاها بلال ابنها "8 سنين"
مديحة"فين ماما يا نوال"
نوال"فى الحمام بتحمى نسمة"
نادية تيجى من جوه
"ازيك ياعمتو"
مديحة بعد ما تقعد"ازيكم يا بنات...وبابا مش هنا"
نادية"لا بابا فى الشغل"
نوال"مامااااااااااااااااا... عمتو جت"
صوت سعاد"اقعدى يا مديحة شوية وجيالك"

تيجى سعاد ومعاها نسمة "سنتين"...وبعد ما يسلموا على بعض
مديحة"انا كنت نازلة اجيب لبس المدرسة لبلال... قلت اعدى عليكى لو عايزة تنزلى معايا تجيبى حاجة لنادية ونوال"
سعاد"هتصل بسمير اسأله"
واخدت سعاد تليفون البيت على حجرها واتصلت بسمير ف الشغل
"الو... ازيك يا سمير...بقولك مديحة هنا ونازلة تجيب لبس المدرسة لبلال...انزل معاها اجيب حاجة البنات... ليه بس ما احنا هنبقى مع بعض...خلاص طيب ماشى... مع السلامة"
مديحة"مرضاش"
وسعاد ردت والدموع بتتلألأ فى عينيها
"كالعادة قال لأ"
"وانتى هتعيطى ليه دلوقتى"
ونزلت الدموع من عين سعاد
"نااااادية... خدى اخواتك وبلال وادخلوا العبوا جوه"
نادية"حاضر ياماما"
بعد دخلوا البنات وبلال...مسحت سعاد دموعها
"ايه يا سعاد...حصل حاجة جديدة"
"محصلش جديد يا مديحة بس انا تعبت واتخنقت...كل حاجة لأ لأ ...انزل لأ... اروح اشترى حاجة لأ... انى اقرر اى حاجة مفيش...انا تعبت من القهر اللى انا عايشة فيه ده... كل كلمة بعمل حسابها قبل مااقولها ...عايشة ف رعب الطلقة التالتة"
"معلش يا سعاد... اهو كده انتى عاقلة... علشان ال3 بنات اللى روحهم ف ابوهم وابوهم روحه فيهم...وبعدين سمير مش وحش اوى يعنى"
"هو مش وحش... سمير حنين وطيب وبيحبنا... بس غيرته وعصبيته دى خلتنى بخاف منه والخوف ده لغى شخصيتى"
"هو ينفع الكلام ده دلوقتى... انتى بتحافظى على بيتك"
"وهو لازم انا اللى احافظ لوحدى... هو كمان ليه ميتغيرش شوية"
"يا سعاد انتى لسه هتعرفى سمير النهاردة... معلش كل راجل ف الدنيا ليه عيوب...استحملى علشان خاطر بيتك وعيالك"
"انا بفضفض معاكى وخلاص...انما غير كده بحط جزمة ف بؤى واسكت"
"لا اله الا الله... استعيذى بالله كده من الشيطان الرجيم... روقى يا سعاد وانا هتكلم معاه"
"لا اوعى الله يخليكى مش ناقصة عكننة وييجى يقولى بتحكى وبتتكلمى"
"خلاص اللى يريحك...هقوم انا علشان متأخرش...بلااااااااااااال"

بعد شهر... ويوم عيد جواز سمير وسعاد العاشر
رن تليفون البيت... ردت سعاد
"الو"
"الو... ايه عاملين ايه"
"كويسين الحمدلله"
"والبنات فين"
"اهم بيتفرجوا على التليفزيون"
"طيب متخليهومش يناموا الا لما اجى"
"حاضر.. بس ليه"
"كل سنة وانتى طيبة... انا جايب عشا جاهز وتورتاية علشان نحتفل بعيد جوازنا"
"وانت طيب يا حبيبى... حاضر هخليهم ميناموش"
"نفسك ف ايه اجيبهولك وانا جاى"
"تيجى بالسلامة مش عايزة حاجة تانية"
"طيب انا عاملك مفاجأة "
"ايه هى"
"لما اجى بقى"
"انت جاى امتى"
"قدامى ساعتين كده"
"تيجى بالسلامة... مع السلامة"

بعد ساعتين... سمير بيخبط ع الباب برِجله
فتحت له نادية... دخل ومعاه حاجات كتير
حط الاكل والتورتاية على الترابيزة
وكان معاه اكياس تانية...
"فين ماما يا بنات"
"فى الاوضة جوه"
دخل سمير الاوضة... واستقبلته سعاد بابتسامة
وقف سمير على الباب لحظات
وقف يتأمل سعاد وهى لابسة طقم نوم جديد وشعرها لونه متغير ومعمول تسريحة وحاطة ميك اب غير المعتاد
"ايه ده"
وردت سعاد بابتسامة
"حلو؟؟"
"حلو ايه؟؟انتى غيرتى لون شعرك ده فين وجبتى اللى انتى لابساه ده منين"
وباحباط قعدت سعاد على طرف السرير
"بدل ماتقولى كلمة حلوة تعملى تحقيق"
"ردى عليا ياسعاد... متنرفزنيش... عملتى الزفت ده فين"
"فى الكوافير اللى فاتح تحت جديد"
"نهار ابوكى اسود...كوافير؟؟ راجل"
"ايه بقى يا شيخ حرام عليك... زهقتنى ف عيشتى"
وهجم عليها شدها من دراعها وقفها قدامه
"روحتى لراجل ومن ورايا"
"مش راجل..والله اللى عملتلى شعرى واحدة ست"
"ست ولا زفت... مأخدتيش اذنى ليه"
وانفجرت فيه تصرخ
"علشان اعملها لك مفاجأة... علشان فاكرة ان حاجة زى كده هتعجبك"
ومسكت منديل وقعدت تمسح الميك اب وهى بتتكلم
"كل حاجة لأ لأ... كل كلمة بحساب... كل نفس بحساب...انا زهقت من عيشتى معاك"
"الله الله...بقى لينا صوت يا ست سعاد"
صوت جرس الباب بيرن...هما لسه ف الاوضة
شدت سعاد شنطة من فوق الدولاب
"انتى بتعملى ايه"
"خلاص زهقت...انا رايحة بيت اهلى لحد ما تتعالج من الشك بتاعك ده"
باب الاوضة اتفتح... وظهرت مديحة
والبنات واقفين بيعيطوا
مديحة"صلوا ع النبى ... صوتكم وصلنى فوق"
سمير"انتى كمان بتهددينى انك هتسيبى البيت"
خرجت سعاد م الاوضة بالشنطة ودخلت اوضة البنات
ووراها سمير ومديحة...والبنات واقفين مكانهم بيعيطوا
سمير"والله العظيم لو خرجتى من البيت.."
مديحة"اسسسسككككت يا سمير"
سعاد"سيبيه ...انا خلاص مبقيتش باقية على حاجة...انا كده كده عايشة معاه مهددة ف كل لحظة"
سمير"ايه اللى قلبك كده... ماكنا عايشين بقالنا 6سنين كويسين ومحصلش حاجة...ولا علشان اسامة طلق مراته"
مديحة برقت له وعضت على شفتها
"بس بقى ياسمير"
سعاد"انت مريض...مريض بالشك ووصلت للجنون خلاص"
وضربها بالقلم على وشها
"انا اللى مبقتش عايزاك... انا كرهتك وكرهت عيشتك"
قفلت الشنطة... وحدفت طقم لنادية وطقم لنوال
"البسوا بسرعة"
وهى بتلبس نادية
"بناتى مش هيخرجوا من بيتهم... عايزة تنزلى انزلى بس مترجعيش هنا تانى"
وردت بسخرية
"هخرج م الجنة يعنى...بلا قرف"
مسمعتش كلامه وكانوا البنات لبسوا...اخدت الشنطة والبنات وراها
وهى ع الباب... زعق سمير
"لو عتبتى خطوة كمان تبقى طالق... فاهمة... اقسم بالله هتبقى طالق ياسعاد"
التفتت له سعاد... وبصت له بتحدى...وخدت بناتها ورزعت الباب وراها
قعد سمير على كنبة جنب الباب
"ده انا كنت جايبلها هدية لعيد جوازنا... والاكل اللى محطوط ده اللى محدش من العيال داق منه لقمة"
قعدت مديحة على كنبة جنبه وطبطبت على كتفه
"ايه اللى حصل بس ل ده كله"
"راحت من ورايا للكوافير "
"يمكن كانت عايزة تعملهالك مفاجأة"
"هى اللى عصبتنى"
"وانت مزود الغيرة اوى ياسمير"
"هى كانت تقدر تعدى الليلة"
"اللى حصل حصل"
"يعنى بيتى اتخرب.. وبناتى مش هشوفهم كل يوم"
"لا حول ولا قوة الا بالله...كان فين كلامك ده قبل ماترمى عليها يمين طلاق تالت"
"يمكن يكون فى حل...يمكن طلقة من الطلقات متتحسبش"
"معرفش....اسأل وشوف"

سمير فى بيت اهل سعاد...قاعد مع باباها
"خلاص يا سمير مفيش حل انتم اتطلقتوا 3 مرات وهى كده بقت محرمة عليك الا بمحلل شرعى"
"محلل ايه لا طبعا"
"ومين قالك انى هقبل اساسا حتى لو انا وافقت..وبصراحة كده انا مبقتش اطمن على بنتى معاك"
"يعنى ايه ياعمى...وبناتى"
"بناتك هيفضلوا بناتك بس كل واحد فيكم بقى يشوف حياته"
"بس انا مقدرش استغنى عنهم...انا عايزهم معايا"
"مينفعش يا سمير"
"لا ينفع... انا لو مخدتهمش مش هدفع مصاريفهم"
"ده واجب عليك مش صدقة منك"
"يااما اخدهم يا مليش دعوة بيهم"
"بقولك ايه... مش عايز تدفع انت حر فيه محاكم تجيب حقهم..واتفضل بقى من هنا"
قام سمير وهو متنرفز.... وخرج من البيت

سمير عند مديحة فى بيتها
"ماهو بصراحة ده مش كلام يا سمير... بناتك محتاجين مامتهم ومحتاجينك كمان ولازم تبقى العلاقة بينكم كويسة"
"مش هتبقى كويسة يا مديحة...هى اللى خربت البيت وفرقت بينى وبين البنات"
"اللى حصل حصل... انا عندى حل كويس"
"قولى"
"انت تخصص لهم مبلغ كل شهر مصاريف... وييجوا يقعدوا معاك هنا خميس وجمعة...منها يبقى البنات معاكم انتم الاتنين ومنها متبقاش اتخليت عن بناتك"
"ماشى...بس اسمعى انا مش رايح بيتهم ده تانى"
"انا اللى هتكلم معاهم واكون الوسيط... استريحت"
"طيب...وفهميهم انها لو اتجوزت هاخد بناتى بالذوق او بالقانون هاخدهم"
"ماشى يا سمير...هقولهم"

بعد سنة... سعاد فى اوضتها
دخل لها باباها
"ازيك يا سعاد"
"اهلا يا بابا ...تعالى"
"ايه البنات خدتهم مديحة النهاردة"
"ايوه...جت من شوية ونزلوا معاها"
"طيب انا كنت عايزك فى موضوع كده"
"خير يابابا"
"اسامة اتقدملك وعايز يتجوزك"

هناك 31 تعليقًا:

  1. اسامه شكلها كده قصه حلوة اوى زى ما عودينا

    ردحذف
  2. تححححححححححححححححفة قوى يا دينا بجد ماشاءالله متتاخريش علينا بقى
    نا متابعة ليكى كل قصصك الى بعتلك سؤال انهاردة على يوميات حماة ومستنية الجديد منك بفارغ الصبر
    أية

    ردحذف
  3. كملي شكلها حلوة اوووووووووووووووووووووووي

    ردحذف
  4. رووووووووووووووعة بجد يا استاذة دينا
    ديما بجد ف الامام
    ومستنية الباقى

    ردحذف
  5. جامده يادينا وسمير ده عاوز الحرق
    Mima

    ردحذف
  6. جميلة بجد
    (دينا)

    ردحذف
  7. wow 7elwa awy bs ana z3lan 3lshan saboo b3d :(

    ردحذف
  8. WOOOOOOOOOOOOOOOOW Samer dah mared msh tabe3e

    ردحذف
  9. fen b2ethaa

    ردحذف
  10. شكلك يا دينا ناويه ع حاجه عالميه
    يوووووووووووووووووب

    ردحذف
  11. يبقى الراجل بصراحة كان عندوا حق

    ردحذف
  12. الدايرة والقارئ داري :] كنت عارف حته اسامه ومتوقعها

    انا صح انا صح

    ردحذف
  13. anty bgd mwhba ana msh bnam men 8er ma 2ra el.7kea bt3tk msh b2et b3raf 2nam men 8erha ana b7b kasask gdan kolha tganen bgd

    ردحذف
  14. Qalby kaaan 7aaass :D btmoooty f Qalbt el a7Daath mn awelha kDaa :P
    Samer Da ensan mostafezz bgd la w kman m3'alt so3ad kman w howa men aslan 3shan yQol ttgawezz wla l2 w y3aQbha w ya5od bnatha ! Anyway el Om leha 7Dana l awladha l7d senn 15 sana bayn ya3ny ywarena 3ard ktafo b2a :D

    ردحذف
  15. شكلها هتكون قصة جمييييييييييييلة زى مامتعودين على قصصك ربنا يوفقك
    dina salah

    ردحذف
  16. دا صحيح انا شوفت قصه حقيقيه زى دى بالظبط

    ردحذف
  17. walahy ana lw mnha 2waf2 3aleh w a3esh 7aiaty b2a de 7aag t2sr l 3omr a da w malo shkk 2wii kda leh 7aram 3aleh walahy bs l moshkala fl banat kda haia5dhom mnha bl kanoon f3lan akid msh hat2dr tda7y b bantha w ttgwz

    ردحذف
  18. tou7fa ya dina .. w bgd 3agbtny enha mab2tsh salbya w 2a5det krarh yatl3ha mn l 2araf 2ly 3ayshah feh dah >:P
    l 7al2a l gededa emta b2a ya dandona ??? :)

    ردحذف
  19. جامدة موووووووووووووووووت يا دينا وعلى فكرة الى عملته سعاد هو ده الحل الوحيد عشان سمير يتادب وهو كده بيعاقب نفسه مش بيعاقب سعاد
    اية

    ردحذف
  20. حلوة اووووووووى بجد

    ردحذف
  21. اييييييييييييييه فين الحلقة التالتة يا دندن؟؟؟

    ردحذف
  22. بس برضه انا زعلانة ع البنات

    ردحذف
  23. لكل صبر نهايه

    ردحذف
  24. اللعب ديه كده حتبقى نااار

    ردحذف
  25. بجد قصصك تحقة جداااااااااا

    ردحذف
  26. مش عارفه اقول ايه محتاره اوى
    خلود

    ردحذف
  27. nice story ya dena
    gamela gedaaaaan

    ردحذف
  28. ظلمتها شكلها تحفه اوي

    ردحذف
  29. اسلوبك جميل ما شاء لله
    بس فيه مشكلة ف الصفحة معرفش عندي بس و لا عند ناس تانية

    ردحذف
  30. انــــا بصراحه اوووول مره اقرا قصه بس بجد اسلوبك ف الكتابه حلو جداا و بيشد الواحد انه يقرا تاني و كمان القصص الي بتختاريها بتتكلم عن مشاكل فعلا بتحصل ف مجتمعناا ف ربنا يوفقك ^^

    ردحذف

قول رأيك بلاش تقرا وتقفل من سكات...ارائكم تهمنى