الأحد، 26 أغسطس 2012

ابغض الحلال... الحلقة 3

الحلقة 3
واتعدلت سعاد فى قعدتها واستغربت
"اسامة...اسامة عايز يتجوزنى"
"اه...ايه الغريب فى كده هو مطلق مراته علشان مكنتش بتخلف وكده كده كان ناوى يتجوز وانتى مش هتقعدى طول عمرك كده ومسيرك هتتجوزى يبقى اللى نعرفه احسن من اللى منعرفوش"
"اتجوز يا بابا... انا جربت حظى وخلاص"
"لا تتجوزى وتعيشى حياتك... انتى لسه يدوب فى التلاتينات والعمر قدامك"
"لو اتجوزت اسامة بالذات سمير هيفتكر ان كان بينى وبينه حاجة"
"سمير دلوقتى مالوش علاقة بيكى ولا حكم عليكى...ويفتكر اللى يفتكره"
"والبنات"
"مالهم البنات"
"مش سمير اتفق معانا انى لو اتجوزت هياخدهم"
"بصى يا بنتى انا عارف ان الكلام اللى هقوله ليكى صعب شوية...بس فكرى فيه بعقلك...سمير بيموت فى بناته وهو حنين عليهم وانتى بتشوفى بنفسك هما كمان بيستنوا يوم الخميس ازاى علشان يروحوا يقعدوا معاه اليومين دول... هو بيبعت فلوس متكفيش مصاريفهم اسبوع وانا مش بخلان عليهم وبكمل...بس انا وامك مش عايشين لك العمر كله وانتى ولا بتشتغلى ولا حاجة والبنات بتكبر والمصاريف بتزيد وابوهم هو اللى هيقدر يصرف عليهم كويس... وانتى لو فضلتى كده من غير جواز بكرة الايام تعدى والبنات تكبر ولو ابوهم سابهم ليكى مسيرهم يتجوزوا وتبقى لوحدك... فكرى كويس يا سعاد... فكرى بعقلك يابنتى"
خرج الاب من الاوضة وساب سعاد سرحانة وبتفكر فى الكلام

فى بيت سمير... قاعدة معاه مديحة
"يعنى هتتجوز اسامة...انا كنت عارف انه بيحبها"
"يحبها ولا ميحبهاش بقى ميخصكش الكلام ده دلوقتى"
"بناتى مش هيعيشوا مع جوز ام يا مديحة...انا بقولك اهو"
"سعاد يهمها مصلحة بناتها وعارفة انك اكيد هتكون احن عليهم من اى حد وعلشان كده هى مش هتدخل ف اى مشاكل معاك خالص... البنات هييجوا يعيشوا معاك هنا بس تبقى تخليها تشوفهم"
"تشوفهم... مش هى اللى سابتهم"
"حرام عليك يا سمير... انت متحرمش ام من ولادها وبعدين احمد ربنا انهم مش عايزين يدخلوا ف مشاكل على الحضانة والرؤية والحاجات دى"
وبصوت مكسور رد عليها سمير
"شفتى...يعنى لو مكنتش استفزتنى اخر مرة مش كان زماننا عايشين مع بعض وبناتنا ف حضننا...ذنبهم ايه بنات صغيرين كده اكبرهم 10 سنين واصغرهم 3 سنين يعيشوا مفارقين"
وطبطبت عليه مديحة
"بس بقى انت هتقطع قلبى"
"انا اللى قلبى بيتقطع عليهم يا مديحة... هيعيشوا من غير ام تخلى بالها منهم ودول بنات يعنى محتاجين ام معاهم فى البيت"
"انت مسيرك تتجوز بس بالله عليك تجيب واحدة تكون طيبة وحنينة علشان متعقدش العيال"
"اتجوز؟؟؟مستحيييييييل... انا هعيش مع بناتى بس مش عايز حاجة من الدنيا غير انى اشوفهم فى احسن حال"
"ربنا يخليك ليهم يا سمير... وانا هبقى معاكم برضه مش هسيبكم يعنى ده اللى بيفرق بيننا كام سلمة"
"ربنا يخليكى يا اختى... هما هييجوا امتى... تفتكرى اغير حاجة ف البيت علشان لما ييجوا يفرحوا...اعمل ايه علشان افرحهم"
وبابتسامة فرحة على فرحته
"لما ييجوا ابقى اسألهم هما عايزين ايه واعمله..هيفرحوا اكتر... وكنت عايزة اقولك حاجة... بلاش العصبية بتاعتك مع البنات علشان ميخافوش منك ويكرهوا حياتهم معاك"
"حاضر حاضر...بس هما ييجوا وانا هحطهم فى عينيا"

بعد 14 سنة
سمير بيفتح باب الشقة بالمفتاح
اول ما دخل
"بخخخخخخخخخخخخخخخخخ"
"ههههه حرام عليكى يا نسمة خضتينى"
"انا شفتك وانت جاى قلت اعملك فجأأأأأأأة ومفاجأأأأأأة"
"الفجأة وعرفتها وهى بخ بتاعتك...ايه المفاجئة بقى"
"هات بس ياحاج الحاجات اللى ف ايدك دى..ايه ده فاكهه ومفيش شيكولاته"
"يابنت انتى مش كبرتى بقى"
"والشيكولاته مالها ومال كبرت...عموما مش هقول المفاجأة الا لو جبت لى شيكولاته"
وطلع سمير من جيبه 3 شيكولاته
"اتفضلى ...انتى واخواتك"
"ميرسى يا حبيبى .... بص بقى... بنتك كده بقت طالبة فى اداب عين شمس زى ماكنت عايزة...مفيش مبروك"
وفرد سمير دراعه وهو قاعد وحضنته نسمه
"مبروك ياحبيبتى... كنتى قلقانة من التنسيق انتى... الحمدلله ان ربنا حقق لك اللى انتى عايزاه"
"الحمدلله"
"هتدخلى قسم ايه"
"مش عارفة لسه...الاقسام كتير وابقى اختار براحتى بقى"
"هى نادية مش هنا"
"لا اتصلوا بيها من المدرسة الضهر كده وقالوا لازم تروح تمضى ونوال ف شغلها لسه مجتش"
"طيب هقوم اريح شوية لحد ماييجوا...عاملة لنا ايه النهاردة"
"هى ريحة اكلى مش واصلة هنا ولا ايه"
"واصلة بس انا من حلاوة اكلك مبعرفش احدد"
"فراخ وصينية بطاطس"
"جوعتينى"
"اجيبلك تتغدا"
"من امتى بتغدا لوحدى..لما اخواتك يرجعوا ابقى صحينى"
"طيب انا هطلع لعمتو اقولها على موضوع التنسيق ده لانى لسه مقولتلهاش"
رد عليها وهو داخل اوضته
"ماشى ياحبيبتى"

نوال خلصت شغلها فى شركة السياحة اللى بتشتغل فيها
نزلت من العمارة اللى فيها الشركة...شافت هيثم
فرحت وراحت ناحيته
"ازيك يا هيثم... ايه المفاجئة الحلوة دى"
"وحشتينى قلت اجى اشوفك"
"مفاجئة حلوة"
"تعالى نتغدا مع بعض"
"لا ياهيثم مش هينفع لازم اتغدا مع بابا واخواتى ف البيت"
"يعنى بقالنا سنة من يوم مااتخرجنا واحنا مش عارفين نتقابل مع بعض غير دقايق عابرة كده"
"انت عارف مبدأى.... لما تبقى تتقدم لى رسمى ونتخطب نبقى نخرج قدام كل الناس براحتنا عادى"
"انا جيت لك علشان كده...محبتش اقولك مفاجأتى فى التليفون علشان اشوف رد فعلك "
"خير"
"ماما امبارح لمحت لى انى لو عايز اخطب اقولها وهى هتساعدنى هى وبابا...فقلت لها انى بحبك وعايز اتقدملك وكده فقالت احدد معاد مع باباكى لتعارف العيلتين"
نوال بفرحة
"بجد ياهيثم"
"طبعا ده كلام ينفع فيه هزار"
"طيب قلت لها ايه عنى وهى قالت ايه"
"مفيش قلت لها انى بحب زميلتى ف الجامعة بقالنا 3سنين دلوقتى وان حبيبتى وعدتنى انها هتستنانى بعد ما اتخرجنا وعلشان كده هى فرحت اوى بيكى وقالت نتقدم حتى نقرا فاتحة وبعد كده نجهز على مهلنا"
"انا فرحانة اوى ياهيثم... بس مش عارفة هقولها لبابا ازاى ..انا بتكسف اوى"
"بصى قوليله نص الحقيقة انى زميلك من الجامعة ولقيتينى النهاردة قدام شغلك وبقولك تحددى معاد مع باباكى اتقدملك...بسيطة"
"ربنا يستر واقدر اقول ومتكسفش"
"جمدى قلبك بقى ...انا عايز اجيلكم بسرعة"
"ان شاءالله...انا همشى بقى"
"استنى هوصلك بتاكسى واكمل انا"

نسمة بتخبط على باب بيت عمتها...مديحة بتفتح الباب
"اهلا يا نسمة ...تعالى"
"ازيك ياعمتو"
"اخبارك ايه...فين بلال"
"الحمدلله...فى البلكونة"
"هدخل اقوله على حاجة مهمة"
"طيب يا حبيبتى"

بلال فى البلكونة... بيتكلم فى الموبايل
"لا النهاردة عندى شغل بالليل... من يوم السبت هبقى الصبح"
ودخلت نسمة البلكونة عليه فجأة
"بتكلم ميييييييييييييين"
بلال لنسمة
"ايه ده يا بت فى حد يدخل على حد كده"
بلال فى الموبايل"طب سلام دلوقتى نتكلم كمان شوية"
"بتكلم مين"
"وانتى مالك"
دخل من البلكونة وسابها... اتنهدت ودخلت وراه
"ده انا جاية اقولك انى قبلت فى اداب عين شمس"
"كويس والله...اكبرى بقى واعرفى انك داخلة الجامعة يعنى بقيتى طالبة جامعية مش تلميذة ثانوى"
"انا كبيرة اهو...ولا انت مش اخد بالك"
"ورينى كده"
وشاورلها تلف...لفت قدامه
"كبيرة شكلا لكن عقلك لسه صغير"
"مين قال كده بس"
"نسمممممة... انتى فاضية باين عليكى...يامامااااااااا"
وجت مديحة من المطبخ
"ايه يا بلال...بتنادى عليا ليه"
"خدى البت دى معاكى المطبخ ...صدعتنى"
نسمة"ماشى يا بلال... انا ماشية خالص"
وراحت نسمة عند الباب
مديحة"تعالى يا نسمة... متزعليش ده بيهزر معاكى"
نسمة"مفيش حاجة ياعمتو...انا نازلة وهبقى اطلعلك بالليل"
خرجت نسمة وقفلت الباب وراها
وهى نازلة ع السلم...بتبتسم وقالت فى نفسها
"ماهو اكيد بيرخم عليا كده علشان بيحبنى زى ما بحبه بس مش عايز يبين "
                     ******************
بعد ما نزلت نسمة
"ليه كده يابلال تحرجها"
"هى دى بتتحرج... هتلاقيها كمان شوية جاية برضه"
"بس يا واد ..متقولش كده على بنت خالك"
"دى عيلة طَقة يا شيخة...هروح اكمل المكالمة اللى قطعتها عليا"
دخل بلال البلكونة...واتصل من الموبايل
"الو... معلش يا حبيبتى قفلت معاكى بسرعة"

سمير والبنات على السفرة... بيقوموا تباعا
نوال"بابا اعملك شاى"
سمير"ماشى ياحبيبتى...وابقى هاتيه البلكونة"
دخلت نوال عملت الشاى...وراحت قعدت مع بابا بعد ما قدمت له الشاى... وبعد تردد حكت له على مقابلة هيثم بنفس الكلام اللى قاله
سمير بيبص لها ومبتسم
"والكسوف ده كله ليه... خليهم يشرفوا اى وقت"
قامت نوال حضنت باباها وباسته
"ربنا يخليك لينا يابابا"
دخلت نوال اوضتهم... كانت نادية قاعدة على الكمبيوتر
ونسمة قاعدة على السرير وحاطة طبق فاكهه قدامها بتاكل منه
نادية"مالك يانوال... شكلك فرحانة كده ليه"
نوال"انا مزقططة مش فرحانة بس"
وحكت لهم كل اللى حصل...وكانت نادية ونسمة عارفين انها وهيثم بيحبوا بعض
نسمة"مبروك يا عروسة...عقبالنا ياااااااااارب"
نادية ساكتة... حست نسمة ان نادية زعلت علشان هى الكبيرة
نسمة"عقبالك يا نادية ان شاءالله"
نادية"انتوا عارفين انا سرحت ف ايه دلوقتى"
وانتبوا الاتنين وسألوها "ايه؟؟"
نادية"ياترى المفروض نقول لماما... ولا نقول لبابا اننا نقول لماما...ولا منقولش حاجة خالص... وياترى ماما هتفرح ومستنية خبر زى ده...ولا احنا بالنسبة لها عادى ولا ايه"
ودمعت نادية... وسابت نسمة الاكل اللى ف ايدها وقعدت تعيط
ونوال لقيت دموعها نازلة
"نكدتوا عليا حرام عليكم"

فى بيت هيثم... قاعد مع مامته وباباه
"انا قلتلها تحدد معاه مع باباها"
الاب"وهى باباها بيشتغل ايه... ومامتها بتشتغل ولا ست بيت"
هيثم"باباها بيشتغل فى شركة بترول...بس مامتها منفصلة عن باباها من وهما صغيرين واتجوزت وخلفت وبيشوفوا بعض كل فين وفين"
وبصت الام والاب لبعض
الاب"وهى عايشة مع مين"
هيثم"هى واخواتها مع باباها"
الام"يعنى اسرة مفككة"
هيثم"البنت كويسة اوى ياماما لما هتشوفيها هتعجبك"
الام"انا مش هشوف حد"
هيثم"ليه"
الام"انت خبيت ليه ان امها وابوها مطلقين"
هيثم"انا مخبيتش...انا لما جت مناسبة قلت"
الام"وانا ابنى مياخدش واحدة من اسرة مفككة ابوها ف حتة وامها ف حتة وتلاقيها عندها عقد الدنيا...ايه اللى يجبرك على واحدة كده"
هيثم"بحبها"
الام"الجواز حياة ولازم تاخد واحدة بنت عيلة ومتربية كويس فى بيت هادى علشان تعرف تربى ولادك... انما البنت دى لأ"
هيثم"طيب شوفيها الاول وبعدين احكمى"
الام"مش هشوف حد ومش موافقة عليها...واحنا نعرف امها كانت فيها ايه علشان كده جوزها طلقها"
هيثم"بابا...قول حاجة"
الاب"كلام مامتك مظبوط واحنا عايزين مصلحتك...اصرف نظر عن البنت دى"

هناك 31 تعليقًا:

  1. تسلم ايدك يا دندون

    ردحذف
  2. جمييييييييله

    ردحذف
  3. حلووووووووووووووة اوووووووووى بجد
    بس الاحداث حاسة انها بسرعة اوى

    ردحذف
  4. اوووووووووووووووووبا ليه كده بس ربنا يستررر

    ردحذف
  5. كل واحدة فيهم عندها مشكلة ربنا يسترها بقى تسلم ايدك يا دينا :)

    ردحذف
  6. La 7awl wla QowatA Ella bellah .. Leh el zan el say2 Da b2aaa w lw kan homa el vela el movable D kan ezay el 7aal ! En ba3d el zann ethm :S

    ردحذف
  7. حلوه بس الاحداث جريت بسرررعه

    ردحذف
  8. حلوة اوووووووووووووووووووووووووووووي

    ردحذف
  9. كلام الام صح بس برضه ده ميمنعش انهاتشوف البنت و تتكلم معاها

    ردحذف
  10. حلوة جدا يسلم عقلك

    ردحذف
  11. ايه رد الفعل بتاع أم هيثم دا مينفعش كدا ع فكره أنا اتعصبت جدا وربنا

    ردحذف
  12. حــــلوة اووي
    بس حرام كدا مينفعش مامت هيثم تحكم ع حد من غير متعرفو

    ردحذف
  13. aaaaaaaaaaaaa l ahl dool 7aram 3alahom leh bi7kom kda 3lal nas mn l zahr l mafrrof tshof l bnt a da bs yaraby 7aram walahy bgd i3ny

    ردحذف
  14. حلوة جدا يا دينا

    ردحذف
  15. جميلة بس عايزين اكتر

    ردحذف
  16. كالعادة حلقة روووووووووووووووعة يادينا بس رد بابا هيثم ومامته استفزنى جداااا
    اية

    ردحذف
  17. 7lwa awii ya dandon ma3 n l a7das natet 14 sana :P bas 8aryba awii tafker baba w mamt hayssam .. tafker rag3y awii .. w ma3na keda n ana mosh hatgwaz wala a ?? /:) :P

    ردحذف
  18. هتهزرى يا دينا ولا ايه ؟؟؟؟

    ردحذف
  19. مش عارف ليه عندى احساس ان هيثم هيطلع اخوها فى الاخر

    ردحذف
  20. عادات و تقاليد و مخ همجى جاحد سطحى

    ردحذف
  21. ليه بس يكسروا قلبهم والله حرام
    خلود

    ردحذف
  22. Ana 7asa any 5aifa awi bs m4 3arfa mn ah we kol ma a2ra 7ds ab2a 5aifa mn alb3dw

    ردحذف
  23. للاسف دا الواقع الى احنا عايشينه اى واحدة والدها و والدتها منفصلين تبئى وحشة عند اهل الشاب من غير ما يشوفوها والباص الولد بيسمع كلام اهله ويعتذر لها ويبعد ويعيش حياته بعد ما يكون ضاف على ضعفها وكسرتها جرح جديد مش هيتداوى
    على فكرة انا مش باتكلم عن نفسى الحمد لله بس فيه حالات كتير حواليا كدة
    آسفة ع الإطالة

    ردحذف
  24. وياما بنات عايشين ف اسر مظهرها مترابط والحقيقة انها مفككة (اهلا بكم فى عالم كلام الناس)

    ردحذف
  25. بس حرام علشان هيثم ونوال بيحبه بعض

    ردحذف
  26. جميلة اوس

    ردحذف
  27. ممكن اعرف الجزء الاول كام حلقة والتأني كام حلقة علشان قصة تحفة ومش عايزة أفوت ولا حلقة

    ردحذف
  28. جميييييييييييييله جدا

    ردحذف

قول رأيك بلاش تقرا وتقفل من سكات...ارائكم تهمنى