الأربعاء، 29 أغسطس 2012

ابغض الحلال...الحلقة 5

الحلقة 5
وقف التاكسى... ونزلت نسمة وقفت قدام العمارة شوية
مترددة...طول الطريق بتفكر
"هتقابلنى ازاى... هتفرح...هتتضايق... هتعاتبنى؟؟"
بعد ما طلعت نسمة اول دور... خافت سعاد تحرجها
وخافت انها بعد الاحراج تكرهها... نزلت تانى
وقفت ف الشارع لحظات
"بعد ما جيت ده كله هرجع تانى؟؟... لأ انا هطلع واللى يحصل يحصل"
طلعت نسمة وهى قلقانة من المقابلة..ضربت الجرس ووقفت
قلبها بيدق ترقبا للقاء...مشاعر مختلفة فرحة شوق قلق خوف
الباب اتفتح... وظهرت سعاد
وقفت سعاد قدام نسمة...مش مصدقة المفاجئة
فتحت دراعها وبكل فرحة
"نسمة!!"
حضنتها نسمة... قد ايه حست بقيمة الحضن ده..كانت نفسها فيه من زمان...مش عايزة تخرج من حضن مامتها
حست سعاد ان نسمة مش بتسيب حضنها...قلقت
"نسمة...مالك ياحبيبتى انتى كويسة"
بعدت نسمة خطوة واحدة...وردت بابتسامة
"الحمدلله... كنتى وحشانى بس"
حضنتها سعاد تانى... حضن سريع
"تعالى ادخلى... انا مش مصدقة نفسى"
دخلت نسمة وهى مترددة ومكسوفة...وقفلت سعاد الباب
"حد هنا؟؟"
"لا مفيش...اسامة ف الشغل واخوكى ف المدرسة"
"اخويا"
رددت نسمة الكلمة فى سرها....واستغربتها
دخلت قعدت على كنبة... وقعدت سعاد جنبها
"طمنينى عليكى وعلى اخواتك...عاملين ايه"
"الحمدلله كويسين"
"قوليلى بجد مالك... جيتى ليه...فيه حاجة"
"لا مفيش بس بجد وحشتينى اوى... مش هطول عليكى"
"تطولى ايه... ياريتك تطولى وتطولى... ده انتوا وحشينى اوى"
"بجد يا ماما بنوحشك"
"اه طبعا...مش ولادى"
"طيب ليه مبتسأليش علينا"
"اسألى اخواتك وانتى هتعرفى ايه اللى بعدنى عنكم"
"ايه ياماما...قوليلى"
"قوليلى بس الاول... تشربى ايه... ولا اقولك احط لك تتغدى"
قامت سعاد دخلت المطبخ... قامت وراها نسمة
"ماما... جاوبينى لو سمحتى"
سعاد واقفة ضهرها لنسمة... ووشها للبوتاجاز بتعمل شاى
نسمة خبطت على كتفها
"ماما...فهمينى ربنا يخليكى"
التفتت سعاد ...وكانت الدموع بتلمع فى عينيها
قفلت نسمة البوتاجاز
"مش عايزة شاى ولا عايزة آكل...انا عايزة افهم"
خرجوا من المطبخ وقعدوا فى الانتريه تانى
"نسمة ...انا مش عايزة اتكلم على باباكى كلام ممكن يزعلك منه"
"ليه... هو بابا وحش؟؟"
"بابا مش وحش...بابا احسن اب ممكن يكون عند اى بنت وانتوا محظوظين بيه... بس هو مكنش يصلح زوج ابدا"
"ازاى"
"بلاش نقلب فى اللى فات يا نسمة"
"طيب بلاش اللى فات... مش بنوحشك"
"بتوحشونى طبعا وببقى هتجنن واسمع صوت واحدة فيكم بس من كتر ما بقيتوا تبعدوا بقيت اخاف اضايقكم"
"نبعد ازاى"
"لما كنت اطلب اشوفكم كنتوا مرة تيجوا وكذا مرة اخواتك يتحججوا بأى حجة... كنت لما اتصل اسمع صوت اخواتك خايفين... انا عارفة ان باباكم اكيد كان بيتكلم عنى وحش معاكم علشان كده بعدتوا"
"لا والله بابا مش بيجيب سيرتك بحاجة وحشة"
"مش مهم اللى فات...هتبقى تجيلى وتسألى عليا..صح"
"طبعا ياماما"
"واخواتك؟؟"
"اكيد هما كمان عايزين يشوفوكى"
"ياريت يا نسمة... هتقولى لباباكى؟"
سرحت نسمة وبعدين جاوبت
"مش عارفة"

نوال بقت مش مصدقة نفسها من الكلام اللى بتسمعه
دموعها كانت شلالات نازلة من عينيها
قفلت معاها بعد كلامها... نزلت من الشركة
راحت على البيت... اول ما دخلت لقيت نسمة كانت وصلت قبلها بدقايق
"نوال...مالك"
وهى بتعيط"مفيش"
جريت على الاوضة وهى بتعيط...نسمة وراها
"نوال مالك"
"سيبينى يا نسمة...علشان خاطرى سيبينى"
"طيب طمنينى مالك بس"
"مامة هيثم رفضتنى علشان بابا وماما مطلقين"
عيطت نوال كتير...خدتها نسمة ف حضنها
كانت نادية وصلت للبيت...واول مادخلت شافتهم بيعيطوا
نادية"فى ايه...بابا حصل له حاجة"
نسمة"الولية الهم ام هيثم الدلدول كلمت نوال بطريقة وحشة وقالت انها رافضة الجواز علشان بابا وماما مطلقين"
نادية"ايه التخلف بتاعها ده...ونوال مالها"
نوال بتسمع وتعيط ومش بترد
نسمة"متخلفة هنقول ايه"
نادية"وانتى زعلانة ليه...المفروض تفرحى ان ربنا بعدك عن ناس متخلفة واغبيا زى دول"
نوال"ممكن تتكلموا بره انا عايزة انام"
شاورت نسمة لنادية انهم يخرجوا....خرجوا من الاوضة
"ياعينى يا نوال صعبانة عليا اوى يا نادية"
"هى اه اتجرحت بس الحمدلله انها فهمت ان كل ده هيثم بيتحجج"
"انا خايفة عليها من الصدمة"
"مش اوى كده يعنى...هتزعل شوية وخلاص ...المهم فين الاكل علشان ورايا درس كمان نص ساعة"
"معملتش اكل النهاردة...اشتريت كشرى"
"كشرى كشرى...هدخل اكل انا علشان البنات زمانهم جايين"
"نادية هو مينفعش تغيرى الدروس وتبقى بره البيت"
"ايدى على كتفك...بابا مش راضى اروح بيوت حد علشان كده ادانى اوضة للدروس"
"طيب مليش دعوة بدل اوامر عليا م الحاج"
دخلت نادية جابت علبة كشرى وجت قعدت تاكل وهى بتفتح وتقلب فى التليفون...دخلت نسمة جابت علبة ودخلت بيها لنوال...وخرجت بيها تانى
"نوال مش عايزة تاكل"
"هى عبيطة... مفيش حد يستاهل"
"قلبك جامد"
"لو مكنش قلبى جامد مكنتش عرفت اتكيف مع الظروف"
وصل سمير...دخل قعد معاهم وبعد ما دخل بشوية...بدأوا البنات اللى فى الدرس يوصلوا واحدة ورا التانية
دخلت نسمة تلم غسيل من البلكونة
ونادت على نادية...راحت لها نادية البلكونة
"بصى يا نادية البنت دى بتاخد درس عندك"
"اه...دى ياسمين"
"بصى دى تانى مرة اشوفها واقفة قبل الدرس مع الولد ده شكلها بتيجى معاه"
"مين ده...مش شكل وقفة اخوات ولا قرايب"
"اخوات مين يانادية...شوفى واقفين يهزروا ازاى...كل ده وهى لسه ف 3اعدادى"
"بس لما اتطلع هوريها"
"من غير عصبية يانادية ...وجهيها بس من غير ماتحرجيها"
"هو انا لسه هطبطب وادلع...اهى طالعة اهى"
دقيقة ورن جرس الباب..ودخلت ياسمين على اوضة الدروس

فى اوضة الدروس...ترابيزة كبيرة على راسها نادية و10 بنات قاعدين...نادية بتبص لياسمين كتير...وقبل ما تبدأ الدرس
"ياسمين...مين اللى كنتى واقفة معاه تحت"
"ده...ده ابن خالتى"
"ابن خالتك؟؟ ومامتك عارفة ان ابن خالتك بيجيبك"
"اه طبعا"
مسكت نادية موبايلها ونادت لياسمين
"تعالى اتصليلى بمامتك"
"ليه"
"عايزة اتأكد منها...واقولها مفيش داعى واحد ييجى معاكى لحد هنا"
"انا هبقى اقولها"
"لا اتصليلى بيها هقولها انا"
"خلاص يا ميس نادية مش هخليه يوصلنى تانى"
"يعنى كدبتى"
"انا مش كدابة"
"لا كدابة وقليلة الادب علشان بتردى عليا كده... اتفضلى يا ياسمين من هنا ومتجيش الدرس تانى"
خرجت ياسمين وهى مكسوفة قدام صاحباتها...ومشيت من الدرس

نفس اليوم بالليل...والبنات فى اوضتهم قبل ما يناموا
نسمة جايبة صينية وفيها سندويتشات وكوباية لبن
"نوال.. نوال ...قومى كلى"
نوال بترد وهى على السرير
"مش عايزة"
نادية قاعدة على سريرها بتحضر شغلها
نادية"قومى يانوال مش هتفضلى طول اليوم كده"
نسمة"بصى قومى كلى سندويتش واحد بس...علشان عايزة اقولكم حاجة مهمة حصلت النهاردة"
وقامت نوال على مضض... وانتبهت نادية لكلام نسمة
نادية "ايه اللى حصل؟؟"
نسمة"وحياة بابا عندك يانوال لتاكلى علشان احكى بقى"
نوال عارفة ان نسمة حنينة ومن حنيتها مش هتسكت...اخدت منها ساندويتش...وبدأت نسمة تحكى كل اللى حصل عند مامتها
نسمة"ها ايه رأيكم بقى...اقول لبابا ولا اسكت...هتيجوا تزوروها معايا ولا لأ"
نادية ساكتة بتفكر... ونوال ردت
"يعنى قابلتك كويس... اومال سابتنا ليه"
نادية"ماهو مكنش ينفع يرجعوا لبعض يا نوال"
نوال"انتى ناسية ان اخر مرة كانت ماما السبب فيها"
نادية"مش ناسية بس فيه مرتين قبلها كان بابا السبب فيهم"
نوال"لو مكنتش ماما عاندت اخر مرة كان زماننا عايشين زى اى بنات طبيعيين ليهم ام واب ومكنتش سمعت كلام زى اللى سمعته النهاردة"
نسمة"بس انا حسيت ان ماما بتحبنا اوى وانها طيبة وحنينة اوى"
نادية"ايوه طبعا بتحبنا... انا فاكرة كانت احن ام فى الدنيا"
نوال"لو كانت حنينة كانت متجوزتش وسابتنا"
نادية"متلوميش عليها لوحدها يا نوال...هى مقدرتش تتحمل بابا"
نوال"ماله بابا..وحش؟؟ عمره ما زعلنا ولا استخسر فينا حاجة"
نادية"كل واحد وليه ظروفه ودى ظروفنا ومحدش منهم غلطان"
نسمة"محدش رد عليا اقول لبابا ولا لأ...هتيجوا معايا ليها تانى ولا لأ"
نوال ونادية بيبصوا لبعض
نادية"لما الاقى وقت هبقى اجى معاكى...ومتقوليش لبابا"
نوال"لسه هفكر...مش عارفة لو قابلتها ممكن اعاملها ازاى... وعايزة اقولكم انى قررت اسيب الشغل"
نادية"ليه"
نوال"لا عايزة انزل شغل ولا عايزة اتعامل مع بنى ادمين"

تانى يوم فى المدرسة.... نادية داخلة الحصة
وبعد ما دخلت ...شافت ياسمين قاعدة فى مكانها
تجاهلتها تماما وكأن محصلش حاجة فى الدرس
مع الشرح... حست ان ياسمين قاعدة مشغولة بحاجة
وكأنها مخدتش بالها...كملت شرح وقربت بهدوء من ياسمين
وفجاة شدت من ايدها الموبايل اللى كانت فاتحاه
"بتعملى ايه ف الحصة"
وبصت نادية فى الموبايل...شافت الاكونت بتاع الفيس مفتوح وياسمين بتكلم واحد ف الشات
"بتكلمى ولاد ف الحصة...دى مالهاش غير معنى واحد انك قليلة الادب"
"انا مؤدبة غصب عن اى حد"
"لو مؤدبة مترديش كده وانتى غلطانة"
"انتى اللى مش من حقك تاخدى موبايلى كده...انتى حاطانى ف دماغك ليه"
"وانا هحط انتى فى دماغى؟؟ليه ان شاءالله"
"علشان انا احلى منك...وعلشان انا فيه حد بيحبنى وانتى لأ... غيرانة منى علشان قربتى تعنسى"
وبدون وعى...رفعت نادية ايدها وضربت ياسمين قلم
عمرها ماكانت بالقوة والانفعال ده... ومحسيتش غير والبنات بيحاولوا يهدوها... وياسمين بتصرخ لما شفتها نزلت دم من قوة القلم وشدته

هناك 23 تعليقًا:

  1. Gamela GeDaann bs nadya kant ttfahm m3aha f el awel f dars ,, bs el sra7a el bnt beg7a w tawelt lsanha Ok bs NaDya kan el mafrod tmsk a3sabha 3n kda D 7tt 3ayla lsa la ra7t wla gat !

    ردحذف
  2. احسن علشان توف هى بتتكلم ازاى مع الاكبر منها سننا بس الحلقة حلوة والقصة احلى
    مايا

    ردحذف
  3. تحفه بجد
    البنات دلواقئتى هما والشباب بقوا مستهترين جداااا ومحدش بيعرف يكلمهمربنا يهديهم ويحفظنا

    ردحذف
  4. بصراحة القصة روعة بس البنت ياسمين دى قليلة الادب

    ردحذف
  5. حلوة اوى يادينا بس بليز زودى الاحداث شويه

    ردحذف
  6. روووووووووووووووووووووووووووعة يا دوندون

    ردحذف
  7. حلوة كتيييييييييييييير يا دندون تسلم ايداكى بس انا معترضة على الطريقة الى نادية بتعامل بيها ياسمين كان لازم تحل الموضوع بحكمة لانها مدرسة وفاهمة فى الحاجات دى مستنية الجديد
    اية

    ردحذف
  8. To7fa bgd ya dondon .. Bas l banota 2ly esmha yassmen d mostfeza awi :@

    ردحذف
  9. حلاوتك يا ياسمين .. حد يجيبلي نمرة البت دي XD

    ردحذف
  10. جميلة اووي تقريبا الولد اﻷي بتكلمة دة ابن سعاد

    ردحذف
  11. جيدة وبالتوفيق

    ردحذف
  12. 7lwaa awee ya ret tnzly sktr mn 7l2a fel yum plzzzz

    ردحذف
  13. الحلقة جميلة جدا بس انا عايزة اعرف الحلقة الجديدة نازلة امتى

    ردحذف
  14. يعنى ياسمين معقده

    ردحذف
  15. يالهوييييييييييييييييييييي ده نوال هتروح في69داهيه

    ردحذف
  16. هو طبعا تصرف ناديه خطأ تمام .. وطبعا ياسمين دى اه مؤدبه واه متربيه بس هى مش لاقيه الى يوجها صح ويشورلها ع الصح عشان تعملو ياسمين مش محتاجه قلم يفوقها محتاجه حد يطبطب عليها ويفهمها الصح من الغلط والمفروض ناديه كانت لما تشوفها مع الولد ف الشارع بعد الدرس تكلمها بعقل لوحدها مش تحرجها كدا ياسمين هتعند معاها اكتر ولما تاخد منها الموبيل بعد الحصه تتكلم معاها برضو لوحدها وتفهمها وبعدين ناديه تكلم مامت ياسمين انها تقرب منها وتعقلها لكن انا اعترض ع اى حد ممكن يعمل حاجه غلط وهو مش عارف الص فا يتقال عليه مش مؤدب ومش متربى .. :\ بلد غريبه وتفكرها زباله :D اقصد ع الى بيفهمو الناس غلط يعنى بس القصه روعه الحلقات التانيه امتى ان شاء الله

    ردحذف
  17. روووووووووعه القصه :D

    ردحذف
  18. بجد روووووعه وفى انتظار الجلقه الجايه

    ردحذف
  19. https://www.facebook.com/pages/%D9%83%D9%8F%D8%AA%D8%B1-%D9%83%D9%84%D8%A7%D9%85/811843602180722 دي صفحتنه علي الفيس بوك ممكن لايك للصفحه صفحه متنوعه (ديني - رمنسي - حزين - مضحك - حكم - قصص {طويله و قصيره} معاً ترتقي ونتفدم

    ردحذف

قول رأيك بلاش تقرا وتقفل من سكات...ارائكم تهمنى