الجمعة، 31 أغسطس، 2012

ابغض الحلال... الحلقة 7

الحلقة 7
وصل وكيل النيابة وقام سمير يسأل عن التحقيق المطلوبة فيه نادية
وعرف انها اول واحدة هيتحقق معاها...وسأل عن السبب

يحيي قاعد متحركش من مكانه وهو بيتابع نادية وسمير بنظراته
فهم انها جاية ف تحقيق بس مش عارف ليه ؟؟

رجع سمير لنادية
"انا سألت السكرتير انتى هنا ليه ف الاول مكنش عايز يقول غير لما تدخلى لوكيل النيابة بس لما شاف القلق اللى احنا فيه قالى انها بسيطة دى شكوى من ولى امر بنت عندك"
"بنت عندى انا...ليه؟؟ومين هى؟"
"بنت بتقول انك ضربتيها وشتمتيها"
"ياسمين!!!"
"هو صحيح حصل كده"
"اه حصل بس هى اللى نرفزتنى"
ونادى العسكرى على نادية لوحدها
دخلت نادية لوكيل النيابة وهى فى قمة التوتر
"اتفضلى يا استاذة...بطاقتك لو سمحتى"
قعدت نادية وطلعت بطاقتها وادتها لوكيل النيابة
"اكتب نادية سمير رضوان\\ 24سنة\\ عنوانك اللى هنا مظبوط ولا اتغير"
"اه هو"
وكيل النيابة للسكرتير
"اكتب العنوان اللى عندك"
وكمل لنادية"ما قولك فيما هو منسوب اليكى فى واقعة ضرب وسب الطالبة ياسمين محمود يحيي"
"انا...انا ضربتها بالقلم فعلا بس ده لانها غلطت فيا وشتمتنى قدام البنات"
"ممكن تحكى اللى حصل بالظبط"
وحكت نادية لوكيل النيابة كل اللى حصل فى الحصة...من غير ماتحكى موقف الدرس والبيت... وبعد ماخلصت
"هل لديكِ اقوال اخرى"
"لأ"
"امضى على اقوالك... وهنستدعى البنت ونشوف اقوالها... بس نصيحة منى انتى لسه ف بداية مستقبلك والمشكلة دى ممكن تأثر على ملفك الوظيفى... لو تتصالحوا والبنت تتنازل عن الشكوى يكون احسن لك كتير...انتى زى بنتى وشكلك محترمة ومؤدبة ومش وش مشاكل"
"شكرا"
خرجت نادية من المكتب وحكت لسمير اللى كان واقف بيستناها وكله قلق
"متقلقيش... هحاول اتصرف فى الحكاية دى"
وهى بتحكى كانت بتدور بعينيها على الشاب اللى كان قاعد قصادها من شوية...ملقيتوش... مهتمتش ...اهى صدفة زى اى صدفة وراحت لحالها

يحيى بعد ما دخلت نادية واتأكد انها صاحبة المشكلة ... انسحب لحد مايفهم اللى حصل بالظبط...ونزل قبل ماتشوفه وتعرف انه صاحب الشكوى وبعد ما شافهم نزلوا من النيابة...طلع و دخل لوكيل النيابة اللى كان طلب استدعاؤه ... وقرا اقوال نادية واتفاجئ بالحكاية اللى مقلتش منها يا سمين غير القلم اللى اتضربته بس
                         *****************
دخل يحيى البيت... وبكل عصبية
"ياسميييييييييييييييييييييييييييييين"
طلعت ياسمين من اوضتها...وجت مامتها من المطبخ
الام"فى ايه يا يحيى"
ياسمين"ايه يا يحيي فى ايه"
يحيي"انا كنت فى النيابة النهاردة... المدرسة بتاعتك حكت حكاية تانية ...انك اللى غلطتى فيها ف الاول... لو طلعتى كدابة هتترفدى من المدرسة وتدخلى الاصلاحية مع الحرامية وبنات الشوارع"
يحيي كان بيخوف ياسمين علشان تقول الحقيقة... وفعلا خافت ياسمين وجريت مسكت فى مامتها
"والله ضربتنى انا مش بكدب"
"ايوه ضربتك بس بعد ماقلتيلها انها بتغير منك علشان عانس"
الام"قلتى لها كده يا ياسمين...مش عيب يابنتى"
ياسمين"هى اللى بهدلتنى فى وسط الفصل قدام البنات"
يحيي"وهى عملت كده ليه"
ياسمين"حاطانى فى دماغها معرفش ليه...حتى قبلها بيوم مشتنى من الدرس"
يحيي"اه واضح بقى انها حاطاكى ف دماغها"
دخل يحيي اوضة ياسمين وقعد على الكمبيوتر...وفتحه
"باس وورد الفيس بتاعك ايه"
"ليه"
"عايز اشوف حاجة عليه"
"ماتشوف من الاكونت بتاعك"
"لا انا عايز ادخل اكونتك انتى"
"مينفعش"
"ليه"
"علشان فيه كلام انا واصحابى فيه اسرارهم مينفعش انت تشوفه"
"اصحابك؟؟ ولاد مش كده؟"
"لا بنات طبعا"
"ومين الولاد اللى عندك ف الاكونت دول"
"مفيش حد كلهم اخوات اصحابى او معايا ف الدروس"
"طيب كل دول يتمسحوا يا ياسمين... وهنسحب الشكوى"
"حاضر"
فهمت ياسمين ان يحيي عرف كل حاجة...خافت تصمم على كلامها تترفد من المدرسة ويضيع مستقبلها زى ما يحيي قال
قام يحيى خرج من اوضتها... وقعد مع مامته
"ماما شدى على ياسمين شوية"
"اشد عليها ازاى اختك مبتعملش حاجة غلط"
"واحنا لما نخاف عليها يبقى هى بتعمل حاجة غلط... دروسها انا هوديها واجيبها وان مكنتش فاضى هشوفلها حد اثق فيه اعملها ابونيه يوديها ويجيبها"
"هو حصل حاجة"
"أأمن اننا نخلى بالنا منها هى دلوقتى ف سن طيش ولازم يكون في رقابة عليها"
"طيب يا يحيي اللى تشوفه...بس ليه هتسحب الشكوى مش اختك اتهانت"
"اختى غلطت فى مُدرستها وهى غلطت انها مدت ايدها عليها غلط بغلط وخلاص المسامح كريم"
"طيب يا يحيي اللى تشوفه"


بعد ما وصلوا نادية وسمير البيت...كانوا نوال ونسمة قلقانين عليهم
قعدوا وحكت نادية تانى اللى حصل
نوال"بنت قليلة الادب وكمان ليها عين تقدم شكوى"
نسمة"ماهى نادية كمان ممسكتش نفسها وضربتها"
نوال"وهتعملى ايه يانادية...هتصالحيها ازاى"
نادية"انا مش هصالح حد ولا انزل من كرامتى علشان خايفة من الجزا...يحصل اللى يحصل بقى"
سمير"لا يا نادية غلط ان يبقى فيه جزا فى ملفك وانتى لسه بقالك 3سنين بس بتشتغلى"
نادية"اعمل ايه بس يابابا"
سمير"انا بكرة هجيلك المدرسة واخد عنوان او تليفون بيت البنت دى واتكلم مع اهلها ونشوف"
نادية"اللى تشوفه صح يا بابا "
سمير"وانتى يانوال فكرتى فى حكاية رامى"
نوال"ايوه يابابا فكرت وموافقة اشوفه بس واتكلم معاه الاول لانى معرفوش اوى"
نادية ونسمة بصوا لنوال باستغراب
سمير"ماشى هتصل بيه واقوله يبقى ييجى لوحده الاول تتعرفوا على بعض"
نسمة"حضرلكم الغدا لحد ما تغيروا هدومكم"
                      **********************
بالليل وبعد ماخلصت نادية الدروس دخلت اوضتهم
كانت نسمة قاعدة تقرا ونوال قاعدة على السرير وف ودنها سماعة الموبايل بتسمع اغانى
قربت منها نادية
"اقفلى عايزة اتكلم معاكى"
شالت نوال السماعات وانتبهت لنادية
نوال"خير يانادية"
نادية"وافقتى على العريس ليه"
نوال"لسه موافقتش بس احتمال كبير اوافق"
نادية"تبقى مجنونة "
نوال"ليه ان شاءالله واحدة متقدم لها عريس وافقت تشوفه"
نادية"يابنتى انتى لحقتى تخلصى من حب هيثم لما تدخلى ف علاقة جديدة"
نوال"حب هيثم خلص خلاص"
نادية"ماشى خلص انما ملحقتيش تتخلصى من اثر التجربة انتى عايزة تنسى هيثم بحد جديد وده هيأثر على اختيارك"
نوال"متخافيش على اختيارى"
نادية"لأ اخاف انتى اختى الصغيرة ولازم اخاف عليكى"
نوال"مش هتعملى عليا كبيرة علشان سنتين فرق يانادية... ابقى اختارى صح انتى ياستى وملكيش دعوة بقراراتى"
قامت نوال خرجت من الاوضة ... نسمة قربت من نادية وباستها ف خدها
"متزعليش هى متقصدش تضايقك"
"على فكرة يانسمة نوال لو وافقت على العريس ده هيكون علشان تثبت لنفسها ان كلام مامة هيثم ورفضها ليها ده غلط وان طلاق بابا وماما مش سبب فى رفض اى حد ليها"
"مش فاهمة قصدك...يعنى طلاق بابا وماما يخلى الناس تبعد عننا ولا لأ"
"لأ طبعا مش معنى ان فيه واحدة بتفكر غلط زى مامة هيثم كده ان كل الناس بتفكر زيها... نوال لسه مصدومة...ربنا يستر"
"مش يمكن العريس ده كويس"
"انا مقلتش وحش...انا بس بقول مينفعش تكون الاسبوع اللى فات كانت بتستنى معاد من هيثم واهله والاسبوع ده توافق على واحد تانى"
"اطمنى يانادية هو لو مش كويس بابا مش هيوافق عليه"
"ربنا يستر ويقدم اللى فيه الخير ان شاءالله"


تانى يوم الصبح ...نوال ونسمة فى البيت
"نوال انا نازلة وجاية على الساعة 2 ان شاءالله"
"ماشى يانسمة"
"ممكن اطلب منك طلب"
"عايزانى احضر حاجة"
"لأ...عايزاكى تكلمى نادية ...امبارح كان كلامك وحش معاها"
"انا مغلطتش فيها وهى عمالة تقولى صح وغلط"
"هى بتنصحك ومش بتفرض رأيها عليكى"
"ماشى يا نسمة شوية واكلمها"
"ماشى يا حبيبتى...باى"
نزلت نسمة.... ومشيت لحد اول الشارع
قابلت بلال... ولسه هتقف معاه...جه عليهم احمد جارهم
"امشى انتى يا نسمة دلوقتى"
"ليه يا بلال"
"هسلم على احمد ومينفعش تفضلى واقفة معانا كده"
مشيت نسمة وهى فرحانة ان بلال بيغير عليها
احمد"صباح الخير يابلال فينك ياراجل"
بلال"صباح النور...فينك انت مش باين"
احمد"الشغل بقى انت عارف...انت جاى منين كده"
بلال"من الشغل برضه"
احمد"مرتاح؟؟"
بلال"الحمدلله"
احمد"بتاخد كام"
بلال"يعنى ساعات الف ساعات 1200 "
احمد"ماتيجى تشتغل معايا وانت هتعدى ال4 ف الشهر"
بلال"لا ياعم ...انا كده كويس ...مليش فى شغل الكباريهات انا"
احمد"بس فلوسها كويسة...عموما فكر لو عايز ابقى تعالى...ده كارت فيه اسم وعنوان الكباريه...ابقى تعالى وهعمل معاك احلى واجب"
اخد بلال الكارت...
"وهو انا يعنى لو فكرت هشتغل ايه"
"ممكن امن لو مش عايز تقف ع البار...فكر لو عايز كلمنى"


نادية فى المدرسة...استدعتها المديرة
راحت نادية للمديرة...واول ما دخلت المكتب اتفاجئت
نفس الشاب اللى شافته فى النيابة... قاعد فى مكتب المديرة
ارتبكت للحظات... وبسرعة استعادت اعصابها
المديرة"تعالى يا نادية... الاستاذ يحيي عايزك"
بصت له نادية بتساؤل
قام ومد ايده يسلم عليها
"انا يحيي اخو يا سمين"
لحظة ما سلمت عليه... حست بخجل رهيب رغم انها مش اول مرة تسلم على راجل ...بس احساسها كان مختلف وخصوصا ابتسامته اللى تدل على انهم يعرفوا بعض مش خصمين فى مشكلة
"بعد اذنك نتكلم بره علشان منعطلش الاستاذة"
وبص للمديرة
"بعد اذن حضرتك"
نادية مش عارفة ترد...اخدها وطلعوا بره المكتب
هى اساسا المفاجئة خليتها بتتماسك بالعافية
لما خرجوا
"احنا اتقابلنا امبارح بس مكنتش اعرف ان صاحبة المشكلة"
"على فكرة ياسمين استفزتنى جدا وكل اللى عندى قلته فى التحقيق"
"انا شفت اقوالك... وجاى اعتذرلك وانا سحبت الشكوى قبل ما اجيلك وبكرر اعتذارى"
"انت كده بتحرجنى بذوقك"
"متقوليش كده... اختى غلطت فيكى وكان لازم افهم منك الحكاية الاول قبل ما اقدم شكوى... بس انا سعيد بالصدفة اللى جمعتنا"
لاول مرة تحس نادية انها مش عارفة ترد
اول مرة تحس بسخونة الدم فى خدودها من الكسوف
كل الناس بتقول عليها متحدثة لبقة...وجريئة
كل ده راح فين...فين الكلام...مش لاقية رد
استجمعت كل تركيزها واللى قدرت عليه
"حصل خير... مفيش مشكلة...وتقدر ياسمين ترجع الدرس تانى لو هى عايزة بس خلى بالك منها"
"حاضر... بس ممكن رقم موبايلك علشان ياسمين تعتذرلك"
"معاها الرقم"
"طيب ممكن الرقم علشان ابقى اسألك عليها"

هناك 33 تعليقًا:

  1. الحلقه تحفه بجد واحداثها حلوة مستنين الجديدة بلتوفيق دينا

    ردحذف
  2. osyra aweeeeeeeeee :@

    ردحذف
  3. 7elwa we hy7sal ;) isa :P

    ردحذف
  4. تحفه يادينا بجد تسلم ايديكى

    ردحذف
  5. حلوة الحلقة بس نسمة عايشة الدور مع بلال ياريت يادينا تخلية يحس انها بتحبة هايبقا احلى ولا اية

    ردحذف
  6. الردود
    1. أزال المؤلف هذا التعليق.

      حذف
    2. أزال المؤلف هذا التعليق.

      حذف
    3. عسول ملهاش علاقه بأنى اشوفه او لأ عسول اقصد بيها شخصيته لذيذه و بعدين يحيى احد ابطال القصه و انا حبى فى القصه بيبقى من حبى لشخصايتها و العكس

      حذف
    4. هههههههههههههههه،،يحيى عسول اه عادى يعنى و ع فكره مش شرط عسول بالشكل ممكن دمه خفيف و طريقته جنتل و عندك حق يحيى عسول ;)

      حذف
    5. أزال المؤلف هذا التعليق.

      حذف
    6. أزال المؤلف هذا التعليق.

      حذف
  7. 7lwa awiii ya dondon :) .. bas osyra awii :(

    ردحذف
  8. جميييييييييييييييييلة قوي قووووووووووي
    دودو

    ردحذف
  9. 7lwaaaaaaaaaa aweeeeeeeeeeeeeeeeeeeeeee

    ردحذف
  10. لا ممتازه ومفيش مشاكل الحمدلله XD

    ردحذف
  11. حلوووووووووووووووووة اوي
    هوووولي

    ردحذف
  12. رووووووووووووووووووووووووووووووعة

    ردحذف
  13. تحححححفة يا دنددوووووون
    آلاء

    ردحذف
  14. أزال المؤلف هذا التعليق.

    ردحذف
    الردود
    1. هو يحيى ده قريبك ولا حاجه :D

      حذف
    2. أزال المؤلف هذا التعليق.

      حذف
  15. أزال المؤلف هذا التعليق.

    ردحذف
  16. أزال المؤلف هذا التعليق.

    ردحذف
  17. أزال المؤلف هذا التعليق.

    ردحذف
  18. عااااااجل جدااا
    السلام عليكم
    الرجل الذى رسم الكاريكاتير عن الرسول قد مات محروقا و الدنمارك
    تتكتم على الخبر.
    ارجو ان ينشر هذ الخبر لان هناك اخت من فلسطين رات رؤيه من سينشر هذ الخبر
    ان الله سيكافئه بعد 4 ساعات والله شخص اسمه محمد اقسم بالله راى الرسول فى منامه وقال له الرسول""" بلغ لمسلمين عنى ان من ينشرها خلال 4 ايام فسيفرح فرحا شديدا وان من
    ...يتجاهلها فسيحزن حزنا شديدا انشرها قدر ما تستطيع

    ردحذف
  19. ههههههههههههههههههههههههههههههههههههههه عسل

    ردحذف
  20. اهى هى دى الصدف ولا بلاش

    ردحذف
  21. يحي ده عسسسسسسسسسسسسسسل اوي

    ردحذف

قول رأيك بلاش تقرا وتقفل من سكات...ارائكم تهمنى