الأربعاء، 5 سبتمبر، 2012

ابغض الحلال... الحلقة 10

الحلقة 10
نادية مش مستوعبة اللى بيحصل
هى مش متاكدة اللى بتسمعه حقيقة ولا خيال
نادية"بابا انت بتقول ايه"
سمير"بقولك واحد اسمه يحيي اللى يبقى اخو البنت اللى ضربتيها اتصل بيا دلوقتى وعايز يتقدملك"
نسمة"شكله ايه..ها..ايه ايه...اوعى يطلع شبه الاخ رامى صبرى"
سمير"بس يابنت عيب تتريقى على عريس اختك"
نسمة"انهى عريس فيهم يابابا...احنا بقى عندنا عريسين"
سمير"نادية انتى ساكتة كده ليه"
نادية"متفاجئة بس يابابا"
سمير"هو شكله ايه صحيح؟؟مش هو جالك المدرسة يوم ما قلتى انه سحب الشكوى"
نادية بترد وهى سرحانة
"اه..يوم ما سحب الشكوى... باباااا هو جاب رقم البيت منين"
سمير"معرفش يمكن من المدرسة ولا من الدليل... انتى ايه رأيك"
نسمة"يابابا وهى هتقول رأيها ازاى من غير ما يتعرفوا على بعض"
سمير"ايه يانادية ساكتة ليه"
نادية"مش عارفة اقول ايه يابابا...انتم قلتم كل حاجة"
سمير"يعنى موافقة ييجى وتتعرفوا على بعض"
هزت نادية راسها موافقة على كلام سمير وهى بتحاول تدارى ابتسامتها اللى كلها فرحة من المفاجئة

رجعت نوال بالليل ...واول ما دخلت
سمير"انتى جاية لوحدك"
نوال"ايوه يابابا"
سمير"فين خطيبك مش المفروض زى ما اخدك من البيت يجيبك"
نوال"ماهو وصلنى لتحت وروح مع اهله"
سمير"طيب"
نوال"تصبح على خير يابابا"
دخلت نوال اوضتهم ...نادية ونسمة قاعدين بيتكلموا
اول ما شافوها...نطت نسمة
"ورينى الدبلة"
فردت نوال ايدها لنسمة وهى بتفرجها الدبلة
نسمة"عقبالى يااااااااااااااااارب"
نوال"عقبال نادية"
بصت نسمة لنادية وهما بيضحكوا
"متعرفش التطورات"
نوال"تطورات ايه؟؟"
نسمة"هحيلك على اللى حصل"
وحكت لها نسمة عن يحيي ومكالمته ونادية ملتزمة الصمت

نادية ف المدرسة وكل شوية مستنية ان يحيي يتصل بيها ... متصلش من ساعة ماقفل معاها فجأة...مستغرباه
"غريب فعلا"
خلال اليوم شافت ياسمين... ياسمين بتتعامل معاها عادى
خلصت شغلها وهى خارجة من المدرسة...رن موبايلها
فرحت لما شافت رقم يحيي...ردت بسرعة
"الو"
"الو..ازيك يانادية"
"الحمدلله ازيك انت"
"كويس الحمدلله... انا عايز اتكلم معاكى انا دلوقتى فى كافيه كابتشينو اللى بعد المدرسة بشارعين عارفاه؟؟"
"اه عارفاه"
"هتقدرى تيجى نتكلم شوية"
"مش عارفة"
"انا مستنيكى...ممكن"
فكرت لحظات
"اوك...انا جاية"
                       **********************
دخلت نادية الكافيه وهى بتدور بعينيها على يحيي لحد ما شافته فى ركن بعيد عن الشارع...راحت ناحيته
اول ماشافها قام يسلم عليها
"اتفضلى"
قعدت نادية وقعد يحيي ...كان يحيي قدامه شاى وطلبت نادية قهوة
"طمنينى ياترى ردك ايه"
"على فكرة انت غريب اوى"
"انا؟؟ليه؟؟"
"مكالمتك معايا امبارح وفجأة تتصل ببابا من غير ماتقولى"
"اعمل ايه ماانا لما جيت لك المدرسة وقلت عايز اتكلم معاكى قلتى لأ...قلت اجيبها رسمى بقى واعرف الرد من باباكى"
"وجبت رقم التليفون ازاى"
"انتو رقمكم ف الدليل وباسم باباكى يعنى مفيش اسهل من كده"
"وليه عايز تخطبنى"
"علشان تنجحى اختى ف الامتحان"
"نعم"
"اقولك ايه بس ...هيكون ليه يعنى حبيتك طبعا"
"احنا لسه شايفين بعض من ايام"
"ومن ساعتها وانا بفكر فيكى ومش شايف غيرك وعايزك تبقى معايا على طول ...يبقى اعذب نفسى ليه وتفضلى بعيد عنى"
نادية اتكسفت... اول مرة تسمع كلام حقيقى كده
ياما سمعت كلام اعجاب بس عمره ما اثر فيها لانه كان كلام عابر
اللى بيقوله وبيلاقيها تصده بيبعد على طول
اول مرة حد يتمسك بيها كده
"هاااا ساكتة ليه"
"مش عارفة ارد على كلامك...اصله حلو اوى"
ضحكت وهى بتقوله...مش قادرة تدارى فرحتها
يحيي حس بيها... بص لها ف عينيها من غير ما يتكلم
بعدت عينيها وارتبكت...ضحك يحيي
"انا كده هتأخر...انا لازم امشى"
"يعنى مقلتليش ردك"
"اتفق مع بابا"

بعد اسبوع...فى بيت سمير
يحيي ومامته وياسمين و نوال ورامى ومديحة وبلال وسمير ونسمة
قاعديد بيقراوا الفاتحة...وبعدها يحيي بيلبس نادية الدبلة
نسمة ونوال بيقدموا للموجودين الجاتوه
وبعد ما خلصت نوال قعدت جنب رامى ...مال عليها رامى
"جهزى نفسك بكرة الساعة 12 هعدى عليكى نشوف اوض النوم"
"بس الساعة 12 بابا بيكون ف الشغل واخواتى فى الكلية والمدرسة"
"وانا مالى  انا هعدى عليكى من تحت مش هطلع"
"لا مش قصدى كده انا اقصد محدش فاضى ييجى معايا يعنى"
"وهما ييجوا ليه مش احنا اللى هنختار...وبعدين مفيش وقت اننا نستنى حد ...قوليلهم رايحين بكرة اللى عايز ييجى يبقى ييجى"
"طيب"

نسمة دخلت لبلال البلكونة وهو بيتكلم فى الموبايل
"انت على طول الموبايل على ودنك كده"
"انا قلتلك اشحنيلى قبل كده"
"خايفة عليك وعلى ودانك لتتطرش"
"ياريت اطرش علشان مسمعش صوتك تانى"
"انت ليه غتت كده"
"وانتى ليه حاطانى ف دماغك كده"
"ماهو الاحساس نعمة"
وفكر بلال فى كلامها.. وهى بتقول الاحساس نعمة
نبرة صوتها وطريقة كلامها اول مرة ياخد باله من طريقتها
"قصدك ايه يا نسمة"
"مقصدش غير اللى قلته...المفروض تحس لوحدك"
"انا مش حاسس بحاجة"
حب انه يقطع عليها اى امل ممكن تكون بتفكر فيه...خلص كلامه
"انا نازل علشان اروح الشغل...سلام"
خرج من البلكونة وسلم على الموجودين واستأذن ونزل

يحيي ونادية قاعدين جنب بعض
"مبروك ياحبيبتى"
"الله يبارك فيك يا يحيي"
"لا كده غلط"
"هو ايه؟"
"يحيي...قولى حبيبى قولى خطيبى قولى اى حاجة"
ضحكت نادية
"بس يا يحيي الناس بتبص علينا"
"اقولك قدامهم يعنى انك حبيبتى"
"بس يا يحيي هزعل منك والله"
"ياااااااااا عمى"
وانتبه سمير ليحيي اللى بيناديله
وارتبكت نادية وهى مكسوفة من اللى هيقوله يحيي
"ممكن اخد نادية نتعشا بره"
خدت نادية نفسها وضحكت فى سرها وهى بتقول مجنون

فى بيت سعاد... سعاد ماسكة الموبايل بتاع نسمة
ونسمة قاعدة جنبها
"ده رامى صبرى خطيب نوال...مش عارفة ليه ياماما مش عارفة اقول عليه رامى كده عادى...مش لايق عليه رامى خالص"
"هو عنده كام سنة"
"35 وشكله باين كبير عليها بس هى بقى مش شايفة كل ده"
"يمكن حبته"
"هتحب فى ايه...طب تصدقى مش عارفة اوجه له كلام...ماهو مينفعش اقوله رامى ولا ينفع اقوله عمو...مش عارفة اعمل ايه"
"ومين دول"
"دى مامة يحيي واخته...بص ياماما اخته دى تحسى كده انك عايزة تلطشيها قلم على تناكتها بس يحيي بقى ايه..عسل خالص ودمه خفيف وبيحب نادية بجد ربنا يسعدهم"
"وهو رامى مش بيحب نوال"
"مش حاسة بنفس الحب اللى عيون يحيي... ياماما ده كل شوية يحدد معاها مواعيد نكون احنا مشغولين فيها علشان ينقوا جهازهم مع بعض من غير حد فينا... ولما قالت انها رايحة تفرش الشقة بابا قال لها لحد الشقة ومفيش مرواح لوحدك"
"معاه حق"
"حاسة ان رامى ده بيحب نوال حب تملك"
"هو احنا هنعيده...ونوال مش حاسة"
"انا مش عارفة نوال جرى لها ايه...ماشية ورا كلامه زى مايكون بيسحبها وراه من غير ماتفكر"
"وباباكى رأيه ايه"
"ساكت خالص ياماما ومش بيعلق"
"هما حددوا الفرح"
"لسه بس شكله قريب...هو مستنى الشقة تجهز وانتى عارفة احنا ف الشتا والقاعات معليهاش ضغط كبير "
"ونادية هتتجوز امتى"
"هيعملوا شبكة ف اجازة نص السنة وهيتجوزوا ف الصيف يحيي جاهز وعنده شقته وكان عنده استعداد يتجوز بسرعة بس نادية قالت مش هينفع علشان الدروس والمدرسة وكده"
"ربنا يسعدهم يارب"
دمعت عيون سعاد... الدموع بتزيد
"بتعيطى ليه ياماما"
"كان نفسى اكون معاهم فى ايام مهمة زى دى... كان نفسى اقدر انصحهم ويسمعونى... بس هما خرجونى من حياتهم خالص"
"متزعليش ياماما... هما بس بيخافوا على زعل بابا زى ماانتى عارفة علشان كده البعد ده حصل"
"يالا مش مهم... المهم ان ربنا عوضنى بيكى"
حضنوا بعض وهما الاتنين بيعيطوا

فى بيت سمير وهما الاربعة قاعدين بيتغدوا
نوال"بابا انا لازم اروح افرش الشقة "
سمير"خدى حد معاكى"
نوال"طيب يابابا... مين فيكم هتيجى معايا"
نسمة"انا عندى امتحانات عملى ومينفعش اروح"
نادية"انا ممكن يوم الجمعة بس باقى الايام عندى دروس لبالليل...ممكن اخد اجازة من المدرسة 3ايام وابقى معاكى الصبح بس"
نوال"مش هيكفى نخلص"
سمير"ابقى شوفى عمتك تيجى معاكى"
نسمة"ماتقولى لماما"
ارتبكوا كلهم... كله ساب الاكل اللى ف ايده وبص لنسمة
كملت كلامها بكل ثقة
"ايوه...اى بنت بتبقى محتاجة مامتها فى ايام زى دى...واى ام بتبقى نفسها تفرح ببنتها فى فرش بيتها...يبقى ليه البعد ده"
نادية ونوال بصول لسمير... سمير سكت شوية وقال
"ابقى كلميها يانوال لو انتى محتاجاها"
قام سمير دخل غسل ايديه ودخل اوضته
نادية ونوال بيبصوا لنسمة
نوال"اهو زعل"
نسمة"ويزعل ليه... بقولكم ايه انتو حرمتوا نفسكم من ماما علشان خايفين على زعل بابا...انتو احرار انا مش هحرم نفسى منها وزى ماهو بابا هى ماما"
قامت نسمة واخدت الاطباق الفاضية على المطبخ
نوال ونادية قاعدين ساكتين... دقايق
نادية"نسمة معاها حق...انا بجد ماما وحشتنى ونفسى اشوفها..اقولك حاجة انا ساعات بحسد نسمة على انها قدرت ترجع علاقتها بماما بسهولة وسرعة كده"
نوال"ماتيجى نروح لها مع نسمة ...انا كلام نسمة اثر فيا"
نادية"يارييييييت"

على باب سعاد... ونسمة بتخبط
فتحت سعاد
"اهلا يانسمة تعالى"
"جايبة لك مفاجأة"
"ايه"
وشاورت نسمة لنادية ونوال اللى كانوا واقفين بعيد
اول ماشافتهم سعاد... اخدتهم الاتنين ف حضنها وهما ال4 بيعيطوا
طول مدة وجودهم عند سعاد... ومفيش اى عتاب بينهم
كل كلامها عن الحاضر والمستقبل
وهما كمان عدم كلامها عن الماضى كان احسن ليهم
واتكلموا كتير كأنهم مكنش فى سنين غياب بينهم
نادية قعدت تحكيلها عن يحيي...ونوال قعدت تحكى عن الحاجات اللى اشترتها وايه اللى ناقصها والايام القليلة اللى فاضلة والتوتر انها متلحقش تخلص
نسمة مش بتتكلم تقريبا وكأنها بتدى فرصة لاخواتها يشبعوا من مامتهم... اسلام مكنش موجود وجه من الدرس وهما موجودين
الالفة اللى بينه وبين نسمة قربت بسرعة بينهم وبينه وخصوصا انه عارفهم وبيحبهم من كلام سعاد عنهم
وبعد حوالى 4 ساعات فاتوا كانهم ربع ساعة
نادية"احنا هنقوم بقى ياماما وهنبقى نجيلك تانى ان شاءالله"
سعاد"ماتخليكم شوية...عمكم اسامة هيفرح اوى لو شافكم"
نوال"معلش علشان اتأخرنا...ماما هو ينفع تيجى تفرشى معايا"
دمعت سعاد...وحضنت نوال
"طبعا ياحبيبتى ده يوم المنى"

هناك 26 تعليقًا:

  1. bgd toooooooooooooooooo7fa b2a

    ردحذف
  2. ya salaaaaaaaaaam 3la el "om" l !!:)

    ردحذف
  3. حلوه جداااااا بس نوال متسرعه جدااااا
    ومش معنى ان مامتها وبابا مطلقين يبقى ديه نهايه الدنيا

    ردحذف
  4. القصة تحفة تسلم ايدك يا دينا بس انا نفسى نوال تسيب رامى صبرى دة

    ردحذف
  5. ان مش مطمنة ل رامى دا خاااااااالص
    وبعدين خسارة فيه اسم رامى صبرى دا :P

    ردحذف
  6. تححححححححححححححححححفة
    هولي

    ردحذف
  7. القصدة جيدة بس حاسة انك بتعدي المواقف العائلية بسرعة

    ردحذف
  8. تحفففففففففففففففة بجد
    تسلم الايادى يا قمر

    ردحذف
  9. رووووووووووووووووووووووووووووووووووووووووووووعة

    ردحذف
  10. تحفــــــــــــــــــــــــــه بجد

    ردحذف
  11. يا أستاذه دينا انتي عالميه .. بصراحه الحلقه تحفه ملهاش حل

    ردحذف
  12. بجد رائعة .. و يحيي ده عسل اوي :D

    ردحذف
  13. Aiwaaaaaaaaaaaaaa b2aaaaaa :D
    el Donya e7lawet f 3enaya w el saboon Da5all f 3enaya w 3alaChaano a3'sell anaaa xD
    El 7ob wala3 f el dora :DD

    ردحذف
  14. toooooo7faaaaaa 2weeeeeee bgd gmeeela

    ردحذف
  15. القصة روع جدا جدا وممتزازة بس مش عجباني شخصية نوااال نهاائي تسلم ايدك ياجمل ديناا قصصك خلتني مدمنة مبنمش غير لما اكون قريت قد كدا وسعات بعيد قصة قرتها قبل كدة من حلوتهم ميرسي يادينا

    ردحذف
  16. بجد الحلقة دى حلوة جدا
    والقصة كلها فكرتها جميلة اوى
    وانا عاجبنى يحى بجد واسلوبه ده
    تسلمى

    ردحذف
  17. حلقة جميلة اوى بس انا حاسة ان نوال مش طايقة رامى دة اساسا زى ما تكون وخداة غصب عنها كدة واحنا فى انتظار الجديديا قمررررررررر

    ردحذف
  18. انتى راااااااااااااائعه يا دينا و الله بس هو اسلام ليه حاسه انه مش واخد عندك نفس اهميه ال3 بنات

    ردحذف
  19. حلووووة اوووي بجد يا ديناا
    Tu2aa

    ردحذف
  20. جااااااااااااااااااااااامده اووووووووووووووووي

    ردحذف
  21. alaaaaaaaaaaaaaaaaaaaaaaaaaaaaah ^_^

    ردحذف
  22. بجد احساس فظيع

    ردحذف
  23. روووووووووووووعه بس يجى ده عثثثثثثثثل العثلات بجد مجنون اوى :D

    ردحذف

قول رأيك بلاش تقرا وتقفل من سكات...ارائكم تهمنى