الجمعة، 7 سبتمبر 2012

ابغض الحلال... الحلقة 12

الحلقة 12
طول الطريق ومحدش بيتكلم خالص
يحيي محرج من اهل نادية ومتضايق منها اوى
سمير متضايق من نوال اللى حطته وحطت نفسها فى جوازة غريبة
نسمة بتحاول تمسك دموعها بعد صدمتها فى بلال
نادية متضايقة من الطريقة اللى عاملتهم بيها حماة اختها
مديحة ملاحظة جو التوتر العام ومتضايقة من اللى حصل عند نوال

وقف يحيي بالعربية عند البيت وهو ساكت
نزلوا كلهم...
سمير"متشكرين يا يحيي تعبناك معانا"
يحيي"متقولش كده ياعمى ... تعبك راحة"
مشيت مديحة فى ايد نسمة... ووراهم سمير
نادية وهى بتقفل باب العربية
"تصبح على خير يا يحيي"
مردش عليها وهو بيبص قدامه... اول ماقفلت الباب... طلع بالعربية بنفس السرعة والعصبية

التفت سمير شاف نادية واقفة مكانها بتبص ع العربية
"نادييييييييية"
راحت نادية ناحية باباها
"نعم يابابا"
"مالك واقفة كده ليه"
"يحيي بكلمه مردش عليا ومشى"
حط ايده على كتفها واخدها وطلعوا من غير ما يتكلم

لما وصلوا لشقتهم كان الباب مفتوح ونسمة مستنياهم وسمعوا صوت باب مديحة بيتقفل
دخل سمير وقفل الباب...بص لبناته كل بنت باين عليها الزعل
"مالكم هو ده شكل ناس راجعة من فرح"
نادية"انا مش فاهمة يحيي ماله"
سمير"احرجتيه قدامنا يا نادية وده ميصحش"
نسمة"انا استنيتك يا بابا تقوله اى حاجة"
سمير"لو كنت اتكلمت كان هيتحرج اكتر"
نادية"انا كل الحكاية قلتله ميتدخلش فى حاجة تخصنا"
سمير"هو متدخلش انتى غلطانة"
نادية"ماانا كنت متنرفزة من الزفتة ام رامى دى"
نسمة"تصبحوا على خير"
دخلت نسمة وسابتهم يكملوا كلامهم اللى متعداش 5 دقايق ودخلت وراها نادية
"مالك يا نسمة شكلك زعلانة"
"مفيش متضايقة بس من حركة ام رامى معانا"
"دى ست فظيعة...هو انا لو اتصلت بيحيي فيها حاجة"
"ده المفروض انك تتصلى طبعا"
نامت نسمة على السرير... او عملت انها نايمة علشان تسيب دموعها اللى حبستها تنزل براحتها من غير ما حد يحس بيها

بعد تردد اتصلت نادية بحيي... مرة و2 و3 مش بيرد عليها
"لاء بقى ...ان شالله عنك مارديت"

فى بيت نوال الصبح... نوال قاعدة على سريرها بتعيط
ورامى واقف جنب السرير
"مينفعش كده بقى خلصينى"
نوال وهى بتعيط
"وانا اعمل ايه يعنى انا تعبت ... مش لازم دلوقتى يعنى"
"انتى عايزة تفضحينى...انتى عايزة اهلى يقولوا عليا مش راجل"
"واهلك مالهم...دى حاجة بيننا احنا"
رامى بيعدل ف هدومه
"انت نازل لمامتك برضه...طول الليل نازل طالع كده"
سابها رامى ورجع بعد شوية ومعاه مامته
"ايه يانوال... فى ايه"
"مفيش يا ماما"
"مش تطاوعى جوزك بقى خلينا نخلص"
"انا مش ممانعة بس خايفة"
"خايفة من ايه...الله يرحم زمان لما كانت ستات العيلة كلها تبقى واقفة"
اتكسف نوال من كلامها وخافت اكتر
ام رامى"خليك راجل معاها مينفعش الدلع ده...وان منفعش معاها الذوق يبقى مفيش غير العافية"
مشيت الام ووصلها رامى لحد الباب ورجع لنوال
قامت نوال.... وبكل خوف
"والله العظيم لو قربت منى بالعافية لاتصل ببابا ييجى ياخدنى واخليها فضيحة بجلاجل"
وبصوت واطى
"خلاص خلاص... مش هاجى جنبك بالعافية...بس قوليلى ليه كل ما اقرب منك تتخشبى كده"
"خايفة يا رامى...ملحقتش اخد عليك... معرفش بس احساسى ان مامتك قاعدة مستنية تحت بحس كانها شايفانا"
وسكتت لحظات
"انا تعبت ونفسى انام... انا داخلة انام فى الاوضة التانية"
"نعم ياختى... نامى هنا لحد ما نشوف حل... ان شالله حتى تروحى لدكتور "
سكتت نوال... طلعت على السرير... لفت وشها بعيد عنه ونامت

مديحة بتخبط على سمير
فتحت لها نادية
"تعالى ياعمتو"
"سمير فين"
صوت سمير من جوه
"انا جاهز خلاص اهو"
نسمة محضرة شنطة كبيرة فيها علب
"ده الاكل بتاعها ياعمتو"
اخدت مديحة الشنطة واخد سمير علب حلويات كان حاططهم ونزلوا
لما راحوا البيت عند اهل رامى كان باب البيت الخارجى مقفول
رن سمير جرس جنب الباب.... بعد 10 دقايق نزلت ام رامى
ام رامى"اهلا وسهلا اتفضلوا"
طلعوا وراها...وقفت على باب شقتها
"اتفضلوا"
سمير"لأ شكرا احنا طالعين لنوال"
الام"اتفضلوا بس..والله لانتوا داخلين"
مديحة وسمير بصوا لبعض...ومع تصميمها دخلوا
قعدوا ساكتين...حوالى 5 دقايق
سمير"نستأذن علشان نطلع لنوال"
الام"متأخذنيش يعنى يا حاج...اصلهم نايمين ..لسه يدوب نايمين من شوية ومينفعش نصحيهم عرسان جداد بقى"
مديحة"احنا جايبينلها الاكل وعايزين نطمن عليها"
الام"وماله ياحبيبتى اول ما يصحوا هوصلهم الاكل بنفسى"
سمير"عايزين نطمن على نوال"
الام"هى بخير...ولما تصحى هقولها تكلمكم ف التليفون...تشربوا ايه"
مديحة وسمير بصوا لبعض
سمير"يالا يا مديحة"
نزلوا وهما متضايقين...وسمير عمال يشتم ويزعق فى الشارع
"ايه الناس دى... هو فيه حد كده... انا ازاى اديتلهم بنتى"

سعاد فى بيتها... واقفة ف المطبخ بتغنى
دخل عليها اسامة
"الله الله على المزاج الحلو"
"طبعا مش راجعة امبارح من فرح بنتى"
"ربنا يفرحك كمان وكمان"
"يارب افرح بيهم كلهم"
"ان شاءالله"
"احنا الساعة كام يااسامة"
"6 الا ربع"
"هروح اتصل بنسمة كده اطمن على نوال"
خرجت سعاد من المطبخ...واتصلت بنسمة
حكت لها نسمة على موقف امبارح بالليل وعلى رجوعهم من غير ما يشوفوها... اخدت سعاد رقم مديحة من نسمة
بعد ما قفلت معاها اتصلت بمديحة
"الو... ازيك يامديحة... هو انتوا صحيح مشفتوش نوال ... ازاى ابوها سكت يعنى...افرضى البت حصل لها حاجة ومخبيين... ليه وافق م الاول على ناس زى دول... شك ف ايه؟؟ لالالا مش معقول مفيش حاجة بينهم... نسمة قالتلى ان نوال مكنتش تعرفه فعلا قبل ما يتقدملها... ماهو انا مش قادرة اطمن عليها كده...بقولك ايه انا هروح لها واللى يحصل يحصل..هبقى اطمنك لما ارجع...مع السلامة"
بعد ماقفلت سعاد... قامت وهى بتلبس
"اسامة اتصل بالكبابجى اللى بتجيبلنا منه خليه يحضر لى كيلو كباب وافوت عليه وانا رايحة لنوال"
"حاضر بس هو فيه ايه"
"الولية حماتها مخلتش حد يطلع معاها امبارح ولا حد يشوفها النهاردة"

وصلت سعاد عند بيت نوال...وكان الباب الخارجى مقفول
رنت الجرس...وبعد شوية نزلت ام رامى
"اهلا وسهلا"
فتحت الباب ودخلت سعاد
"اهلا بيكى يا حاجة"
وطلعت ووقفت عند بيتها
"اتفضلى"
"لا شكرا انا طالعة لبنتى"
"لازم تتفضلى عندى..والله لانتى داخلة تشربى حاجة"
"بصى يا حاجة انا لاجاية اكل ولا اشرب انا جاية لبنتى مش لحد تانى"
"مالك يا ام نوال كده انتى مش عايزة نضايفك ولا ايه"
"معلش وقت تانى"
طلعت نوال على اول سلمتين...مسكتها ام رامى من ايدها
"استنى بس"
وزعقت سعاد
"استنى ايه... انتى هتمنعينى اطلع لبنتى ولا ايه"
"لا بس هما نايمين"
"يا سلاااااام هما نايمين ليل ونهار... حتى لو نايمة هصحيها او هقعد جنب الباب لحد ماتصحى... عن اذنك بقى"
طلعت سعاد وطلعت وراها ام رامى
خبطت سعاد... فتح رامى... دخلت ووراها مامته حطت سعاد الاكل اللى معاها على السفرة
"فين نوال"
رامى"اتفضلى انادى عليها"
سعاد"لا متناديش انا داخلة لها"
مع جرأة سعاد وسرعة تصرفها وقف رامى ومامته مش عارفين يتكلموا
نوال اول ماسمعت صوت مامتها... خرجت من الاوضة بسرعة
واتقابلوا عند الباب... اترمت نوال ف حضن مامتها
اخدتها سعاد ف حضنها وبصت لرامى ومامته...المرتبكين
"مالك يانوال...وشك مخطوف ليه"
نوال"مفيش ياماما"
سعاد"انتى عينيكى عاملة كده ليه...انتى معيطة"
ام رامى"دلع بنات"
سعاد"هو ايه اللى دلع بنات...بنتى معيطة ف يوم صباحيتها ليه"
رامى"مفيش حاجة والله...ماتتكلمى يانوال"
سعاد"تعالى نتكلم ف الاوضة"
ام رامى"لأ الكلام بيبقى قدامنا...انا مضمنش تتدعى على ابنى وتقول ايه"
نوال"هقول عليه ايه يعنى؟؟"
ام رامى"بصى بقى يا ام نوال...بنتك عاصية على جوزها من اول ليلة...ده اسمه كلام... هو محدش فهمها انها لازم تطاوعه من اول يوم"
بصت سعاد لنوال باستغراب ومفاجئة من الكلام
"تعالى يانوال نتكلم جوه"
اخدتها سعاد ودخلت الاوضة وقفلت من جوه
"ايه اللى بتقوله حماتك ده"
"ياماما انا خايفة ومتوترة وهو كل شوية ينزل يقولها عمل ايه وانا قلت ايه وهى تطلع تدينى محاضرة طول الليل على كده...كل مايقرب منى بخاف...اصله مبيقوليش كلمة حلوة تشيل الخوف من جوايا ده كل همه عايز يخلص علشان مامته مستعجله"
"يعنى هو طبيعى ... ضربك؟؟؟ عملك حاجة"
"طبيعى ياماما ومضربنيش ولا حاجة بس مامته مخليانا احنا الاتنين متوترين"
حضنتها سعاد وهى بتطمنها
"يااااه يا نوال...انا كنت هموت م القلق عليكى ... دى ست جاهلة ومتخلفة...ايه ده للدرجة دى التدخل فى حياتكم"
حست سعاد بنوال بتعيط وهى ف حضنها
"متعيطيش ياحبيبتى...خوفك ده طبيعى متقلقيش انتى "
خرجت سعاد لرامى ومامته اللى كانوا قاعدين واقفين وواقفين قاعدين مش ثابتين على حال
سعاد"بقولك ايه يارامى ما تاخد مراتك كده يومين اى حتة تتفسحوا"
ام رامى"يروحوا فين ؟مش ليهم بيت"
سعاد"بس دول عرسان يا حاجة ولازم يتفسحوا"
ام رامى"ابنى خلص كل اللى معاه فى الجواز ومعهوش للفسح والكلام الفاضى ده"
ردت سعاد بنفاد صبر
"هحجز لهم انا فى اى اوتيل يومين ... ماشى يا رامى"
رامى وهو بيبص لمامته ومتردد
"ماشى يا طنط"

نادية طول اليوم متصلتش بيحيي... ولا يحيي اتصل بيها
البيت كله متوتر ...سواء بسبب جوازة نوال
او كل بنت عندها سببها على حدة
وكل بنت زعلانة على زعل باباها
خبط الباب... فتحت نسمة
كانت مديحة على الباب وبلال نازل معاها
بلال"ازيك يا نسمة"
نسمة من غير ماتبص له
"الحمدلله...اتفضلوا"
بلال"انا رايح الشغل...مش عايزة حاجة"
نسمة"شكرا"
دخلت مديحة... واول مادخلت
"سمير فين"
نسمة"فى البلكونة"
دخلت له مديحة وهى مبسوطة وبتضحك...قعدت قدامه
"اطمن يا سمير شكوكك مش ف محلها...بنتك سليمة مش زى ماكنت فاكر"
رد سمير بلهفة
"عرفتى منين"
"من سعاد"
وحكت مديحة لسمير عن مكالمة سعاد ليها وعن زيارتها لنوال وانها بعد ما رجعت اتصلت بيها وحكت لها
"الحمدلله...طمنتينى يا مديحة"
"والله اللى طمنتنا سعاد ربنا يخليها ويطمنها يارب"

نادية بعد تفكير طول اليوم... وبعد عمتها ما مشيت
قلعت دبلتها ...وراحت لسمير
"بابااا... دى دبلة يحيي والخاتم اللى جابهولى.. ابقى اتصل بيه واديهومله"
اتفاجئ سمير
"ليه ايه اللى حصل"
"مالناش نصيب نكمل مع بعض يا بابا... هو مش عايزنى وانا كمان مش عايزاه"

هناك 22 تعليقًا:

  1. يا دندونه ما تزودي في الحلقه شويا

    ردحذف
  2. om ramy de 3iza wal3aaaaaaaaaaaaaaaa bgd w shkl ramy da bt3 mamto 2wiiiiiiiiii w nawl msh hatrta7 fl gwaza de bgd lazm tn2l f sh2a b3eda 3an ahlo .. w nadia 3'altana gedaaaan fl tasro3 2ly hea feh da kda i8ia i7s ano msh kber gwaha w anaha msh bt7bo 2wii w nesma l mafrod msh tz3l 3lshan 2lb blal msh malkoo w so3ad l mafrod tbtdy t2rb mn bantha l2nhom f3lan m7tagnlaha 2wiii fl w2t da aktr mn babahom

    ردحذف
  3. to7fa ya dondon
    tslmy ya rb w tslm 2sskek elgamela de

    ردحذف
  4. سعاد دي عسسسسسسسسسسسسسسسسسل

    ردحذف
  5. Om Ramy D 3ayza el 7arQ f MeDaaan 3aaaam :@@ aaa Daaa ya Saaatr 3l D BaChrya bgd hya malha Behom aslan aa elbGa7a D ! 3aDat aa w zft aa D !!
    Rabna yostorha m3 nwaal bgd ... NaDya 3'altaana Rasmy lazm t3tzr l y7ya w Howa tabe3y y3ml kDa kramto bardo w malhaaCh tQol kol Che2 Edma w naseb w tsebo kman ! W hya elly 3'altana o.O

    Nesma ht3adehaale fatra D hya 3ayCht nafsaha f ahwham w el zanb mCh zanb blal fatra w ht3ady 3leha rabna yhDeha :)
    So3aaad Om Qalb 7DeeeD :D 7lwa a3oDlohom 3l selm D :D aywaa kDaa lazm 7d yQaflohom bl mersad :D
    Tslamy Dinaaaaaaaaaaa bgd aktaaaarrr mn Ra23aaa bgd as usual ;)

    ردحذف
  6. تصدقى اللى بتحكيى زى اللى حصل معيا بالظبط بس كمان حماتى كانت معانا فى اوضت النوم بس عاارفة انا قررت انى اطلق عارفة لية علشان كانت عارفة حالت ابنها وكانت عاايزة تطلعنى العيب فيا انا بس بجد انتتى بتحكى عن قصه زى قصتى تماما والاحساس فيها صعب جدا وانا مريت بالاحساسا دة

    ردحذف
  7. ياريت تزودي الحلقة شويه الحلقة صغيره اووووووي وياريت في ايام المدارس تنزلي الحلقات بدري علشان المدارس وعلى فكره انت تحححححححححفه

    ردحذف
  8. Om Ramy de Nefsy A5no2ha heya w Ramy

    ردحذف
  9. زووووووووووووودي الحلقة يا دينا بليييييييييييييييز وبجد روعة

    وام رامي دي متخلفة اوووووووووووووووي

    ومتخليش نادية ويحيي يسيبوا بعض من فضلك

    ردحذف
  10. حلوة اوى

    ردحذف
  11. جميييييييييييييييييييييييييييييييييييييلة اوى

    ردحذف
  12. حاسة ان يحيى دة عامل حدثة او حاجة ربنا يستر بس الحلقة حلوة جداااااا

    ردحذف
  13. بجد حلقة جميلة اوى اوى
    ومش عاجبانى شخصية رامى نهااااااااااااااااااااااااااااائى
    وقرار نادية السريع ده مش صح
    وبجد قصة جميلة اوى
    تسلم ايدك

    ردحذف
  14. حلقه توب
    من الاخر بجد تسلمى يادينا
    انا بخمن ان يحيي هيعمل حادثه بالعربيه وناديه هتندم ع التصرف السريع او القرار السريع دا

    ردحذف
  15. لا بجد القصه كلها تحفه
    انا كنت بدور على جوجل وظهرت قدامى بالصدفه المدونه بتاعتك
    ماقمتش من قدام اللاب الا وانا مخلصه ال12 حلقه
    يلا بليز نزلى الحلقه الجديدة :)

    ردحذف
  16. جميلة اووووووووى
    يسلموا ايدك
    dodysalah

    ردحذف
  17. بجد انا متابعكي من زمان والله وقريت كل قصصك
    بجد كلهم جامدين جدااااااااااااااااااااااااااا
    بليز تنزلي الحلقه الجديده بسرعه

    خلود

    ردحذف
  18. ايه يا دينا انتى اتاخرتى اوى فى الحلقة دى
    يلا بسرعــــــــــــــــــــــــــــة

    ردحذف
  19. انا مستنيه الحلقه 13 بقالى يومين بليز بسرعه متشوقه اعرف هيحصل ايه

    ردحذف
  20. a ya Dina et2a5arti leh keda el maradi ??? El mafrood b2a tnazeli 13 w 14 =P

    ردحذف
  21. انا معجبة جدا بجراة سعاد و شجاعتها اعتقد ان حياتها مع سمير قبل كده علمتها الجراة وخلت شخصيتها قوية
    اية

    ردحذف
  22. سعاد دى عثثثثثل بجد وناديه ويحيي شكلى حسدتهم والله اعلم :D :D

    ردحذف

قول رأيك بلاش تقرا وتقفل من سكات...ارائكم تهمنى