الأحد، 9 سبتمبر، 2012

ابغض الحلال... الحلقة 13

الحلقة 13
بص لها سمير با ستغراب
"بتقولى ايه يانادية؟؟ هو فيه حاجة حصلت"
قعدت نادية...واتكلمت بانفعال
"ايوه فيه... من امبارح وهو مش معبرنى واتصلت بيه ومردش..خلاص هو حر انا مش عايزاه"
"كل ده ليه يعنى"
"بتسألنى انا يا بابا... هو انا اللى مبردش عليه"
"ماهو انا قلتلك امبارح انك احرجتيه قدامنا"
"ميشفعلوش انى يعاملنى كده...يابابا بقولك مبيردش عليا اعمل ايه اتحايل عليه يكلمنى يعنى"
"بصى يا نادية...اهدى بس ونتكلم بالعقل"
"اتفضل يابابا"
"زمان كنت كل ما اتعصب اقول طلاق...كانت النتيجة ايه ان بيتى اتخرب وانتوا اتحرمتوا من مامتكم"
"اول مرة يابابا احس من كلامك انك ندمان"
"انا عايزك تستفيدى من اللى حصل...بلاش التسرع والعصبية دى... روحى اتصلى بيه تانى...مردش استنى مسيره هيتصل... ماهو مش معقول هيفضل ميتكلمش كده...البسى دبلتك واعقلى"
ابتسمت نادية من كلام باباها... ما صدقت حد يهديها
لبست الدبلة...وقامت باسته
"ربنا يخليك لينا يا بابا"
"ويخليكوا ليا...يحيي راجل محترم وبيحبك متزعليهوش تانى"

تانى يوم الصبح.... شافت نادية ياسمين ف الحصة
بعد الحصة مل خلصت...نادت نادية على ياسمين بره الفصل
"ياسمين...ممكن موبايلك اكلم يحيي"
"اتفضلى... هو فيه حاجة بينكم صح؟؟"
"ليه بتقولى كده"
"امبارح ماما لاحظت وسألته"
"وهو قال ايه"
"قال مفيش حاجة بس انا وماما قلنا شكلكو متخانقين"
"لا مش متخانقين ولا حاجة احنا متكلمناش علشان تليفونى كان بيتصلح بس"
اخدت نادية الموبايل من ياسمين
"ادخلى انتى حصتك يا ياسمين وانا هخلص واجيبهولك"
"حاضر"
دخلت ياسمين الفصل واتصلت نادية بيحيي
وبعد رنتيت رد يحيي
"الو...ايه يا ياسمين"
"الو...ازيك يا يحيي"
"نادية... بتتكلمى من تليفون ياسمين ليه"
"مش عايزنى اكلمك يعنى...انت مخاصمنى"
"انا مش مخاصمك انا زعلان منك بجد"
"متزعلش انا اسفة"
"انتى اهانتينى"
"متكبرش المواضيع كده يعنى.... انا كنت متضايقة ومقصدتش ازعلك"
"مينفعش تكلمينى كده يا نادية"
"حاضر...مش هخلص الرصيد لياسمين بقى عايزة اشوفك"
"يا ستى خلصيه ما انا اللى بشحن"
"انا ورايا حصة واتاخرت عليها علشان اصالحك..متزعلش بقى يا حبيبى"
"ماشى يا حبيبتى...متعمليهاش تانى"
"حاضر بس انت كمان مهما حصل متخاصمنيش تانى"
"ماشى يا حبيبتى...يالا شوفى حصتك وهعدى عليكى بعد المدرسة"
"هستناك متتأخرش عليا علشان وحشتنى اوى"

بعد اسبوع من جواز نوال
رامى بيلبس الصبح علشان يروح الشغل...نوال واقفة معاه
"مش هتفطر"
"اه هفطر تحت...يالا غيرى هدومك علشان ننزل"
"هتفطر تحت ليه"
"كده زى ماانا متعود افطر مع بابا وماما"
"بس ده قبل مانتجوز"
"قبل وبعد...بقولك ايه اوعى تفتكرى انى هتغير مع اهلى علشانك"
"يعنى قصدك ايه"
"قصدى نظامى مش هيتغير"
"بس بعد الجواز حاجة وقبله حاجة تانية"
"انا ابنهم الوحيد واستحالة اسيبهم"
"ماشى يارامى...افطر معاهم...طيب هنتغدا ايه النهاردة لان من النهاردة اهلى مش هيبعتوا اكل"
"واحنا مستنيين اكل من اهلك..ده واجب عليهم انهم يبعتولك وانتى عروسة"
"طيب واجب...احنا هناكل ايه النهاردة"
"معرفش هسأل ماما"
"وماما مالها"
"هى اللى هتطبخ وهى اللى ماسكة المصروف"
"مصروف بيتها ولا بيتنا"
"مفيش حاجة اسمها بيتنا وبيتهم... احنا بيت واحد واكلنا واحد شربنا واحد مصروفنا واحد واللى مسئولة عن البيت ماما"

فى بيت سمير
سمير قاعد مع يحيي ونادية ونسمة
يحيي"على فكرة ياعمى كان معاك حق لما قلت نغير القاعة"
سمير"مش كده يا يحيي... بصراحة كانت تقيلة على قبلى من يوم فرح نوال"
يحيي"وانا مش عايز حاجة غير تكون عاجباكم"
نادية"القاعة اللى بابا قال عليها احلى كتير"
يحيي"كده يبقى حددنا اول خميس ف اجازة نص السنة... هننزل نجيب الشبكة امتى"
نادية"انا عندى امتحانات وكنترول"
سمير"خليها يوم جمعة يانادية"
نادية لنسمة"انتى عندك امتحان السبت"
نسمة"اه السبت الجاى امتحان واللى بعده لأ"
يحيي"ايه رأيك يا نادية نخليها الجمعة اللى بعد اللى جايةعلشان نسمة ميبقاش وراها امتحان تانى يوم"
نسمة"عادى ياجماعة متعطلوش نفسكم علشانى"
يحيي"عطلة ايه بس... لازم نفرح كلنا مع بعض"
سمير"ربنا يفرحكم ويسعدكم ياولاد"
يحيي"وقولى لمامتك يا نادية تيجى معانا"
بصت نادية لسمير ...سمير دور وشه بعيد عنها
نسمة"فكرة حلوة اوى يا يحيي"
نادية اتكلمت بقلق"ايه رأيك يابابا"
سمير وهو قايم"اللى انتوا عايزينه اعملوه"
قام سمير... بصت نادية ونسمة لبعض
نادية"شكله زعل...ياريتك يا يحيي ما قلت كده"
يحيي"ومامتك برضه اكيد كانت هتزعل لو مقلنلهاش"
نسمة"يحيي معاه حق ومغلطش ف حاجة"
يحيي"ماتيجى نبقى نروح لها انا وانتى زيارة كده ونقولها على الترتيبات بتاعتنا ...يعنى علشان تحس انها معانا ف الصورة"
نسمة"يحيى والله انت عسل"
يحيي"سامعة يا نادية... سامعة الناس اللى بتفهم"
نادية بترد بجدية
"انا مبفهمش يعنى"
يحيي"يعنى مفيش كلمة حلوة كده ولا نسمة بس هى اللى ليا هنا"
نسمة"بس يا يحيي بقى متحرجهاش"
يحيي"وانا اقدر احرجها برضه...بصى بتبص لى ازاى ...ياستى انا بخاف"
ضحكت نادية بعد ما كانت مكشرة
نادية"لو هنروح لماما تعالى نروح لها دلوقتى علشان معنديش وقت"
يحيي"ماشى... انتى جاهزة"
نادية"اه...اصل بصراحة لو استنيت وقعدت افكر هخاف على زعل بابا ومش هروح ولا اجى"
نسمة"يبقى متستنيش يانادية"
نادية"ما تيجى معانا يا نسمة"
نسمة"انا كنت عندها امبارح... روحوا انتوا"
نادية"طيب انا داخلة استأذن بابا اننا نازلين"
دخلت نادية وطلعت من عند سمير
"يالا يا يحيي"
نزلوا... وبدأت نسمة تلم الكوبايات اللى كانت قدامهم
دخلتهم المطبخ وهى راجعة قابلت سمير رايح عند الباب
"انت نازل يا بابا"
"اه شوية...عايزين حاجة وانا جاى"
"لا شكرا"
نزل سمير ودخلت نسمة الاوضة علشان تذاكر
مسكت ملزمة وبدأت مذاكرة...بعد 10 دقايق رن تليفون البيت
"الو... مالك يا عمتو... طيب انا طالعة لك حالا"

فى بيت مديحة.... نسمة بتسندها
"قومى معايا ياعمتو...الف سلامة عليكى"
"مش قادرة يا نسمة... لولا المفتاح اللى عندكم مكنتيش عرفتى تدخلى"
"هتفضلى ع الارض كده... قومى معايا بس لحد الكنبة... الحمدلله ان التليفون كان قريب منك"
"الحمدلله... انا مش عارفة رجلى لفت تحتى ازاى ووقعت الوقعة المهببة دى"
"الف سلامة عليكى...بصى مش هينفع كده انا هتصل ببابا ييجى نوديكى لدكتور"

فى اوضة مديحة...بلال وسمير بيسندوها ينيموها على السرير
نسمة بتعدل المخدات وراها...وبتحط لها مخدات ترفع عليها رجلها المتجبسة
بلال"سلامتك ياماما... اقعد يا خالو"
سمير بيقعد على كرسى جنب السرير
"الحمدلله يا مديحة انها جت على قد كده....ربنا يقومك بالسلامة"
مديحة"الله يسلمك...لولا نسمة كان معاها مفتاح مش عارفة كنت هستنى لحد بلال ما ييجى ازاى...ربنا ما يورى حد لما حسيت انى مش قادرة اتحرك حسيت انى بتخنق وكأنى محبوسة ف البيت شديت التليفون واتصلت بنسمة"
بلال"الحمدلله...نسمة دايما جدعة"
تجاهلت نسمة كلام بلال
نسمة"مش عايزة حاجة دلوقتى ياعمتو"
مديحة"لا ياحبيبتى ربنا يخليكى... ماهو بلال معايا النهاردة اهو"
نسمة"متشيليش هم الاكل انا كل يوم هعمل حسابكم معانا وابقى اطلعلكم الغدا...ولو عايزة اى حاجة تانية ابقى قوليلى"
مديحة"ربنا ينجحك يا نسمة يا بنت سعاد ويرزقك بابن الحلال يارب"
نسمة"يالا ...انا نازلة سلامو عليكو"

نسمة ف الكلية... فى الامتحان
قاعدة ف اللجنة بتحل...بتخلص وبتسلم الورقة وتخرج
تشوف بلال واقف مع ليلى
تتجاهلهم وتمشى بعيد عنهم قبل بلال ما يشوفها
                         ********************
نسمة فى بيت مديحة... بتشيل الغدا بعد مديحة ما اكلت
جه بلال من بره
"ازيك يا نسمة"
"الحمدلله... لو عندك غسيل هاته علشان هغسل كمان شوية"
"لأ مفيش ...متشكر على تعبك"
"العفو انا معملتش حاجة"
"لا ازاى انتى مخلية بالك من ماما كأنك بنتها"
"كأنى...اومال انا ايه...انا بنتها فعلا يا بلال ولا نسيت انها مربيانى من اول ما وعيت ع الدنيا"
"لا منسيتش... بس انتى بتكلمينى ليه كده"
"كده ازاى"
"بطريقة مختلفة زى ماتكونى زعلانة منى"
"لا مش زعلانة منك...انا بس بكلمك بطريقة تخليك متتضايقش منى"
"انا اتضايق منك انتى"
"انت كنت عندنا ف الجامعة النهاردة"
"اه ...انتى شفتينى"
"اه شفتك"
"مكلمتينيش ليه"
"محبتش اضايقكم...هى دى؟؟"
"اه هى...ايه رأيك"
"مخدتش بالى... اهم حاجة انها عاجباك ربنا يوفقكم "
"هى عجبانى بس...ده احنا بنحب بعض بقالنا سنين...عقبالك"
"ان شاءالله"
نزلت نسمة وهى بتحاول تدارى دموعها
دموع صدمة و دموع احساس بالقهر على حلم حلمته وطلع وهم

نادية عند الكوافير... عروسة
معاها نسمة وسعاد ومديحة واقفة كويسة على رجلها بعد فك الجبس
جه يحيي... عريس
ومعاه ياسمين ومامته
فى القاعة... ونادية ويحيي بيرقصوا سلو
سعاد قاعدة مع اسامة واسلام
وسمير رايح جاى متوتر
سعاد ملاحظة توتره... سألت مديحة
"هو فيه ايه...سمير ماله"
"متضايق علشان نوال اتأخرت لحد دلوقتى مجتش...تليفونها مقفول وتليفون بيتها مبيردش"
"متقلقيش ومتخليهوش يقلق انها مش ف البيت... هى مبتقعدش ف بيتها خالص ومن لحظة ما بتفتح عينيها لحد ما هتنام وهى عند حماتها"
"عرفتى منين"
"كلمتها كذا مرة وعرفت... بس الغريب انها مجتش لحد دلوقتى"

بعد حوالى ساعة من بداية الفرح
بدات زميلات نادية واحدة ورا التانية تمشى
لاحظت نادية ارتباكهم.... كل واحدة فيهم بتسلم عليها وتبارك لها وتتحجج بحجة انها هتمشى بدرى
لاحظت نادية ان اكتر من واحدة عيونهم بتدمع
بصت على ياسمين لقيتها بتعيط
وبصوت هامس وهى ويحيي على الكوشة
"يحيي مش ملاحظ ان اصحابى فيهم حاجة مش طبيعية"
"متاخديش ف بالك يا نادية... يمكن وراهم حاجة"
"كلهم؟؟؟طب ياسمين بتعيط ليه"
"مفيش ... بقولك ايه نقدم الشبكة دلوقتى ولا ايه رأيك"
"يحيي...فى ايه؟؟؟انت تعرف حاجة انا مش عارفاها"
ارتبك يحيي... حاول يدور على كلام
سألته نادية بقلق
"اتكلم يا يحيي... فيه ايه"

هناك 32 تعليقًا:

  1. حلوة جدا جدا جدا جدا جدا ^ــــــــــــ^

    ردحذف
  2. الحلقه حلوه كده مفيش حلقه بليل صح ولا اى






    rana ahmed








    ردحذف
  3. فى ايه يا دينا

    ردحذف
  4. حصل ايييييييييييييييييه بليز بسرعه يا دينا

    ردحذف
  5. اختها ماتت عملت حدثه صح ,,,,,

    ردحذف
    الردود
    1. شكلها مش حادثه و حماتها عملت فيها حاجه

      حذف
  6. الحلقة الجاية امتى بليزززززززز

    ردحذف
  7. الحلقه جامده جدا بجد بس بليز تنزلي الحلقه الجديده بسرعه بليييييييييييييييييييييييز

    خلود

    ردحذف
    الردود
    1. يا جماعة براحة عليها احنا كلنا منقدرش نكتب اللى هى كتباه ده كل يوم
      مسيرنا نذهق وهى كتباتها ممتازة واكييد تعبت الله يكون فى عونها المفروض نحس شوية بيها
      مادام كطلنا بنحبها

      حذف
  8. ايه القفلة دى يا دينا انا كده مش هاعرف انام لحد ما اعرف يحيى مخبى ايه بلييييييييييييييييز نزلى الحلقة الجديدة بسرعة
    اية

    ردحذف
  9. انا اول مره اكتب حاجه همت بس بجد الحلقات حلوه قوى وانا بستنها دايما ياريت بسرعه نزلى الحلقه الجديده ربنا يوفقك

    ردحذف
  10. اوعى تكون نوال ماتت لأ و النبى انا مش ناقصه يا دينا

    ردحذف
  11. حلوه جدااااااااااااااا والف الف سلامه عليكى يا دندونه

    ردحذف
  12. Nwaaal GralHaa 7aaga ! O.o
    Rabna yostoorrrr .. Gamela GeDan Dina :)

    ردحذف
  13. حلوة اووووووووووووووووووووووووووووووووي

    ردحذف
  14. بجد حلو اوووووووى يادينااا بس حصل انا عايزة اعرف مش هفضل مستنيه كدة

    ردحذف
  15. يا ترى حصل ايه انا متشوقه اعرف من فضلك يا دينا بسرعه الله يخليكى ياريت تنزلى الحلقه النهارده بالليل ربنا يوفقك ..........امل

    ردحذف
  16. اكيد امه وهو نكدوا عليها ومكنوش عاوزنها تروح فرح اختها وقالها عليا الطلاق ما انتى نازله زى مكان ابوها بيعمل فى امها ونزلت؟؟؟؟؟؟؟؟؟؟؟

    ردحذف
  17. انا عايزة اعرف هى نوال أختها ماتت

    ردحذف
  18. في ايه يا دينا .. الحركه دي مستفزه أنا كدا مش هبطل تفكير :-@

    ردحذف
  19. في ايه يا دينا .. الحركه دي مستفزه أنا كدا مش هبطل تفكير :-@

    ردحذف
  20. في ايه يا دينا .. الحركه دي مستفزه أنا كدا مش هبطل تفكير :-@

    ردحذف
  21. l2 bthrgyy eh ally 7assal :OOOO
    Tu2aa

    ردحذف
  22. حلقة جاااااااامده اوى يا دينا وشوقتينا نعرف ايه الى حصل
    dody salah

    ردحذف
  23. لالالا ماتسبناش على نارنا كده
    ايه حاجة حصلت لنوال ولا ايه

    ردحذف
  24. الحلقة الجاية امتى

    ردحذف
  25. يادنا انا قعدة ادام الكمبيوتر مستنايها نزليهابسرعة علشان نفسى انام

    ردحذف
  26. حرام عليكى

    ردحذف
  27. لالالالالا حرام عليكي متسبيناش على نار كدا
    يا تري ايه اللى حصل ؟؟
    اوعى يكون حد حصله حاجة ...

    ردحذف
  28. جميلة اوى الحلقة دى
    ومشوقة بجد النهاية
    تسلمى

    ردحذف

قول رأيك بلاش تقرا وتقفل من سكات...ارائكم تهمنى