الثلاثاء، 11 سبتمبر، 2012

ابغض الحلال... الحلقة 14

الحلقة 14
ارتبك يحيي
"مفيش حاجة يا نادية "
ونادت نادية على ياسمين...جت لها ياسمين
"مالك يا ياسمين بتعيطى ليه"
ولمحت يحيي بيغمز لياسمين... بصت ليحيي
"والله يا يحيي لو عرفت انك مخبى عليت حاجة ليكون زعل كبير بينى وبينك"
"روحى انتى يا ياسمين"
مشيت ياسمين
"انا هقولك بس عايزك تاخدى الكلام بهدوء"
"قول يا يحيي"
"اميرة "
"اميرة مين؟؟ اميرة صاحبتى"
"ايوه"
"مالها... هى قالتلى انها مش هتقدر تيجى علشان تعبانة واحتمال تولد اى وقت"
"بصى اللى اعرفه واللى ياسمين عرفته من اصحابك انها جالها ولادة وحالتها صعبة شوية ومحتاجة نقل دم علشان كده اصحابك مشيوا"
"انا عايزة اطمن عليها... هات موبايلك اتصل بيها"
"بقولك تعبانة يا نادية"
"اكلم مامتها او جوزها او اى حد... انت متعرفش اميرة بالنسبة لى ايه"
"عارف من كلامك عنها"
"دى صاحبتى من اعدادى لحد ما الكلية واشتغلنا مع بعض كمان يعنى زى واحدة من اخواتى.. انا قلقانة اوى"
جه عليهم سمير
"مالكم... شكلكم فيه حاجة"
يحيي"مفيش حاجة ياعمى"
سمير"اصل انتوا فى الفيديو طالعين بتتكلموا كأنكم بتشدوا مع بعض"
يحيي" لا مفيش حاجة... بقولك ايه ياعمى عايزين نطمن على البوفيه"
قالها يحيي وهو بيشد سمير بعيد عن نادية ولما راحوا بعيد
"اطمن يا يحيي كل حاجة تمام"
"انا عايز اقولك حاجة تانية"
"خير"
"اميرة صاحبة نادية توفت وهى بتولد ...الخبر جه لزميلاتها وهما هنا وياسمين اختى هى اللى قالتلى"
"لا اله الا الله... معقول... ونادية عرفت"
"لا حاولت اخبى عليها واللى ربنا قدرنى اقوله انى قلتلها انها تعبانة..مش هقدر اقولها اكتر من كده"
"صح كده يا يحيي...اميرة صاحبتها من زمان وخبر زى ده تأثيره هيكون صعب عليها"
جت عليهم مديحة
"فيه ايه"
يحيي"انا هروح لنادية علشان متلاحظش حاجة"
مشى يحيي... وحكى سمير لمديحة...عيطت مديحة
"يا حبيبتى يا بنتى... لا حول ولا قوة الا بالله...يا خسارة شبابك"
"بس يا مديحة...نادية هتاخد بالها"
"يارب صبر قلب امها"
"انا مش عارف نوال دى كمان مجتش لحد دلوقتى ليه... انا هتجنن من القلق"
ردت وهى بتمسح دموعها
"متقلقش الغايب حجته معاه"
"حجة ايه...دى بقت حاجة زيادة اوى"
بعد حوالى نص ساعة من كلامهم
جت نوال مع رامى ومامته وباباه
راحت تسلم على سمير ...بما انه اقرب واحد من مدخل القاعة
"ازيك يا بابا"
سمير"اهلا... تعبتى نفسك وجيتى ليه دا الفرح قرب يخلص "
حماتها بمصمصة الشفايف
"يوه..هى دى اهلا وسهلا"
يحيي"اهلا وسهلا...بس مينفعش ان البنت تيجى فرح اختها ف اخره... ايه اللى اخرك يانوال"
نوال"معلش يابابا انا اسفة"
رامى"معلش ياعمى كان عندنا اخواتى ولسه نازلين"
سمير"واخواتك لو عندكم هى ليه تستنى...هى تيجى فرح اختها وانت تقعد مع اخواتك"
حماتها"لا بقى يا حاج ...هى دلوقتى ف عصمة جوزها وهو اللى يقول امتى تنزل وامتى تقعد"
سكت سمير... وجت مديحة سلمت عليهم واستقبلتهم هى ونسمة
وبعد ما قعدوا... راحت مديحة لسمير وسألته عن اللى حصل
حكى لها الحوار القصير...سكتت مديحة شوية
"اقولك حاجة ومتزعلش منى يا سمير"
"قولى...هزعل ايه اكتر من كده"
"التاريخ بيعيد نفسه وحياتك انت وسعاد بتتكرر مع نوال"
"ازاى ...وانا كان عندى ام متحكمة ف حياتها"
"انت اللى كنت متحكم حتى ف النَفَس...مش مهم مين اللى بيتحكم المهم انها عيشة مش عادية زى بقية الناس"
طول الفرح والاجواء متوترة... نادية حاسة ان فيه حاجة وفسرتها انها تأخير نوال
يحيي خايف نادية تعرف وفاة اميرة واليوم يتقلب وخصوصا ان فيه ناس معزومين معارف بعيدة مش اقارب
بلال بيتعامل مع نسمة زى ما بيتعامل مع اخواتها ونسمة بتتعامل معاه بحساسية
انتهى الفرح على خير وكل واحد اللى ف قلبه ف قلبه

نادية تانى يوم الخطوبة عرفت وفاة اميرة...كانت صدمة ليها كبيرة جدا...كانت مع مامتها طول ايام العزاء... وعرفت ان المولود عاش وهى ماتت... كلام مامة اميرة كان بيعذب نادية...ياترى مين هيربى البنت دى اللى اتولدت يتيمة... ياترى هتجيلها مرات اب تعاملها ازاى... ياترى هى هتقدر تخلى بالها منها وهى صحتها تعبانة

نادية شافت على جوز اميرة... كان منهار جدا
مكنتش عارفة تعزيه فى اول وتانى يوم من كتر المعزين
تالت يوم...وهو قاعد لوحده...راحت تعزيه
"البقاء لله ياعلى"
"شفتى يا نادية...اميرة ماتت وسابتنى وسابت بنتها"
"شد حيلك"
"انا مش عارف هعيش ازاى من غيرها... انتى فاكرة لما كنت بنزعل من بعض شوية كنت بعمل ايه...مكنتش بقدر اسيبها تزعل منى واكلمها واصالحها... ياريتها ما خلفت وكانت فضلت عايشة"
"هى ماتت ازاى بالظبط يا على"
"جالها نزيف بعد ما ولدت... ومحدش حس بيها"
"ازاى محدش حس بيها...هو مكنش حد معاها"
"لأ ...قالولنا ان الزيارة بمواعيد ونظام المستشفى من غير مُرافق"
"ازاى كده...وازاى محدش يلحقها...ده اهمال انت لازم تعمل بلاغ"
"مامتها مش عايزة الجثة تتشرح... وانا مش عارف اعمل ايه واقتنعت بكلام حماتى لما قالت التشريح مش هيرجعها"
"ربنا معاك ويصبرنا كلنا"

نادية من بعد وفاة اميرة كانت ملازمة البيت تماما... وساعدها انهم كانوا ف اجازة ومكنش فيه دروس ولا مدرسة
فكانت فريسة الوحدة والتفكير والحزن
علاقتها بيحيي اتأثرت من حزنها على اميرة
مش عايزة تخرج معاه...لما يكون جاى تتحجج بأى حجة علشان ميقعدش كتير... مكالماتهم قليلة ووقتها بسيط
وفى البيت دايما قاعدة لوحدها... بتاكل بالعافية
بعد حوالى اسبوعين ... دخلت عليها نسمة الاوضة
"نادية بابا عايزك"
"حاضر"
قامت نادية وطلعت لباباها...وقعدت معاه
"وبعدين يانادية... مش هينفع كده"
"قلبى محروق اوى يابابا"
"يابنتى ده نصيب... هى نصيبها كده"
"انا هتجنن على مامتها وجوزها وبنتها...ولا هى اللى ملحقتش تفرح... مش عارفة ازاى هتبقى حياتى من غيرها"
"مامتها ربنا يصبرها وجوزها بكرة يتجوز وبنتها ربنا احن عليها من البشر...وانتى لازم تنسى وتعيشى حياتك طبيعية"
"انسى...وهما ينسوا... وهى تيجى الدنيا وتخرج كده وتتنسى"
"لا حول ولا قوة الا بالله...هى دى الحياة بنيجى ونروح مهما عشنا حياة طويلة ولا قصيرة بنفارقها واهلنا بتنسانا ...الدنيا كده"
"ياريتها ما اتجوزت ولا خلفت...يعنى لو كانت مثلا مبتخلفش يمكن كانت هتزعل بس مكنتش هتموت"
"استغفر الله العظيم...ده عمرها وكانت هتموت ف نفس اللحظة سواء وهى بتولد ولا وهى قاعدة ولا وهى ماشية...ده عمرها"
جت نسمة من جوه
"نادية...يحيي اتصل وسأل على بابا موجود ولا لأ ولما جيت اندهلك قال لأ هو جاى وكان بيطمن ان بابا هنا"
نادية"جاى ليه"
نسمة"معرفش...يمكن زيارة عادية"
نادية سكتت وهى مستغربة من الزيارة المفاجئة

فى بيت ام رامى
نوال قاعدة بتطبق غسيل
"انتى لسه مخلصتيش"
"اه قربت اخلص اهو"
"اعمليلك هِمة شوية وخلصى علشان حطيتلك مشاية المطبخ ف الحمام تغسليها"
"اغسلها ليه"
"اللبن اتكب منى ع الارض وانا بفرغه من الكيس...اسيب المشاية باللبن اللى عليها ولا يعنى اغسلها انا"
"ماشى هغسلها بس خليها بكرة... انا تعبت النهاردة كنت بعمل بيتى فوق وجيت اعمل هنا كمان... مش قادرة اقف على حيلى"
"هو ايه الجيل الخِرع ده...انا كنت ف شبابى بروح السوق واجى اطبخ وانضف واغسل على ايدى ورامى على كتفى كمان...انتى لابتروحى سوق ولا معاكى عيل يلبخك...قومى قومى بلاش دلع قبل جوزك وحماكى ما ييجوا"
"حاضر"
قامت نوال وهى فعلا مش قادرة...خلصت تطبيق الغسيل
ودخلت الحمام ... وغسلت المشاية
سمعت صوت الباب بيتفتح... ورامى وباباه جم
خلصت وخرجت من الحمام
نادت عليها حماتها من المطبخ
"يالا يا نوال نحضر العشا"
دخلت لها نوال... وحضروا العشا
واول ما قعدوا يتعشوا...حست نوال ان معدتها اتقلبت وقامت تجرى ع الحمام ..تتقيأ
بعد ما رجعت
رامى"ايه لسه تعبانة"
نوال"شوية"
ام رامى"تعبانة مالك ما انتى طول اليوم زى الفل ولا هى حركات لما شفتى جوزك"
بص لها رامى بتساؤل...ردت نوال
"هعمل حركات ليه يعنى...انا قصرت ف حاجة"
رامى"صحيح ياماما هى بقالها كام يوم اول ما تصحى من النوم تجرى ع الحمام ترجَع"
ام رامى" وايه تانى... العادة مظبوطة وجت ف معادها الشهر ده؟"
واحمرت نوال خجلا من حماها اللى قاعد متابع الحديث ومعرفتش ترد... وكل اللى حواليها اخدين الكلام عادى...ردت بصوت طلع همس
"لأ...متأخرة"
ام رامى"تبقى حامل... مبروك يارامى الف مبروك"
نوال"مش اكيد يا ماما لازم نعمل تحليل نتأكد"
ام رامى وهى بتبص فى ساعة الحيطة اللى وراها
"خلاص الجامع اللى جنبنا زمانه قفل...بكرة نبقى نروح نعمل التحليل"
رامى فرحان وباباه بيبارك له
نوال"جامع ايه ياطنط"
ام رامى"الجامع فيه عيادة شعبية فيها دكتورة امراض نسا ممتازة"
نوال"واروح عيادة شعبية ليه ما انا اتابع عند دكتور كويس"
ابو رامى"لالا دكتور ايه...احنا بناتنا بيتكشفوش على راجل"
نوال"طيب اروح لدكتورة معروفة مش واحدة لسه بتتعلم...ولا ايه يارامى"
رامى"ايه رأيك يا ماما"
ام رامى"ومالها دكتورة الجامع دى مولدة نسوان الحتة كلها"
واشمئزت نوال من اسلوب ام رامى وكلامها البيئة
وسمعتها بتكمل
"وكمان على ايه مصاريف دكاترة...احنا يدوب عيادة الجامع على قدنا"
وسكتت نوال لما حست ان مفيش قايدة من الكلام
ورامى مؤيد لمامته ف كل كلمة
تانى يوم راحت هى ومامة رامى العيادة
وبعد التحليل...اتأكدت انها حامل
وغير اى واحدة ف مكانها...محستش بالفرحة
بالعكس حست انها خلاص ارتبطت بالعيلة دى مدى الحياة

هناك 25 تعليقًا:

  1. يوووووه انا ببقا عايزاها متخلصش ^_^ .. تسلم ايدك يا دينا :)

    ردحذف
  2. تسلم ايدك بس قصيرة ولا انا بيتهايائلى كنت عاوزة الاحداث تتطول اكتر من كده ياري يا جميل تطولى الحلقه اكتر من كده مش بنلحق نشبع

    ردحذف
  3. مسكينه ادبست في رامي وامو

    ردحذف
  4. رووووووووووووووووووووووعة

    ردحذف
  5. كل يوم مفاجئه فى الاحداث انتى مبدعه بس ياريت تطوليها شويه ومتتاخريش علينا انا مش ببقى عارفه اعمل اى حاجه طول اليوم كل شويه افتح اشوف الحلقه الجديده تسلم ايدك يا مبدعه رووووووووووووووعه ...........امل

    ردحذف
  6. ام رامي دي ست سمممممممم يع عليها ...بس حلوة الحلقة تسلم ايديكي يا مدام دينا ^^

    ردحذف
  7. Kaaaan Allaah f el 3aawn ya Nwaal :(
    MCh 3ayz aQool hya elly 3mlt f nafsaha kDa lma esta3Glt b awel wa7d b3d haitham w tgahlt 3mayl Om ramy mn sa3t Ma Gahezo rl sha2a ,, tsta7mell b2aa :/

    Gamela Dinaa bs bellah 3aleKe tb2y ttaweleha Chwaya 3n kDa. Plzz :)

    ردحذف
  8. a5eern al 7l2a nzlt :D
    bs 7lwaa awee al mra de :D
    yalaa mstnen ally b3dha
    Tu2aa

    ردحذف
  9. رااائعه

    ردحذف
  10. حلقة تجنن بس ام رامى دى واحدة بيءة اوى

    ردحذف
  11. ربنا معاكى يا نوال ع العيلة للى انتى دخلتى فيها دى

    ردحذف
  12. ونادية ايه اللى هى بتقوله دا مينفعش على فكرة
    ويحيى مالوش ذنب
    بس انا حاسة انها هاتسيبه وتتجوز جوز اميرة دا

    ردحذف
  13. عسل يا دينا

    ردحذف
  14. تسلم ايداكى يا دينا بجد حلقة جميييييلة بس احداثها قليلة حاسة ان نادية

    هتتجوز على عشان تربى بنت اميرة و دى هتكون تضحية منها بحبها ليحيى وفى نفس الوقت متضايقة من سلبية نوال وتسلط ام رامى
    اية









    ردحذف
  15. تسلم ايدك بجد بس انا زعلت اوى المره دى ع نوال وحياتها وفرحتها اللى انكسرت وسلبيه باباها فالح بس كان يتخانق مع مامتهم ومن البنات يزعل لو راحو لمامتهم سلبى اوى المفروض يخاف ع بناته ويعمل المستحيل ويزعق للست الغبيه مامه رامى ويارب يادينا ناديه متسبش يحيي لانه طيوبه اوى والنبى بلاش انا حاسه انها هتربى بنت اميره وتتجوز على ربنا يستر بقا ف الحلقات اللى جايه وتسلم بجد ايدك انتى فنانه

    ردحذف
  16. تسلم ايدك يا دينا بجد القصة جميلة اوى

    بس مش عارفة نوال دى ازاى مستحملة تعيش كدا ان كان مع حماتها ولا جوزها اللى ملوش اى شخصية بس ارجع واقول هى اللى عملت كدا فى نفسها يبقى تتحمل نتيجة غلطها
    وكمان حاسة ان يحي رايحلهم البيت وهيسيبوا بعض هو ونادية بجد هزعل اوى عشان يحي دة عسل وشخصية جميلة

    ردحذف
  17. بكره الناس المتخلفة دى
    بجد عيله رامى دى بشعه وهو ماعندوش شخصية ونوال اللى اهانت لنفسها لما وافقت من الاول
    وبجد حلقة جامدة
    تسلمى

    ردحذف
  18. هى الحلقة جميلة اوى
    واللى احب اقوله ورطتى روحك يا نوااااال

    ردحذف
  19. الحلقه حلوه جداااا
    بس نوال غلطانه ولازم تستحمل التسرع هيا وباباها
    وشكل ناديه هاتسيب يحيى وانا هازعل قوى

    ردحذف
  20. نوال غبية و هى اللى حطت نفسها فى المصيبة ده هى لا جهلة و لا معقدة ابوها كويس و كانت عايشة عيشة كويسة يعنى مش بتهرب من مشاكل علشان تروح مشكلة اكبر فعلا غبية

    ردحذف
  21. احسن عشان التسرع وحش كله نصحها بلاش وهى صممت خليها تشرب :@ :@

    ردحذف
  22. ايه العيله الزباله دى؟"

    ردحذف
  23. راجل معرص بجد !

    ردحذف
  24. سوري يا دينا انا حاسة ان رامي دلدول وبتاع امه وف ناس هتقولي يعني يعصي مامته بس انه يطيعها حاجة وانه يلغي شخصيته اودام مامته وفالح يعمل فيها راجل ع نوال وبعدين عيب عليه ده حتي كبير ده انا لو كنت اتجوزت واحد زيه كنت خلعته مش اتطلقت حيوان صحيح
    بس احلي شخصية يحيي راجل كده وعجبني موقف سعاد من مامت رامي ف صباحية نوال

    ردحذف
  25. ام رامي دي باردة ورخمة
    وانشاء الله نوال هترجع لهيثم

    ردحذف

قول رأيك بلاش تقرا وتقفل من سكات...ارائكم تهمنى